Xikola ya Utumiki bwa Mulungu ya 2015 In’dzatithandiza Kukulisa Luso Lathu Lakupfunzisa
1 Nyakunemba psalymo Davide adanemba kuti: ‘Mafala ya pa mulomo pangu na kukumbuka kwa mtima wangu, Bzikhale bzakukudekerani, imwe Yahova, Tsendwa langu na Mpulumusi wangu.’ (Psal. 19:14) Ifepanombo timbafunisisa kuti mafala yathu yakondwese Yahova, thangwe timbalemekezambo mwai wathu wakulewalewa cadidi mu gwere na mu utumiki. Xikola ya Utumiki bwa Mulungu ni njira ibodzi yomwe Yahova ankutipfunzisira kuti ticite bwino mu utumiki. Kupfunzisidwa kumweku kumbacitika mu mdzinga uli-wense m’magwere yakupitirira 111.000 ya pa dziko lense. Bzimwebzi bzinkuthandiza abale na mfumakazi wa bzikhalidwe bzakusiyana-siyana kuzungulira dziko lense kuti wakhale atumiki wakukwana na wakuthemera wa bzipsa bzabwino, wakukwanisa kupfunzisa mwakutsimikiza, mwaluso, na mwakukhwimika.—Mab. 19:8; Wakol. 4:6.
2 Ndandanda ya xikola ya 2015 inkuphatanidzambo nfundo za m’kabukhu kakuti Kodi MʼBaibulo Muli Nkhani Zotani? na nkhani za m’bukhu lakuti Baibulo Limaphunzitsa Chiyani na bukhu lakuti Chikondi Cha Mulungu. Kuthumizira bzimwebzi, nthawe yacinjidwa pa mbali ya Nfundo zikulu-zikulu za m’Bibliya na Mbali N.° 1. Kucinja kumweku pabodzi na malango ya momwe mbali za mu xikola zin’dzacitidwira kunkufotokozedwa mu ndime zinkutewerazi.
3 Nfundo zikulu-zikulu za m’Bibliya: Abale womwe wan’dzapasidwa mbali imweyi wan’dzakhala na mphindi ziwiri kuti wafotokoze nfundo ibodzi ya m’Bibliya mu mbali ya kuwerengedwa kwa Bibliya. Kukonzekera bwino kun’dzacitisa kuti mu nthawe yomwe mwapasidwayo mukwanise kufotokoza nfundo zakuthandiza gwere. Patsogolo pace ninga momwe tikhacitira kale, gwere lindzakhala na mphindi 6 zakufotokoza nfundo zomwe agumana pa kuwerengedwa kwa Bibliya kwa mdzinga mu tumphindi twakusaya kupitirira 30. Bzimbafuna kukonzekera na kusamala kuti ticite mitawiro yacigwatho mu tumphindi 30 basi, tsono kucita bzimwebzi ni njira yabwino yakutipfunzisira. Bzimwebzi bzin’dzapasa mpata azinji kuti afotokozembo bzomwe iwo wapfunza pa kufufudza kwawo.
4 Mbali N.° 1: Nthawe yomwe yaikhidwa pa kuwerengedwa kwa Bibliya yabwezedwa kufika pa mphindi 3 ayai zakucepa ndipo bzin’dzakwanisika kumaliza nfundo zing’ono-ng’ono. Wale womwe wan’dzapasidwa mbali yakuwerengayi, wan’dzafunika kumbakonzekera kwene-kwene mwa kuwerenga mwa kucosa mafala wacimbabvesesa na tceru kafotokozedwe kawo ka mafala na kuwerenga mwakusaya cikukumira kuti wakwanise kubvekesa nzeru. Atumiki wense wa Yahova wan’funika kulimbikira kuwerenga bwino, pakuti kuwerenga ni mbali yakufunika kwene-kwene pa kunamata kwathu. Mpsakukondwesa kuwona azinji mwa wana wathu ankuwerenga bwino! Abereki wankutendedwa thangwe ra nyongo yawo ya kuthandiza wana wawo mwa lufoyi kuwerenga bwino.
5 Mbali N.° 2: Mbali imweyi in’dzacitidwa na mpfumakazi mu mphindi 5 zokha. Wan’dzafunika kuphatisa basa msolo womwe wan’dzapasidwawo. Penu msolo womwe wan’dzapasidwawo un’dzacokera nkhani za m’kabukhu kakuti Kodi MʼBaibulo Muli Nkhani Zotani?, un’dzafunika kuphatisidwa basa kufotokoza nfundo yakuthandiza mu utumiki bwa kumunda yomwe njaphindu mu gawo la gwere. Penu nkhaniyo in’dzacokera mu bukhu la Baibulo Limaphunzitsa Chiyani, in’dzafunika kuphatisidwa basa pa kufotokoza nfundo yakuthandiza mu utumiki bwa kumunda yomwe njakudziwika mu gawo la gwere. Penu nkhaniyo in’dzacokera mu bukhu la Chikondi cha Mulungu, nyakupfunza an’dzafunika kufotokoza nfundo zakubverana na msolo an’dzapasidwayo, kusankhula mavesi yakuthemera kuyaphatisira basa na kulatiza momwe nfundo zam’Bibliya zingaphatire basa pa moyo Wacikristau. Mavesi manango yakuthumizira yakubverana na msoloyo, yangadzaphatisidwembo basa. Nyakunyang’anira xikola an’dzanyang’ana nyakumuthandizira wace.
6 Mbali N.° 3: Mbaliyi in’dzacitidwa mu mphindi 5 ndipo in’dzaperekedwa kwa m’bale ayai mpfumakazi. Ikapasidwa mpfumakazi, izo zin’dzafunika kucita mbaliyi ninga momwe zin’dzacitira na Mbali N.° 2. Koma ikapasidwa m’bale, iye an’dzafunika kuifotokoza ninga nkhani kuna abveseri. Penu mbali yakuperekedwayo in’cokera mu bukhu la Baibulo Limaphunzitsa Chiyani, in’dzafunika kuti iphatisidwe basa momwe tingacitire muutumiki bwa kumunda pa nfundo zomwe n’zakuthandiza gwerelo. Penu mbali yakuperekedwayo in’cokera mu nfundo za m’bukhu la Chikondi cha Mulungu, nyakupfunzayo an’funika kuufotokoza msolo wapasidwayo, kusankhula mavesi yakuthemera kuyaphatisa basa, na kulatiza momwe nfundo za m’Bibliya zingaphatisidwire basa pa moyo Wacikristau.
7 Nfundo Zatsapano mu Mbali N.° 3 kuna Abale: Penu nkhani in’dzacokera mu nfundo za m’kabukhu kakuti Kodi MʼBaibulo Muli Nkhani Zotani? ayai bukhu la Chikondi cha Mulungu in’dzafunika kucitidwa ninga ciratizo ca kunamata ninga banja ayai ca utumiki bwa kumunda. Ninga momwe bzimbacitikira kale, nyakunyang’anira xikola an’dzasankhula munthu wakum’thandiza. Nyakumuthandizirayo an’funika kukhala wa m’banja lace ayai m’bale wa mu gwere. Mavesi yakuthumizira yomwe yan’kubvekesa nfundo za m’Bibliya zomwe zin’kubverana na msoloyo yangaphatisidwe basa. Mkulu ali-wense ati ambapasidwembo mwa kabodzi-kabodzi mbali imweyi. Mkulu angasankhule yekha bzakucita na nyakumuthandiza wace. Mwakusaya kupenukira, bzin’dzakhala bzakulimbisa kuna gwere kuwona akulu wankulatiza luso lakupfunzisa na munthu wa m’banja lace ayai m’bale winango.
8 Malango: Pambuyo pa nyakupfunza ali-wense kucita mbali yace, nyakunyang’anira xikola an’dzaphatisa basa mphindi ziwiri kuti atende na kupereka malango yakucokera mu bukhu la Pindulani ndi Sukulu ya Utumiki wa Mulungu. Pomwe nyakunyang’anira xikola ankulewa mafala yakucemerera nyakupfunza iye an’dzalewa lini kuti nyakupfunzayo ankupendedwa mbali iponi. Na tenepo, pambuyo pa nyakupfunza ali-wense kucita mbali yace, nyakunyang’anira xikola an’funika kufotokoza mafala yakutenda na nfundo zomwe nyakupfunzayo an’kuyezera kucita, na kufotokoza momwe iye wacitira bwino pa nfundoyo, ayai mwakudeka mtima angafotokoze thangwe ranyi bzakhala bzaphindu kuti nyakupfunzayo wafotokoza nfundo inango mwakubveka bwino.
9 Kwadru ya malango imbagumanika pa tsamba 79 mpaka 81 la bukhu lace la Pindulani ndi Sukulu. Nyakupfunza atamala kucita mbali yace, nyakutsogolera xikola an’dzanemba bzakufunikira mu bukhu la nyakupfunzayo ndipo an’dzamubvunza pambali bzakucita bzomwe iye waphatisira basa pa malango yomwe adapasidwayo. Kutenda pabodzi na kuperenka malango yakuthumizira bzingaperekedwe kwa nyakupfunza pambuyo pa mitsonkhano ayai pa nthawe inango. Kukhala na thupo na nyakupfunza ali-wense wa m’xikola kungawonedwe ninga mpata wakumuthandiza kugumana phindu mwauzimu.—1 Tim. 4:15.
10 Penu nyakupfunza ankupitirira nthawe, nyakunyang’anira xikola ayai nyakumuthandizira wace an’dzapereka cizindikiro, ninga kulira kwa kampainya ayai kulira kwa kugogoda kwa cinthu, koma bzicicitika mu njira yakuthemera mwakulatiza kuti nthawe yamala. Nyakupfunza an’dzafunika kudziwa cizindikiroco mwa kumaliza nfundo yomwe ankulewayo acicoka pa pulatifomupo.—Onani bukhu la Pindulani ndi Sukulu, tsa. 282, ndi. 4.
11 Wense womwe mbakuthemera, wankulimbisidwa kunembesa mu Xikola ya Utumiki wa Mulungu. (Onani bukhu la Pindulani ndi Sukulu, tsa. 282, ndi. 6.) Mapfunziso yomwe xikolayi imbapereka yambathandiza wanthu wa Yahova kuti apalizire na kupfunzisa bzipsa bzabwino bza Umambo mwakutsimikiza, mwaulemu na mwalufoyi. Mwakusaya kupenukira, Yahova ankutumbizidwa mwa kupasidwa mbiri na wense womwe wankugumana phindu kwene-kwene kucokera mu mapfunziso ya Mulunguya!—Psal. 148:12, 13; Zai. 50:4.
[Cithunzi-thunzi pa tsamba 5]
Citani nyongo ya kuyenda patsogolo mwa kubvuma na kuphatisa basa malango