Kuyamba kwa Gawo 9

Gawoli limbatipfunzisa bza maswaka, apolofeta na wamambo omwe adalatiza cikhulupiro camphanvu kwene-kwene kwa Yahova. Ku dziko la Siriya, kukhana kamtsikana ka ku Jirayeri komwe kakhakhulupira kuti mpolofeta wa Yahova angadapoza matenda ya Naamani. Mpolofeta Elizeu akhakhulupira na mtima wense kuti Yahova angadamukhotcerera kwa anyamadulanthaka wace. Jehoyada, mkulu wa ansembe, adaikha moyo wace pa ngozi kuti akhotcerere mulumbwana Jeoyasi omwe akhafuna kuphedwa na yavu wace Ataliya, omwe akhali munthu wakuipa kwene-kwene. Mambo Ezekiya adakhulupira kuti Yahova angadapulumusa mzinda wa Jeruzalemu, ndipo iye alibe kubvuma kugopswedwa na anyankhondo wa ku Asiriya. Mambo Josiya adapfudza bzifanikiso bza mirungu yakunama m’dziko lace, adakonzesa tempwlo, na kuthandiza Ajirayeri kuyamba pomwe kunamata Yahova.