Thandizo kwa Akazi Omwe Ambaboneresedwa
“ AKAZI azinji pa dziko lentse adaboneresedwa kale mwa njira inango. Kodi imwepo ndimwe m’bodzi wa iwo? Onani kuti n’thangwe ranyi Mulungu ambacita namwe thupo na bzomwe an’dzacita kwa wale omwe ambaboneresa akazi.”
Yamweya ni mafala yakuyambirira ya nkhani yakuti “Kuteteza Akazi — Zimene Baibulo Limanena” yomwe iri mu webisaite ya jw.org. Kuphampha kwa nkhaniyi kuna linki yakuti muibaxari nkhaniyo. Imwepo mungaidinde muciifunya-funya icikhala dokumento yomwe ina masamba manai. Mpfumakazi inango, yomwe imbakhala ku Estados Unidos yakucemeredwa Stacy, idalewa kuti: “Inepano ndidadinda kopiya zinango za nkhani imweyi. Patsogolo pace, inepano na mpfumakazi inango tidatenga kopiyazo ticikazigawira ku mbuto yomwe imbakhala akazi mu gawo la gwere lathu”.
Mkazi munango omwe ambaphata basa ku mbuto imweyi adabvunza mpfumakaziyo penu bzingadakwanisika kuti isiye makopiya yanango kuti iye agawire wanthu omwe akhakhala ku mbuto imweyire. Bzakutewera bzace mpsakuti tumatsamba 40 twa nkhani imweyi tudagawidwa pabodzi na tumakartau twa jw.org twakukwana 30. Ntsiku inango, nyakunyang’anira ku mbutoyo adakumbira kuti akaziwo alatizidwe momwe pfunziro la Bibliya limbacitidwira.
Stacy pabodzi na mpfumakazi zinango ziwiri adakhalambo na bzakutewera bzabwino ku mbuto inango yomwe imbakhala akazi. Kumweko iwo adasiya makopiya maxanu ya katsamba kamweka ndipo wanthu wa kumwekowo adawakumbira kuti adzabwerese pomwe makopiya manango. Mkazi munango omwe akhaphata basa ku mbutoyo, adalewa kuti: “Katsamba kamweka kan’thandiza akazi kuno, ni bzomwe ifepano tikhafunikira.” Pa ulendo bunango akazi azinji omwe ambakhala ku mbuto imweyi adatsonkhana kuti awone momwe pfunziro la Bibliya limbacitidwira ndipo awiri mwa iwo adalewa kuti akhafuna kuyenda kukatsonkhana ku Nyumba ya Umambo kuphampha kwa sumana imweyire.
Stacy adalewa kuti: “Bzidakhala bzakudekeza kwene-kwene kuwona momwe wanthu adakomedwera pomwe adawerenga nkhani yabwinoyi. Pambuyo pa kudindidwa kacifunyidwa-funyidwa, katsamba kamweka kambacitisa kuti wanthu afune kukawerenga. Ndipo ni njira yabwino yakupalizirira mafala ya Umambo kwa akazi amwewa. Bzidakhala bzabwino kwene-kwene kuwona momwe wanthu adakomedwera pomwe adatambira mafala yamweya. Ndipo tikudikhirira kuwona momwe Yahova an’simbira nyongo yathu kuti tipitirize kuthandiza akazi amwewa na mafala yabwino.”