Kukulisa Luso Lathu mu Utumiki​—Kukonzekera Mafala Yathu Yakuyambira Nkhani

Thangwe Ranyi Mpsakufunika: Mafala yathu yakuyambira nkhani yakasaya kukhala yakupasa kaso, mweneciro nyumba angaimise maceza yathuyo pomwe tinati kupereka umboni. Natenepo, wapalizi wazinji wambaona kuti mafala yawo yakuyambira nkhani ni mbali yakufunika kwene-kwene ya upalizi bwawo. Tsono bziratizo bzaupalizi bzakubwera mu Utumiki ciratizo ca upalizi Bwathu bwa Umambo na mu bukhu la Kukambitsirana, bzimbapereka lini mafala yense, na cakulinga ca kuti yambapuse kuyacinja. Napo penu ciratizo ca upalizi cinikhala cakukwana, wapalizi wangasankhule kucicinja ayai kuphatisa basa comwe wakonzekera. Tsono, bzingatifambire bwino kwene-kwene tikakonzekera na tceru mafala yathu yakuyambira nkhani m’mbuto mwa kundolewa bzomwe takumbuka tikafika pa nyumba ya munthu.​—Mim. 15:28.

Momwe Mungacitire:

• Sankhulani nkhani. Ikhale yakucokera mu bukhu lomwe munkugawiralo icikhala yakucitisa kaso mu gawo lanu.

• Konzekerani mwatceru mafala mang’onong’ono yomwe mun’dzalewa pambuyo pa kumusana. Mungayambe na kulewa kuti: “Ndiri pano thangwera . . . ,” “Wanthu wazinji wana thupo na . . . ,” “Ndingafune kubva makumbukidwe yanu pa . . . ,” ayai njira inango. Mwacigwatho mafala yakupusa kubva kawiri-kawiri yambaphata basa bwino. Wapalizi winango wambasankhula kuikha mu msolo mafala yawo yakuyambira nkhani.

• Konzani mibvunzo yomwe in’dzacitisa mweneciro nyumba kufuna kuceza. (Mat. 17:25) Lekani kuyebwa kuti iye akhakumbuka bzinango pomwe mukhanati kufika, tenepo, mibvunzoyo ileke kukhala yakunesa kwene-kwene ayai yakumugopswa.

Yezerani Kucita Bzimwebzi Mkati mwa Mwezi Wathunthu:

• Koyani nthawe pa kunamata kwanu ninga banja kuti mukonzekere na kumbayezeza mafala yanu yakuyambira nkhani.

• Mukakhala mu utumiki, uzani apalizi anzanu bzomwe mungafune kukabzifotokoza. (Mim. 27:17) Cinjani mafala yanu yakuyamba penu yankukhala yakusaya kuthandiza.