Mungakonzekere Tani Mafala Yabwino Yakuyambisa Nayo Nkhani?

1. Thangwe ranyi mafala yabwino yakuyambisira nkhani njakufunika kwene-kwene?

¹ Ninga momwe cakudya ‘cakucenesa mtima’ cimbatikonzekeresa kuti tidye cakudya caico, mafala yabwino yakuyambisira nkhani, yambafungula njira kuti tikhale na maceza yabwino ya m’Bibliya. Mafala yabwino yakuyambisira nkhani yangasiyane kuwanda kwace na bzomwe bzingalewedwe. Tsono ninga cakudya ca goso labwino, iyo nthawe zense yambafunika kukumbukiridwa na kukonzekeredwa pakana nthawe. (Mimwani [Miyambo] 15:28) N’ciani cingacitise kuti mafala yakuyambisira nkhani yakhale yakuphata mtima?

2. Kodi tingakonzekere tani mafala yakuyambira nayo nkhani yabwino?

² Sankhulani Nkhani Zomwe Wanthu Wangafune Kubva: Mafala yathu yakuyambisira nkhani yan’funika kunyosa ciso ca mweneciro nyumba kuti iye aleke kumalisa macezayo. Tenepo, pomwe munkukonzekera, kumbukirani nkhani zomwe wanthu wangafune kubva kwanuko. Kodi wanthu wa m’mudzimo wan’funa kubva bza boma labwino, moyo wacikondweso m’banja ayai kumala kwa nkhondo? Kawiri-kawiri wanthu wambafuna kulewa nzeru yawo, tenepo konzekerani mbvunzo omwe unganyose munthuyo kuti alewe bzomwe ankukumbuka. Mungaphatise basa bziratizo bza upalizi bzakucokera mu Utumiki Bwathu bwa Umambo, mucibzicinja mwakubverana na gawo lanulo. Kodi mun’sairanyi nthawe zinango kumbayezeza mafala yakuyambira nayo nkhani pa Kunamata Ninga Banja?

3. Kodi tingacite tani kuti mafala yathu yakuyamba yakhale yakubverana na mwambo na cikhalidwe ca wanthu wa m’gawo lathu?

³ Kumbukirani bza Mwambo na Cikhalidwe ca Wanthuwo: M’mbuto zinango, timbadikhiridwa kuleweratu bzomwe tabwerera. Tsono m’mbuto zinango, mulendo akasaya kutoma kudziwa momwe weneciro nyumbawo waliri ayai kubzidziwisa kwa iwo, iwo wambawona ninga kusaya ulemu. M’bzigawo bzinango, wanthu wa cipembedzo wambabvuma kuti tirigume Bibliya pa mafala yathu yakuyambirira. (Mabasa 2:14-17) Tsono m’mbuto zomwe wanthu si wa cipembedzo ca cikristau ayai penu walibe na cipembedzoco, bzingakhale bwino kutcenkha kuliguma Bibliya pa ulendo bwakuyamba, koma pa ulendo bwakubwerezera.—Mabasa 17:22-31.

4. Kodi tin’funikira kusamala ciani pa mafala yathu yakufungulira nayo nkhani?

⁴ Mafala Yakufungulira: Konzekerani mwakusamala mafala yanu yakufungulira nkhani. Mafala yakucepa na yakusaya kunesa, ndiyo yambaphata basa. Mpsakufunikambo kwene-kwene momwe tingayalewere. Lewa-lewani mwakukomedwa. Lewa-lewani kucokera pansi pa mtima, na kumbamwetulira, mucilatiza kuti munkumufunira bzabwino mweneciro nyumbayo. Kuteweza malangoya, kun’dzatithandiza kukonzekera mafala yabwino yakuyambisira nayo nkhani yomwe yan’dzalimbisa wanthu wa m’gawo lathu kufuna kudyera pa “citawo ca Yahova.”—1 Wakolinto 10:21.