Yahova Ambatetekera Mipembo ya Atumiki Wace

Nkhanizi zacosedwa mu Buku Lapachaka la Mboni za Yehova 2013

Mianmar

Tsamba 91, ndime 3 mpaka tsamba 92, ndime 1

Anyakupfunza Wakuyamba wa Mtundu wa Cikayin

Mu 1940, mpainiya munango dzina lace Ruby Goff, akhapalizira ku Insein, mzinda ung’ono omwe uli kunja kwa mzinda wa Yangon. Thangwe ra kusaya kugumana wanthu wakufuna kutetekera nsiku imweyo, Ruby adapemba kuti: “Yahova, ndithandizeni kugumana ‘bira’ m’bodzi yekha pomwe ndikanati kuyenda kumui.” Atacita bzimwebzo, pa nyumba yomwe adadzayendayo, iye adagumana Hmwe Kyaing, omwe akhali wa mtundu wa Cikayin wakunamata mu Igreja Batista, ndipo adatetekera bwino-bwino nkhani ya Umambo. Mu nthawe yakucepa, Hmwe Kyaing pabodzi na wana wace wacikazi, Chu May (Daisy) na Hnin May (Lily), wakhapfunza Bibliya, wacimbayenda bwino patsogolo mwauzimu. Napo Hmwe Kyaing adadzasaika patsogolo pace, mwana wace mkulu Lily adadzakhala wakuyamba kubatizidwa ninga Mboni ya Yahova mu mtundu wa Cikayin. Daisy adadzabatizidwambo.

Lily na Daisy wadakhala apainiya wa nyongo, ndipo wakadakumbukiridwa mpaka pano. Lero, azukulu wawo wazinji na anyakupfunza wawo wa Bibliya, wankutumikira Yahova ku Mianmariko na ku madziko manango.

Mianmar

Kwadru ya m’matsamba 108-109

Yahova Adafungula Njira

MAURICE RAJ

GOLE LAKUBADWA: 1933

GOLE LAKUBATIZIDWA: 1949

MBIRI YACE: Adamala magole yakuposa 50 ankucita utumiki bwa nthawe zense ku Mianmar, ndipo mbali ikulu adatumikira ninga nyakunyan’ganira mthambi. Iye akadatumikira mu Komiti ya Mthambi.a

MU 1988, mu mzinda ya Yangon mudayamba ciphiringu ca ciwembo, comwe wanthu bzulu bzizinji wadadzala m’miseu pakufuna kuti boma licinjidwe. Bzinthu bzitafika pakunesa, wacikunda wadalanga bomalo, waciikha bzakutonga bza ucikunda m’mbuto zizinji za m’dzikolo. Wadaphedwa wanthu bzulu bzizinji womwe wakhacita phiringulo.

Mwezi ubodzi-bodziyo, tidafuna kutumiza relatorio ya pa gole ya mthambi yathu ku likulu ku Nova York; tsono zikhadagwatidwa njira zense zakutumizira matsamba, ndipo tikhalibe njira inango yakutumiza relatorioyo kunja kwa dziko lathulo. Patsogolo pace, tidabva kuti Mtumi wa ku Estados Unidos akhafuna kutumiza matsamba ku dziko lawo na cinkhupukupu. Nditakumbuka kuti relatorio yathuyo ingatumizidwe pabodzi na matsamba yawoyo, ndidabvala fato yomwe ndikhaithemba kwene-kwene na gravata, ndiciyenda kagumana na mtumiyo.

Pomwe ndikhafambisa kanderendere mu mzinda womwe ukhali wa matope yokha-yokha, ndidawona kuti mu mseumo mukhalibiretu munthu na m’bodziyo. Mu nthawe yakucepa, ndadzawona kuti mseu womwe ndikafuna kupitayo ukhadafungidwa na cimuti, ndidandoimisa kandere-ndereyo ku mbali kwa mseu, ndicifamba na minyendo mtantho ukhadasalayo.

Nditafika pafupi na pa cipata ca mtumiyo, ndidawona wanthu madzana mazinji wankumbakuwa pakufuna kupita, tsono wacikunda wa ukali wakhafunga cipataco. Ndidaima, ndicipemba mwakazizizi. Nyakupfunza munango atawona kabvalidwe kangu, adakuwa kuti: “Munthuyu angakhale nyabasa wa m’mwemu.” Pamwepo, ine ndidapapatidza pakati pa thimulo. Pomwe ndidafika pa cipata cakufungidwa ca nyumba ya mtumiyo, mcikunda wamphanvu adandinyang’anisa mwa kuzimbwa.

Iye adandibvunza mwa ukali kuti: “Ndiwe mbani, ndipo un’funa ciani?”

Ine ndidati: “Ndin’funa kuwonana na mtumi. Ndina nkhani yakufunika kwene-kwene kuti nditumize ku America.”

Iye adandinyang’anisisa mwa ka nthawe. Mwadzidzidzi, adafungula cipataco, acindipfuwira mkati. Ndipo mwakanfulumize adafunga cipataco pomwe thimu lire likhafuna kuyamba kupita.

Iye adandiuza kuti: “Nditewere.”

Titafika pa msuwo pa mtumiyo, mcikunda ule adandisiya m’manja mwa munthu munango omwe akhawoneka wakuneta, ndipo adandibvunza bzomwe ndikhafuna.

Ndidamufokotozera kuti: “Ndacokera ku xikiritorio ya Sociedade Torre de Vigia. Ndina relatorio yakufunika kwene-kwene yomwe bzin’funika ifike mwezi umweuno ku likulu lathu ku Nova York.” Kodi munganditumizirembo pabodzi na matsamba yanuyo?” Nditam’pasa munthuyo envelopi yangu yakufunika ire, ndidamuuza kuti: “Pepani, ndiribe kuikha selo.”

Mwakudabwa, munthuyo adandicita mibvunzo pang’ono, acinditsimikizira kuti angadatumiza relatoriyoyo. Patsogolo pace ndidadziwa kuti relatorioyoyo idafika ku likuluko mkati mwa nthawe.

[Mafala ya m’nyansi]

[Mafala yakutsindika pa tsamba 9]

Nditam’pasa munthuyo tsamba envelopi yangu yakufunika ire, ndidamuuza kuti: “Pepani, ndiribe kuikha selo.”