Bzomwe Bzingakutsangalazeni Mukakhala Na Thupo
Kodi Muna Thupo?
“Munthu ali-wentse ambakhala na thupo, koma inepano ndalemweratu. Thangwe ndikulimbana na mabvuto mazinji, ndipo bvuto likulu kwene-kwene ni mayezo yomwe ndikugumana nayo pakusamalira bayangu omwe akuduwala kwa magole mazinji.”— Júlia.a
“Mkazangu adandithawa, acindisiyira wana awiri omwe ndidalera ndekha. Bzidandiwawa kwene-kwene kulera ndekha wana. Kuthimizira bzimwebzi, ndidacosewa basa, ndipo ndikhalibe kobiri zakukonzesera kandere-ndere wangu. Kulewa cadidi, ndikhadziwa lini kuti ningadaphata muti wanyi, tenepo ndikhana thupo kwene-kwene. Ndikhadziwa kuti kubzipha ni pikado, ndipopa ndidadandaulira Mulungu kuti amalise mabvuto yanguyo.”— Barry.
Kodi imwepo mukagumana na mabvuto mumbakhala na thupo kwene-kwene ninga momwe bzidacitikira Júlia na Barry? Penu bziri tenepo, nkhani zomwe ziri mu revista ino zinkutsangalazani na kukuthandizani. Nkhanizo zinifotokozambo bzinthu bzomwe bzimbacitisa thupo kawiri-kawiri, na momwe tingagumanire mtsangalazo tikakhala na thupo.
a Madzina yacinjidwa.