Phatisani basa Webisaiti ya jw.org mu Utumiki Bwanu

Webisaiti yathu ni cinthu cakuphatisa basa cakufunika kwene-kwene pakuthandiza kumwaza bzipsa bzabwino ‘mpaka kumalekezero ya dziko la pansi.’ (Mab. 1:8) Wanthu wazinji wambakwanisa lini kugumana wokha webisaite ya jw.org. Na tenepo iwo wambakwanisa pambuyo pa kulatizidwa na mpalizi.

Nyakunyang’anira wa dera munango adaicosa pa saite vidiyo yakuti Thangwe Ranyi Tin’funika Kupfunza Bibliya? mu mtedwe wace wam’manja ndipo ambailatiza pa mpata uli-wense womwe angaugumane. Mwaciratizo, akayenda ku nyumba na nyumba, iye ambalewa kuti: “Ndinkuzungira wanthu mwacigwatho pa kuwathandiza kugumana mitawiro ya mibvunzo yakufunika mitatuyi: Thangwe ranyi dzikoli lina mabvuto mazinji kwene-kwene? Kodi Mulungu an’dzayamalisa tani mabvutoya? Ndipo kodi tingapirire tani pa nthawe yakucepa yasalayi? Vidiyo ifupiyi inkufotokoza bza mibvunzoyi.” Iye ambailiza ndipo ambanyang’anisisa mweneciro nyumba kuti awone momwe ingamutokonyere mtima. Vidiyoyi njakucitisadi kaso ndipo wanthu wazinji pakuiwona wambanyang’ana lini kumbali mpaka itafika kuphampha. Pambuyo pace nyakunyang’anira waderayo ambati: “Imwepo mwamala kubva kuti mungakumbire pa interneti pfunziro la Bibliya. Pakuti ndiri pano, ndingakulatizeni mwacigwatho momwe mungacitire.” Mweneciro nyumbayo akabvuma, iye ambamulatiza mwa kuphatisa basa broxura lakuti Bzipsa Bzawino. Penu mweneciro nyumbayo alibe nthawe, iye ambapangana naye kuti adzabwere ulendo bunango. Pa nthawe yakupuma iye akayenda kukadya pa mbuto zakudyera, iye ambacita bzibodzi-bodzibzo kwa munthu womwe adakhala pafupi naye pambuyo pa kuceza naye mwa uxamwali. Kodi mumbaphatisambo basa webisaite ya jw.org mu utumiki bwanu?