12 Kukhala Na Bzakulinga

THANDAUZO LACE

Bzakulinga ni bzinthu bzomwe munthu ambafuna kudzabzikwanirisa. Bzimbaphatanidza kukonzekera bwino, kucinja bzinthu bzinango na kucita nyongo kuti adzakwanirise bzakulingabzo.

Bzakulinga bzimbakhala bzakusiyana-siyana. Bzinango bzimbamala nthawe ing’ono, ntsiku ayai midzinga kuti bzikwanirisidwe. Ndipo bzinango bzimbamala nthawe zizinji, minyezi ayai gole. Nthawe zizinji timbafunika kukwanirisa bzakulinga bzing’ono-bzing’ono kuti tidzakwanirise bzakulinga bzikulu-bzikulu.

THANGWE RANYI BZIMWEBZI MPSAKUFUNIKIRA?

Mukakwanirisa bzakulina bzanu, mumbakhala wakukhwimika, anzanu ambakuthembani ndipo mumbakhala wakukondwa kwene-kwene.

Kukhwimika: Imwepo mukakwanirisa bzakulinga bzing’ono-bzing’ono, mumbakhala na citsimikizo cakuti mun’kwanisambo bzakulinga bzikulu-bzikulu. Ndipo mumbakhala wakukonzeka kulimbana na mayezo ntsiku na ntsiku. Mwa ciratizo, imwepo mungabvume lini kuti anzathu akungingimizeni kucita bzinthu bzomwe mpsakuphonyeka.

Axamwali wanu: Wanthu azinji ambafuna kukhala pa uxamwali na wanthu omwe ana bzakulinga ndipo ambacita nyongo kuti abzikwanirise. Mwa ciratizo, imwepo na xamwali wanu mukakhala na cakulinga cibodzi-bodzi ndipo mukaphata basa pabodzi kuti mucikwanirise, mun’dzacitisa kuti uxamwali bwanu bukhale bwakulimba kwene-kwene.

Kukhala wakukondwa: Mukakwanirisa bzakulinga bzanu, mumbakomedwa kwene-kwene.

Christopher adalewa kuti: “Ine nimbafuna kwene-kwene kukhala na bzakulinga. Bzimbandithandiza kukhala na bzakucita nthawe zentse. Ndipo munthu ukakwanirisa cakulinga comwe ukhanaco, umbakomedwa kwene-kwene mu mtima. Ndipo ukambakumbukira umbandoti, ‘Ndikhafuna bzire bzakwanisika!’”

NFUNDO YA M’BIBLIYA: “Ule omwe ambadikhirira mphepo kuti icinje na kudikhirirambo kuti nthawe ikhale bwino kuti abzale, an’dzabvuna lini.—Mpalizi 11:4,Bíblia na Linguagem de Hoje.

BZOMWE MUNGACITE

Phatisani basa bzomwe bziri m’nyantsibzi kuti mukwanirise bzakulinga bzanu.

Bzakulinga. Nembani bzakulinga bzomwe mukufuna kubzikwanirisa. Ndipo mukamala sankhula bzakulinga bzomwe mukufuna kuti bzikhala pa mbuto yakuyamba, yaciwiri, yacitatu mpaka kumaliza kukwanirisa bzentse.

Citani makonzedwe: Pa cakulinga ciri-centse, citani ibzi:

• Nembani nthawe yomwe mukufuna kudzakwanirisa cakulingaco.

• Nembani bzomwe mungateweze kuti mukwanirise cakulinga canu.

• Kumbukirani mabvuto yomwe mungadzagumane nayo na bzomwe mungadzacite.

Citani mwakamfulumize: Imwepo mun’funika lini kudikhira kuti bzinthu bzentse bzikhale bwino kuti muyambe kubzicita. Bzibvunzeni kuti: ‘Kodi n’ciponi cinthu cakuyamba comwe nin’funika kucita kuti ndikwanirise cakulinga cangu?’ Mukamala citani ibzi. Nembani bzentse momwe bzikufambira na njira zomwe mwateweza.

NFUNDO YA M’BIBLIYA: ‘Munthu wa nyongo an’dzagumana phindu pa bzakulinga bzace.’—Mimwani 21:5.