Tsamba Lakucokera ku Bungwe Lakutonga

Wakufunidwa Apalizi wa Umambo:

Bziyezezereni kuti imwepo ndimwe m’bodzi wa apostolo omwe ali pa Phiri la Miolivera. Jezu akuwonekera patsogolo panu. Ndipo pomwe akhadasala pang’ono kuyenda kudzulu akulewa kuti: “Mzimu wakucena ukadzafika kwa imwepo, mun’dzatambira mphanvu ndipo mun’dzakhala mboni zangu ku Jeruzalemu, ku Djudeya kwentse na ku Samariya mpaka mbuto zakutali za pa dziko la pantsi.” (Mab. 1:8) Kodi n’ciyani comwe imwepo mungadacita?

Pinango mungadacita mantha thangwe basalo likhali likulu. Ndipo mungadabzibvunza kuti: ‘Kodi tinkwanisa tani kucitira umboni mpaka mbuto zakutali za pa dziko la pantsi” uko ndife wanthu wakucepa?’ Ndipo pinango mungadakumbukira bza mcenjezo omwe Jezu adapereka usiku bwakumalizira pomwe akhanati kufa. Iye adati: “Kapolo, ni mkulu lini kuposa mbuya wace. Penu adazunza inepano, iwo an’dzazunzambo imwepo; penu adabvera mafala yangu iwo an’dzabverambo mafala yanu. Tsono iwo an’dzacita bzinthu bzentsenebzi thangwe ra dzina langu, thangwe iwo ambadziwa lini Ule omwe adandituma.” (Juw. 15:20, 21) Pakukumbukira mafala yamweya pinango mungabzibvunze kuti: ‘Kodi ningakwanise tani kucitira umboni bwakukwanira, pomwe wanthu akutizunza na kutitsutsa?’

Ntsiku zino timbakhalambo na mibvunzo ninga imweyi. Ninga Mboni za Yahova, basa lathu ni kucitira umboni bwakukwanira “mpaka kuphampha kwa dzikoli” kwa “wanthu wa mitundu yentse.” (Mat. 28:19, 20) Kodi tingakwanise tani kuphata basa limweri, maka-maka tikakumbukira kuti Jezu adaleweratu kuti tin’dzazunzidwa?

Bukhu la Mabasa ya apostolo limbatiuza nkhani yakukondwesa ya momwe apostolo na Akristau wa mu nthawe zakuyambirira adakwanisa kuphata basa lomwe adapasidwa na thandizo la Yahova. Bukhu lomwe mukuwerengali lidakonzedwa na cakulinga cakuti likuthandizeni kupfunza nkhani imweyi. Mun’dabwa mukawona kundendemerana komwe kulipo pakati pa atumiki wa Mulungu wa mu nthawe zakuyambirira na atumiki wace ntsiku zino. Muniwona kuti kundendemerana kumweku kukuphatanidza lini basa lakupalizira basi koma momwe tiri wakulinganizika kuti tilicite. Mwakusaya kupenukira kuwona kundendemerana kumweku, kunilimbisa cikhulupiro canu cakuti Yahova Mulungu akupitiriza kutsogolera mbali ya pa dziko la pantsi ya gulu lace.

Tikukupemphererani ndipo tikukhulupira kuti kupfunza bukhu la Mabasa kunilimbisa cikhulupiro canu cakuti Yahova an’dzakuthandizani na mphanvu yace ya mzimu wakucena. Mwa njira imweyi, tikufuna kukulimbikisani kupitiriza ‘kucitira umboni bwakukwanira’ bza Umambo bwa Mulungu na kuthandiza winango kugumana njira ya cipulumuso. — Mab. 28:23; 1 Tim. 4:16.