Wanthu Womwe Timbawapasa Marevista Mwakukhazikika—Mbabwino Kuyamba Kupfunza Nawo Bibliya
1. Thangwe ranyi gulu la Yahova lakhala linkumbalimbisa apalizi kukhala na wanthu wakumbawapasa marevista mwakukhazikika?
1 Wanthu wazinji wali lini wakukonzekera kupfunza nafe Bibliya, koma iwo wambakondwa kulewenga marevista yathu. Tenepo gulu la Yahova lakhala linkumbalimbisa apalizi kukhala na wanthu wakumbawapasa marevista mwakukhazikika. Pomwe wanthu wanilewenga marevista yathu mwakukhazikika, iwo wambayamba kukhala na cifundo pa Fala la Mulungu. (1 Pedru 2:2) Nthawe zinango bzomwe walewengebzo bzingawatokonye, bziciwacitisa kubvuma kupfunza Bibliya.
2. Tingacite ciani kuti womwe timbawapasa marevista mwakukhazikika afune kupfunza Bibliya?
2 ‘Kuthirizira’ Mbeu za Cadidi: M’mbuto mwa kundopereka marevista, cezani naye mweneciro nyumbayo, muciyeza kudziwana naye. Bzimwebzi bzingakuthandizeni kudziwa bzakucitika pa moyo wace, bzomwe ambafuna, na bzibvero bzace, bzomwe bzingakuthandizeni kulewa-lewa naye mwa nzeru. (Mimwani 16:23) Konzekerani pa kuyenda kamuzungirapo. Bzikakwanisika, mufokotozereni mwacigwatho nfundo ibodzi ya m’marevistayo na vesi lace. Mukacita bzimwebzi, mun’dzakhala munkuthirizira mbeu za cadidi mu mtima mwace. (1 Wakolinto 3:6) Nembani nsiku ya ulendo bwakubwereza buli-bwense, marevista yomwe mupereke pabodzi na nkhani na vesi lomwe mucezerane.
3. Kodi tingawazungire kangasi wanthu womwe timbawapasa marevista mwakukhazikika?
3 Kubwerera Kangasi? Mun’funikira kubwerera kabodzi pa mwezi kukapereka marevista yapsa kuna womwe mumbawapasa marevista mwakukhazikika. Tsono bzinthu bzikabvumiza pa moyo wanu, ndipo penu munthuyo ana cifundo, mugasankhule kumuzungira kazinji-kense. Ninga ciratizo, pambuyo pa mdzinga ubodzi ayai miwiri mutamusiira marevista, mungabwerere mucirewa kuti: “Ndapita na pano kuti ndidzakuuzeni nfundo ibodzi ya m’marevista yomwe ndidakusiyirani yale.” Bzimwebzi bzingamucitise kufuna kulewenga nkhani yomwe ina nfundoyo. Penu ailewenga kale, mungamubvunze kuti ankukumbukanyi bza nkhaniyo, mucicezerana mwacigwatho. Ayai penu munthuyo ambakondwa kulewenga mabukhu yathu, mungabwerere mucikamulatiza tratado, ayai bukhu lomwe tinkugawira pa mweziyo.
4. Kodi nthawe na nthawe tingacitenyi kuti tidziwe penu wale womwe timbawapasa marevista mwakukhazikika wan’funa kupfunza Bibliya?
4 Lekani kudikhira kuti mweneciro nyumba atome ndiye kukumbira kupfunza Bibliya. Tomani ndimwepo. Napo penu adalamba kupfunza Bibliya mbuyomu, nthawe na nthawe mungambamulatize msolo wakuti: “Kuyankha Mafunso a m’Baibulo” wa mu Nsanja ya Olonda, muciwona penu angabvume kucezerana namwe. Pinango mungayambe kupfunza naye mwacigwatho. Tsono mukasaya kukwanisa kuyambisa pfunziro, mungapitirize kumbamuyendesera marevista kuti mukulise cifundo cace cakupfunza Bibliya.