Yahova Ambabaira Wale Omwe Ambamulinga na Mtima Wense

1, 2. (a) Kodi lufoyi na cikhulupiro bzimbabverana tani? (b) Kodi tin’cezerana mibvunzo iponi?

BABA WATHU, Yahova, ambapicira kusimba atumiki wace wakukhulupirika. Imweyi ni njira ibodzi yomwe Yahova ambalatizira lufoyi lace kuna ife ndipo ife timbamufuna ‘thangwe iye ndiye omwe adayamba kutifuna.’ (1 Juwau 4:19) Pomwe lufoyi lathu kuna Yahova linkukula, cikhulupiro cathu cimbalimba ndipo tinkutsimikiza kuti Yahova an’dzasimba wale omwe iye ambawafuna.—Werengani Wahebereu 11:6.

² Yahova ambafunisisa kubaira! Imweyi ni mbali ya khalidwe lace. Tenepo cikhulupiro cathu kuna Mulungu cingakhale lini cakukwanira penu timbakhulupira lini kuti iye an’dzabaira wale omwe ambamulinga na mtima wense. Thangwe ranyi tinkulewa tenepo? Ni thangwe rakuti ‘cikhulupiro ndico cidikhiro cakutsimikizika ca bzinthu bzakudikhiridwa.’ (Wahebereu 11:1) Cikhulupiro cimbathandauzambo kukhala na citsimikizo camphanvu cakuti Mulungu an’dzasimba atumiki wace wakukhulupirika. Kodi cidikhiro ca mabaibaiyo cingatithandize tani? Kodi Yahova adasimba tani atumiki wace wa kale? Kodi iye ambasimbambo tani atumiki wace nsiku zino? Bwerani tiwone.

YAHOVA AMBAPICIRA KUSIMBA ATUMIKI WACE

3. Kodi ni piciro liponi lomwe timbaligumana pa Malakiya 3:10?

³ Yahova Mulungu adapicira kusimba atumiki wace wakukhulupirika. Iye ankutiuza kuti timucitire bzabwino bzomwe tingakwanise ticikhulupira kuti iye an’dzatisimba. Yahova adalewa kuti: ‘Ndaphata minyendo ndiyezeni, kuti muwone penu ndin’dzakufungulirani lini misuwo ya kudzulu ndicikutsanulirani bzisimbo bzomwe mun’dzasaya pakubzitambirira.’ (Malakiya 3:10) Kubvuma mcemo wa Yahovayu kumbalatiza kuti timbamukhulupira.

4. N’thangwe ranyi tingakhulupire piciro la Jezu la pa Mateu 6:33?

⁴ Jezu adauza anyakupfunza wace kuti penu iwo angadaikha Umambo pa mbuto yakutoma, Mulungu angadawathandiza. (Werengani Mateu 6:33.) Jezu adalewa bzimwebzi thangwe iye akhadziwa kuti mapiciro ya Mulungu nthawe zense yambakwanisika. (Zaiya 55:11) Ifepano tingatsimikizembo kuti tikakhulupira Yahova na mtima wense, iye an’dzaphatisisa piciro lace lakuti: ‘Ndin’dzakuthawani lini na pang’onopo ne kukusiyani.’ (Wahebereu 13:5) Piciro limweri limbatithandiza kukhulupira mafala ya Jezu ya pa Mateu 6:33.

5. N’thangwe ranyi mtawiro wa Jezu kuna Pedru ngwakulimbisa tensenefe?

⁵ Pa nthawe inango mpostolo Pedru adabvunza Jezu kuti: ‘Ifepano tasiya bzinthu bzense ndipo takutewerani; tsono n’ciyani comwe ife tin’dzagumana?’ (Mateu 19:27) Jezu alibe kukalipa na mbvunzo wa Pedru. M’mbuto mwace, Jezu adauza anyakupfunza wace kuti an’dzasimbidwa thangwe ra kubzipereka kwawo. Apostolo na atumiki winango wakukhulupirika, an’dzatonga pabodzi na Jezu kudzulu. Koma Jezu adalewa pomwe kuti napo tsapano tingagumane bzisimbo. Iye adati: ‘Ali-wense omwe adasiya nyumba, abale, mpfumakazi, abereki, wana ayai minda thangwe ra dzina langu an’dzatambira bzizinji kuposa bzimwebzi ndipo an’dzagumana moyo wakusaya kumala.’ (Mateu 19:29) Ateweri wense wa Jezu angagumane baba, mai, abale, mpfumakazi na wana mu gwere nsiku zino. Bzimwebzi n’bzakufunika kwene-kwene kuposa cinthu ciri-cense comwe tingasiye kuti tibzipereke pakuthandizira Umambo bwa Mulungu.

CIDIKHIRO CA MOYO

6. N’thangwe ranyi Yahova adapicira kubaira atumiki wace?

⁶ Kuthumizira pa bzisimbo bzabwino bzomwe tinabzo tsapano, tinkudikhira bzisimbo bzizinji kutsogolo. (1 Timotio 4:8) Kudziwa kuti Yahova adapicira kubaira atumiki wace wakukhulupirika, kumbatithandiza kuti tipirire tikambagumana na mabvuto. Tikatsimikiza kuti Yahova ‘ambabaira wale omwe ambamulinga na mtima wense,’ tin’dzapitiriza kukhala wakukhulupirika.—Wahebereu 11:6.

7. N’thangwe ranyi cidikhiro ciri ninga ndangula?

⁷ Pa Nkhani ya pa Phiri, Jezu adati: ‘Kondwani, mucimoga mwakukomedwa pakuti mabaibai yanu ni mazinji kudzulu; thangwe n’tenepa momwe iwo adazunzirambo apolofeta pomwe imwepo mukhanati kuwoneka.’ (Mateu 5:12) Atumiki winango wa Mulungu an’dzatambira mabaibai yawo kudzulu. Ndipo winango an’dzatambira mabaibai ya moyo wakusaya kumala mu paraizo pansi pano. Limweri ni thangwe linango lomwe lingaticitise kuti ‘tikondwe ticimoga mwakukomedwa.’ (Psalymo 37:11; Luka 18:30) Koma tensenefe, cidikhiro cathu cingakhale ninga ‘ndangula ya moyo, yakulimba na yamphanvu.’ (Wahebereu 6:17-20) Ninga ndangula yomwe imbacitisa kuti ngalawa m’madzi ileke kutengeka na conzi, cidikhiro cathu camphanvu cingatithandizembo kupitiriza kukhala wakulimba. Cingatipasembo mphanvu kuti tipirire pa nthawe ya mabvuto.

8. Kodi cidikhiro cathu cimbacepesa tani thupo?

⁸ Cidikhiro cathu cingatithandize kuti ticepese thupo. Ninga mankhwala yomwe yambaderekhesa mtima, mapiciro ya Mulungu yambaderekhesembo thupo lathu. N’bzakukondwesa kudziwa kuti Yahova an’dzatisamalira tikamutulira thupo lathu. (Psaylmo 55:22) Tingatsimikize na mtima wense kuti Mulungu angacite ‘bzinthu bzikulu kwene-kwene kuposa bzense bzomwe timbakumbira.’ (Wayefezo 3:20) Yahova an’dzatithandiza, sikuti mwa kutipasa bzinthu bzikulu basi, koma ‘bzinthu bzikulu kwene-kwene kuposa bzense’!

9. Kodi tin’funika kucita ciyani kuti tidzatambire bzisimbo bza Yahova?

⁹ Kuti titambire mabaibai, tin’funika kukhala na cikhulupiro camphanvu kuna Yahova na kumbabvera malango yace. Mozeji adauza mtundu wa Jirayeri kuti: ‘Yahova an’dzakusimbanidi ku dziko lomwe Yahova Mulungu wanu ankukupasani kuti likhale ninga utaka bwanu, koma kokha mukabvera mafala ya Yahova Mulungu wanu na kusunga mwakusamala malamulo yense yomwe ndikukuuzani leroya. Yahova Mulungu wanu an’dzakusimbani ninga momwe iye adakupicirirani.’ (Bzakutonga 15:4-6) Kodi munkutsimikiza na mtima wense kuti Yahova an’dzakusimbani mukapitiriza kumutumikira mwakukhulupirika? Muna thangwe labwino lakukhulupira bzimwebzi.

IWO ADASIMBIDWA NA YAHOVA

10, 11. Kodi Yahova adasimba tani Zuze?

¹⁰ Bibliya lidanembedwa kuti litithandize. Iro lina bziratizo bzizinji bza momwe Mulungu adasimbira atumiki wace wakukhulupirika wa kale. (Waroma 15:4) Zuze ni ciratizo cabwino pa nkhaniyi. Iye adagulisidwa ninga kapolo na abale wace caiwo. Patsogolo pace, mkazi wa mbuya wace adamunamizira ndipo adaikhidwa m’kawoko ku Edjipito. Kodi Yahova akhadayebweratu Zuze pomwe akhali m’kawokomo? Ne na pang’onopo! Bibliya limbati: ‘Yahova adapitiriza kukhala na Zuze acimulatiza lufoyi lakukhulupirika,’ ndipo ‘Yahova akhana Zuze ndipo bzense bzomwe Zuze akhacita bzikhambamufambira bwino.’ (Ciyambo 39:21, 23) Napo pa nthawe zakunesazo, Zuze adadikhira Mulungu wace.

¹¹ Na kupita kwa magole, Farawo adacosa Zuze m’kawoko ndipo Zuzeyo adadzakhala mtongi waciwiri wamphanvu m’dziko la Edjipito. (Ciyambo 41:1, 37-43) Pomwe Zuze na mkazi wace adakhala na wana awiri, ‘Zuze adapasa mwana wakuyamba kubadwa dzina lakuti Manase, pakuti iye adati, Mulungu wandicitisa kuti ndiyebwe mabvuto yangu yense na nyumba yense ya baba wangu.’ Ndipo mwana waciwiri adamupasa dzina lakuti Efraimu, pakuti iye adati, “Mulungu wandipasa wana m’dziko la matsautso yangu.”’ (Ciyambo 41:51, 52) Yahova adasimba Zuze wakukhulupirikayo ndipo iye adapulumusa Ajirayeri pabodzi na Aedjipito pa nthawe ya njala. Ndipo Zuze akhadziwa kuti bzisimbobzi bzikhacokera kwa Yahova.—Ciyambo 45:5-9.

12. Kodi n’ciyani comwe cidathandiza Jezu kuti apitirize kukhala wakukhulupirika?

¹² Jezu Kristu adapitirizambo kubvera Mulungu napo pomwe akhagumana na mayezo yakuwawa ndipo Yahova adamusimba. Kodi n’ciyani comwe cidathandiza Jezu kuti apitirize kukhala wakukhulupirika? Fala la Mulungu limbati: ‘Thangwe ra cikondweso comwe adamuikhira patsogolo pace, iye adapirira muti wakuzunzikira, iye alibe kucita thupo na manyazi.’ (Wahebereu 12:2) Jezu adagumanadi cikondweso mwa kukwanisa kucenesa dzina la Mulungu. Ndipo Jezu adasimbidwa na baba wace ndipo adapasidwa maudindo mazinji yakudabwisa. Bibliya limbalewa kuti iye ‘adakhala pansi ku boko la madidi la mpando wa umambo wa Mulungu.’ Timbawerengambo kuti: ‘Mulungu adamukwizika pa mbuto ya padzulu kwene-kwene, acimupasa mwakudeka mtima dzina lomwe liri padzulu pa madzina yense.’—Wafiripo 2:9.

YAHOVA AMBAYEBWA LINI BZOMWE TIMBACITA

13, 14. Kodi Yahova ambawona tani bzomwe timbamucitira?

¹³ Dziwani kuti Yahova ambatenda bzinthu bzense bzomwe timbacita kuti timutumikire. Iye ambadziwa kuti nthawe zinango tingabziwone ninga ndife mtazi. Iye ambatisamalira pomwe tinkugumana na bzineso ku basa ayai tikakhala na thupo na momwe tingasamalirire banja lathu. Ndipo iye ambabvesesa tikatazira kucita bzinthu ninga momwe tikhafunira mu utumiki bwace thangwe ra kuduwala ayai kusunama. Tingatsimikize kuti Yahova ambatenda kukhulupirika kwathu napo kuti timbagumana na mabvuto.—Werengani Wahebereu 6:10, 11.

¹⁴ Lekani kuyebwa kuti Yahova ni ‘Mbveseri wa mpembo.’ Tingatsimikize kuti tikapemba, iye an’dzatibva. (Psalymo 65:2) ‘Baba wa nsisi zikulu na Mulungu omwe ambatitsangalaza mu njira iri-yense’ an’dzatipasa bzinthu bzense bzomwe n’bzakufunikira kuti tipitirize kukhala xamwali wace. Nthawe zinango iye angaphatise basa abale na mpfumakazi zathu kuti atithandize. (2 Wakolinto 1:3) Yahova ambatenda tikambacitira nsisi winango. ‘Omwe anidekera mtima munthu wakusauka ankukumbiza Yahova ndipo iye an’dzamubwezera bzomwe wacitabzo.’ (Mimwani 19:17; Mateu 6:3, 4) Tenepo, tikambapasa na kuthandiza abale wathu, Yahova ambawona bzabwino bzomwe tacitabzo ninga kuti iye ana mangawa na ife. Ndipo iye ankupicira kutibaira thangwe ra kudeka mtima kwathuko.

MABAIBAI YATSAPANO NA YAKUTSOGOLO

15. Kodi ni bzisimbo bziponi bzomwe imwepo pamwekha munkudikhira pa moyo wanu? (Onani cithunzi-thunzi pa tsamba 21.)

¹⁵ Akristau wakudzozedwa ana cidikhiro ca kutambira ‘nsinga-msolo yacilungamo,’ kuna Jezu. (2 Timotio 4:7, 8) Tenepo, penu muna cidikhiro cakusiyana, bzinkuthandauza lini kuti ndimwe lini wakufunika kuna Mulungu. Wanthu azinji kwene-kwene wa ‘mabira manango’ ya Jezu ankufunisisa kudzatambira mabaibai ya moyo wakusaya kumala m’paraizo pansi pano. M’mwemo ‘anyakulungama an’dzatambira dziko la pansi, acidzapfatsa na mtendere muzinjisa.’—Juwau 10:16; Psalymo 37:11.

16. Kodi ni mafala yaponi yakutsangalaza yomwe timbagumana pa 1 Juwau 3:19, 20?

¹⁶ Nthawe zinango tingawone ninga kuti tinkucita lini bzizinji mu utumiki bwa Yahova ayai tingapenukire penu Yahova ankukomedwa na bzomwe tinkucita. Pinango tingawone ninga tinkuthemera lini kutambira mtundu uli-wense wa mabaibai. Koma tin’funika lini kuyebwa kuti ‘Mulungu ni mkulu kuposa mitima yathu ndipo ambadziwa bzinthu bzense.’ (Werengani 1 Juwau 3:19, 20.) Pomwe tinkutumikira Yahova thangwe ra cikhulupiro pabodzi na lufoyi, tingatsimikize kuti iye an’dzatisimba, napo penu tinkuwona kuti bzomwe tinkucita n’bzakucepa kwene-kwene.—Marko 12:41-44.

17. Kodi ni bzisimbo bzinango bziponi bzomwe tinabzo tsapano?

¹⁷ Yahova ankusimba wanthu wace, napo nthawe zino zakumalizira za mkonzedwe wakuipa wa Sathani. Iye ankuwonesesa kuti tinkutambira cidziwiso cakufunikira na mtendere ninga mbali ya gulu lense la abale. (Zaiya 54:13) Ninga momwe Jezu adapicirira, Yahova ankutisimba tsapano na banja la lufoyi la abale na mpfumakazi wa pa dziko lense. (Marko 10:29, 30) Kuthumizira bzimwebzi, wale omwe ankulinga Mulungu na mtima wense ankusimbidwa na mtendere wa mu mtima, m’tsangalazo na cikondweso.—Wafiripo 4:4-7.

18, 19. Kodi atumiki wa Yahova ambawona tani bzisimbo bzomwe ambatambira?

¹⁸ Ninga atumiki wa Yahova, kuzungulira dziko lense la pansi, tinkutambira bzisimbo bzakucokera kwa Baba wathu. Mwa ciratizo, Bianca ku Alemanha adalewa kuti: “Ndin’dziwa lini momwe ndingamutendere Yahova thangwe ambandithandiza ndikakhala na thupo ndipo nthawe zense ambakhala ku mbali kwangu. Dziko kunjaku liri pa mabvuto. Ndimbabzibva kukhala wakukhotcerereka m’manja mwace thangwe ra kukhala pa uxamwali na Yahova. Kubzipereka komwe ndimbacita kuna iye, kumbandendemerana lini na bzisimbo bzomwe iye ambandipasa.”

¹⁹ Kumbukirani bza Paula wa magole 70 yakubadwa wa ku Canadá omwe ana matenda makulu ya msana. Iye adalewa kuti matendayo yambamutazisa kufamba na kucita bzinthu bzizinji, koma bzimwebzi bzimbamutazisa lini kupalizira. Iye adati: “Ndimbayezera kupalizira mu njira zakusiyana-siyana ninga upalizi bwa kuphatisa basa mtedwe na upalizi bwakusaya kulinganizidwa. Cinthu comwe cimbandithandiza ni kunemba mu caderno mavesi na nfundo zinango za m’mabukhu yathu kuti ndimbaziwerenge nthawe na nthawe. Ndipo ndimbamucemera kuti ‘Caderno Wangu wa Cipulumuso.’ Thupo limbacepa tikambakumbukira bzisimbo bza Yahova. Yahova nthawe zense ngwakukonzeka kutithandiza, bziribe basa mabvuto yomwe tinkugumana nayo.” Bvuto lomwe munkugumana nalo lingakhale lakusiyana kwene-kwene na la Bianca ayai la Paula. Tenepo, imwepo mungakumbukire momwe Yahova ambakusimbirani na momwe ambasimbirambo winango omwe mumbawadziwa. N’bzabwino kwene-kwene kukumbukira momwe Yahova ankukusimbirani tsapano na momwe an’dzakusimbirani kutsogolo!

20. Kodi n’ciyani comwe tingadikhirire tikapitiriza kucita bzinthu bzabwino kuti titumikire Yahova mwakukhulupirika?

²⁰ Lekani kuyebwa kuti mipembo yanu yakucokera pansi pa mtima ‘in’dzasimbidwa kwene-kwene.’ Mungatsimikize kuti ‘mukacita bzomwe Mulungu akufuna, mun’dzatambira bzomwe iye adapicira.’ (Wahebereu 10:35, 36) Tenepo bwerani tipitirize kulimbisa cikhulupiro cathu na kucita bzense bzomwe tingakwanise kuti titumikire Yahova. Tina citsimikizo cakuti Yahova an’dzatisimba!—Werengani Wakoloso 3:23, 24.