Mibvunzo Yakucokera kwa Anyakuwerenga

Kodi ni “makumbukidwe” yaponi yomwe Yahova tsapanopali aniikha m’mitima mwa maboma?

Pakulewa bza kuyamba kwa citsautso cikulu, Apokalipse 17:16, 17 ambalewa kuti: “Nyanga 10 zomwe wawona na cirombo cire, bzin’dzawenga putayo, ndipo bzin’dzamutengera bzinthu bzace bzentse bzicimusiya pezi, ndipo bzin’dzadya thupi lace bzicidzamutentha na moto. Thangwe Mulungu an’dzawapasa makumbukidwe yakucita bzomwe iye akufuna. Wentsenewo an’dzakhala na makumbukidwe mabodzi yakuti apereke mphanvu yawo yakutonga kwa cirombo cire.” Kale-kale, mabukhu yathu yakhalewa kuti “makumbukidwe” yomwe Yahova an’dzaikha m’mitima mwa maboma njakupfudza magereja yakunama.

Tsono bzidafunikira kucinja kabvesesedwe kathu. “Makumbukidwe” yomwe Yahova an’dzaikha m’mitima mwa maboma njakupereka “mphanvu yawo yakutonga kwa cirombo cire.” Kuti tibvesese momwe profesiya imweyi in’dzakwanisidwira, mbatitawireni mibvunzo minango.

Ni bzinthu bziponi bzomwe bzimbafotokozedwa mu profesiya imweyi? “Puta” omwe ambadziwika na dzina lakuti “Babiloniya Mkulu”; ambaimira magereja yentse yakunama. “Cirombo cifuira kwene-kwene” cimbaimira Nações Unidas. Iro lidakonzedwa mu 1919 na cakulinga ca kudzakhazikisa mtendere padziko lentse la pantsi ndipo likhacemeredwa Liga das Nações. (Apokalipse 17:3-5) “Nyanga 10” zimbaimira maboma yentse yomwe yambathandizira ciromboco.

Kodi ni kubverana kuponi komwe kulipo pakati pa puta na cirombo? Putayo “adakhala pa msana” wa cirombo. Bzimwebzi bzikuthandauza kuti iye ambathandizira ndipo ambayezera kutonga ciromboco.

Kodi n’ciyani comwe cin’dzacitikira putayo? Ciromboco pabodzi na nyanga 10, “bzin’dzawenga putayo” bzicimutengera cuma cace centse bzicilatiza kwa wentse bzicito bzace bzakuipa. Iwo an’dzatonga m’mbuto mwa Yahova mwakupfudza putayo. (Apokalipse 17:1; 18:8) Kumweku kun’dzakhala kumala kwa magereja yentse yakunama. Tsono pomwe bzimwebzi, bzikanati kucitika, Yahova an’dzacitisa kuti maboma yacite cinthu comwe cikanati kucitika kale padziko lentse la pantsi.

Kodi Yahova an’dzacitisa kuti maboma yacite ciyani? Iye an’dzacitisa kuti maboma yakhale na “makumbukidwe” yakucita bzomwe iye akufuna ayai kuti maboma ‘yan’dzapereka mphanvu zawo na utongi bwawo kwa cirombo [cifuira kwene-kwene]’ comwe ni Nações Unidas. (Apokalipse 17:13) Ndokumbukirani kuti bzimwebzi bzikuthandauza ciyani. Kodi maboma yan’dzandosankhula kupereka mphanvu na utongi bwawo kwa ciromboco? Ne! Profesiyayi imbalatiza kuti Mulungu ndiye omwe an’dzayacitisa kuti yacite bzimwebzo. (Mimwani 21:1; ndendemezerani na Zaiya 44:28.) Ndipo kodi kucinja kumweku kun’dzacitika pang’ono-pang’ono? Ne! Ibzo bzin’dzacitika mwadzidzidzi. Patsogolo pace, ciromboco cin’dzaphatisa basa mphanvu zomwe cin’dzapasidwa kuti citonge magereja yakunama m’mbuto mwa Yahova cicidzawapfudza wentse.

Kodi tin’funika kudikhirira ciyani? Tin’funika lini kudikhirira kuwona m’manotisiya nkhani zakuti maboma yakuthandizira pang’ono-pang’ono Nações Unidas. Bzomwe tin’funika kudikhirira mpsakuti: Mwakudabwisa na mwadzidzidzi, Yahova an’dzacitisa kuti maboma yapereke mphanvu zawo kwa cirombo cire. Bzimwebzi bzikadzacitika tin’dzadziwa kuti citsautso cikulu casala pang’ono kuyamba. Pomwe tikudikhirira bzimwebzi, “mbatipitirizeni kukhala tceru na wakukumbuka bwino” thangwe tsapanopali tin’dzawona bzinthu bzikucinja mwadzidzidzi! — 1 Atesalonika 5:6.