Acikulire, Imwepo Mungathandize Gwere mu Njira Zakusiyana-siyana

“Ndikakumbukira bzinthu bzomwe ndidacita pomwe ndikhali tswaka nimbadabwa kwene-kwene. Tsono pakuti tsapano ndakalamba ni-mbakwanisa lini kucita bzomwe ndikhacita kale-kale.” — Connie wa magole 83.

Pinango imwepo mukukwanisa lini kucita bzinthu bzizinji ninga momwe mukhacitira pomwe mukhali tswaka. Ndipo napo mucidziwa kuti mwatumikira Yahova kwa magole mazinji, mukandendemezera bzomwe mudacitira Yahova m’mbuyomu na tsapano pinango mungasuname. Penu ndibzo bzomwe bzikukucitikirani, n’ciyani comwe cingakuthandizeni kuti mukhale wakukondwa?

BZOMWE YAHOVA AMBADIKHIRIRA KWA IMWEPO

Bzibvunzeni kuti: ‘Kodi Yahova akudikhirira ciyani kwa inepano?’ Imwepo mungagumane mtsangalazo na mafala ya pa Deuteronomiyo 6:5, yomwe yambati: “Umufune Yahova Mulungu wako na mtima wako wentse, moyo wako wentse na mphanvu zako zentse.”

Mwakubverana na vesiri, Yahova akudikhirira kuti imwepo mumutumikire na mtima wanu wentse, moyo wanu wentse na mphanvu zanu zentse. Bzimwebzi bzingakuthandizeni kutcenkha kumbabzindendemezera na winango ayai kumbandendemezera bzomwe mumbakwanisa kucita tsapano na bzomwe mudacita m’mbuyo.

Pomwe imwepo mukhali tswaka mukhacitira Yahova bzomwe mungadakwanisa mwakubverana na momwe bzinthu bzikhaliri pa moyo wanu pa nthawe imweyo. Kodi n’ciyani comwe mungacitire Yahova tsapano? Pakuti bzinthu bzacinja pa moyo wanu bzikuwonekeratu padeca kuti imwepo mukupitiriza kucita bzomwe mungakwanise mwakubverana na momwe bzinthu bziriri tsapano. Mukambawona bzinthu mu njira imweyi, imwepo mun’dzakwanisa kuzindikira kuti mukucitira bzinthu Yahova ninga momwe mukhamucitira m’mbuyo. Imwepo mukhamucitira bzomwe mungadakwanisa pa nthaweyo ndipo tsapano mukumucitirambo bzomwe mungakwanise.

Bzithunzi-thunzi: Mpfumakazi ikutumikira Yahova mwakukhulupirika kwa magole mazinji. 1. Kwa magole mazinji pomwe ikhali tswaka ikuceza na mkazi munango mu upalizi bwa nyumba na nyumba. 2. Tsapano pomwe yakalamba ikupalizira pabodzi na mpfumakazi inango yacitswaka mwakuphatisa basa telefoni. — Imwepo mudacitira Yahova bzomwe mungadakwanisa pomwe mukhali tswaka ndipo tsapano mukumucitira bzomwe mungakwanise pomwe mwakalamba

BZOMWE MUDAPFUNZA BZINGATHANDIZE WINANGO

M’mbuto mwa kundombakumbukira bzomwe mungakwanise lini kucita, mbakumbukirani mipata yomwe imwepo munayo yakuthandiza winango napo kuti ndimwe wacikulire. Kulewa cadidi, ninga wacikulire imwepo mungacite bzinthu bzinango bzomwe mukhabzicita lini pomwe mukhali tswaka. Mwa ciratizo, imwepo mungacite ibzi:

Fotokozerani winango bzomwe mudapfunza pa moyo wanu. Kumbukirani bzomwe Bibliya limbalewa m’mavesiya:

Mambo Davide: “Ndikhali tswaka ndipo tsapano ndakalamba, koma ndikanati kuwona munthu wakulungama akulekereredwa, ne kuwona wana wace akunyang’ana cakudya.” — Salimo 37:25.

Djoswa: “Onani kuti lero inepano ndikufa, ndipo imwepo mun’dziwisisa na mtima wanu wentse, na moyo wanu wentse kuti palibe kutazika na cibodzico pa mafala yabwino yentse yomwe adakuuzani Yahova, Mulungu wanu. Yentse yadakwanisika kwa imwepo. Palibe fala na libodzilo lomwe lidatazika.” — Djoswa 23:14.

Pinango imwepo mudalewambo kale mafala ninga yamweya. Davide na Djoswa adalewa bzinthu bzomwe bzidawacitikira pa moyo wawo. Atumiki wakukhulupirika wa Yahovawa adalewa bzomwe adawona na kubva kwa magole mazinji mwakuti mafala yawoyo yadakhala yamphanvu kwene-kwene.

Penu mukutumikira Yahova kwa magole mazinji, imwepo mungauzembo winango bzomwe Yahova adakucitirani na bzomwe adacitirambo winango. Kodi imwepo mukukumbukira nthawe inango yomwe mudawona Yahova akuthandiza atumiki wace mu njira yakudabwisa? Penu ndibzo, khalani wakutsudzuka kuuza winango bzimwebzo! Bzimwebzi bzingawacitise kuti akomedwe kwene-kwene ninga momwe bzidacitikira na imwepo. Na tenepo, imwepo mungalimbikise kwene-kwene abale na mpfumakazi mukambawauza bzomwe bzidakucitikirani pa moyo wanu. — Aroma 1:11, 12.

Njira inango ya momwe mungalimbikisire winango, ndiyo kumbagumanika pa mitsonkhano ya gwere bzikakwanisika. Mukacita bzimwebzi, imwepo mungalimbikise abale na mpfumakazi ndipo mungalimbikisidwembo. Connie, omwe wafotokozedwa kale ule adalewa kuti: “Kugumanika pa mitsonkhano kumbandicitisa kuti ndileke kukhala wakusunama. Kodi ningakhale tani wakusunama na lufoyi lomwe abale na mpfumakazi ambandilatiza ku Nyumba ya Umambo? Nimbayezera kulatiza kutenda kwangu wentse mwakuwapasa mphaso. Ndipo nimbacita ciri-centse kuti ndipitirize kucita bzinthu bzauzimu na abale na mpfumakazi zangu.”

YAHOVA AMBATENDA BZENTSE BZOMWE MUMBAMUCITIRA

M’Bibliya muna bziratizo bza wanthu azinji omwe Yahova akhawafuna napo kuti akhakwanisa lini kumucitira bzinthu bzizinji. Kumbukirani bza Simiyoni, Mjirayeri munango omwe adakhala na moyo pa nthawe yomwe Jezu adabadwa. Pomwe Simiyoni akhambayenda ku templo, pinango iye akhambawona maswaka yakucita mabasa yakufunika ku temploko. Tsono tani pakulewa bza Simiyoniyo? Pinango iye angadakumbuka kuti akhali lini wakufunika kwa Yahova thangwe rakuti akhakwanisa lini kumucitira bzizinji ninga momwe maswakayo yakhacitira. Tsono Yahova akhawona bzinthu mu njira yakusiyana. Iye akhawona Simiyoni ninga “mtumiki wakukhulupirika” ndipo adamupasa mwayi wakuwona Jezu. Ndipo Yahova adamuphatisambo basa kuti alewe profesiya yakuti Jezu ndiye angadadzakhala Mesiya! (Luka 2:25-35) Bzikuwonekeratu padeca kuti Yahova alibe kukumbukira bza kukalamba kwa Simiyoni. M’mbuto mwace, iye adawona cikhulupiro comwe iye akhanaco, “ndipo adawonambo kuti mzimu wakucena ukhali pa iye.”

Mwakukondwa Zuze na Mariya akulatiza Jezu kwa Simiyoni. — Yahova adasimba Simiyoni mwa kumupasa mwayi wakuwona Jezu na kulewa profesiya yakuti iye akhali Mesiya wakupiciridwa

Imwepo mungakhalembo na citsimikizo cakuti Yahova ambawona basa lakukhulupirika lomwe mumbamucitira napo kuti mukukwanisa lini kucita bzizinji. Yahova ambafuna kuti munthu ali-wentse “apereke mwakubverana na bzomwe anabzo.” — 2 Akolinto 8:12.

Na tenepo, mbacitani bzomwe mun’kwanisa kucita. Mwa ciratizo, mbakumbukirani upalizi bomwe mungakwanise kucita mwakubverana na thanzi lanu napo kuti mungapalizire kwa nthawe yakucepa. Imwepo mungalimbikise abale na mpfumakazi mwa kucita kumbawaligaliri ayai kuwatumizira tsamba. Bzinthu ninga bzimwebzi bzingakhale bzakulimbikisa kwa abale na mpfumakazi maka-maka bzikakhala bzikucokera kwa munthu omwe akutumikira Yahova kwa magole mazinji.

Winango ambatazira kucita bzizinji thangwe ra bvuto la thanzi. Onani nkhani inango yomwe idacitika ku madokero kwa África pa kwadru ya msolo wakuti “Mwakuphatisa Basa Bibliya Mpfumakazi Idapulumusa Moyo wa Munthu.”

Kumbukirani kuti bzomwe mudacita pakutumikira Yahova kwa magole mazinji na bzomwe mukucita tsapano pakumutumikira mwakukhulupirika bzingalimbikisembo winango. Imwepo ndimwe ciratizo cabwino ca kupirira ndipo mungakhale na citsimikizo cakuti “Mulungu ngwakulungama, iye an’dzayebwa lini basa lanu na lufoyi lomwe mudalilatiza pa dzina lace, ndipo mumbalatiza bzimwebzi mwakutumikira anyakukhulupira anzanu.” — Ahebereu 6:10.

MBAKHALANI WAKUTANGANIKA PAKUTHANDIZA WINANGO

Kafuku-fuku ambalatiza kuti amuna na akazi azinji wacikulire omwe ambathandiza winango ambakhala na thanzi labwino, ambakumbuka bwino ndipo ambakhala na moyo nthawe itali.

N’cadidi kuti kucitira bzabwino wanthu winango kun’dzamalisa lini mabvuto yomwe yambabwera thangwe ra kukalamba. Ni Umambo bwa Mulungu bokha bomwe bun’dzamalisa pikado yomwe imbacitisa kuti tikalambe na kufa. — Aroma 5:12.

Napo bziri tenepo, bzomwe imwepo mumbacitira Yahova tsapano bzomwe bzimbaphatanidza kuthandiza winango kuti amudziwe, bzimbacitisa kuti cidikhiro canu cikhale cakulimba ndipo bzingacitisembo kuti mukhale na thanzi labwino. Acikulire, dziwani kuti Yahova ambawona bzomwe imwepo mumbamucitira pa basa lace ndipo gwere limbatenda ciratizo canu ca kukhulupirika.

Mwakuphatisa Basa Bibliya Mpfumakazi Idapulumusa Moyo wa Munthu

Mtsikana munango adapita pafupi na pomwe pakhana kangolo kathu ka mabukhu. Pomwe mpfumakazi yacikulire yomwe ikhadaima pa kangolopo idamala kumusana naye, idamubvunza penu bzingadakwanisika kuti imuwerengere vesi libodzi lakulimbikisa. Mpfumakaziyo idamuwerengera Jeremiya 29:11, omwe ambalewa kuti Yahova akufuna kuti tikhale na mtendere sikuti tsoka. Patsogolo pace, mpfumakaziyo idabvunza mtsikanayo kuti: “Kodi iwepo ukukwanisa kuwona kuti ni tsogolo liponi lomwe Mulungu akufuna kuti ukhale nalo?”

Mtsikanayo adakomedwa kwene-kwene pomwe adabva bzimwebzi. Iye adayamba kulira acilewa kuti: “Iye akufuna kuti ndikhale na mtendere na cidikhiro. Ndikutenda kwene-kwene thangwe ra kundiwerengera vesiri. Ndikukhulupira kuti umweyu ni mtawiro wa mpembo wangu. Ndikugumana na mabvuto mazinji pa moyo wangu. Bzinthu bzafika pakunesa kwene-kwene mwakuti ndikhakumbuka bza kubzipha. Kumacibese kuno ndapemba kwa Mulungu kuti andilatize penu akadandifuna. Patsogolo pace, imwepo omwe ne mumbandidziwa lini mwandiimisa mucindiwerengera vesi lomwe likulatiza kuti Mulungu ambandifuna. Bzimwebzi bziribe kundocitika bzokha.”

Mpfumakaziyo idalatiza mtsikanayo nkhani zakusiyana-siyana mu jw.org zomwe zingamuthandize kuphatisa basa Bibliya kuti akwanise kulimbana na makumbukidwe ya kubzipha. Mpfumakaziyo idamufotokozerambo momwe pfunziro la Bibliya limbacitidwira ndipo idamucemera kuti adzagumanike pa mitsonkhano. Pa sumana yakutewera yace, mtsikanayo adagumanika pa mitsonkhano ya kuphampha kwa sumana ndipo adayamba kupfunza Bibliya mwakuphatisa basa broxura lakuti: Khalani na Moyo Wakukondwa Mpaka Kale-kale!.

Bziribe basa magole yomwe munayo, imwepo mungapalizire mwakuphatisa basa kangolo.