Kodi Mukukumbukira?

Kodi imwepo mwawerenga bwino-bwino nkhani za gole lino mu Ntsanza ya Mulindiri? Penu mun’ti inde, yezerani kutawira mibvunzo iri m’nyantsiyi:

Kodi n’ciyani comwe cimbaticitisa kupasa ulemerero Yahova?

Ifepano timbapereka ulemerero kwa Yahova thangwe ra kuti timbamulemekeza kwene-kwene. Timbaperekambo ulemerero kwa Yahova thangwe timbafuna kuti wanthu winango amudziwembo. — w25.01, tsa. 3.

Munthu akatiphonyera, tingakhale tani wakulekerera?

Timbapulumbudza lini momwe tikubvera; tsono, tikatcenkha kukhala wakukalipa ticiyebwa bzomwe anzathu waticitira, bzimwebzi bzingatithandize kuti tileke kugumana na mabvuto yomwe yambabwera thangwe ra kukhala na ciya. — w25.02, matsa. 15-16.

Thangwe ranyi Marko ni ciratizo cabwino kwa abale wacitswaka?

Marko adabvuma basa lakutumikira na mtima wentse. Napo kuti bzikuwoneka kuti akhadasunama, Marko alibe kubwerera mbuyo. Iye adalimbisa uxamwali bwace na Paulo pabodzi na Akristau winango wakukhwima mwauzimu. — w25.04, tsa. 27.

Kodi Jezu akhafuna kulewa ciyani pomwe adapemba kuti: “Inepano ndawadziwisa dzina lanu”? (Juwau 17:26)

Anyakupfunza wa Jezu akhadziwa kale dzina la Mulungu. Tsono Jezu adathandiza anyakupfunza wacewo kudziwa bwino Yahova, kuphatanidzambo cakulinga comwe iye anaco na dzikoli pabodzi na wanthu, bzomwe iye akhadacita kale, bzomwe iye an’dzacita na makhalidwe yace. — w25.05, matsa. 20-21.

Tikakhala wakubzicepesa, timbazindikira ciyani?

Timbazindikira kuti timbadziwa lini bzinthu bzinango. Mwa ciratizo, timbadziwa lini ntsiku yomwe cimaliziro cin’dzafika ayai momwe Yahova an’dzacitira bzinthu pa nthawe imweyo. Timbadziwambo lini bzomwe bzin’dzacitika mangwana ayai momwe Yahova ambatidziwira. — w25.06, matsa. 15-18.

N’ciyani comwe cingatithandize kuti tigumane phindu na nkhani ya wentse pabodzi na nkhani zinango?

Tingabzibvunze kuti: ‘Kodi ni umboni buponi bomwe bukuphatisidwa basa kuti buthandize wanthu amwewa? Kodi pana ciratizo comwe ningaciphatisire basa ndikakhala ndikupfunzisa cadidi cimweci? Mbani omwe pinango angakomedwe na nkhani imweyi?’ — w25.07, tsa. 19.

Kodi tingapfunze ciyani bza kulekerera kwa Yahova na momwe adacitira bzinthu na Davide?

Napo kuti Davide adacita pikado zikulu-zikulu, pomwe iye adakungula na mtima wentse, Yahova adamulekerera. (1 Amambo 9:4, 5) Mulungu akalekerera pikado, iye ambakoya lini pikadoyo ayai kudzaiphatisa basa kutsogolo kuti alange munthu omwe aicitayo. — w25.08, tsa. 17.

Penu nyakupfunza wa Bibliya akuneseka kubvesesa nfundo inango, n’ciyani comwe mun’funika kucita?

Penu iye akadapitiriza kusaya kubvesesa nfundoyo pambuyo pakuyezera kumupfunzisa bwino mwakuphatisa basa Bibliya, pitirizani pfunzirolo ndipo citani makonzedwe kuti mudzaceze bza nkhaniyo pa nthawe inango. — w25.09, tsa. 24.

Bibliya limbalewa kuti pikado ina “mphanvu yakupumpsa.” (Ahebereu 3:13) Mwa njira iponi?

Pikado ingaticitise kufuna kucita bzinthu bzakuipa. Ingaticitisembo kuti tipenukire bza lufoyi la Mulungu. — w25.10, tsa. 16.

Kodi Ni bzinthu bzitatu bziponi bzomwe bzingatithandize kumbapemba kwa Yahova na mtima wentse?

(1) Tingambakumbukire bza makhalidwe ya Yahova. (2) Tingambakumbukire bzomwe tikugumana nabzo ayai penu tin’funika kulekerera munthu, ticimbabzilewa mu mpembo. (3) Tingambapembe mwakusaya kuthamanga. Bzimwebzi bzin’dzatithandiza kumufotokozera Yahova momwe tikubvera. — w25.10, matsa. 19-20.

Kodi tingathandize tani acikulire?

Tingambazungire ayai kuligariri wale omwe mbaacikulire. Tingambawaperekezembo pomwe akuyenda ku nyumba ya ulapi. Ayai tingambapalizire nawo mu njira zakusiyana-siyana. — w25.11, matsa. 6-7.

Ni bzinthu bziponi bzomwe bzingacitise kuti malowozi yacikristau yakhale yakulemekezeka?

Bverani malamulo ya boma. Tsimikizirani kuti msindayo udzakhale wakulemekezeka ndipo tsimikiziranimbo kuti malowozi yanuyo yadzalatize makhalidwe yomwe mzimu wakucena umbalatiza. Sankhula bzakubvala bzakuthemera ndipo tcenkhani miyambo yomwe ikubverana lini na bzomwe Bibliya limbalewa. Mbalewalewanani mu njira yabwino pomwe mukukonzekera malowozi yanu. — w25.12, matsa. 21-24.