3. Kodi Tidalengedwa Kuti Tibonere?
Thangwe ranyi mpsakufunika kudziwa mtawiro wa mbvunzoyu?
Mtawiro wa mbvunzoyi umbatokonya momwe ifepano timbawonera bzinthu pa moyo wathu.
Kuti Mukumbukire
Kodi bzina msolo kulewa kuti Mulungu omwe adalenga dziko lakudekali ndiye omwe ambacitisa kuti tibonere?
Wanthu azinji akawona mabvuto yomwe akugumana nayo, ambayamba kupenukira bza Mulungu. Iwo ambayamba kukumbuka kuti (1) Mulungu alibe mphanvu yakumalisa mabvuto, (2) Mulungu ambacita lini thupo na kubonera kwathu ndipo (3) Mulungu kulibe.
Kodi makumbukidweya njacadidi?
KUTI MUDZIWE BZINANGO
Onani pa webisaite ya jw.org. vidiyo yakuti Kodi Tingadziwe Tani Kuti Bibliya Ndacadidi?
Bibliya Limbati
Mulungu alibe kulenga wanthu kuti adzabonere.
Mulungu ambafuna kuti wanthufe tikhale wakukondwa.
‘Ndazindikira kuti palibe cinthu cabwino kuposa kuti [wanthu] akondwe, na kuti ambacite bzinthu bzabwino pomwe akana moyo, nakuti munthu ali-wentse adye na kumwa, acigumana cikondweso pa basa lace lentse lakulimba. Imweyi ni mphaso ya Mulungu.’—MPALIZI 3:12, 13.
Mulungu adapasa banja lakuyamba bzentse bzomwe likhafunikira kuti likhale na moyo wakukondwa.
Mulungu akhafuna lini kuti iwo pabodzi na wana wawo abonere.
‘Mulungu adawauza kuti: “Balanani, muwande, mudzaze dziko la pantsi.”’—CIYAMBO 1:28.
Banja lakuyamba lidasankhula kuleka kubvera Mulungu.
Na thangwe limweri, iwo adabzibweresera mabvuto kuphatanidzambo kuna wana wawo wentse.
‘Ndipopa ninga momwe pikado idapita m’dziko thangwe ra munthu m’bodzi, idabwerambo infa thangwe ra pikado ndipo infayo idafikira wanthu wentse thangwe rakuti wentse ana pikado.’ —WAROMA 5:12.a
Mulungu alibe kulenga wanthu kuti ambabzitsogolere okha.
Ninga momwe munthu angakwanise lini kukhala na moyo m’madzi, mpsibodzi-bodzimbo iye angakwanise lini kubzitsogolera yekha.
‘Munthu omwe an’famba, alibe mphanvu yakutsogolera nzayo zace.’—JEREMIYA 10:23.
Mulungu ambafuna lini kuti wanthu ambabonere.
Ndipopa iye ambatipasa malango yomwe yambatithandiza kukhala na moyo wabwino na kutcenkha kucita bzinthu bzomwe bzingatibweresere mabvuto.
‘Ucindotetekera mitemo yangu! Mtendere wako un’dzakhala ninga mkulo.’—ZAIYA 48:18.
a Mu Bibliya, fala lakuti ‘pikado’ limbathandauza bzinthu bzakuipa bzomwe munthu ambacita ndipo limbathandauzambo bza khalidwe lomwe wanthu wentse analo.