Mun’dzaulokotera Mpatayu?
Cikumbuso Cinkubweraci Cin’dzatipasa Mpata Wakulatiza Kutenda Kwathu
1. Kodi Cikumbuso cin’dzatipasa mpata wanyi wakupambulika?
1 Cikumbuso ca 14 Abril, cin’dzatipasa mpata wakupambulika wakuthumizira na kulatiza kutenda kwathu kukoma mtima kwa Yahova. Nkhani ya pa Luka 17:11-18, imbalatiza momwe Yahova na Jezu wambaiwonera nkhani ya kutenda. Mpsakupasa nsisi kuti pa anyamapere khumi wale, m’bodzi yekha ndiye adabwerera, acikatenda. Kutsogoloku, mphaso ya cakulombolera in’dzaticiziratu pa bzakuipa bzense, moyo wamuyaya ucidzakhaladi wacadidi! Mwakusaya kupenukira, tin’dzamutenda Yahova nsiku zense thangwe ra bzisimbobzo. Tsono kodi tingalatize tani kutenda kwathu m’midzinga inkubwerayi?
2. Kodi tingathumizire tani kutenda kwathu cakulombolera?
2 Thumizirani Kutenda Kwanu: Bzomwe timbabva mu mtima ndibzo bzimbacitisa kuti titende. Kuti tikwanise kuthumizira kutenda kwathu cakulombolera, ndondomeko ya kulewengedwa kwa Bibliya ya pa nyengo ya Cikumbuso, inkugumanika m’mbuto zizinji ninga mu Tradução do Novo Mundo (mu Cingerezi), Calendário de 2014 na kabukhu kakuti Kusanthula Malemba Tsiku ndi Tsiku. Mun’sairanyi kucezerana mavesiyo ninga banja? Kucita bzimwebzi kun’dzathumizira kutenda kwathu cakulomboleraco. Ndipo bzimwebzi bzin’dzawonekerambo pa bzakucita bzathu.—2 Wak. 5:14, 15; 1 Ju. 4:11.
3. Kodi tingalatize kutenda kwathu mwa njira ziponi pa nyengo ya Cikumbuso?
3 Latizani Kutenda Kwanu: Kutenda kumbalatizidwa na bzicito. (Wakol. 3:15) Nyamapere wakutenda ule, adacita nyongo yakumugumana Jezu, acimutenda. Mwakusaya kupenukira, iye adakomedwambo kuuza winango bza kucirisidwa kwace mwakudabwisa. (Luka 6:45) Kodi kutenda kwathu cakulombolera, kun’dzatilimbisa kucitambo mbali mu kampanya yakucemerera wanthu ku Cikumbuso? Kutumikira ninga mpainiya wakuthandiza ayai kuthumizira nthawe yathu ya utumiki pa nyengo ya Cikumbuso, ni njira zinango zabwino zakulatiza kutenda kwathu. Pa Cikumbuso, kutenda kwathu kun’dzatilimbisa kutambira alendo na manja mawiri, ticibzipereka kuti titawire mibvunzo yawo.
4. Tingacitenyi kuti tidzaleke kudandaula cikamala Cikumbuso?
4 Kodi Cikumbusoci cin’dzakhala cakumalizira? (1 Wak. 11:26) Tin’dziwa lini. Tsono comwe tin’dziwa n’cakuti, un’dzakhala wapita mpata wakupambulika kuti tilatize kutenda kwathu. Kodi mun’dzaulokotera mpatayu? Mafala yakutenda ya m’kamwa mwathu pabodzi na bzakukumbuka bza mu mtima mwathu, bzikondwese Yahova, omwe adapereka cakulombolera mwa kukoma mtima.—Psal. 19:14.