Kodi Pfunziro la Bibliya N’ciyani?
Mboni za Yahova zina programa yakupfunzisa wanthu Bibliya, yomwe imbatawira mibvunzo mizinji, kuphatanidzambo mibvunzo yakuti:
Kodi Mulungu ni mbani?
Kodi Mulungu ambandisamaliradi?
Kodi ningacite tani kuti banja langu likhale na moyo wakukondwa?
Kodi ningagumane tani cikondweso pa moyo wangu?
M’nyantsimu, mun’gumana mitawiro ya mibvunzo yomwe wanthu kawiri-kawiri ambabvunza pakulewa bza programa yathu ya pfunziro la Bibliya.
Kodi pfunzirolo limbacitidwa tani? Timbanyang’ana nkhani ninga zakuti “Mulungu” ayai “Malowozi” ndipo timbawona pabodzi mavesi ya m’Bibliya yomwe yambalewa bza nkhani zimwezi. Pakucezerana bza mavesiyo timbakwanisa kuwona bzomwe Bibliya lentse limbalewa bza nkhaniyo, ndipo mwa njira imweyi timbakhala tikusiya kuti Bibliya lifotokoze lokha.
Kuti bzikhale bzakupusa pakupfunza Bibliya, timbaphatisa basa bukhu lakuti Bzomwe Bibliya Limbapfunzisa. Bukhu limweri lina nkhani zizinji. Ndipo limbafotokoza mwakubveka bwino bzomwe Bibliya limbapfunzisa pakulewa bza Mulungu, Jezu, na bzomwe bzin’dzacitika kutsogolo.
Kodi munthu an’funika kupagali kobiri zingasi kuti apfunzisidwe Bibliya? Pfunzirolo ndafovolo, ndipo mun’funika lini kupagali bukhu lomwe mun’dzaphatisa basa.
Kodi pfunzirolo limbamala nthawe zingasi? Wanthu azinji ambaphatisa basa ora ibodzi mdzinga uli-wentse kuti apfunze nafe Bibliya. Koma kazinji-kazinji bzimbathemba imwepo. Timbabvuma kupfunza na wanthu mwakubverana na nthawe yawo.
Kodi n’ciyani cin’dzacitika ndikakumbira pfunziro la Bibliya? Mukakumbira pfunziro la Bibliya, m’bodzi wa Mboni za Yahova za kwanuko an’dzakuzungirani ku mbuto na nthawe yakukudekerani. Iye an’dzakulatizani mu mphindi zakucepa momwe pfunziro la Bibliya limbacitidwira. Ndipo mukakomedwa nabzo, mungapitirize kupfunza.
Ndikabvuma pfunziro la Bibliya, kodi nin’dzakhaliratu Mboni ya Yahova? Nee. Mboni za Yahova zimbakomedwa kupfunzisa wanthu bzinthu bza m’Bibliya, koma timbawangingimiza lini kuti apite cipembedzo cathu. M’mbuto mwace, timbawafotokozera mwaulemu bzomwe Bibliya limbalewa, ticikumbukirambo kuti ali-yentse ana ufulu bwa kusankhula yekha bzomwe akufuna kukhulupira.—1 Pedru 3:15.