NKHANI YAKUPFUNZA 30
NYIMBO 97 Fala la Mulungu Limbatipasa Moyo
Tingapitirize Kupfunza Bzizinji na Mapfunziso Yakuyambirira ya m’Bibliya
“Nthawe zentse nimbafuna kukukumbusani bzinthu bzimwebzi, napo kuti mumbabzidziwa kale ndipo ndimwe wakukhazikika m’cadidi.” — 2 PEDRU 1:12.
CAKULINGA CA NKHANIYI
Mu nkhani ino, tiniwona momwe mapfunziso yakuyambirira ya m’Bibliya yomwe tidapfunza pomwe tidayamba kupfunza Bibliya yangapitirizire kutithandiza ntsiku zino.
1. Kodi mapfunziso yakuyambirira ya m’Bibliya yadacinja tani moyo wanu?
MAPFUNZISO yakuyambirira ya m’Bibliya yadacinja moyo wathu. Pomwe ifepano tidapfunza kuti dzina la Mulungu ni Yahova, tidayamba kukhala naye pa uxamwali. (Zaiya 42:8) Pomwe tidapfunza bzomwe bzimbacitika munthu akafa, tiribe kukhala pomwe na thupo ticikumbuka kuti anyakufunidwa wathu omwe adafa akuboneresedwa. (Mpalizi 9:10) Ndipo pomwe tidapfunza kuti dziko lentse lin’dzakhala Paraizo tidasiya kucita thupo na tsogolo lathu. Tidakhala na citsimikizo centse cakuti tingadandokhala lini na moyo kwa magole 70 ayai 80 basi koma mpaka kale-kale. — Salimo 37:29; 90:10.
2. Kodi 2 Pedru 1:12, 13, ambalatiza tani kuti napo Akristau omwe mbakukhwima mwauzimu angagumanembo phindu na mapfunziso yakuyambirira ya m’Bibliya?
2 Ifepano timbasiya lini kugumana phindu na mapfunziso yakuyambirira ya m’Bibliya. Mu tsamba lace laciwiri, mpostolo Pedru adanembera Akristau omwe akhali “wakukhazikika m’cadidi” ayai kulewa kwinango akhali wakukhwima mwauzimu. (Werengani 2 Pedru 1:12, 13.) Tsono pa nthawe imweyire, apfunzisi wakunama na wanthu wakuipa akhayezera kupambusa Akristauwa pa kunamata kwacadidi. (2 Pedru 2:1-3) Pedru akhafuna kuthandiza abalewo kuti akwanise kulimbana na mayezo yamweya. Ndipopa iye adawakumbusa mapfunziso manango yomwe iwo akhadapfunza kale. Mapfunziso yamweya yangadathandiza Akristau wale kupitiriza kukhala wakukhulupirika kwa Yahova mpaka kuphampha.
3. Ni ciratizo ciponi comwe cikutithandiza kuwona kuti mapfunziso ya m’Bibliya njakufunikambo kwa Akristau wakukhwima mwauzimu?
3 Napo kuti tikutumikira Yahova kwa magole mazinji, ifepano tingapitirize kupfunza bzinthu bzipsa na mapfunziso yakuyambirira ya m’Bibliya. Kumbukirani ibzi: Munthu omwe ambadziwa kuphika na munthu omwe akupfunza kuphika pinango angaphatise basa bzinthu bzibodzi-bodzi kuti aphike cakudya. Tsono pakuti munthu omwe ambadziwa kuphikayo ambaphika kale kwa magole mazinji, iye adapfunza momwe angaphatisire basa bzinthu bzibodzi-bodzibzo kuti aphike cakudya mu njira zakusiyana-siyana cicikoma. Mwa njira ibodzi-bodziyi, wale omwe ambatumikira Yahova kwa nthawe itali na wale omwe ayamba tsapanopa kupfunza Bibliya ambadziwa mapfunziso mabodzi-bodzi yakuyambirira ya m’Fala la Mulungu, tsono iwo angambawone mapfunzisoyo mu njira zakusiyana. Kucokera pomwe tidabatizidwa pinango bzinthu pa moyo wathu na bzomwe timbacita mu gulu la Yahova bzidacinja. Tikakumbukira bza mapfunziso yakuyambirira ya m’Bibliya yomwe tidapfunza kale-kale, timbakwanisa kuwona njira ya momwe tingayaphatisire basa pa moyo wathu tsapano. Mbatiwoneni mapfunziso matatu ya m’Bibliya na bzomwe Akristau wakukhwima mwauzimu angapfunze na mapfunzisoyo.
YAHOVA NI MULENGI
4. Kudziwa kuti Yahova ni Mulengi kudacitisa kuti moyo wanu ukhale tani?
4 Ifepano timbadziwa kuti dziko na bzentse bzomwe bziri m’dzikoli bzidakonzedwa na Mulengi omwe ngwanzeru na wamphanvu. Bibliya limbati: “Omwe adakonza bzinthu bzentse ni Mulungu.” (Ahebereu 3:4) Tsono tingapfunze bzinthu bzinango bzizinji na cadidi cakuyambirira cimweci. Pakuti Yahova ndiye omwe adatilenga, iye ambadziwa bzinthu bzentse pakulewa bza ifepano. Iye ambacita nafe thupo ndipo ambadziwa bzomwe mpsabwino kwa ifepano. Tenepo kudziwa kuti Yahova ni Mulengi kwacinja moyo wathu mu njira zakusiyana-siyana ndipo kwacitisambo kuti moyo wathuyo ukhale na thandauzo.
5. Kodi ni cadidi ciponi ca m’Bibliya comwe cimbatithandiza kukhala wakubzicepesa? (Zaiya 45:9-12)
5 Cadidi cakulewa kuti Yahova ni Mulengi cimbatithandiza kukhala wakubzicepesa. Pa nthawe inango, Djobi akhambakumbukira kwene-kwene bza iye na bza wanthu winango. Ndipopa Yahova adathandiza Djobi mwa kumukumbusa kuti Yahovayo akhali Mulengi wamphanvu-zentse. (Djobi 38:1-4) Bzimwebzi bzidathandiza Djobi kuzindikira kuti bzentse bzomwe Yahova ambacita mpsakulungama. Na kupita kwa nthawe, mprofeta Zaiya adanemba kuti: “Wanthu an’funika lini kukumbuka kuti iwo mbanzeru kwene-kwene kuposa Mulengi wawo.” — Werengani Zaiya 45:9-12.
6. Kodi ni pa nthawe iponi pomwe bzingakhale bzabwino kukumbukira bza nzeru na mphanvu za Mulengi wathu? (Onanimbo bzithunzi-thunzi.)
6 Munthu akatumikira Yahova kwa magole mazinji, pinango iye angayambe kuthemba kwene-kwene bzinthu bzomwe ambabzidziwa m’mbuto mwakukumbira thandizo kwa Yahova na malango yomwe yambagumanika m’Bibliya. (Djobi 37:23, 24) Bzimwebzi bzikacitika, iye angacite bwino kuima acikumbukira kuti nzeru na mphanvu zomwe Mulengi wathu Yahova anazo tingazindendemezere lini na za munthu ali-wentse. (Zaiya 40:22; 55:8, 9) Na tenepo, cadidi cakuyambirira ca m’Bibliya cimweci cin’dzatithandiza kupitiriza kukhala wakubzicepesa na kubvesesa kuti bzomwe Yahova ambakumbuka mpsakufunika kwene-kwene kuposa makumbukidwe yathu.
N’ciyani comwe cingatithandize kukumbukira kuti nzeru zathu zingapose lini nzeru za Yahova? (Onani ndime 6)d
7. Kodi n’ciyani comwe Rahela adacita kuti abvume malango mapsa?
7 Kukumbukira kuti Yahova ni Mulengi kudathandiza Rahela, omwe ambakhala ku Eslovénia kubvuma malango mapsa yomwe yadaperekedwa na gulu la Yahova. Iye adati: “Nthawe zinango bzimbandinesa kubvuma malango manango yomwe abale omwe ambatsogolera ambapereka. Inepano ndidawona Nkhani Zipsa za Bungwe Lakutonga za Gole la 2023 #8. Napo bziri tenepo, pomwe kakuyamba ndidawona m’bale omwe akhana ndebvu akufotokoza nkhani pa mitsonkhano ya gwere, inepano ndiribe kukomedwa nabzo. Na tenepo, inepano ndidapemba kwa Yahova ndicimukumbira kuti andithandize kubvuma kucinja kumweku.” Rahela adabvesesa kuti Yahova ni Mulengi wakudzulu na dziko la pantsi, iye nthawe zentse ambadziwa njira yabwino yakutsogolera gulu lace. Kodi imwepo bzimbakunesanimbo nthawe zinango kubvuma kabvesesedwe kapsa ayai malango mapsa? Penu ndibzo, cinthu cabwino ni kukhala munthu wakubzicepesa na kupambula nthawe yakukumbukira bza nzeru na mphanvu za Mulengi wanu. — Aroma 11:33-36.
MATHANGWE YOMWE YAMBACITISA KUTI MULUNGU ALEKERERE KUBONERA
8. Kodi ni phindu liponi lomwe mudakhala nalo thangwe ra kudziwa mathangwe yomwe yambacitisa kuti Yahova alekerere kubonera?
8 Thangwe ranyi Mulungu ambalekerera kubonera? Azinji ambakalipira Mulungu ayai ambafika pakukumbuka kuti iye kulibe! (Mimwani 19:3) Mwakusiyana na bzimwebzi, imwepo mudapfunza kuti pikado na kuperewera ndibzo bzomwe bzimbacitisa kuti tibonere sikuti Yahova. Imwepo mudapfunzambo kuti kupirira kwa Yahova na wanthu kwacitisa wanthu azinji kufika pa kumudziwa na kufika pa kutsimikizira kuti iye an’dzamalisa kubonera kwentse. (2 Pedru 3:9, 15) Cadidi cimweci cidakutsangalazani ndipo cidalimbisa uxamwali bwanu na Yahova.
9. Kodi ni pa bzakucitika bziponi bzomwe bzingakhale bwino kukumbukira mathangwe yomwe yambacitisa Yahova kulekerera kubonera?
9 Ifepano tikudziwa kuti tin’funika kupirira pomwe tikudikhirira kuti Yahova adzamalise kubonera. Tsono ifepano ayai munthu omwe timbamufuna akagumana na mabvuto, kucitiridwa bzinthu bzakusaya cirungamo ayai kufedwa tingayambe kukumbuka kuti Yahova akucedwa kumalisa mabvuto. (Habakuki 1:2, 3) Pa nthawe ninga zimwezi, bzingakhale bwino kukumbukira mathangwe yomwe yambacitisa Yahova kulekerera wanthu wabwino kugumana na mabvuto.a (Salimo 34:19) Ndipo tingakumbukirembo bza cakulinga ca Yahova cakumalisa kubonera mpaka kale-kale.
10. N’ciyani comwe cidathandiza Anne pomwe mai wace adafa?
10 Kudziwa cadidi pakulewa bza kubonera kungatithandize kuti tipirire. Anne, omwe ambakhala ku ntsuwa ya Mayotte ku Oceano Índico, adati: “M’magole ya m’mbuyomu, inepano ndidafedwa mai wangu ndipo bzimwebzi bzidandisunamisa kwene-kwene. Tsono inepano nimbacita nyongo yakukumbukira kuti Yahova ndiye lini omwe ambacitisa kuti tibonere. M’mbuto mwace, iye akufunisisa kumalisa kubonera kwentse na kulamusa wanthu omwe timbawafuna. Kukumbukira cadidi cimweci kumbandithandiza kukhala na mtendere omwe ningakwanise lini kuufotokoza.”
11. Kudziwa mathangwe yomwe yambacitisa Yahova kulekerera kubonera kumbatithandiza tani?
11 Kudziwa cadidi pakulewa bza mathangwe yomwe yambacitisa Mulungu kulekerera kubonera kungaticitise kuti tipitirize kupalizira. Mpostolo Pedru adalewa kuti kupirira kwa Yahova kumbacitisa kuti wanthu azinji afike pa kukungula acipulumusidwa. Pedru adanemba kuti: “Kumbukirani mtundu wa munthu omwe mun’funika kukhala. Mun’funika kukhala wanthu wa makhalidwe yakucena, mucimbacita bzinthu bzomwe bzin’latiza kuti ndimwe wanthu wakubzipereka kwa Mulungu.” (2 Pedru 3:11) Njira ibodzi yakulatizira kuti ndimwe wanthu “wakubzipereka kwa Mulungu” ni kupalizira. Ninga Baba wathu Yahova, ifepano timbafuna wanthu ndipo tikufuna kuti iwo adzakhale na moyo mpaka kale-kale mu dziko lipsa. Yahova akupitiriza kupereka mwayi kwa wanthu wa m’gawo lanu kuti amunamate. Ndipo imwepo muna mwayi wakukhala nyabasa mwanzace wa Mulungu mwa kuthandiza wanthu azinji kupfunza bza iye pomwe cimaliziro cikanati kufika! — 1 Akolinto 3:9.
TIKUKHALA MU “NTSIKU ZAKUMALIZIRA”
12. Kubvesesa kuti tikukhala mu “ntsiku zakumalizira” kumbatipasa citsimikizo ciponi?
12 Bibliya limbafotokoza bwino-bwino momwe wanthu angadadzakhalira mu “ntsiku zakumalizira.” (2 Timotio 3:1-5) Tikawona makhalidwe yakuipa yomwe wanthu akulatiza m’dzikoli timbakwanisa kuzindikira kuti profesiya imweyi ikukwanisika. Kubvesesa cadidi cimweci kumbaticitisa kutsimikizira kuti Fala la Mulungu ndakuthembeka. — 2 Timotio 3:13-15.
13. Pakukumbukira ciratizo ca Jezu comwe ciri pa Luka 12:15-21, kodi n’ciyani comwe tin’funika kubzibvunza?
13 Kudziwa kuti tikukhala mu ntsiku zakumalizira kumbatithandizambo kuphatisa basa bwino nthawe yathu. Tingapfunze kufunika kwa kucita bzimwebzi na ciratizo comwe Jezu adacifotokoza pa Luka 12:15-21. (Werengani.) Thangwe ranyi mwamuna wakudala adacemeredwa “wakusaya nzeru”? Iye adacemeredwa wakusaya nzeru sikuti thangwe rakuti akhali wakudala koma thangwe rakuti akhaikha bzinthu bzakuphonyeka pa mbuto yakuyamba. Iye ‘akhabzigwezekera cuma, koma kwa Mulungu akhali wakusauka.’ Kucita bzimwebzi kukhali kusaya nzeru thangwe rakuti mwamunayo angadakhala lini na moyo kwa nthawe itali. Mulungu adauza mwamunayo kuti: “Usiku buno iwepo unifa.” Kodi n’ciyani comwe tikupfunza na ciratizoci? Nthawe yomwe yasala kuti tifike kuphampha kwa dzikoli njing’ono-ng’ono kwene-kwene ndipopa tin’funika kubzibvunza kuti: ‘Kodi bzakusankhula bzangu bzikulatiza kuti ndikuphatisa basa bwino nthawe yangu mwa nzeru? Kodi ni bzakulinga bziponi bzomwe nimbalimbikisa kuti wana wangu akhale nabzo? Kodi nimbaphatisa basa nthawe yangu, mphanvu zangu na bzinthu bzangu kuti ndibzigwezekere cuma ayai kuti ndigwezeke cuma cangu kudzulu?’
14. Ninga momwe calatizira ciratizo ca Miki, thangwe ranyi mpsakufunika kukumbukira bzinthu bzomwe bzikulatiza kuti tikukhala mu ntsiku zakumalizira?
14 Ifepano tikambakumbukira bzinthu bzomwe bzikulatiza kuti tikukhala mu ntsiku zakumalizira bzingatithandize kusankhula bwino bzinthu pa moyo wathu. Bzimwebzi ndibzo bzomwe bzidacitikira mpfumakazi inango yakucemeredwa Miki. Iyo idati: “Pomwe ndidamaliza kupfunza, inepano ndikhafunisisa kuphata basa lomwe lingadacitisa kuti ndipfunze moyo wa bzirombo. Tsono ndikhafunambo kukhala mpainiya wakukhazikika ndicikatumikira komwe kukhafunikira apalizi azinji. Abale na mpfumakazi za m’gwere mwangu adandiuza kuti ndikumbukire bwino-bwino penu bzingadakhala bzakukwanisika kuti ndiphate basa lomwe ndikhafuna ndipo pa nthawe ibodzi-bodziyo ndicitumikira ninga mpainiya ayai kuyenda kukatumikira komwe kukhafunikira apalizi azinji. Iwo adandikumbusa kuti cimaliziro ca dzikoli ciri pafupi. Ndipo mu dziko lipsa nin’dzakhala na nthawe ikulu kwene-kwene ndicidzapfunza bza bzirombo bzomwe nin’dzafuna. Na tenepo, ndidadzasankhula kurso zomwe zingadandimalira lini nthawe ikulu. Bzimwebzi bzidandithandiza kuti ndigumane basa lomwe likhandipasa kobiri zakukwanira na nthawe yakukhala mpainiya ndipo patsogolo pace ndidadzayenda kukatumikira ku Equador komwe kukhafunikira apalizi azinji.” Tsapano Miki pabodzi na bayace akutumikira mu dera la ku dziko limweri.
15. Kodi ciratizo ca Tiyago cikulatiza tani kuti tin’funika lini kusiya kupfunzisa wanthu? (Onanimbo bzithunzi-thunzi.)
15 Ifepano tin’funika lini kusunama wanthu akalamba kubva mafala yabwino. Na kupita kwa nthawe, iwo angacinje. Mbatiwoneni bzomwe bzidacitikira Tiyago m’bale wace wa Jezu. Iye adawona pomwe Jezu akhakula, pomwe adakhala Mesiya na pomwe adayamba kupfunzisa wanthu kuposa munthu ali-wentse. Napo bziri tenepo, iye alibe kutewera Jezu pa nthawe imweyo. Iye adadzakhala nyakupfunza wa Jezu pambuyo pa Jezuyo kulamusidwa, ndipo adadzakhala nyakupfunza wa nyongo!b (Juwau 7:5; Agalatiya 2:9) Ndipopa lekani kusiya kupalizira adzinza wanu pabodzi na wanthu wa m’gawo lanu omwe alibe kukutetekerani pomwe mudawapalizira kakuyamba. Pinango bzomwe imwepo mungawauze tsapano angadzabzikumbukire kutsogolo ayai pambuyo pa citsautso cikulu kuyamba.c
Kodi n’ciyani comwe cingaticitise kuleka kusiya kupalizira adzinza wathu omwe ambatumikira lini Yahova? (Onani ndime 15)e
PITIRIZANI KUMBATENDA BZOMWE YAHOVA AMBAKUKUMBUSANI
16. Kodi bzomwe Yahova ambatikumbusa bzakuthandizani tani? (Onanimbo kwadru yakuti “Phatisani Basa Cadidi ca m’Bibliya Kuti Muthandize Winango.”)
16 Mbali ya cakudya cauzimu comwe timbatambira cimbakonzedwera wale omwe ambadziwa lini bzizinji pakulewa bza Bibliya. Nkhani za wentse zomwe zimbafotokozedwa pa mtsonkhano wa kuphampha kwa sumana, marevista yakugawira na nkhani zinango pabodzi na mavidiyo yomwe yambagumanika mu webisaite yathu ya jw.org, zimbakonzedwera maka-maka kwa wanthu omwe ni Mboni lini za Yahova. Napo bziri tenepo, bzinthu bzimwebzi bzimbatithandizambo. Ibzo bzimbathumizira lufoyi lathu kwa Yahova, bzimbatithandiza kukhulupira Bibliya ndipo bzimbatithandizambo kukhala apfunzisi wabwino. — Salimo 19:7.
17. Kodi ni pa nthawe iponi bzingakhale bwino kukumbukira bza mapfunziso yakuyambirira ya m’Bibliya?
17 Mboni za Yahovafe timbakomedwa cadidi ca m’Bibliya cikakhala na kabvesesedwe kapsa. Tsono timbatendambo cadidi cakufunika cakuyambirira ca m’Bibliya comwe tidapfunza pakuyamba comwe cidatithandiza kuyamba kukhala pa uxamwali na Yahova. Tikambafuna kungingimira nzeru zathu m’mbuto mwa kutewera malango ya gulu la Yahova, mwakubzicepesa tikumbukire kuti Mulengi wathu wa nzeru na wamphanvu zentse ndiye omwe akutsogolera gulu lace. Ifepano ayai munthu omwe timbamufuna akagumana na mabvuto bzingakhale bwino kukhala wakupirira ticikumbukira thangwe lomwe likucitisa Yahova kulekerera kubonera. Pomwe tikufuna kusankhula momwe tingaphatisire basa nthawe yathu na bzinthu bzathu timbakumbukira kuti tikukhala mu ntsiku zakumalizira ndipo kwasala nthawe ing’ono-ng’ono kuti cimaliziro cifike. Mbatibvumeni kuti bzomwe Yahova ambatikumbusa bzipitirize kuticitisa kukhala wanzeru na kutithandiza kupitiriza kumutumikira mwakukhulupirika.
NYIMBO 95 Ceza Cinkuyenda Cicithumizirika
a Onani nkhani yakuti “Mavuto Onse Adzatha Posachedwapa” mu Ntsanza ya Mulindiri ya 15 Maio, 2007, matsa. 21-25 (Chichewa).
c Onani nkhani yakuti “Bzomwe Timbadziwa bza Momwe Yahova An’dzatongera Wanthu Kutsogoloku.” mu Ntsanza ya Mulindiri ya Maio 2024 matsa. 8-13.
d BZOMWE BZIKUCITIKA PA CITHUNZI-THUNZI: Mkulu munango akufotokoza makumbukidwe yace tsono akulu winangowo akubverana lini nabzo. Patsogolo pace, iye akunyang’anisisa kudzulu komwe kuna nyenyezi ndipo akukumbukira bza mphanvu na nzeru za Mulengi. Iye akubvesesa kuti bzomwe Yahova ambakumbuka mpsakufunika kwene-kwene kuposa makumbukidwe yace.
e BZOMWE BZIKUCITIKA PA CITHUNZI-THUNZI: Mpfumakazi yakwanisa kuwona bzinthu bzomwe bzikulatiza kuti tikukhala mu ntsiku zakumalizira pa pfunziro lace la payekha. Bzimwebzi bzamucitisa kuti aligaliri m’bale wace acimupalizira.