Ndidakhala Misiyonario Napo Kuti Ndikhana Manyazi

Inepano ndidabadwa mu 1951 ku Vienna, ku Áustria. Ndikukumbukira kuti pomwe inepano ndikhali mwana, ndikhana manyazi. Banja lathu likhali la Cikatolika ndipo inepano ndikhakhulupira Mulungu na kumbapemba kwa iye nthawe zentse. Pomwe inepano ndikhana magole 12, pai wangu adayamba kupfunza Bibliya na Mboni za Yahova ndipo padandopita nthawe pang’ono mai wangu adayambambo kupfunza Bibliya pabodzi na pai wanguwo.

Patsogolo pace, tidayamba kutsonkhana mu gwere lakucemeredwa Döbling ku Vienna. Inepano na wanthu wa m’banja mwangu tikhambacitira bzinthu pabodzi. Ifepano tikhambawerenga na kupfunza Bibliya, kuyenda ku mitsonkhano na kumbabzipereka kuti tithandizire pa mtsonkhano wa dera. Kuyambira pomwe ndikhali mwana, pai wangu adandithandiza kukulisa lufoyi langu kwa Yahova. Iwo nthawe zentse akhambapemba kuti inepano pabodzi na mana wangu tikhale apainiya. Tsono pa nthawe imweyire, cimweci cikhali lini cakulinga cangu.

KUYAMBA UTUMIKI BWA NTHAWE ZENTSE

Inepano ndidabatizidwa mu gole la 1965 pomwe ndi-khana magole 14. Tsono kwa inepano ndikhawona kuti bzikhali bzakunesa kwene-kwene kupalizira wanthu omwe ndikhawadziwa lini. Ndipo kazinji-kazinji, inepano ndikhakumbuka kuti maswaka yanzangu yakhandiposa ndipo ndikhafunisisa kuti iyo yambandifune. Tsono pomwe ndidabatizidwa, ndidayamba kumbamala nthawe ikulu na wanthu omwe akhatumikira lini Yahova. Ndipo mtima wangu ukhambandinesa thangwe ndikhadziwa kuti bzikhali lini bwino kumbamala nthawe pabodzi na wanthu omwe akhatumikira lini Yahova. Tsono inepano ndikhambakwanisa lini kusiya kucita nawo bzinthu pabodzi. Kodi n’ciyani comwe cidandithandiza?

Pomwe padandopita nthawe pang’ono, mpfumakazi inango ya magole 16 yakucemeredwa Dorothée idayamba kumbatsonkhana m’gwere mwathu. Inepano ndidadabwa kwene-kwene na nyongo yomwe iyo ikhanayo pa upalizi bwa nyumba na nyumba. Inepano ndikhali mkulu kuposa iye, tsono inepano ndikhambayenda lini kukapalizira nthawe zentse. Inepano ndidakumbuka kuti: ‘Abereki wangu ni Mboni za Yahova, tsono Dorothée ndiye yekha omwe ali m’cadidi. Iye ambakhala pabodzi na mai wace omwe akuduwala, koma napo bziri tenepo, nthawe zentse ambagumanika mu upalizi!’ Ciratizo cace cidandicitisambo kufuna kucita bzizinji pakutumikira Yahova. Patsogolo pace, inepano na Dorothée tidayamba kucita upainiya pabodzi. Pakuyamba tidayamba kutumikira ninga apainiya wakuthandiza ndipo patsogolo pace, tidayamba kutumikira ninga apainiya wakukhazikika. Dorothée akhambakomedwa kwene-kwene na kupalizira. Ndipo bzimwebzi bzidacitisa kuti inepanombo ndiyambe kumbakomedwa kwene-kwene na kupalizira. Iye ndiye omwe adandithandiza kukhala na pfunziro langu lakuyamba la Bibliya. Na kupita kwa nthawe, bzidadzakhala bzakupusa kwa inepano kumbaceza na wanthu mu upalizi bwa nyumba na nyumba, m’miseu na ku mbuto zinango.

Mu gole langu lakuyamba ninga mpainiya wakukhazikika, m’bale munango wa ku Áustria wakucemeredwa Heinz adayamba kutumikira m’gwere mwathu. Iye adapfunza cadidi ku Canadá pomwe akhazungira m’bale wace omwe akhali Mboni ya Yahova. Patsogolo pace, adatumizidwa kuti adzatumikire m’gwere mwathu ninga mpainiya wakupambulika ku Vienna. Pomwe tidadziwana, inepano ndidayambiratu kumufuna. Iye akhafuna kukhala misiyonario, tsono inepano ndikhafuna lini. Pakuyamba inepano ndikhamulatiza lini kuti ndikhamufuna. Tsono pomwe padapita nthawe pang’ono tidayamba umakhadzi ndipo tidalowolana ticipitiriza kutumikira pabodzi ninga apainiya ku Áustria.

BZOMWE BZIDANDITHANDIZA KUKHALA NA CAKULINGA CAKUTUMIKIRA NINGA MISIYONARIO

Bayangu Heinz nthawe zentse akhambalewa kuti akhafunisisa kukhala misiyonario. Iye akhambandingingimiza lini kukhala na cakulinga cibodzi-bodzico, tsono akhambandicita mibvunzo yomwe ikhambandithandiza kukumbukira bza cakulingaco. Iye akhambandibvunza kuti: “Pakuti tiribe wana, kodi tingaleke kucita bzizinji pakutumikira Yahova?” Inepano ndikhana mantha kukhala misiyonario thangwe ra manyazi yomwe ndikhanayo. N’cadidi kuti ndikhatumikira kale ninga mpainiya, tsono ndikhawona kuti mpsakunesa kutumikira ninga misiyonario. Tsono Heinz adapirira ndipo adapitiriza kundithandiza kumbakumbukira bza cakulinga cimweci. Iye adandithandiza kuleka kumbakumbukira bza mantha yangu koma nimbakumbukire momwe ningadathandizira wanthu winango. Malango yamweya yadandithandiza kwene-kwene.

Pang’ono na pang’ono, ndidadzayamba kufuna kukhala misiyonario. Na tenepo, tidaprenxeri petisau kuti tiyende ku Xikola ya Jileyade. Tsono m’bale omwe akhanyang’anira ku mthambiko, adalewa kuti bzingadakhala bwino cakuyamba ningadapfunza kulewalewa bwino Cingerezi. Pomwe patapita magole matatu ndikupfunza Cingerezi, tidadabwa kwene-kwene pomwe tidauzidwa kuti tikatumikire mu gwere la Yugoslavian ku Salzburg, ku Áustria. Kwa magole 7, ifepano tidapalizira wanthu omwe akhalewalewa cirewedwe caci Servo-croata. Bayangu adadzakhala nyakunyang’anira dera, ndipo tidamala gole libodzi tikuzungira magwere yomwe yakhalewalewa cirewedwe caci Servo-croata pabodzi, ndipo tidakhala na mapfunziro mazinji ya Bibliya.

Mu 1979 abale omwe ambatsogolera ku mthambi adatiuza kuti tiyende kukakhala ku Bulgária kwa kanthawe. Tsono pakuti basa lathu kumweko likhadaletsedwa, iwo adatiuza kuti tiyende kumweko ninga kuti ni “feriya.” Iwo adatiuza kuti tikhafunika lini kukapalizira. Tsono adatiuza kuti tikhafunika kunyamula mwakabise-bise tumabukhu tung’ono-tung’ono twa mpfumakazi zixanu zomwe zikhakhala ku Sófia mu mzinda wa Bulgária. Ndipo inepano ndikhacita mantha kwene-kwene, tsono Yahova adandithandiza kucita basali. Mpfumakazi za kumweko zikhali pangozi ya kuikhidwa m’kawoko tsono napo bzikhali tenepo, izo zikhali zakukhwimika na zakukondwa. Kuwona bzimwebzi kudandipasa citsimikizo cakucita bzentse bzomwe ningadakwanisa pa utumiki buli-bwentse m’gulu la Yahova.

Pomwe padapita nthawe, tidadzatumiza pomwe petisau kuti tiyende ku Xikola ya Jileyade, ndipo pa nthaweyi imweyi, tidabvumidwa. Ifepano tikhakumbuka kuti tingadakacita xikolayi mu cirewedwe ca Cingerezi ku Estados Unidos. Tsono mu Novembro gole la 1981, Xikola ya Jileyade idayambambo kugumanika ku mthambi ya ku Alemanha. Ndipopa ifepano tidacita xikolayi mu cirewedwe caci Alemanha, bzomwe bzidakhala bzakupusa kwene-kwene kwa inepano kubvesesa. Tsono kodi tingadayenda kukatumikira kuponi?

KUTUMIKIRA KU DZIKO KOMWE KUKHANA NKHONDO

Tidatumizidwa kuti tikatumikire ku Kenya! Tsono mthambi ya ku Kenya idatibvunza penu bzingadakwanisika kuti tikatumikire ku dziko la pafupi la Uganda. Magole 10 m’mbuyo mwace, Mkulu wa acikunda wakucemeredwa Idi Amin adatsogolera thimu la anyankhondo kuti akaphindukire boma aciyamba kutonga ku Ugandako. Pomwe iye akhatonga, wanthu azinji adaphedwa ndipo winango azinji adabonera kwene-kwene. Ndipo mu 1979, boma la Uganda lidaphindukiridwa pomwe. Ndikukhulupira kuti imwepo mukukwanisa kubvesesa thangwe lomwe likhandicitisa kukhala na mantha kuyenda kukatumikira mu dziko limwelire. Tsono Xikola ya Jileyade ikhadatikonzekeresa kuti timbathembe Yahova. Ndipopa tidabvuma utumiki bumwebu.

Moyo ku Uganda ukhali wakunesa kwene-kwene. Boma likhakwanisa lini kucitisa kuti m’dzikolo mukhale na madzi, maluju na bzinthu bzinango bzakufunikira. Telefoni zikhambaphata lini basa. Wanthu akhambaphana na kuberana bzinthu maka-maka usiku. Ndipo kukadoka, wanthu akhambakhala m’mii mwawo ndipo azinji akhapemba kuti wanthu aleke kudzawabera ayai kudzawapha. Napo kuti abale wa ku Uganda akhagumana na mabvuto yamweya, iwo akhapitiriza kutumikira Yahova mwakukondwa!

Mu 1982, ifepano tidafika ku Kampala lomwe ni likulu la Uganda. Minyezi mixanu yakuyambirira, ifepano tidakhala ku mui kwa M’bale Sam na Mpfumakazi Christina Waiswa pabodzi na wana wawo axanu na wanthu winango wa m’banja mwawo anai. Kazinji-kazinji, tikhambadya kabodzi pa ntsiku, koma napo bzikhali tenepo iwo akhali wakukonzeka kumbatipasambo bzing’ono-ng’ono bzomwe akhanabzobzo. Pa nthawe yomwe tikhakhala na banja limweri, tidapfunza bzinthu bzizinji bzomwe bzidatithandiza mu utumiki bwathu bwa umisiyonario. Tidapfunza kumbaphatisa basa madzi mang’ono-ng’ono kuti tisambe na kuphatisambo basa madzi mabodzi-bodziyo pakuyenda ku kazadebanyo. Mu 1983 tidagumana nyumba inango ku mphimpha ya Kampala yomwe ikhali yakukhotcerereka ndipo tidayamba kukhala kumweko.

Ifepano tikhambakomedwa kwene-kwene kupalizira ku Kampala. Inepano ndikukumbukira kuti pa mwezi m’bodzi, tidakwanisa kugawira marevista yakupitirira 4000! Ndipo bzomwe tikhakomedwa nabzo kwene-kwene ni momwe wanthu akhabvumira cadidi. Iwo akhambalemekeza Mulungu ndipo akhafuna kuceza kwene-kwene bza m’Bibliya. Kazinji-kazinji, inepano na bayangu Heinz tikhambacitisa mapfunziro yakukwana 10 ayai 15. Ndipo ifepano tidapfunza bzinthu bzizinji na anyakupfunza wathu wa Bibliya. Napo kuti iwo akhambafunikira kufamba na minyendo pakuyenda ku mitsonkhano sumana iri-yentse, iwo akhang’ung’udzika lini koma nthawe zentse akhali wakukondwa.

Mu gole la 1985 na 1986, mu dziko la Uganda mudacitika pomwe nkhondo kawiri. Bzikhali lini bzakudabwisa kuwona wana akufamba na mpfuti. Iwo akhaphatisidwa basa ninga acikunda ndipo akhambakhala pa mseu acimbawona kuti mbani omwe angadapita na pa mseupo. Pomwe tikanati kuyenda mu upalizi, tikhayamba kukumbira Yahova kuti atithandize kukhala wakugwa mpfuwa, wanzeru na kutcenkha ngozi. Ndipo Yahova akhambatawira mipembo yathu. Tikagumana munthu omwe akhafuna kutetekera mafala ya Umambo, mantha yathu yakhamaliratu.

Ifepano tikhakomedwambo kwene-kwene kupalizira wanthu omwe akhadafulukira ku Ugandako. Ifepano tidapfunza Bibliya na dotolo munango wakucemeredwa Murat Ibatullin pabodzi na mkazace Dilbar. Iwo akhali wa ku Tartaristão ku Rússia. Banja limweri lidafika pakubatizidwa ndipo mpaka pano likupitiriza kutumikira Yahova mwakukhulupirika. Ndipo ndidakhalambo na mwayi wakudziwana na mkazi munango wakucemeredwa Tatjana Vileyska wa ku Ucrânia omwe akhafuna kubzipha. Pomwe adabatizidwa, Tatjana adabwerera ku Ucrânia ndipo patsogolo pace adadzayamba kuthandizira basa lakusandulizira mabukhu yathu m’cirewedwe caci Ucrânia.a

UTUMIKI BUPSA

Mu gole la 1991 pomwe tikhali feriya ku Áustria, mthambi ya kumweko idatiligaliri icitiuza kuti tatambira utumiki bupsa bomwe bukhali bwakuyenda kukatumikira ku Bulgária. Kwa magole mazinji, basa lakupalizira likhadaletsedwa m’madziko mazinji ya ku Europa. Tsono bzimwebzo bzidadzacinja ndipo Mboni za Yahova zidadzabvumizidwa kumbapalizira m’madziko yamweya. Ndipo libodzi mwa madzikoya likhali Bulgária. Ninga momwe ndikhadalewera kale, ifepano tikhadayenda kale mu dziko limweri pomwe basa lathu lakupalizira likhadaletsedwa. Ndipo tidayendesa mabukhu manango mwakabisira m’dziko limweri. Tsono tsapano tikhadatumizidwa na cakulinga cakuti tikapalizire.

Abale adatiuza kuti tiyenderetu ku Bulgária. Ndipopa tiribe kukhala pomwe na mwayi wakuti tibwerere ku Uganda kuti tikalongedze bzinthu bzathu na kugonekana na azixamwali wathu. M’mbuto mwace, tidayenda ku Beteli ya ku Alemanha ndipo kumweko tidakatenga karo ticiyenderatu ku Bulgária. Tidatumizidwa kuti tikatumikire ku kagrupo kanango komwe kakhana apalizi 20 ku Sófia.

Ku Bulgária, ifepano tidagumana na mabvuto mazinji. Bvuto lakuyamba likhali lakuti tikhadziwa lini cirewedwe ca kumweko. Kuthumizira bzimwebzi, kukhana mabukhu mawiri basi ya cirewedwe caci Bulgária yomwe ni Coonadi Cimene Cimatsogolera ku Moyo Wamuyaya na Bukhu Langu la Nkhani za m’Bibliya. Ndipo tidawonambo kuti bzikhali bzakunesa kuyambisa mapfunziro ya Bibliya. Napo kuti tikhagumana na mabvuto yamweya, kagrupo kathu kakhapitiriza kupalizira na nyongo. Ndipopa gereja ya Ortodoxa iribe kukomedwa pomwe idatiwona tikupalizira ndipo idayamba kutizunza.

Mu 1994, boma la ku Bulgária likhawona lini pomwe Mboni za Yahova ninga cipembedzo ndipo wanthu ku Bulgariako akhakumbuka kuti Mbonizo ni wanthu wakugopswa. Abale winango adaikhidwa m’kawoko. Wanthu akhambalewa bzinthu bzakunama pakulewa bza ifepano m’majornale na m’ma TV. Iwo akhalewa kuti Mboni za Yahova ambafuna kuti wana wawo ambafe thangwe ra kulamba kuikhidwa mulopa, nakuti akhambauza Mboni zinzawo kuti zibziphe. Pa nthawe imweyi, kupalizira kukhali kwakunesa kwene-kwene. Wanthu azinji akhambalewalewa nafe mwaukali ndipo akhambacemera mapolisiya ayai kutithusira bzinthu. Kutambira mabukhu kucokera ku dziko linango bzikhali bzakunesa. Ndipo kuti tilugari mbuto yakucitira mitsonkhano ya gwere bzikhali bzakunesa kwene-kwene. Pa nthawe inango, mapolisiya yadagwatiza na kuimisa mtsonkhano wathu wa cigawo. Ifepano tikhalibe kuzolowera kucitiridwa bzinthu mwa njira imweyi. Wanthu amwewa akhali wakusiyana na wa ku Uganda omwe akhali wakukonzeka kupfunza Bibliya! Kodi n’ciyani comwe cidatithandiza kuti tipitirize kucita utumiki bumwebu?

Kumala nthawe tiri pabodzi na abale na mpfumakazi zathu kudatithandiza kwene-kwene. Iwo akhafuna cadidi ndipo akhambatenda kwene-kwene kukhala nafe pabodzi. Ifepano tikhali wakuphatana kwene-kwene ndipo tikhathandizana. Bzimwebzi bzidatipfunzisa kuti tikambafuna wanthu tin’dzakhala wakukondwa kwene-kwene pa utumiki buli-bwentse.

Pambuyo pakupita magole, basa lathu lakupalizira lidadzakhala lakupusa. Mu 1998, basa lathu lidadzabvumizidwa pomwe ndipo mabukhu mazinji ya cirewedwe caci Bulgária yadadzagumanika. Patsogolo pace, mu 2004 prediyo zipsa zidayamba kuphatisidwa basa. Tsapano ku Bulgária kuna magwere yakukwana 57 na apalizi wakukwana 2953. Ndipo mu gole la 2024 wanthu wakukwana 6475 adagumanika pa Cikumbuso. Ndikakumbukira, pa nthawe inango ku Sófia kukhana mpfumakazi zixanu, tsono tsapano kuna magwere 9! Tidakwanisa kuwona kuti “Mng’ono [adadzasanduka] . . . culu.” — Zaiya 60:22.

KULIMBANA NA MABVUTO YA PA MOYO WATHU

Pa moyo wangu ndidakhala na mabvuto mazinji ya thanzi. Kazinji-kentse adotolo adazindikira kuti ndikhana matenda ya kugwera ulupi. Pa nthawe inango, ndidazindikiridwa kuti ndikhana matenda ya kugwera ulupi. Ndida-tambira thandizo la ulapi la mphanvu kwene-kwene kuti akwanise kucosa mbali ya ulupi yomwe ikhadagwerayo. Ndidayenda ku India komwe dotolo munango adandicita operasau kwa maora 12 ndipo adakwanisa kucosa pang’ono mbali ya ulupi yomwe ikhadagwerayo. Tidakhala ku Beteli ya ku Índia mpaka ine kupola ndipo patsogolo pace tidadzabwerera ku Bulgária kuti tikapitirize na utumiki bwathu.

Pa nthawe imweyi, bayangu Heinz adaduwala matenda yakunesa kwene-kwene. Thangwe ra matenda yamweya bzikhamunesa kufamba na kulewalewa. Pomwe matendayo yakhayenda yacikula, iye akhafunikira kwene-kwene thandizo langu. Ndipo nthawe zinango ndikhaneta na kucita thupo kuti pinango ningadakwanisa lini kupitiriza kumusamalira. Tsono m’bale munango wacitswaka wakucemeredwa Bobi kazinji-kazinji akhambayenda mu upalizi pabodzi na Heinz. Heinz akhakwanisa lini kulewalewa bwino-bwino na kuphatisa basa manja na minyendo yace. Napo bzikhali tenepo, Bobi akhacita lini manyazi kupalizira pabodzi na bayanguyo. Nthawe zentse ndikafunikira munthu kuti andithandize kusamalira Heinz, inepano ndikhadziwa kuti Bobi akhali wakukonzeka kundithandiza. Napo kuti inepano na Heinz tikhadasankhula kuleka kukhala na wana m’dziko lino kuti ticite bzizinji pakutumikira Yahova, Bobi adakhala mwana omwe Yahova adatipasa pa nthawe yomwe tikhafunikira! — Marko 10:29, 30.

Bayangu Heinz adadzakhalambo na kankro ndipo adadzafa mu 2015. Ndamusuwa kwene-kwene mwamuna wangu. Iye ni omwe nthawe zentse akhandithandiza kuti ndileke kucita thupo. Bzimbandinesa kukhulupira kuti ndiri lini pomwe naye pabodzi. Inepano nimbamukumbukira kwene-kwene ndipo bziri ninga akana moyo! (Luka 20:38) Ntsiku zentse nimbakumbukira bza mafala yace yakudeka mtima na malango yabwino yomwe akhandipasa. Nimbatenda kwene-kwene magole yentsene yomwe tidatumikira Yahova pabodzi.

NIMBATENDA KWENE-KWENE YAHOVA THANGWE RA KUNDITHANDIZA NTHAWE ZENTSE

Yahova adandipasa mphanvu kuti ndipirire mabvuto yentse yomwe ndidagumana nayo. Iye adandithandizambo kuleka kukhala wa manyazi na kuti ndikhale misiyonario omwe ambafuna wanthu. (2 Timotio 1:7) Nimbatenda kwene-kwene Yahova thangwe inepano na m’bale wangu tiri mu utumiki bwa nthawe zentse. Tsapano iye na bayace akutumikira ku gawo la cirewedwe caci Sérvia ku Europa. Mipembo yomwe pai wangu adacita m’mbuyomu idatawiridwa!

Kupfunza Bibliya kumbandithandiza kuti ndikhale na mtendere. Pa nthawe zakunesa ndidapfunza kumbapemba na “mtima wentse” ninga momwe Jezu akhacitira. (Luka 22:44) Nimbakwanisa kuwona kuti mipembo yangu imbatawiridwa ndikambawona lufoyi na kudeka mtima komwe axamwali wangu wa m’gwere la ku Sófia ambandilatiza. Iwo nthawe zentse ambandicemera kuti ndicite nawo bzinthu pabodzi ndipo ambandilatiza kuti ambandifuna. Bzimwebzi bzimbandicitisa kuti ndikhale wakukondwa kwene-kwene.

Nimbakomedwa kwene-kwene kukumbukira bza cilamuso. M’makumbukidwe mwangu, nimbakwanisa kuwona wanthu wentse wa m’banja mwangu ali pabodzi. Abereki wangu ali kutsogolo kwa nyumba yathu ndipo ana mawonekedwe ninga yomwe akhanayo pomwe adalowolana, mana wangu akuphika ndipo bayangu Heinz adaima pafupi na kavalo wace. Kukumbukira bzimwebzi kumbandithandiza kuti ndileke kukhala na makumbukidwe yakuphonyeka ndipo kumbandicitisa kuti nditende Yahova.

Ndikambakumbukira bzomwe bzidacitika pa moyo wangu na bzomwe Yahova adapicira pakulewa bza kutsogolo, nimbabzibva ninga Mambo Davide omwe adanemba pa Salimo 27:13, 14 kuti: “Ndingadakhala ndiri kuponi bzingadakhala kuti ndiribe cikhulupiro pakuwona ubwino bwa Yahova m’dziko la wanthu wamoyo? Dikhirira Yahova. Khwimika, ucilimbisa mtima wako. Inde, dikhirira Yahova.”