N’ciponi cintsintsi ca moyo wacikondweso m’banja?

BIBLIYA LIMBATI

“Wakusimbidwa ngule omwe ambabva mafala ya Mulungu aciyakoya!”​—Luka 11:28.

PHINDU LACE MUKAKHULUPIRA BZIMWEBZI

Mun’dzagumana lufoyi lacadidi.​—Wayefezo 5:​28, 29.

Mun’dzalemekezedwa caibzo.​—Aefezo 5:​33.

Mun’dzakhala na cisungiko cacadidi.​—Marko 10:6-9.

KODI TINGAKHULUPIREDI BZOMWE BIBLIYA LIMBALEWA?

Inde, pa mathangwe mawiri:

• Mulungu ndiye adayambisa moyo wa m’banja. Bibliya limbalatiza kuti Mulungu ndiye adayambisa makonzedwe ya m’banja. (Ciyambo 2:18-24) M’mafala yanango, ciphatano ca m’banja, ciripo thangwe Yahova ndiye adacibweresa. Thangwe ranyi nzeru imweyi nja thandauzo?

  Kumbukirani ibzi: Mucidya cakudya cakukoma bwino, mucifunambo kudziwa bzomwe bzaphatisidwa basa pakuciphikapo, imwepo mungadabvunza mbani? Mwa nzeru imwepo mungadabvunza nyakuciphikayo.

  Bzibodzi-bodzimbo, kuti tidziwe bzakufunika kuti banja lathu likondwe, tingacite bwino kulinga Yahova, pakuti ndiye adayambisa makonzedwe ya banja.

• Mulungu ambakukumbukirani. Mabanja ya nzeru, yambalinga malango ya Yahova, yomwe ambapereka m’Fala lace. Thangwe ranyi? ‘Thangwe iye ambakukonkhobzani.’ (1 Pedru 5:​6, 7) Yahova an’funa ubwino bwanu kucokera pansi pa mtima​—ndipo malango yace yambaphata basa nthawe zense!​—Mimwani 3:​5, 6; Zaiya 48:17, 18.