Moyo wa Banja na Axamwali Wabwino
Wanthu azinji bzimbawanesa kubverana na abale pabodzi na axamwali wawo. Onani momwe nfundo za m’Bibliya zingakuthandizeni kukhala wakubverana na anzanu.
LEKANI KUKHALA WADYERA
NFUNDO YA M’BIBLIYA: ‘Lekani kumbandokumbukira bzakufuna bzanu bzokha, koma mumbakumbukirembo bzakufuna bza wanthu winango.’—Wafiripo 2:4.
THANDAUZO LACE: Tingakhale pa mbverano wabwino na wanthu winango, tikambalinga kuwacitira bzinthu sikuti kumbandodikhira kuti iwo aticitire. Mukakhala wadyera, mungadzonge mbverano wanu na winango. Mwa ciratizo, munthu omwe ali pa banja akakhala wadyera acimbandolinga bzakufuna bzace, angafike pakusiya mwanzace wa m’banjamo acikagonana na munthu munango. Ndipo palibe omwe angafune kukhala pa uxamwali na munthu omwe nthawe zense ambandofuna kulewa bzinthu bzomwe anabzo na bzomwe ambadziwa. Bukhu linango lomwe lacosedwa tsapanopapa limbalewa kuti “wanthu omwe ambandokumbukira bza iwo wokha sikuti bza winango, ambagumana na mabvuto mazinji.”
BZOMWE MUNGACITE:
Mbathandizani winango. Axamwali wabwino ambakhulupirana ndipo ambathandizana nthawe zense. Kafukufuku munango ambalatiza kuti munthu omwe ambathandiza mwanzace, ambacepesa thupo ndipo ambabziwona kuti ngwakufunika.
Mbabverani nsisi winango. Nsisi ni kubva kuwawidwa komwe munthu munango akubva. Munthu omwe ana nsisi, ambalewa lini mafala yakusenzeka na cakulinga cakufuna kukalipisa winango.
Mukambabvera nsisi winango, bzin’dzakhala bzakusaya kunesa kuzindikira kusiyana pakati pa imwepo na iwo.Tenepo, nsisi zin’dzakuthandizani kumalisa tsankhulo na kucita uxamwali na wanthu wa miyambo na makhalidwe yakusiyana-siyana.
Mbacezani na winango. Mukambapambula nthawe kuti muceze na winango, bzin’dzakuthandizani kuwadziwa bwino. Mukafuna kukhala na xamwali wabwino, mun’funika kuceza naye bzinthu bzomwe bzingamudekere na bzomwe mpsakufunika kwa iye. Ndipo akambalewalewa, mbamutetekerani ndipo mbalatizani kuti munaye thupo. Tsapanopapa kafukufuku munango adalewa kuti, “maceza ninga yamweya yambacitisa wanthu kukhala wakukondwa kwene-kwene.”
MBASANKHULANI AXAMWALI MWANZERU
NFUNDO YA M’BIBLIYA: ‘Kubverana na wanthu wakuipa kumbadzonga makhalidwe yabwino.’—1 Wakolinto 15:33.
THANDAUZO LACE: Wanthu omwe mungakhale nawo pa uxamwali, angakupfunziseni bzinthu bzabwino ayai bzakuipa. Adziwi winango ambatawirizambo nfundo imweyi ndipo ambalewa kuti wanthu akakhala pa uxamwali, ambatewezerana bzakucita. Mwa ciratizo, iwo ambalewa kuti munthu omwe ambafamba na wanthu omwe ambafumali ayai adamalisa malowozi yawo, iye ambadzayambambo kufumali ayai kukhumba kumalisa malowozi yace.
BZOMWE MUNGACITE: Khalani pa uxamwali na wanthu omwe ana makhalidwe yabwino yomwe imwepo mumbayafuna. Mwa ciratizo, nyang’anani wanthu omwe ambacita bzinthu mwakukumbukira anzawo, wa ulemu, wakupasa na wakutambira bwino alendo kuti akhale axamwali wanu.
NFUNDO ZINANGO ZA M’BIBLIYA
Onani mavidiyo yakulewa bza Bibliya yomwe yadakonzedwa kuti yathandize mabanja, maswaka na wana kuti akhale na moyo wakukondwa
MBATCENKHANI KULEWA MAFALA YOMWE YANGAKALIPISE WINANGO.
‘Mafala yakulewedwa mwakusaya kukumbuka yali ninga kulasa kwa mphanga.’—MIMWANI 12:18.
KHALANI WAKUPASA.
‘Munthu wakupasa, an’dzasimbidwa.’—MIMWANI 11:25.
MBACITIRANI BZINTHU WINANGO NINGA MOMWE MUNGADAFUNIRA KUTI AKUCITIRENIMBO.
‘Bzinthu bzense bzomwe mun’funa kuti wanthu akucitireni, imwepo muwacitire bzibodzi-bodzibzo.’—MATEU 7:12.