Malango ya Mtsonkhano wa Moyo Wathu Wacikristau na Utumiki

Nkhani Zace

1. Malango yomwe yali mu tsamba lino yanithandiza wentse omwe an’khala na mbali

pa Mtsonkhano wa Moyo Wathu na Utumiki. Ndipo iwo an’funika kuwerenga

malango ya nkhani yawo mu Kabukhu ka Mitsonkhano ka Moyo Wathu Wacikristau

na Utumiki na kuwerengambo malango ya mu tsamba lino pomwe akanati

kukonzekera nkhani yawo. Mpalizi ali-wentse an’funika kulimbikisidwa kuti ambacite

mbali za anyakupfunza. Ndipo wale omwe ambatsonkhana na gwere

mwakukhazikika angapasidwembo mbalizi penu iwo ambabverana na mapfunziso ya

m’Bibliya na kuteweza mitemo yacikristau. Nyakunyang’anira Mtsonkhano wa Moyo

Wathu na Utumiki an’funika kucezerana na ali-wentse omwe akanati kukhala mpalizi

wakusaya kubatizidwa omwe angafune kumbapasidwambo mbali za anyakupfunza,

ndipo patsogolo pace amuuze penu akuthemera kumbapasidwambo nkhani ayai

ne. Pa macezayo, mpfunzisi wa munthuyo an’funika kukhala alipombo (ayai

m’bereki wace akakhala ni mtumiki wa Yahova). Pakucezeranapo angaphatise basa

mibvunzo yomwe imbacitidwa kuna wale omwe akufuna kukhala apalizi wakusaya

kubatizidwa. — od-CN msolo 8 ndi. 8.

MAFALA YAKUFUNGULIRA

2. Mphindi 1. Mdzinga uli-wentse, pambuyo pa nyimbo yakufungulira na mpembo, nyakutsogolera Mtsonkhano wa Moyo Wathu na Utumiki an’dzalewa mafala yomwe yan’dzacitisa abveseri kufunisisa kubvesera mbali za mtsonkhanoyo. Iye an’funika kudzalewambo nfundo zomwe zin’dzalimbikisa abveseriwo.

CUMA CA M’FALA LA MULUNGU

3. Nkhani: Mphindi 10. Mu Kabukhu ka Mitsonkhano ka Moyo na Utumiki muna msolo wa nkhani ya mbali imweyi, pabodzi na nfundo ziwiri ayai zitatu zikulu-zikulu. Nkhaniyi in’funika kumbacitidwa na mkulu ayai mtumiki wakuthandiza wakuthemera. Kawerengedwe ka Bibliya ka mdzingayo kakayamba na bukhu lipsa la m’Bibliya, pan’dzalatizidwa vidiyo yakufotokoza bukhulo. Mfotokozi wa nkhaniyo an’funika kulatiza kubverana kwa vidiyoyo na nkhani akuifotokozayo. Iye an’funikambo kuwonesesa kuti wafotokoza nfundo zentse zakugumanika mu kabukhu ka mitsonkhano. Ndipo nthawe ikabvumiza, angaphatisembo basa bzithunzi-thunzi na mareferesiya yomwe yaikhidwa kuti yabvekese nkhaniyo.

4. Cuma Cauzimu: Mphindi 10. Imweyi ni mbali ya mibvunzo na mitawiro, ndipo mfotokozi an’funika lini kuyamba na mafala yakufungulira ne kumaliza na mafala yakufunga nayo. Mbaliyi in’funika kumbacitidwa na mkulu ayai mtumiki wakuthandiza wakuthemera. Mfotokozi angasankhule momwe angaphatisire basa nthawe yace pa nfundo ziwirizo kuti alatize momwe gwere lingaphatisire basa nfundozo. Tsono iye an’funika kubvunza mibvunzo yentse kwa abveseriwo. Iye angasankhule penu angakumbire abveseri kuti awerenge mavesi yentse ya mbvunzo wakuyambirira, ayai angandowerengese mavesi yakucepa. Abveseri omwe alatidwe an’funika kupereka mitawiro yawo mu tumphindi 30 ayai twakucepa.

5. Kuwerengedwa kwa Bibliya: Mphindi 4 ayai zakucepa. Mbali ya anyakupfunzayi in’funika kucitidwa na mwamuna. Ndipo nyakupfunzayo an’funika kuwerenga mbaliyi mwakusaya kulewa mafala yakufungulira ne yakufunga nayo. Nyakutsogolera mtsonkhano an’funika kuthandiza anyakupfunza kuti ambawerenge bwino-bwino, mwacibadwa, mwakubveseseka, mwakusaya kuphonya-phonya, mwakucinja-cinja fala, mwakutsindika mafala yakuthemera na mwakumbaima-ima m’mbuto zakuthemera. Pakuti nthawe zinango mbali ya kawerengedwe ka Bibliya imbakhala na mavesi mazinji ayai mang’ono-ng’ono kuti yawerengedwe, bzingakhale bwino kuti nyakupereka mbali kwa anyakupfunza ambakumbukire luso la nyakupfunza ali-wentse pomwe ankupereka mbalizo.

BZIPEREKENI MU UTUMIKI BWAKUMUNDA

6. Mphindi 15. Mbali imweyi idakonzedwa kuti ithandize wentse kukulisa luso lawo la kuyambisa maceza, kupalizira na kupfunzisa mu utumiki. Ndipo bzikafunikira, akulu angambapasidwembo mbali zimwezi. Nyakupfunza ali-wentse an’funika kuphatisira basa pfunziro ayai malango ya momwe angacitire mbali yace yakugumanika mkati mwa parênteses mu Kabukhu ka Mitsonkhano ka Moyo na Utumiki. Nthawe zinango pfunziro lomwe angapasidwe lingacokere mu broxura lakuti Kuwerenga na Kupfunzisa ayai lakuti Mbafunani Wanthu. Ndipo nkhani zinango zin’dzakhala zakucita kucezerana na abveseri. Tenepo, nkhanizi zin’funika kufotokozedwa na mkulu ayai mtumiki wakuthandiza wakuthemera. — Onani ndime 15 kuti mudziwe momwe mungacitire mbali ya kucezerana na abveseri.

7. Kuyambisa Maceza: Mbali ya anyakupfunzayi ingaperekedwe kwa mwamuna ayai mkazi. Ndipo nyakuthandizayo an’funikambo kukhala mwamuna ayai mkazi ninga nyakupfunzayo ayai wa m’banja libodzi. Iwo angacite mbali yawoyo adakhala ayai adaima. — Kuti mudziwe bzizinji pakulewa bza nkhani zakucezerana na mtundu wa upalizi, onani ndime 12 na 13.

8. Kucita Ulendo Bwakubwereza: Mbali ya anyakupfunzayi ingaperekedwe kwa mwamuna ayai mkazi. Ndipo nyakuthandizayo an’funikambo kukhala mwamuna ayai mkazi ninga nyakupfunzayo. (km-CN 5/97 tsa. 2) Iwo angacite mbali yawoyo adakhala ayai adaima. Nyakupfunzayo an’funika kulatiza momwe angalalewere kuti acitise munthu omwe adaceza naye kale pa ulendo bwakuyamba afune kudziwa bzizinji. — Kuti mudziwe bzizinji pakulewa bza nkhani zakucezerana na mtundu wa upalizi, onani ndime 12 na 13.

9. Kucitisa Mapfunziro: Mbali ya anyakupfunzayi ingaperekedwe kwa mwamuna ayai mkazi. Ndipo nyakuthandizayo an’funikambo kukhala mwamuna ayai mkazi ninga nyakupfunzayo. (km-CN 5/97 tsa. 2) Iwo angacite mbali yawoyo adakhala ayai adaima. Mbali imweyi in’funika kulatiza ciratizo ca pfunziro la Bibliya lomwe layamba kale. Tenepo, bzin’funika lini kuyamba na mafala yakufungulira ninga kuyamba na kumusana ayai kukhala na mafala yakufunga nayo, kusiya penu mbali ya nyakupfunzayo ikukumbira kuti acite bzimwebzo. Ndipo mpsakufunika lini kuwerenga ndime zentse zomwe zalatidwazo, napo kuti nthawe zinango bzingacitidwe.

10. Kufotokoza Bzomwe Mumbakhulupira: Mbaliyi ikakhala ni nkhani yakucita kufotokoza, in’funika kucitidwa na mwamuna. Tsono penu ni mbali ya ciratizo, ingacitidwe na mwamuna ayai mkazi. Ndipo nyakuthandizayo an’funika kukhala mwamuna ayai mkazi ninga nyakupfunzayo ayai wa m’banja libodzi. Nyakupfunza an’funika kutawira bwino na mwakusamala mbvunzo wa msolo wa nkhani yomwe akucezeranayo mwakuphatisa basa mareferensiya yomwe yaikhidwa. Ndipo nyakupfunzayo angasankhule kulewa ayai kusaya kulewa referensiya yomwe afufudza pomwe akufotokoza nkhani yace.

11. Nkhani: Mbali ya anyakupfunzayi in’funika kuperekedwa kwa m’bale, aciifotokoza kuna gwere ninga nkhani. Nkhaniyi ikacokera pa mbali ya “Nkhani Zakuthumizira A” ya m’broxura la Mbafunani Wanthu, nyakupfunza an’funika kulatiza momwe tingaphatisire basa mu upalizi mavesi ya mu nkhani yaceyo. Mwa ciratizo, iye angafotokoze kuti ni pa nthawe iponi yomwe tingaphatise basa vesiro mu utumiki, angafotokoze thandauzo la vesiro na momwe tingalifotokozere pomwe tikuceza na munthu. Tsono nkhaniyo ikacokera pa libodzi mwa mapfunziro ya m’broxura la Mbafunani Wanthu, nyakupfunza an’funika kufotokoza momwe tingaphatisire basa nkhani ya m’pfunzirolo mu utumiki. Iye angabveseke nfundo yakuyamba ya m’pfunzirolo ayai vesi liri-lentse lomwe likugumanika m’pfunzirolo, bzikakhala bzakufunikira.

12. Nkhani Zomwe Mungacezerane: Bzomwe bzikufokozedwa mu ndime ino na yomwe ikubwerayi, bzikuphata basa pa mbali za “Kuyambisa Maceza” na “Kucita Ulendo Bwakubwereza.” Pakakhala palibe kuperekedwa malango manango, cakulinga ca nyakupfunza ni kufokoza cadidi ca m’Bibliya cakusaya kunesa comwe cingakhale cakuthandiza kwa munthu omwe akuceza naye na kusiya nkhani yomwe angadzacezerane pa ulendo bunango. Nyakupfunza an’funika kusankhula nkhani yomwe angaceze na mwenekaciro mui yomwe njakuthemera na yakubverana na gawo lanu. Bzina nyakupfunzayo penu angafune kupereka bukhu ayai kuwonesa vidiyo yomwe imbacita mbali ya Bzinthu Bzomwe Timbapfunzisira. M’mbuto mwa kumbacita kukoya mu msolo mtundu unango wa maceza, anyakupfunza an’funika kukulisa luso lawo la kuceza na wanthu, na kukulisa makhalidwe ninga kumbacita thupo na wanthu na kumbalewalewa macibadwa.

13. Mtundu wa Upalizi: Nyakupfunza an’funika kuphatisira basa mtundu wa upalizi omwe apasidwa mwakubverana na momwe bzinthu bziriri m’gawo lanu. Mwa ciratizo:

(1) Upalizi bwa Nyumba na Nyumba: Mtundu umweyu wa upalizi umbaphatanidza kupalizira nyumba na nyumba, kupalizira mwakuphatisa basa telefoni ayai mwakunemba matsamba. Ndipo umbaphatanidza kucita ulendo bwakubwereza kwa wanthu omwe tidaceza nawo pa upalizi bwa nyumba na nyumba.

(2) Upalizi Bwakusaya Kulinganizidwa: Mtundu umweyu wa upalizi umbaphataniza kupalizira wanthu kucokera pa nkhani inango yomwe tikuceza nawo. Angakhale anzathu wa ku basa, omwe timbapfunza nawo, avizinyu wathu, wanthu omwe tinawo pabodzi m’karo ayai omwe tagumana nawo ku mbuto iri-yentse pomwe tikucita mabasa yathu ya ntsiku na ntsiku.

(3) Upalizi bwa Padeca: Mtundu umweyu wa upalizi umbaphataniza kupalizira na tungolo, kupalizira wanthu m’mamerkado, mu mseu, mu jardim, momwe mumbaimisidwa karo, ayai momwe mumbagumanika wanthu azinji.

14. Kuphatisira Basa Mabukhu na Mavidiyo: Mwakubverana na momwe bzinthu bziriri, nyakupfunza angasankhule penu angafune kuwonesa vidiyo ayai bukhu. Penu mbali ya nyakupfunza ikulewa kuti iye awonese vidiyo, ayai ndiye wacita kusankhula kucita bzimwebzo, an’funika kulewa bza vidiyoyo acicezerana bzomwe ikufotokoza, koma an’funika lini kuiliza.

KUKHALA NA MOYO WACIKRISTAU

15. Pambuyo pa nyimbo, mphindi 15 za mbali imweyi zin’dzakhala za nkhani ibodzi ayai ziwiri zomwe cakulinga cace ni kuthandiza abveseri kuphatisa basa Fala la Mulungu pa moyo wawo. Pakakhala palibe malango manango, mbali imweyi ingaperekedwe kwa mkulu ayai mtumiki wakuthandiza wakuthemera, kupambula mbali ya bzakusaya bza gwere yomwe imbacitidwa na mkulu. Penu nkhani njakucita kucezerana, mfotokozi wa nkhaniyo angacite mibvunzo nthawe iri-yentse pomwe akufotokoza nkhaniyo na kufotokozambo nfundo zinango za nkhani yace. Mafala yakuyambisira nkhani yace yan’funika kukhala yakucepa kuti akwanise kufotokoza nfundo zentse za m’nkhani yace na kupasambo mwayi kuna abveseri wa kuperekambo mitawiro. Penu nkhaniyo ina mbali ya kubvunza wanthu winango mibvunzo, iwo an’funika kuyenda pa platifomu penu mpsakukwanisika, m’mbuto mwa kutawira adakhala m’mbuto zawo.

16. Pfunziro la Bibliya la Gwere: Mphindi 30. Mbali imweyi imbaperekedwa kwa mkulu wakuthemera. (M’magwere momwe muna akulu ang’ono-ng’ono, atumiki wakuthandiza wakuthemera angapasidwembo mbaliyi, bzikafunikira.) Bungwe la akulu lingasankhule abale omwe mbakuthemera kucitisa Pfunziro la Bibliya la Gwere. Abale omwe anisankhulidwawo an’funika kucitisa pfunzirolo mu njira yabwino kuti aleke kudya nthawe; an’funikambo kutsindika bzinembo bza nfundo zikulu-zikulu na kuthandizambo abveseri wentse kuwona kufunika kwa nfundo zomwe zikupfunzidwazo. Iwo an’funika kuwerenga malango yakuperekedwa na gulu lathu yakulewa bza momwe tin’funika kumbacitisira nkhani zomwe zimbakhala na mbali ya mibvunzo na mitawiro. (w23.04 tsa. 24, kwadru) Nfundo zentse za m’pfunzirolo zikamala kufotokozedwa, bzin’funikira lini pomwe kuwanza bzakulalewa pakufuna kumaliza nthawe yomwe yasala. Penu mpsakukwanisika, anyakutsogolera na anyakuwerenga wakusiyana-siyana angaphatisidwe basa mdzinga uli-wentse. Penu nyakutsogolera Mtsonkhano wa Moyo Wathu na Utumiki an’lewa kuti pfunzirolo licitidwe mwa cigwatho, nyakucitisa pfunziroyo angasankhule momwe angacitire bzimwebzo. Pinango angasankhule kuwerenga ndime zinango, acimoga zinango.

MAFALA YAKUFUNGA NAYO

17. Mphindi 3. Nyakutsogolera Mtsonkhano wa Moyo Wathu na Utumiki an’dzafotokoza mwacigwatho nfundo zikulu-zikulu za mtsonkhanoyo. Iye angalewembo nfundo zinango zomwe zin’dzapfunzidwa mu mdzinga wakutewera. Ndipo penu nthawe in’bvumiza, iye angadziwisembo madzina ya abale omwe an’dzacita mbali za anyakupfunza mu mdzinga wakutewerayo. Pakakhala palibe kuperekedwa malango manango, nyakutsogolera mtsonkhanoyo angapereke bzidziwiso na kuwerengambo matsamba yakuyenda kuna gwere pa nthawe imweyi. Bzidziwiso bzinango ninga bza utumiki bwakumunda, ndondomeko ya kucenesa Nyumba ya Umambo, bzin’funika lini kuperekedwa pa pulatifomu; bzingaikhidwe pa kwadru ya bzidziwiso. Penu nthawe yakuwerenga bzidziwiso na matsambaya ingakwane lini pa mphindi zitatu za mafala yakufunga nayo, nyakutsogolera mtsonkhanoyo angakumbire abale omwe an’dzacita mbali za Kukhala na Moyo Wacikristau kuti afotokoze mbali zawo mwacigwatho. (Onani ndime 16 na 19.) Mtsonkhano un’funika kufunga na nyimbo pabodzi na mpembo.

KUTENDA NA KUPEREKA MALANGO

18. Nyakupfunza ali-wentse akamala kucita mbali yace, nyakutsogolera mtsonkhano wa Moyo Wathu na Utumiki an’dzakhala na mphindi pafupi-fupi ibodzi kuti atende nyakupfunzayo, aciperekambo malango mwakubverana na pfunziro lomwe apasidwa. Pomwe nyakutsogolera mtsonkhano an’dzacemera nyakupfunza kuti adzacite mbali yace, iye an’funika lini kulewa pfunziro lomwe nyakupfunzayo ankuphatisa basa. Tsono mbali ya nyakupfunzayo ikamala, nyakutsogolera mtsonkhanoyo an’dzatenda nyakupfunzayo, ndipo patsogolo pace an’dzalewa pfunziro lomwe iye akhaphatisa basa, acifotokozambo thangwe lomwe ankulewera kuti nyakupfunzayo aphatisa basa bwino malango ya m’pfunzirolo, ayai angafotokoze mwakudeka mtima thangwe lomwe akuwonera kuti nyakupfunzayo an’funika kudzabwerezera pomwe pfunzirolo kutsogolo. Nyakutsogolera mtsonkhanoyo angafotokozembo mbali zinango za ciratizoco, akawona kuti kucita bzimwebzo kungathandize nyakupfunzayo ayai abveseri. Bzikafunikira, nyakutsogolera mtsonkhanoyo angaperekembo malango manango yakuthandiza kwa nyakupfunzayo pambali, yakucokera m’broxura lakuti Mbafunani Wanthu, Kuwerenga na Kupfunzisa, ayai ya m’bukhu lakuti Sukulu ya Utumiki wa Mulungu, ndipo angacite bzimwebzi mitsonkhano ikamala ayai pa nthawe inango. Malangoyo yangakhale yakubverana na pfunziro lomwe akhaphatisa basa ayai pfunziro linango. — Kuti mudziwe bzizinji pakulewa bza udindo bwa nyakutsogolera Mtsonkhano wa Moyo Wathu na Utumiki na udindo bwa mthandizi wakupereka malango, onani ndime 19, 24, na 25.

NTHAWE

19. Palibe mbali yomwe in’funika kupitirira nthawe ne mafala ya nyakutsogolera mtsonkhano wa Moyo Wathu na Utumiki. Napo Kabukhu ka Mitsonkhano ka Moyo na Utumiki kambalatiza nthawe ya mbali iri-yentse, tsono penu mwamaliza nkhani yanu pomwe nthawe yomwe yalatidwayo ikanati kumala, mun’funikira lini kuthumizira nfundo zinango na cakulinga ca kumaliza nthawe yomwe yasala. Mbali iri-yentse ikadya nthawe, nyakutsogolera mtsonkhano wa Moyo Wathu na Utumiki ayai mthandizi wakupereka malango an’funika kupereka malango kuna omwe wadya nthaweyo, mtsonkhano ukamala. (Onani ndime 24 na 25.) Mtsonkhano wentse kuphatanidzambo nyimbo na mipembo umbamale ora ibodzi na mphindi 45.

NYAKUNYANG’ANIRA DERA AKAZUNGIRA GWERE

20. Penu gwere likuzungiridwa na nyakunyang’anira dera, mtsonkhano wa pakati pa mdzinga un’funika kucitidwa mwakuteweza ndondomeko ya mu Kabukhu ka Mitsonkhano ka Moyo na Utumiki; tsono Pfunziro la Bibliya la Gwere pa mbali ya Kukhala na Moyo Wacikristau lin’dzapitidwa nkhankha na nkhani ya utumiki ya nyakunyang’anira dera ya mphindi 30. Pomwe nkhani ya utumikiyi ikanati kuyamba, nyakutsogolera Mtsonkhano wa Moyo Wathu na Utumiki an’dzafotokoza mwacigwatho nfundo zikulu-zikulu za mtsonkhanoyo, kulewa nfundo zinango zomwe zin’dzapfunzidwa mu mdzinga wakutewera, kupereka bzidziwiso na kuwerengambo matsamba yakuyenda kuna gwere, patsogolo pace iye an’dzacemera nyakunyang’anira dera. Nkhaniyo ikamala, nyakunyang’anira derayo ndiye an’dzamaliza mtsonkhanoyo na nyimbo yomwe iye wasankhula. Nyimboyo ikamala, iye angasankhule m’bale kuti adzafunge mtsonkhanoyo na mpembo. Pa mdzinga wakuzungiridwa na nyakunyan’ganira dera, mu sala B mun’dzacitidwa lini mbali za anyakupfunza. Tsono kagulu ka cirewedwe cinango kangacite mitsonkhano yace, napo pa mdzinga omwe nyakunyang’anira derayo akucezera gwere lomwe limbanyang’anira kaguluko. Kaguluko kan’dzafunika kuphatana na gwerelo kuti kadzabvesere nkhani ya utumiki ya nyakunyang’anira dera.

MDZINGA WA MTSONKHANO WA DERA AYAI MTSONKHANO WA CIGAWO

21. Pa mdzinga wa mtsonkhano wa dera ayai mtsonkhano wa cigawo, magwere yan’funika lini kucita mitsonkhano ya gwere. Nkhani za mtsonkhano wa pakati pa mdzinga zingapfunzidwe pa kunamata kwa pa banja ayai pa pfunziro la patekha.

MDZINGA WA CIKUMBUSO

22. Ntsiku ya cikumbuso ikakhala pakati pa mdzinga, pan’funikira lini kucitidwa Mtsonkhano wa Moyo Wathu na Utumiki.

NYAKUNYANG’ANIRA MTSONKHANO WA MOYO WATHU NA UTUMIKI

23. Mkulu m’bodzi wakusankhulidwa na bungwe la akulu an’dzatumikira ninga nyakunyang’anira Mtsonkhano wa Moyo Wathu na Utumiki. Udindo bwace ni kuwonesesa kuti mtsonkhanoyu udalinganizidwa bwino, ndipo ukucitidwa mwakubverana na malangoya. Iye an’funika kumbaphata basa pabodzi na mthandizi wakupereka malango. Kabukhu ka Mitsonkhano ka Moyo na Utumiki kakandofika, nyakunyang’anira Mtsonkhano wa Moyo Wathu na Utumiki an’funika kunemberatu madzina ya omwe an’dzacita mbali pa mitsonkhano ya minyezi yentse miwiri. Mbalizi zikuphatanidza za anyakupfunza, za omwe ni anyakupfunza lini na kunembambo madzina ya omwe an’dzatsogolera mitsonkhano, omwe adasankhulidwa na bungwe la akulu. (Onani ndime 3-16 na 24.) Pomwe akusankhula abale omwe an’dzacita mbali za anyakupfunza, iye an’funika kukumbukira bzinthu ninga ibzi: magole ya nyakupfunza ali-wentse, luso lace na ufulu bwace bwa kulewalewa pa nkhani yomwe akupasidwayo. Ndipo iye an’funikambo kukumbukira bzinthu bzimwebzi pomwe akusankhula abale omwe an’dzafotokozambo nkhani zinango za mtsonkhanoyo. Nkhani iri-yentse in’funika kuperekedwa pakasala midzinga mitatu ayai kuposa mitatu kuti adzacite mbaliyo. Ndipo an’funika kumbaphatisa basa formulariyo ya Mbali Yanu mu Mtsonkhano wa Moyo Wathu Wacikristau na Utumiki (S-89). Nyakunyang’anira Mtsonkhano wa Moyo Wathu na Utumiki an’funika kuwonesesa kuti kopiya ya ndondomeko ya mitsonkhano yentse yaikhidwa pa kwadru ya bzidziwiso. Bungwe la akulu lingasankhule mkulu munango ayai mtumiki wakuthandiza kuti ambamuthandize. Tsono, akulu okha ndipo an’funika kumbasankhula abale omwe ambacite mbali zomwe ni za anyakupfunza lini.

NYAKUTSOGOLERA MTSONKHANO WA MOYO WATHU NA UTUMIKI

24. Mdzinga uli-wentse, mkulu m’bodzi ambatumikire ninga nyakutsogolera Mtsonkhano wa Moyo Wathu na Utumiki. (Penu akulu mbakucepa, atumiki wakuthandiza wakuthemera angasankhulidwe kuti ambatsogolerembo mtsonkhanoyu.) Nyakutsogolera mtsonkhano ana udindo bwa kukonzekera mafala yakufungulira na yakufunga nayo. Ndipo ndiyembo omwe ambacemera omwe ana mbali, ndipo akulu akakhala wakucepa iye angambacitembo mbali zinango, maka-maka zire zomwe ziribe bzakulewa bzizinji koma kuwonesedwa kwa mavidiyo yokha. Mafala yomwe ambalewe mbali iri-yentse ikamala, yan’funika kukhala yakucepa. Bungwe la akulu lin’funika kusankhula akulu omwe mbakuthemera kuti ambacite mbali imweyi. Akulu wakusankhulidwawo an’funika kumbacinjana-cinjana pakutsogolera mtsonkhanoyu. Malingana na momwe bzinthu bziriri, nyakunyang’anira Mtsonkhano wa Moyo Wathu na Utumiki pinango angambatsogolere mwakubwereza-bwereza kusiyana na akulu winangowo. Penu m’bale ngwakuthemera kutsogolera Pfunziro la Bibliya la Gwere, ndiye kuti iye ngwakuthemerambo kutsogolera mtsonkhanoyu. Tsono, kumbukirani kuti mkulu omwe asankhulidwe kukhala nyakutsogolera mtsonkhano, ndiyembo ambatenda na kupereka malango mwakudeka mtima kwa abale omwe an’cita mbali za anyakupfunza. Ndipo ndiyembo omwe ambawonesesa kuti mtsonkhanoyo ukumala pa nthawe yace. (Onani ndime 17 na 19.) Penu pana mbuto yakukwanira ndipo penu nyakutsogolera mtsonkhano angafune, pangaimisidwe mikrofoni inango pa pulatifomupo kuti iye aphatise basa; bzimwebzi bzin’dzathandiza kuti pomwe akucemera abale omwe adzacite mbali zawo, abalewo an’dzakhala aimambo kale pa mikrofoni yakufotokozerera nkhani. Penu nyakutsogolerayo angafune, angacite kukhala pafupi na meza pa pulatifomupo pomwe in’dzakhala ikucitidwa mbali ya nyakupfunza ya kuwerengedwa kwa Bibliya, pabodzi na mbali za mu Bziperekeni mu Utumiki Bwakumunda. Bzimwebzi bzin’dzathandiza kukoya nthawe.

MTHANDIZI WAKUPEREKA MALANGO

25. Penu mpsakukwanisika, bzingakhale bwino kusankhula mkulu omwe ni mfotokozi wa luso kuti ambacite mbali imweyi. Udindo bwa mthandizi wakupereka malango ni kupereka malango kwa akulu ayai atumiki wakuthandiza pa mbali iri-yentse yomwe angacite bzikafunikira, ninga mu mbali ya mu Mtsonkhano wa Moyo Wathu na Utumiki, pa nkhani ya wentse na pa kuwerenga na kucitisa Pfunziro la Ntsanza ya Mulindiri, ayai Pfunziro la Bibliya la Gwere. (Onani ndime 19.) Penu alipo akulu wakukwanira m’gweremo omwe ambafotokoza na kupfunzisa mwaluso, akulu wakusiyana-siyana wakuthemera angaphatisidwe basa gole liri-lentse ninga mthandizi wakupereka malango. Tsono mpsakufunika lini kuti mthandiziyo ambapereke malango nthawe iri-yentse pomwe m’bale an’cita mbali.

SALA B

26. Pakakhala na anyakupfunza azinji, pinango pangacitidwe makonzedwe kuti mbali za anyakupfunzazo zimbacitidwembo mu sala B. Penu mbalizi zin’dzacitidwambo mu sala B, pan’funika kusankhulidwa m’bale kuti ambakatsogolere, ndipo bzingakhale bwino acikhala mkulu. Komwe mpsakufunika, angasankhulidwembo mtumiki wakuthandiza wakuthemera kuti ambatsogolere. Bungwe la akulu lingasankhule m’bale omwe angambatsogolere mbaliyi, ayai lingawone penu abale angambacinjane-cinjane pa kutsogolera mdzinga uli-wense. M’bale omwe ati ambatsogolere mu sala B, an’funika kumbateweza malango yakugumanika mu ndime 18. Penu mbali za anyakupfunza zin’dzacitidwa mu sala B, anyakupfunza an’funika kudzakumbiridwa kuti ayende mu sala B, ikandomala mbali ya Kufufudza Cuma Cauzimu ya mu Cuma ca m’Fala la Mulungu. Ndipo iwo an’funika kubwerera kuti adzaphatane na gwere ikandomala mbali ya nyakupfunza wakumalizira.

MAVIDIYO

27. Pa mtsonkhanoyu pan’dzakhalambo na mavidiyo. Mavidiyoya yan’dzagumanika mu JW Library^® yomwe yangaphatisidwe basa m’mitcini yakusiyana-siyana.

S-38-NYU 11/23