Mbabwerezerani Nfundo Zikulu-zikulu

Kodi bzimbakunesani kukumbukira bzomwe mwamala kupfunza? Bzimwebzi bzimbacitikira tentsenefe nthawe na nthawe. N’ciyani comwe mungacite kuti mumbakumbukire bzomwe mwapfunza? Mbabwerezerani nfundo zikulu-zikulu.

Mukakhala mukupfunza, mbaimani kuti munembe nfundo zikulu-zikulu. Onani momwe mpostolo Paulo adathandizira wale omwe angadawerenga tsamba lakuyenda kwa Ahebereu kubvesesa bzomwe akhalewa pomwe adanemba kuti: “Tsapano, pa bzinthu bzomwe tikulewabzi nfundo ikulu njiyi.” (Ahebereu 8:1) Mwa kulewa mafala yamweya, iye adathandiza omwe angadawerenga tsambali kubvesesa bzomwe akhafuna kulewa na momwe bzimwebzo bzingadawathandizira pa moyo wawo.

Imwepo mungambapambule nthawe, pinango mphindi 10, kuphampha kwa pfunziro lanu, kuti mumbakumbukire nfundo zikulu-zikulu zomwe mwapfunza. Penu mukukwanisa lini kukumbukira nfundozo, onani tumisolo ayai werengani pomwe mafala yakuyamba ya ndime iri-yentse kuti mukwanise kukumbukira. Penu mwapfunza bzinthu bzipsa, yezerani kubzifotokoza na mafala yanu-yanu. Mukambabwerezera nfundo zikulu-zikulu, bzin’dzandokuthandizani lini kuti muzolowere basi, koma mun’dzakwanisambo kuwona momwe nkhaniyo ingakuthandizireni pa moyo wanu.