Mibvunzo Yakucokera kwa Anyakuwerenga

Kodi ni lini pomwe basa la kupalizira lin’dzamala?

Jezu adati: “Mafala yabwino ya Umambo, yan’dzapaliziridwa pa dziko lentse la pantsi komwe kuna wanthu, ninga umboni kwa mitundu yentse, pamwepo cimaliziro cin’dzafika.” (Mateu 24:14) Fala lakuti “cimaliziro” lomwe liri pa vesiri na m’mavesi ya 6 na 13, limbathandauza kumala kwa dziko la Sathaniri pa Armagedo. (Apokalipse 16:14, 16) Na tenepo, tin’pitiriza kupalizira mafala yabwino mpaka pomwe ntsiku imweyi in’dzakhala yasala pang’ono kufika. Bzimwebzi bzimbacinja kabvesesedwe komwe tikhanako kale-kale pakulewa bza nkhani imweyi.

Kale-kale tikhabvesesa kuti tingadasiya kupalizira mafala yabwino pomwe citsautso cikulu cingadayamba pakupfudzidwa kwa Babiloniya Mkulu. (Apokalipse 17:3, 5, 15, 16) Tikhakhulupira kuti citsautso cikulu cikadzayamba, Yahova angadadzapasa lini pomwe wanthu mwayi wa kupfunza bza iye. (Zaiya 61:2) Ndipo tikhakhulupirambo kuti omwe an’dzapulumuka pa citsautso cikulu mbale omwe adatumikira Yahova mwakukhulupirika pomwe citsautso cikuluco cikhanati kuyamba. Ifepano tikhawandendemezera na Adjuda omwe adapulumuka pomwe mzinda wa Jeruzalemu udapfudzidwa mu gole la 607 AEC. Wanthu amwewa akhadasankhulidwa kuti apulumuke thangwe akhanamata Yahova ndipo akhawenga bzinthu bzakuipa. (Ezekiyeli 5:11; 9:4) Tsono kuyezezera kumweku kukubverana lini na mafala yomwe Jezu adalewa pa Mateu 24:14, pomwe pambalatiza kuti wanthu angakhale na mwayi wakubvuma mafala yabwino pomwe yandosala nthawe pang’ono kuti cimaliziro cifike pa Armagedo.

Kubvekesedwa kwa momwe tikhabvesesera Mateu 24:14 kukucinjambo kabvesesedwe kathu pa mafala yomwe yambandendemezeredwa na matalala yomwe yambafotokozedwa pa Apokalipse 16:21. Pambuyo pakufufudza bwino-bwino padazindikiridwa kuti bzinembo bziwiribzi bzimbabverana. Mwa njira iponi? Mtawiro uli pa bzomwe wanthu ambacita akabva mafala yabwino ya Umambo. Mpostolo Paulo adanemba kuti mafalayo njabwino kwa “wale omwe ali pa njira yakuyenda kukapulumusidwa,” ndipo ni “mnuntci wamoyo.” Tsono kwa anyamadulanthaka wa Mulungu ni mafala yakuipa ayai ni “mnuntci wa infa.” (2 Akolinto 2:15, 16) Iwo ambawenga mafala ya Umambo thangwe yambalatiza kuti dziko lomwe iwo ambalifuna ndakuipa, limbatongedwa na Sathani ndipo tsapanopali lin’pfudzidwa. — Juwau 7:7; 1 Juwau 2:17; 5:19.

Bzikuwoneka kuti matalala yomwe yambafotokozedwa pa Apokalipse 16:21 yan’dzakhala ‘makulu na yakudzonga kwene-kwene.’ Bzimwebzi bzin’funa kulewa kuti pomwe citsautso cikulu cin’dzakhala cikucitika basa lakupalizira lin’dzakhala lakubvekera kwene-kwene ayai kuti dzina la Yahova lin’dzadziwika kwene-kwene. (Ezekiyeli 39:7) Pambuyo pa kupfudzidwa kwa Babiloniya Mkulu pa nthawe imweyo, kodi wanthu winango an’dzabvuma mafala yabwino ninga momwe an’dzafunira mnuntci wabwino? Bzimwebzi bzingadzacitike. Pinango iwo angadzakumbukire ayai kuzindikira kuti kwa magole mazinji Mboni za Yahova zikhapalizira bza kupfudzidwa kwa magereja yakunama.

Bzimwebzi bzikundendemerana na bzomwe bzidacitika ku Edjipito pambuyo pa miliri 10 kucitika. Pomwe Yahova “[adanyazisa] mirungu yentse ya mu Edjipito,” wanthu wace adacoka ku Edjipitoko pabodzi na “wanthu winango azinji” omwe akhali lini Ajirayeri. (Ekisodo 12:12, 37, 38) Pinango wanthu amwewa adasankhula kuyenda pabodzi na wanthu wa Yahova thangwe adawona kuti bzentse bzomwe Mozeji akhadalewa pakulewa bza miliri 10 bzidacitikadi.

Munthu ali-wentse omwe an’dzayamba kutumikira Yahova pambuyo pa kupfudzidwa kwa Babiloniya Mkulu an’dzakhala na mwayi wakuthandizira abale wace wa Kristu omwe an’dzakhala akali pantsi pano. (Mateu 25:34-36, 40) Tsono mwayi wakutongedwa ninga mabira un’dzamala pomwe yandosala nthawe ing’ono-ng’ono kuti Armagedo icitike yomwe in’dzakhala nthawe yomwe anyakudzozedwa omwe an’dzakhala akali pantsi pano an’dzatambira mabaibai yawo kudzulu.

Kabvesesedwe kapsaka kakulatiza lufoyi likulu na ntsisi za Yahova. Kulewa cadidi, iye “an’funa lini kuti munthu ali-wentse adzapfudzidwe, koma an’funa kuti wanthu wentse akungule.” — 2 Pedru 3:9.