NKHANI YAKUPFUNZA 27
Thangwe Ranyi Tin’funika Kumbamugopa Yahova?
“Uxamwali bwa pa mtima na Yahova n’bwa wale omwe ambamugopa.” — SALIMO 25:14.
NYIMBO 8 Yahova ni Pakuthawira Pathu
BZOMWE TIN’PFUNZAa
1-2. Kodi n’ciyani comwe tin’funika kucita kuti tikhale axamwali wapamtima wa Yahova? (Salimo 25:14)
KODI imwepo mukuwona kuti ni khalidwe liponi lakufunika lomwe mun’funika kukhala nalo kuti mubverane na xamwali wanu? Pinango imwepo mungatawire kuti axamwali wacadidi ambafunana na kuthandizana. Ndipo imwepo mungawone lini kuti mantha njakufunika kuti mubverane na xamwali wanu. Tsono, ninga momwe likulewera vesi lomwe likutsogolera nkhani ino, wanthu omwe an’funa kukhala axamwali wapamtima wa Yahova an’funika “kumugopa.” — Werengani Salimo 25:14.
2 Tentsenefe tin’funika kumbagopa Yahova, bziribe basa penu tayamba tsapanopa kutumikira Yahova ayai tidayamba kale-kale. Tsono, kodi kugopa Mulungu kumbathandauza ciyani? Kodi tingapfunze tani kugopa Yahova? Ndipo tingapfunze ciyani bza kugopa Yahova na wanthu wakukhulupirika ninga Obadiya, Mkulu wa Antsembe Jehoyada na Mambo Jehowasi?
KODI KUGOPA MULUNGU KUMBATHANDAUZA CIYANI?
3. Fotokozani bzinthu bzomwe bzimbaticitisa mantha na momwe manthayo yambatikhotcererera.
3 Ifepano tingagope cinthu comwe cin’funa kutipweteka. Mantha yamweya ngabwino thangwe yambatithandiza kucita bzinthu mwanzeru. Kugopa kugwa kungaticitise kuti tileke kufamba mphepete mwa nkhomole. Kugopa kupwetekeka kumbaticitisa kuti tithawe tikawona ngozi. Ndipo kugopa kudzonga uxamwali bwathu na munthu omwe timbamufuna kumbaticitisa kuti tileke kulewa ayai kucita cinthu comwe cingamudekere lini.
4. Kodi ni mtundu uponi wa mantha omwe Sathani akufuna kuti ifepano tikhale nawo?
4 Sathani ambafuna kuti wanthu akhale na mantha yakuipa kwa Yahova. Iye ambafuna kuti wanthu akhale na nzeru ninga zomwe Elifazi akhanazo zakuti Yahova ni mkali, ndipo wanthufe tingakwanise lini kucita bzinthu bzabwino kwa iye. (Djobi 4:18, 19) Sathani ambafuna kuti ifepano timugope kwene-kwene Yahova mpaka tisiye kumutumikira. Tsono kuti bzimwebzi bzireke kuticitikira, tin’funika kupfunza kulemekeza Yahova na kugopa kucita cinthu comwe iye angakomedwe lini naco.
5. Kodi kugopa Mulungu kumbathandauza ciyani?
5 Munthu omwe ambagopa Mulungu, ambamufuna ndipo ambacita ciri-centse kuti aleke kucita cinthu comwe cingadzonge uxamwali bwace na iye. Jezu akhana mtundu umweyu wa ‘mantha.’ (Ahebereu 5:7) Iye akhawona lini Yahova ninga munthu wakupasa mantha. (Zaiya 11:2, 3) M’mbuto mwace, iye akhamufuna kwene-kwene Yahovayo ndipo akhafuna kumubvera. (Juwau 14:21, 31) Ninga Jezu, ifepanombo timbamugopa Yahova mwa kumulemekeza thangwe iye ambatifuna, ana nzeru, ana cirungamo ndipo ngwa mphanvu. Ndipo ifepano timbadziwambo kuti Yahova ambatifuna kwene-kwene ndipo ambafunambo kuti ifepano ticite bzomwe iye ambatipfunzisa. Ifepano tingakondwese mtima wa Yahova ayai tingacitise kuti iye awawidwe. — Salimo 78:41; Mimwani 27:11.
KUPFUNZA KUGOPA MULUNGU
6. Kodi n’ciyani comwe tingacite kuti tipfunze kugopa Mulungu? (Salimo 34:11)
6 Ifepano timbabadwa lini ticigopa Yahova, koma timbafunika kupfunza kumugopako. (Werengani Salimo 34:11.) Cinthu cibodzi comwe cingatithandize ndico kumbakhala na nthawe ya kumbawona cirengedwe. Tikambawona “bzinthu bzomwe iye adalenga,” timbakwanisa kuwona kuti Yahova ngwa nzeru, ana mphanvu ndipo ambatifuna. Ndipo bzimwebzi bzin’dzaticitisa kuti timufune na kumulemekeza kwene-kwene. (Aroma 1:20) Mpfumakazi yakucemeredwa Adrienne, idalewa kuti: “Inepano ndikambawona cirengedwe, nimbakwanisa kuwona kuti Yahova ana nzeru kwene-kwene ndipo bzimwebzi bzimbandidabwisa na kundithandiza kudziwa kuti iye ambadziwa bzomwe mpsabwino kwa inepano.” Bzimwebzi bzidacitisa kuti mpfumakaziyi ifike pakulewa kuti: “Ningafune lini kucita cinthu comwe cingacitise kuti ndiluze uxamwali bwangu na Yahova, Omwe adandipasa moyo.” Kodi imwepo mungapambule nthawe sumana iri-yentse kuti mumbakumbukire bza cirengedwe? Mukambacita bzimwebzi, imwepo mun’dzamufuna kwene-kwene Yahova na kumulemekeza. — Salimo 111:2, 3.
7. Kodi mpembo ungatithandize tani kuti timbagope Yahova?
7 Cinthu cinango comwe tingacite kuti tipfunze kugopa Mulungu, ndico kumbapemba nthawe zentse. Tikambapemba kwene-kwene kwa Yahova, iye ambakhala munthu caiye kwa ifepano. Ndipopa pomwe tikupemba, ticimukumbira kuti atipase mphanvu kuti tipirire mabvuto, bzimwebzi bzimbatikumbusa kuti iye ana mphanvu kwene-kwene. Tikambamutenda thangwe ra kutipasa Mwana wace kuti adzatifere, bzimwebzi bzimbatikumbusa kuti iye ambatifuna kwene-kwene. Ndipo tikambamudandaulira Yahova kuti atithandize pa bvuto lomwe tikugumana nalo, timbalatiza kuti timbamuwona kuti iye ngwanzeru kwene-kwene. Mipembo ninga imweyi imbatithandiza kuti timulemekeze kwene-kwene Yahova. Ndipo imbatithandizambo kuti tikhale wakukhwimika kuti tileke kucita cinthu ciri-centse comwe cingadzonge uxamwali bwathu na iye.
8. N’ciyani comwe tingacite kuti tipitirize kugopa Mulungu?
8 Kuti tipitirize kumbagopa Mulungu, tin’funika kumbawerenga Bibliya na cakulinga cakuti tipfunze na nkhani za wanthu omwe adacita bzinthu bzabwino na bzakuipa. Bwerani ticezerane bza atumiki awiri wa Yahova omwe akhali wakukhulupirika. Tin’cezerana bza mthandizi wa nyumba ya Mambo Akabe wakucemeredwa Obadiya na Mkulu wa Antsembe Jehoyada. Ndipo tikamala tin’dzacezerana bza Mambo Jehowasi wa Djuda, omwe pakuyamba akhatumikira Yahova, koma patsogolo pace adadzasiya kumutumikira.
KHALANI WAKUKHWIMIKA NINGA OBADIYA OMWE AKHAGOPA MULUNGU
9. Kodi kugopa Yahova kudacitisa kuti Obadiya akhale munthu wa moda wanyi? (1 Amambo 18:3, 12)
9 Mafala yakuyambirira yakulewa bza Obadiyab yomwe yali Bibliya yambalewa kuti: “Obadiya akhagopa kwene-kwene Yahova.” (Werengani 1 Amambo 18:3, 12.) Kodi mantha yabwino yomwe Obadiya akhanayo kwa Yahova yadamuthandiza tani? Cakuyamba, mantha yamweya yadamucitisa kuti akhale munthu wakukhulupirika, ndipopa mambo adamuikha kuti ambanyang’anire nyumba yace. (Ndendemezerani na Nehemiya 7:2.) Kugopa Mulungu kudathandiza pomwe Obadiya kuti akhale munthu wakukhwimika pa nthawe yomwe bzimwebzi bzikhali bzakufunikira. Iye adakhala na moyo mu nthawe yomwe dziko la Jirayeri likhatongedwa na mambo wakuipa Akabe, omwe “adacita bzinthu bzizinji bzakuipa pa maso pa Yahova kuposa amambo wentse wa m’mbuyo mwace.” (1 Amambo 16:30) Ndipo mkazi wa Akabeyo, Jezabeli omwe akhanamata Baala, akhawenga kwene-kwene Yahova ndipo akhafuna kumalisa kunamata kwacadidi mu umambo bwa Jirayeri. Mkazi umweyu adapha apolofeta azinji wa Mulungu. (1 Amambo 18:4) Bzimwebzi bzikulatiziratu padeca kuti Obadiya akhatumikira Yahova pa nthawe yakunesa kwene-kwene.
10. Kodi Obadiya adalatiza tani kuti akhali wakukhwimika?
10 Kodi Obadiya adalatiza tani kuti akhali wakukhwimika? Pomwe Jezabeli adayamba kunyang’ana apolofeta wa Mulungu kuti awaphe, Obadiya adatenga apolofeta 100 aciwabisa “m’magrupo mawiri ndipo akhambawapasa pau na madzi kuti adye.” (1 Amambo 18:13, 14) Bzomwe Obadiya akhacita bzingadadziwika, iye angadaphedwa. Obadiya akhali munthumbo ninga ifepano ndipo iye akhafuna lini kufa. Tsono, iye akhafuna kwene-kwene Yahova pabodzi na wanthu omwe akhamutumikira kuposa momwe iye akhafunira moyo wace.
Napo kuti basa lathu laletsedwa, m’bale wakukhwimika akupereka cakudya cauzimu kuna abale wace wacikristau (Onani ndime 11)c
11. Kodi atumiki wa Yahova ntsiku zino akulatiza tani kuti ali ninga Obadiya? (Onani cithunzi-thunzi.)
11 Ntsiku zino, atumiki azinji wa Yahova ambakhala m’madziko yomwe basa lathu ndakuletsedwa. Iwo ambalemekeza akulu-akulu wa boma, tsono ninga Obadiya, abale na mpfumakazi wakukhulupirikawa ambapasa Yahova bzomwe iye ambafunikira bzomwe n’kunamatidwa. (Mateu 22:21) Iwo ambalatiza kuti ambagopa Mulungu mwa kumubvera sikuti kubvera wanthu. (Mabasa 5:29) Iwo ambacita bzimwebzi mwakupitiriza kupalizira mafala yabwino ya Umambo na kucita mitsonkhano yawo mwakabise-bise. (Mateu 10:16, 28) Ndipo iwo ambadziwa kuti abale na mpfumakazi zawo akufunikira cakudya cauzimu. Onani bzomwe Henri adacita. Iye ambakhala mu dziko libodzi la ku África komwe basa lathu likhadaletsedwa. Pa nthawe yomwe basa lathuli likhadaletsedwa, Henri adabzipereka kuti ambapase abale na mpfumakazi zathu cakudya cauzimu. Iye adanemba kuti: “Inepano ndine munthu wa mantha. Ndipopa ndikutsimikiza kuti comwe cidandicitisa kuti ndikhale wakukhwimika ni lufoyi lomwe ndikhanalo kwa Yahova.” Kodi nthawe inango mudakhala kale wakukhwimika ninga Henri? Imwepo mungakhale wakukhwimika mukakhala kuti mumbagopa Yahova.
KHALANI WAKUKHULUPIRIKA NINGA MKULU WA ANTSEMBE JEHOYADA OMWE AKHAGOPA MULUNGU
12. Kodi Mkulu wa Antsembe Jehoyada na mkazace adalatiza tani kuti akhali wakukhulupirika kwa Yahova?
12 Mkulu wa Antsembe Jehoyada akhagopa Yahova, ndipo kugopa Yahovako ndiko komwe kudamucitisa kuti apitirize kukhala wakukhulupirika kwa iye na kucita nyongo yakulimbikisa wanthu kuti apitirize kunamata Yahova. Bzimwebzi bzidawonekera padeca pomwe mwana wacikazi wa Jezabeli, Ataliya, adayamba kutonga mu umambo bwa Djuda. Wanthu akhamugopa kwene-kwene Ataliya. Iye akhali munthu wakuipa kwene-kwene ndipo akhalibe ntsisi mwakuti adayezera kupha wana wentse wa mambo omwe akhali azukulu wace ndipo iye adakhala mambo! (2 Nkhani 22:10, 11) Tsono, mwana m’bodzi wakucemeredwa Jehowasi alibe kuphedwa thangwe rakuti mkazi wa Jehoyada, Jehozabeti, adamubisa. Iye pabodzi na bayace adatenga mwanayo acimufuwa mwakabise-bise. Bzimwebzi bzidacitisa kuti Jehoyada na Jehozabeti athandizire kuti mzere wa Davide wa amambo uleke kumala. Jehoyada akhali wakukhulupirika kwa Yahova, ndipo alibe kubvuma kuti mantha na Ataliya yamutazise kucita bzinthu bzabwino. — Mimwani 29:25.
13. Pomwe Jehowasi akhana magole 7, kodi Jehoyada adalatiza tani kuti akhali wakukhulupirika kwa Yahova?
13 Pomwe Jehowasi adakwanisa magole 7, Jehoyada adalatiza pomwe kuti akhali wakukhulupirika kwa Yahova. Iye adakonza manera yakuti aikhe Jehowasi kuti akhale mambo. Bzimwebzi bzingadakwanisika, Jehowasi, omwe akhali mzere wa Davide, angadakhala mambo. Tsono bzimwebzi bzingadasaya kukwanisika, bzikuwoneka kuti Jehoyada angadaphedwa. Koma thangwe ra kuthandizidwa na Yahova, bzidakwanisika. Jehoyada adakwanisa kuikha Jehowasi pa mpando wa umambo acipha Ataliya mwa kuthandizidwa na atsogoleri pabodzi na antsembe. (2 Nkhani 23:1-5, 11, 12, 15; 24:1) Patsogolo pace, Jehoyada “adacita mpangano pakati pa Yahova, mambo na wanthu kuti wanthuwo angadapitiriza kukhala wa Yahova.” (2 Amambo 11:17) Ndipo Jehoyada “adaikha wanthu kuti anyang’anire misuwo yakupitira mu nyumba ya Yahova, kuti wanthu wakupswipa aleke kupita m’nyumbamo.” — 2 Nkhani 23:19.
14. Kodi Jehoyada adalemekezedwa tani thangwe ra kulemekeza Yahova?
14 Yahova akhadalewa kale kuti: “Wanthu omwe an’ndilemekeza inepano nin’dzawalemekezambo.” Bzimwebzi ndibzo bzomwe iye adacita na Jehoyada, Yahova adamulemekeza. (1 Samuyeli 2:30) Iye adacitisa kuti bzinthu bzabwino bzomwe mkulu wa antsembeyu adacita bzinembedwe kuti bzitipfunzise. (Aroma 15:4) Ndipo pomwe Jehoyadayo adafa, adalemekezedwa kwene-kwene thangwe rakuti thupi lace lidakaikhidwa “mu mzinda wa Davide pabodzi na amambo, thangwe rakuti iye adacita bzinthu bzabwino mu Jirayeri mwa kulatiza kulemekeza Mulungu wacadidi pa nyumba yace.” — 2 Nkhani 24:15, 16.
Ninga Mkulu wa Antsembe Jehoyada, kugopa Mulungu kun’funika kuticitisa kuti tithandize abale na mpfumakazi zathu (Onani ndime 15)d
15. Kodi tingapfunze ciyani na nkhani yakulewa bza Jehoyada? (Onani cithunzi-thunzi.)
15 Nkhani ya Jehoyada ingatithandizembo kuti timbagope Mulungu. Abale omwe ambatsogolera mu gulu la Yahova angatewezere Jehoyada mwa kukhala tceru kuti apitirize kukhotcerera mabira ya Mulungu. (Mabasa 20:28) Abale wacikulire angapfunze bzizinji na Jehoyada. Iwo akagopa Yahova acipitiriza kukhala wakukhulupirika kwa iye, Yahovayo angawaphatise basa kuti acite bzinthu bzizinji. Iye ambawawona kuti iwo mbakufunika. Maswaka yangatewezere bzomwe Yahova adacita na Jehoyada mwa kumbawona abale wacikulire kuti mbakufunika na kumbawalemekeza, maka-maka wale omwe ambalatiza kuti mbakukhulupirika. (Mimwani 16:31) Ndipo tentsenefe tingapfunze na atsogoleri pabodzi na Alevi omwe adathandiza Jehoyada. Bwerani tentsenefe timbathandizire “wale omwe akutsogolera” mu gulu la Yahova mwa kumbawabvera. — Ahebereu 13:17.
LEKANI KUKHALA NINGA MAMBO JEHOWASI
16. Kodi n’ciyani comwe Mambo Jehowasi adacita pomwe Jehoyada adafa?
16 Jehoyada adathandiza Mambo Jehowasi kukhala munthu wabwino. (2 Amambo 12:2) Thangwe ra bzimwebzi, mamboyo akhacita bzinthu bzabwino. Tsono pomwe Jehoyada adafa, Jehowasi adayamba kutetekera nzeru za wanthu wakuipa. Kodi n’ciyani comwe cidacitika? Iye pabodzi na wanthu wace adayamba “kunamata mitanda yakupambulika na bzifanikiso.” (2 Nkhani 24:4, 17, 18) Yahova adawawidwa na bzimwebzi, ndipopa “iye adawatumizira apolofeta wakusiyana-siyana kuti akawathandize kubwerera kwa iye . . . , tsono iwo alibe kuwabvera.” Ndipo iwo alibe kubverambo Zakariya omwe akhali mwana wa Jehoyada. Zakariyayo akhali mpolofeta wa Yahova ndipo akhalimbo mwana wa tiu wace. Mambo Jehowasi adapha Zakariya napo kuti pai wace na mai wace wa Zakariyayo ndiwo omwe adamupulumusa pomwe abale wace wentse adaphedwa. — 2 Nkhani 22:11; 24:19-22.
17. Kodi n’ciyani comwe cidacitikira Jehowasi?
17 Jehowasi alibe kugopa Yahova ndipo bzimwebzi bzidacitisa kuti bzinthu bzimuipire kwene-kwene. Yahova adalewa kuti: “Wanthu omwe akundinyoza, an’dzanyozedwambo.” (1 Samuyeli 2:30) Acikunda ang’ono-ng’ono wa Asiriya adakunda “acikunda azinji” wa Jehowasi ndipo pa nkhondoyo Jehowasiyo “adapwetekedwa.” Patsogolo pace, Jehowasiyo adaphedwa na mtumiki wace m’bodzi thangwe ra kupha Zakariya. Pakuti mambo umweyu adacita bzinthu bzizinji bzakuipa, iye alibe kukhala na mwayi wakuikhidwa “mu thenje la amambo.” — 2 Nkhani 24:23-25.
18. Mwakubverana na Jeremiya 17:7, 8, kodi n’ciyani comwe cingatithandize kuti tileke kukhala ninga Jehowasi?
18 Kodi tikupfunza ciyani na bzomwe bzidacitikira Jehowasi? Iye akhali ninga muti omwe ukhalibe mizi, omwe ukhafunikira kudjimbikiridwa na muti unango. Pomwe munthu omwe akhamuthandiza, Jehoyada, adafa, Jehowasi adayamba kutetekera apanduki ndipo bzimwebzi bzidamucitisa kuti aleke kukhala wakukhulupirika kwa Yahova. Bzimwebzi bzikutipfunzisa nkhani yakufunika kwene-kwene. Bzikutipfunzisa kuti tin’funika lini kukhala wakukhulupirika kwa Yahova thangwe ra kuthandizidwa na wanthu winango kuphatanidzambo wanthu wa m’banja mwathu. Kuti tikhale wakulimba mwauzimu, tin’funika nthawe zentse kumbagopa Mulungu, mwa kumbawerenga Fala lace, Bibliya, kukumbukira bzomwe tawerengabzo na kupemba. — Werengani Jeremiya 17:7, 8; Akolose 2:6, 7.
19. Kodi Yahova akutikumbira kuti ticite ciyani?
19 Yahova ambatikumbira lini kuti timucitire bzinthu bzomwe tingabzikwanise lini. Bzomwe iye ambatikumbira kuti ticite ndibzo bzomwe bzidanembedwa pa Mpalizi 12:13, pomwe pambati: “Gopa Mulungu wacadidi ucibvera Malamulo yace, pakuti ibzi ndibzo bzomwe munthu ali-wentse an’funika kucita.” Tikagopa Mulungu, ifepano tin’dzakwanisa kukhala wakukhwimika pa mabvuto yomwe tin’dzagumana nayo kutsogolo, ninga momwe adacitira Obadiya na Jehoyada. Palibe cinthu comwe cingadzakwanise kudzonga uxamwali bwathu na Yahova.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
a Mu Bibliya, fala lakuti “kugopa” limbathandauza bzinthu bzizinji. Fala limweri lingathandauze mantha ayai kulemekeza. Nkhani ino, in’tithandiza kukhala na mantha yabwino kwa Yahova yomwe yangatithandize kukhala wakukhwimika na wakukhulupirika kwa Baba wathu wakudzulu pomwe tikumutumikira.
b Obadiya omwe tikulewayu ngule lini omwe akhali mpolofeta, omwe adadzakhala na moyo pomwe padapita magole mazinji, omwe akhali munembi wa bukhu la m’Bibliya lakucemeredwa Obadiya.
c BZOMWE BZIKUCITIKA PA CITHUNZI-THUNZI: Pa cithunzi-thunzi cakuyezezeraci, m’bale akupereka cakudya cauzimu pa nthawe yomwe basa lathu laletsedwa.
d BZOMWE BZIKUCITIKA PA CITHUNZI-THUNZI: Mpfumakazi yomwe ni tswaka ikupfunza na mpfumakazi yacikulire momwe ingacitire upalizi bwa pa telefoni; m’bale wacikulire akulatiza kuti ngwakukhwimika pomwe akucita upalizi bwa padeca; m’bale omwe ngwakukhwima mwauzimu akupereka malango ya momwe angakonzere bzinthu bzomwe bzadzongeka mu Nyumba ya Umambo.