Khalani Wakudeka Mtima

Kodi n’Ciyani Comwe Jezu Adacita?

VIDIYO: Jezu Akupoza Zimola

1. Onani VIDIYO, ayai werengani Juwau 9:1-7. Patsogolo pace kumbukirani mibvunzo iyi:

1. Kodi Jezu adayamba kupoza zimola ule ayai adayamba kumupalizira? — Onani Juwau 9:35-38.

2. Thangwe ranyi bzomwe Jezu adacita bzidacitisa kuti zimola ule akhale wakukonzeka kutetekera Jezu?

Kodi Tikupfunza Ciyani na Bzomwe Jezu Adacita?

2. Bzingakhale bzakusaya kunesa kuna wanthu kutetekera mafala yathu tikalatiza kuti tikucita nawo thupo.

Tewezerani Jezu

3. Mbabverani ntsisi wanthu. Mbayezerani kukumbukira momwe iwo akubvera.

1. Bzibvunzeni kuti: ‘Kodi n’ciyani comwe cikumucitisa thupo? Kodi ni nkhani iponi yomwe ingamuthandize ayai yomwe ingamudekere?’ Kubzicita mibvunzo imweyi kungakuthandizeni kuti mumbacite bzinthu mwakudeka mtima na kumbalatizambo kuti mumbacita thupo na wanthu.

2. Imwepo mungalatize kuti mumbacita thupo na munthu mukamutetekera. Tenepo, iye akakufotokozerani momwe akubvera ayai bvuto lomwe akugumana nalo pa moyo wace, lekani kumbacinja nkhaniyo mucifotokoza inango.

4. Mbalewalewani mwakudeka mtima na mwaulemu. Momwe imwepo munilewalewera bzingalatize kuti muna ntsisi na wanthu ndipo mukufuna kuwathandiza ayai ne. Ndipo mbasamalani na bzomwe mumbalewa na momwe mumbalewalewera kuti mutcenkhe kukalipisa wanthu.

5. Khalani wakuthandiza. Mbanyang’anani mipata yakuthemera kuti muthandize wanthu. Ndipo ifepano tikacita bzinthu mwakudeka mtima bzin’dzacitisa kuti wanthu afune kutitetekera.