PFUNZIRO 54
Kodi “Kapolo Wakukhulupirika na Wanzeru” ni Mbani Ndipo Ambaphata Basa Lanyi?
Jezu ni msolo wa gwere la Cikristau. (Aefezo 5:23) Pakuti ni mambo kudzaulu, Jezu akutsogolera ateweri wace mwakuphatisa basa “kapolo wakukhulupirika na wanzeru.” (Werengani Mateu 24:45.) Pakuti adacita kusankhulidwa na Jezu caiyeyo, kapoloyu ana ugo bwakutsogolera. Koma ambapitiriza kukhala kapolo wa Kristu na kutumikira abale wace wa Kristuyo. Kodi mbani kapolo umweyu? Kodi iye ambatithandiza tani?
1. Kodi “kapolo wakukhulupirika na wanzeru” ni mbani?
Yahova nthawe zentse ambaphatisa basa munthu m’bodzi ayai kathimu ka wanthu kuti atsogolere wanthu wace. (Malakiya 2:7; Ahebereu 1:1) Pomwe Jezu adafa apostolo ndiwo adayamba kutsogolera. (Mabasa 15:2) Ntsiku zino bzirimbo tenepoyo. Kathimu ka akulu kakucemeredwa Bungwe Lakutonga la Mboni za Yahova, kambapereka cakudya cauzimu na kutsogolera basa la kupalizira. Kathimu kamweka ni “kapolo wakukhulupirika na wanzeru omwe [Jezu] adamuikha.” (Mateu 24:45a) Wentse omwe ambacita mbali ya Bungwe Lakutonga ni Akristau wakudzozedwa na mzimu, omwe akudikira kudzatonga pabodzi na Kristu mu Umambo bwace bwa kudzulu. Ndipo akafa ambalamusidwa aciyenda kudzulu.
2. Kodi ni cakudya ciponi cauzimu comwe kapolo wakukhulupirika ambapereka?
Jezu adalewa kuti kapolo wakukhulupirika “[angadadzapasa Akristau anzawo] cakudya pa nthawe yakuthemera.” (Mateu 24:45b) Cakudya cimbacitisa kuti thupi lathu likhale na mphanvu. Mpsibodzi-bodzimbo, cakudya cauzimu yomwe ni malango yakucokera kwa Mulungu, cimbatipasa mphanvu yakukhala wakukhulupirika kwa Yahova na kucita basa lomwe Jezu adatiuza kuti timbacite. (1 Timotio 4:6) Ifepano timbatambira cakudya cauzimuci m’mitsonkhano yadera, ya cigawo, m’mabukhu yomwe yambafotokoza Bibliya na m’mavidiyo yomwe yambatithandiza kubvesesa bzomwe Mulungu akufuna na kulimbisa uxamwali bwathu na iye.
FUFUDZANI BZINANGO
Onani thangwe ranyi timbafunikira “kapolo wakukhulupirika na wanzeru” omwe ni Bungwe Lakutonga.
Bungwe Lakutonga limbapereka cakudya cauzimu, malango na thandizo kwa Mboni za Yahova za pa dziko lentse la pantsi
3. Wanthu wa Yahova an’funika kukhala wakulinganizika
Bungwe Lakutonga limbatsogoleredwa na Jezu pakulinganiza basa la Mboni za Yahova. Jezu akhatsogolerambo tenepo basa la Akristau wakuyambirira. Onani VIDIYO.
Werengani 1 Akolinto 14:33, 40 ndipo mukamala cezeranani mbvunzo wakutewerayu:
Kodi mavesiya yakulatiza tani kuti Yahova ambafuna kuti atumiki wace akhale wakulinganizika?
4. Kapolo wakukhulupirika na wanzeru ambalinganiza basa lathu la kupalizira
Kupalizira likhali basa lakufunika kwene-kwene kwa Akristau wakuyambirira. Werengani Mabasa 8:14, 25, ndipo mukamala cezeranani mibvunzo ikutewerayi:
Mbani akhatsogolera basa lakupalizira pakati pa Akristau wakuyambirira?
Kodi n’ciyani comwe mpostolo Pedru na Juwau adacita pomwe adapasidwa malango na apostolo anzawo?
Kupalizira ni basa lakufunika kwene-kwene lomwe limbalinganizidwa na Bungwe Lakutonga. Onani VIDIYO.
Jezu adalatiza kuti basa lakupalizira likhali lakufunika kwene-kwene. Werengani Marko 13:10, ndipo mukamala cezeranani mibvunzo ikutewerayi:
Thangwe ranyi basa lakupalizira ndakufunika kwene-kwene kwa Bungwe Lakutonga?
Thangwe ranyi timbafunikira kapolo wakukhulupirika na wanzeru kuti tikwanise kucita basa limweri pa dziko lentse?
5. Kapolo wakukhulupirika ambatipasa malango
Bungwe Lakutonga limbapereka malango kwa Akristau pa dziko lentse. Kodi iwo ambadziwa tani malango yomwe an’funika kupereka? Onani kuti bungwe lakutonga la Akristau wakuyambirira lidacita tani bzimwebzi. Werengani Mabasa 15:1, 2, ndipo mukamala cezeranani mibvunzo ikutewerayi:
Kodi n’ciyani comwe cikhacitisa kuti Akristau winango wakuyambirira ambanesane?
Kodi Paulo, Barnaba na anzawo adaifikisa kuponi nkhaniyo?
Werengani Mabasa 15:12-18, 23-29, ndipo mukamala cezeranani mbvunzo wakutewerayu:
Kodi n’ciyani comwe bungwe lakutonga lakuyambirira likhacita likanati kusankhula bzakucita? — Onani mavesi 12, 15 na 28.
Werengani Mabasa 15:30, 31 na 16:4, 5, ndipo mukamala cezeranani mibvunzo ikutewerayi:
Kodi Akristau wakuyambirira adacita ciyani pomwe adatambira malango yakucokera ku bungwe lakutonga?
Kodi Yahova adawasimba tani thangwe ra kubvera kwawo?
Werengani 2 Timotio 3:16 na Tiyago 1:5, ndipo mukamala cezeranani mbvunzo wakutewerayu:
Kodi Bungwe Lakutonga limbanyang’ana kuponi malango likafuna kusankhula bzakucita ntsiku zino?
WANTHU WINANGO AMBALEWA KUTI: “Ukambabvera Bungwe Lakutonga umbandokhala ukubvera nzeru za wanthu.”
Kodi n’ciyani cimbakutsimikizirani kuti Jezu ndiye akutsogolera Bungwe Lakutonga?
KODI MWAPFUNZA CIYANI?
Bungwe Lakutonga ni “kapolo wakukhulupirika na wanzeru” omwe adasankhulidwa na Kristu. Iro limbatsogolera Akristau pa dziko lentse na kuwapasa cakudya cauzimu.
Mibvunzo yakubwerezera
Mbani adasankhula “kapolo wakukhulupirika na wanzeru”?
Kodi n’ciyani comwe Bungwe Lakutonga limbacita kuti litithandize?
Kodi imwepo mumbakhulupira kuti Bungwe Lakutonga ni “kapolo wakukhulupirika na wanzeru”?
ONANI POMWE IBZI
Onani kuti Bungwe Lakutonga limbalinganiza tani basa.
“Kodi Bungwe Lakutonga la Mboni za Yahova n’Ciyani?” (Nkhani ya pa jw.org)
Onani kuti Bungwe Lakutonga limbacita tani kuti litsimikizire kuti ifepano tikutambira cakudya cauzimu pa nthawe yace?
Kodi abale omwe ambacita mbali ya Bungwe Lakutonga ambabva tani na basa lomwe Jezu adawapasa?
Kodi mitsonkhano yathu ya gwere na mitsonkhano mikulu-mikulu imbalatiza tani kuti Yahova akutsogolera Bungwe Lakutonga?