Tiri Lini Tekha

Nkhanizi zacosedwa mu Buku Lapachaka la Mboni za Yehova 2013

Africa

Tsamba 47, ndime 1 mpaka tsamba 48, ndime 2

Akhapalizira Yekha-yekha ku Mzinda Wakutali

Davide omwe ambakhala ku Kenya, pa nthawe inango adacoka kwawo, acikakhala mu mzinda munango wakutali. Ali kumweko, adayamba kupfunza Bibliya na Mboni za Yahova. Mwakusaya kukhalisa, iye adabwerera ku mudzi kwace ku Lokichar, kubodzi na kumpoto kwa dziko la Kenya. Kucokera kwaceko, gwere la pafupi likhagumanika pa mtantho wa 165 kilometro, ku mzinda wa Lodwar. Davide adacita magole manai ankugumana lini na Mboni, koma iye akhapalizira wadzinza wace na anzace wakufendererana nawo mui, aciwadziwisa bzinthu bzomwe iye akhadapfunza mu nthawe yakucepa yomwe iye adapfunza Bibliya. Winango wadabvuma, ndipo mu nthawe yakucepa iye akhacitisa mapfunziro mazinji ya Bibliya. Mu 2007, iye adanembera abale ku Lodwar, acipitiriza pfunziro lace, mwakumbacita ulendo kawiri pa mwezi na mota, kanderere-ndere na minibazi.

Pomwe cidziwiso cace cikhathimizirika, nyongo ya Davide mu utumiki, idathimizirambo. Akanati kubatizidwa, iye adamanga “Nyumba ya Umambo” ya dongo yakundodikhirira, yakupsimphiridwa na mauswa pafupi na pa mui pace, komwe akhacitisa mitsonkhano na womwe wakhafuna. Tsono, si wense m’mudzimo wadakomedwa na upalizi bwace, ndipo mkati mwa magole mawiri iye akhatukanidwa na kumbamenyedwa. Pa nthawe inango, wanthu wa m’mudzimo wadamumenya m’mpaka kukomoka, wacimbamunamizira kuti iye akhapitisa “Cipembedzo ca madimonyo” m’mudzimo. Na tenepo, Davide atakumbira thandizo kwa mkulu wa boma, wanthuwo wadaleka kumuboneresa, ndipo Davide adapitiriza kupalizira. Davide adati: “Cadidi ndico moyo wangu, ndipo napo wandizunze, ndinicisiya lini.”

Mu 2009, Davide adabatizidwa, ndipo iye tsapano ankutumikira ninga mtumiki wakuthandiza na mpainiya wakukhazikika. Iye na mwana wace wacimuna wa magole 15 yakubadwa ndiwo wokha Mboni za Yahova ku dera lenselo. Tsono mu Abril 2012, wanthu 60 wa m’mudzimo wadawonekera pa Cikumbuso ca infa ya Kristu, cakucitidwa m’Nyumba ya Umambo yakundodikhirira ire, pafupi pa nyumba ya Davide.