PFUNZIRO 11

Kulewalewa Mwakukomedwa

Waroma 12:11

BZOMWE MUNGACITE: Limbisani abveseri wanu mwa kulewalewa mwakukomedwa na kucokera pansi pa mtima.

Tokonyedwani na nkhaniyo. Pomwe munkukonzekera nkhani yanu, kumbukirani bwino-bwino bza kufunika kwa nkhaniyo. Idziweni bwino nkhaniyo kuti mukakwanise kuifotokoza kucokera pansi pa mtima.
Akumbukireni abveseri wanu. Kumbukirani momwe nkhani mun’kafotokozayo in’kathandizira abveseri wanu. Kumbukirani momwe mungakaifotokozere mu njira yomwe ingakathandize abveseriwo kuwona kufunika kwa bzomwe ankupfunzabzo.
Lewalewani kucokera pansi pa mtima. Lewalewani mwakukomedwa. Momwe munkuphatisira basa manja na mawonekedwe ya nkhope yanu bziratize momwe munkutokonyedwera na nkhaniyo.

Samalani kuti abveseri wanu aleke kuipidwa thangwe ra kuphatisa basa kwanu manja mwakunyanyirira. Phatisani basa manja yanu mu njira yakuthemera. Lewalewani mwakukomedwa maka-maka pomwe munkufotokoza nfundo zakufunika kwene-kwene na pomwe mun’funa kulimbisa abveseri wanuwo kuti aphatise basa bzomwe munkuwapfunzisabzo. Tsono tcenkhani kunetesa abveseri wanuwo mwa kulewalewa mwakukomedwa mpaka kumala nkhani yenseyo.