Mitsonkhano ya Utumiki Bwakumunda, Imbakwanirisa Cakulinga Cace

1. Kodi mitsonkhano ya utumiki bwakumunda ina cakulinga ciponi?

¹ Pa nthawe inango, Jezu adatsonkhanisa wanthu 70 mwa anyakupfunza wace pomwe akhanati kuyenda kukacita kampanya yakupalizira. (Luka 10:1-11) Iye adawalimbisa mwa kuwakumbusa kuti iwo akhali lini wokha, na kuti iwo akhatsogoleredwa na ‘Mweneciro kubvuna,’ Yahova. Iyembo adawapasa malango yomwe yadawathandiza kucita basa, ndipo iye adawagawa ‘awiri-awiri.’ Nsiku zino mitsonkhano yomwe timbacita pomwe tinati kuyenda mu utumiki bwakumunda imbakhala na cakulinga cibodzi-bodzico​—kutilimbisa, kutitsogolera na kutilinganiza.

2. Kodi mitsonkhano ya utumiki bwakumunda iti imbacitike kwa nthawe itali tani?

² Mtsonkhano wa utumiki bwakumunda umbacitika kwa mphindi 10 mpaka 15, womwe umbaphatanidza kulinganiza mathimu, kugawira magawo na kucita mpembo. Tsapano bzimwebzi bzacinjidwa. Kuyambira mu Abril, mitsonkhano ya kukonzekera kuyenda mu utumiki bwakumunda iti imbadzacitike kwa mphindi 5 ayai mphindi 7. Tsono mitsonkhanoyi ikambatewerana na mitsonkhano ya gwere linango, bzin’dzafunika kucepesa nthaweyo, koma ayankugumanikawo wacezerane mwakukondwa nkhani zabwino za m’Bibliya. Kucita mwacigwatho mitsonkhano ya utumiki bwakumunda bzin’dzacitisa wense kukhala na nthawe izinji mu utumiki. Kuthumizira bzimwebzi, penu apainiya ayai apalizi wan’dzayamba kupalizira, pomwe mtsonkhano wa utumiki bwakumunda unati kuyamba, bzingadzafunike kugwatiza pang’ono basa lawo kuti wakagumanike pa mtsonkhanopo.

3. Kodi mitsonkhano ya utumiki bwakumunda yalinganizidwa tani kuti ikhale yakuthandiza kwene-kwene apalizi?

³ Mitsonkhano ya utumiki bwakumunda in’dzafunika kulinganizidwa kuti idzathandize kwene-kwene apalizi. Mu magwere mazinji bzin’dzakhala bzaphindu kuna mathimu ya utumiki bwakumunda kuti yadzatsonkhane pace-pace kuposa kugumana mbuto ibodzi. Mwa njira imweyi bzingapuse kuti apalizi wafike pa mbuto yakugumanira mu utumiki bwakumunda ayai kuyenda mu gawo. Bzingapuse kuna apalizi kulinganiza mwakamfulumize, ndipo bzingapuse kuna anyankutsogolera tumagulu kukhala tceru kuna wale womwe iye ambawatsogolera. Bungwe la akulu lingacezerane mkhalidwe wa mbutoyo na kuwona komwe kuli bwino. Mtsonkhano unati kumala na mpembo wacigwatho, wense wan’dzafunika kudziwiratu komwe wankapalizira na munthu omwe ankapalizira naye.

4. Thangwe ranyi mitsonkhano ya utumiki bwakumunda in’funika lini kuwonedwa ninga yakusaya phindu kuposa mitsonkhano inango?

⁴ Njakufunika Mwakundendemerana na Mitsonkhano ya Gwere: Pakuti mitsonkhano ya utumiki bwakumunda imbacitika kuti ipase phindu wale womwe ambayenda mu utumiki, mitsonkhanoyo in’funika lini kucitika na gwere lense pabodzi. Tenepo, bzimwebzi bzinkuthandauza lini kuti in’funika kuwonedwa mwakupepuka ayai kuwonedwa ninga yakusaya phindu kuposa mitsonkhano inango. Kundendemerana na mitsonkhano yathu yense, mtsonkhano ya utumiki bwakumunda ni makonzedwe ya Yahova yomwe yambaticitisa kulimbisana winango na mwanzace pa lufoyi na mabasa yabwino. (Waheb. 10:24, 25) Na tenepo, nyakutsogolera an’funika kukonzekera bwino kuti macezeranoyo yatumbize Yahova pabodzi na wense wakugumanikawo. Penu n’bzakufunika kucita tenepo, apalizi womwe waniyenda mu utumiki wan’funika kucita nyongo yakugumanika pa mitsonkhano ya utumiki.

5. (a) Kodi nyakunyang’anira utumiki ana udindo buponi pakucita makonzedwe ya utumiki bwakumunda? (b) Kodi ni nthawe iponi pomwe mpfumakazi ingatsogolere mitsonkhano ya utumiki bwakumunda?

⁵ Momwe Nyakutsogolera Angakonzekerere: Kuti munthu ali-wense akhale wakukonzekera bwino kuti acite mbali pa m’tsonkhano, iye an’funika kuuzidwiratu nsikuyo inati kufika. Bzimwebzi mpsakufunikambo pakulewa bza mitsonkhano ya utumiki bwakumunda. Inde, penu gulu la utumiki bwakumunda linigumana palokha kuti liyende mu utumiki bwakumunda, anyakutsogolera maguluyo ayai anyakuwathandizira wawo wan’funika kutsogolera mitsonkhano m’mathimu yawo. Na tenepo, penu gwere lin’dzapangana kugumana lense kuti lidzayende mu utumiki bwakumunda, nyakunyang’anira utumiki an’dzasankhula munthu kuti adzatsogolere. Nyakunyang’anira utumikiyo andzapasa anyakutsogolera wense ndondomeko ndipo kopiya yace an’dzaiikha pa kwadru la bzidziwiso. Nyakunyang’anira utumiki an’dzafunika kuphatisa basa luso lakukumbuka pakugawira mbali anyakutsogolera acimbakumbukira kuti mitsonkhano imweyi, kuti ifambe bwino, imbafuna luso lakupfunzisa na lakulinganiza bzinthu la omwe ambatsogolera. Penu palibe akulu, atumiki wakuthandiza, ayai m’bale wakubatizidwa wakuthemera wakusankhulidwa kuti acite nsiku imweyo, nyakunyang’anira utumiki an’dzafunika kuikha mpfumakazi yakubatizidwa ya luso kuti itsogolere.​—Onani nkhani ya msolo wakuti “Nyakutsogolera Akakhala ni Mpfumakazi.”

6. Kwa omwe aniikhidwa kuti atsogolere, thangwe ranyi mpsakufunika kuti akonzekere bwino?

⁶ Tikambatambira mbali ya mu Xikola ya Utumiki bwa Mulungu ayai mu Mtsonkhano wa Basa, timbawona bzimwebzi ninga cinthu cakufunika ndipo timbakonzekera bwino. Mbang’ono-ng’ono wa ife womwe ambatoma kudikhirira mpaka afike ku mitsonkhano kuti ayambe kukumbuka bzomwe ankalewa. Mbali iri-yense yakutsogolera utumiki bwakumunda in’funika kuwonedwa mwa njira ibodzi-bodziyi. Pakuti tsapano nthawe ya mtsonkhano wa utumiki bwakumunda in’dzakhala yakucepa, kukonzekera n’kwakufunika kuti mtsonkhanoyo ukhale waphindu na kumala pa nthawe yace. Kukonzekera bwino kumbaphatanidzambo kukonzekera gawo nsikuyo inati kufika.

7. Kodi ni bzinthu bziponi bzomwe nyakutsogolera an’funika kudzacezerana?

⁷ Bzomwe Mungacezerane: Pakuti bzinthu bzimbasiyana-siyana mwakuyenderana na gawo liri-lense kapolo wakukhulupirika alibe kukonza ndandanda ya mitsonkhano ya utumiki bwakumunda. Pa kwadru yomwe ina msolo wakuti, “Pakukonzekera Mtsonkhano wa Utumiki Bwakumunda Mungacezerane Nfundo Izi” paikhidwa bzinango bzomwe bzingathandize. Kawiri-kawiri mitsonkhanoyo iti imbadzacitike mwakucezerana. Nthawe imweyo, kucezeranako kungadzaphatanidze kucita ciratizo cakukonzekeredwa bwino ayai kuwonesa vidiyo yakuthemera yakugumanika mu jw.org. Mukambakonzekera mitsonkhano ya utumiki bwakumunda, nyakutsogolera an’funika kukumbukira bzomwe bzingalimbise na kukonzekeresa wale womwe aniyenda mu utumiki pa nsiku imweyo.

8. Kodi n’ciyani cingakhale cakuthandiza pa kucezerana pa mitsonkhano ya utumiki bwakumunda mu nsiku za malinkhuma na za midzinga?

⁸ Mwaciratizo, nsiku za Malinkhuma apalizi azinji ambagawira marevista ya Nsanja ya Olonda na Galamukani! Azinji ambayenda lini mu utumiki pakati pa mdzinga, koma ambayenda pa nsiku za Malinkhuma, tenepo iwo angayebwe bzinthu bzomwe adacita pa Kunamata kwawo ninga Banja. Bzimwebzi bzingakhale bzaphindu kuna nyakutsogolera kuti awone cibodzi mwa bziratizo bza upalizi bzomwe bziri kumambuyo kwa Utumiki Bwathu bwa Umambo. Njira zinango zimbaphatanidza kucezerana momwe tingaphatisire basa mbali inango ya notisia za m’dera lathulo, bzakucitika ayai feriado pa kugawira marevista ayai momwe tingayambisire ulendo bwakubwereza penu marevistayo yabvumidwa. Penu ali-wense pa mitsonkhano ya utumiki bwakumunda waphatisa kale basa payekha marevista yomwe yankugawiridwa, nyakucitisayo angadzawabvunze kuti iwo alewe mwacigwatho nfundo zinango ayai bzakugumana nabzo bzakulimbisa. Mu nsiku za midzinga, nyakutsogolera angasankhule kucita ciri-cense mwakubverana na bzomwe bzinkugawiridwa pa mweziwo. Mabukhu yakupfunzirira, ninga yakuti Bzipsa Bzabwino na mabroxura yakuti Tetekerani Mulungu na bukhu lakuti Baibulo Limaphunzitsa Chiyani yangagawiridwe nsiku iri-yense, tenepo nyakutsogolerayo angacezerane mwacigwatho momwe libodzi mwa mabukhu yamweya yangagawidwire.

9. Penu gwere linkhala linkucita kampanya yakupambulika m’nsiku za kumala kwa m’dzinga, n’ciyani comwe mungacezerane?

⁹ Penu gwere lin’khala linkucita kampanya yakupambulika m’nsiku za kumala kwa mdzinga, nyakutsogolera angacezerane momwe angagawirire marevista pabodzi na mcemo ayai tumatsamba, ayai iye angacezerane bzomwe angacite penu munthuyo ankufunisisa kubva bzizinji. Njira inango ingakhale kufotokozerana bzakugumana nabzo bzomwe bzingabvekese phindu la kampanyayo.

10, 11. Thangwe ranyi apalizi wan’funika kukonzekera kuti mitsonkhano ya utumiki bwakumunda ikhale ya phindu?

¹⁰ Momwe Apalizi Angakonzekerere: Apalizi ana mbalimbo yakucitisa mtsonkhano wa utumiki bwa kumunda kukhala wa phindu. Mwa kukonzekereratu nsikuyo inati kufika pinango pakucita kunamata ninga banja, iwo wan’dzakhala na bzakulewa kuti auzembo apalizi anzawo. Kukonzekera bwino kumbaphatanidzambo kukhala na marevista na matsamba ayai mabukhu yanango tinati kuyenda komwe tinkagumanira kuti tiyende mu utumiki bwakumunda ticiyenda tense mugawo mwakusaya kucedwa na bziri-bzense.

¹¹ Bziri bwino kucita makonzedwe yakumbafika na nthawe pomwe mitsonkhano ya utumiki bwakumunda inati kuyamba. N’cadidi, timbacita nyongo yakufika na nthawe pa mitsonkhano yense ya gwere. Tsono, kufika mwakucedwa pa mitsonkhano ya utumiki bwakumunda kungabwerese msokonezo. Mu njira iponi? M’bale omwe an’tsogolera ambawona mbali zinango pomwe anati kulinganiza thimulo. Penu pana apalizi ang’ono-ng’ono, iye angasankhule kuwatumiza ku mbali ya gawo lomwe lidapaliziridwa kale pang’ono. Penu winango afamba na minyendo kuti akafike pa mtsonkhano wa utumiki bwakumunda ndipo gawolo liri kutali, iye angawagawe awiri-awiri na wale womwe wabwera na kanderendere. Penu gawolo limbacitika bzinthu bzaciwembu kwene-kwene, iye angasankhule abale kuti aphatire basa pabodzi na mpfumakazi ayai pafupi na thimu la mpfumakazi. Apalizi womwe mbakudwala, angagawidwe ku nyumba zomwe ziri pafupi. Apalizi watsapano angasankhulidwe kuti wayende pabodzi na apalizi waluso. Tsono, penu apalizi anifika mwakucedwa, makonzedweyo kawiri-kawiri yan’dzafunika kucinjidwa ayai kupfudzidwa kuti yathandizembo anyakucedwawo. N’cadidi, timbakhala na mathangwe yabwino yakucedwera pa cakucitikaco. Na tenepo penu timbakhala na cizolowezi cakucedwa, tingabzibvunze penu ni thangwe rakuti tiribe thupo na mitsonkhano ya utumiki bwakumunda ayai thangwe tiribe kukwanisa kulinganiza na nthawe bzinthu bzathu.

12. Penu imwepo kawiri-kawiri mumbacita makonzedwe yakubula na mwanzanu, nciyani comwe mun’funika kukumbukira?

¹² Apalizi womwe ambatsonkhana kuti ayende mu utumiki, angasankhule kucitiratu makonzedwe pawokha pomwe mtsonkhanoyo ukanati kuyamba ayai iwo angapasidwiretu munthu wakuti ayende naye. Penu imwepo mumbandokhala munkucita makonzedwe ya kubula na mwanzanu, kodi mungacite bzimwebzo mwakutsudzuka koma mucimbayenda na apalizi wakusiyana-siyana m’mbuto mwa kumbayenda na xamwali wanu wapamtima nthawe zense? (2 Wak. 6:11-13) Kodi nthawe zinango mungacite bzimwebzo mwa kuphata basa na mpalizi watsapano kuti mumuthandize kuti ayende patsogolo pa luso lace lakupfunzisa? (1 Wak. 10:24; 1 Tim. 4:13, 15) Tetekerani na tceru malango yali-yense yomwe mungapasidwe kuphatanidza na malango ya komwe mungayambire kupalizira. Mtsonkhanoyo ukamala, lekani kumbacinja makonzedweyo ndipo ndokoni mwakusaya kucedwa ku gawo lomwe linkapalizidwalo.

13. Penu anyakugumanika pa mtsonkhanopo an’khala wakuzindikira acicitambo mbali yawo, kodi mitsonkhano ya utumiki bwakumunda in’dzatipasa phindu liponi?

¹³ Wanthu 70 omwe Jezu adawatuma kuti akapalizire, iwo ‘adabwerera wan’kukondwa.’ (Luka 10:17) Mpsakupenukisa lini kuti Jezu adatsonkhana nawo pomwe wakhanati kuyamba kupalizira aciwathandiza kuti wagumane phindu. Nsiku zino, mitsonkhano ya utumiki bwakumunda ingakhale na cakulinga cibodzi-bodzico. Penu wense omwe an’cita basalo an’khala wakuzindikira acicita mbali yawo, mitsonkhano ya utumiki bwakumunda in’dzakhala yakulimbisa, yakulinganizika ndipo in’dzatithandiza kukwanisa basa lomwe tidapasidwa la kupereka ‘umboni kwa mitundu yense.’​—Mat 24:14.

[Mafala yakutsindika pa tsamba 4]

Mitsonkhano ya utumiki bwakumunda infunika lini kuwonedwa ninga yakusaya kufunika kwene-kwene kuposa mitsonkhano inango ya gwere

[Mafala yakutsindika pa tsamba 5]

Pakukonzekera utumiki bwakumunda, nyakutsogolera an’dzafunika kukumbukira bzomwe andzacita kuti adzalimbise na kukonzekeresa wense womwe waniyenda mu utumiki nsiku imweyo

[Kwadru pa tsamba 6]

Nyakutsogolera Akakhala ni Mpfumakazi

Mpfumakazi in’funika kumpsinkha mu msolo ndipo bzimbakhala bwino icicita kukhala pa mpando pomwe inkutsogolera mtsonkhano wa utumiki bwakumunda. Bzomwe iye angasankhule kuti acezerane na abveseri bzingakhalembo bzibodzi-bodzi na bzomwe m’bale angadasankhula. Iye an’funika kutcenkha kuwoneka ninga ankupfunzisa wanthu womwe alipowo, iye angayambise kucezerana ninga thimu. Penu iye anicemera mpfumakazi iri-yense yakubatizidwa kuti ipereke mpembo, mpfumakaziyo in’dzafunikambo kumpsinkha mu msolo. Penu m’bale wakubatizidwa an’fika pomwe iwo wayamba kale, mpfumakaziyo in’dzafunika kukumbira iye kuti apereke mpembo wakufungira. Nyakunyang’anira utumiki an’dzafunika kucitiratu makonzedwe yakuthandiza pa bzinthu bzakusaya kudikhirika acipereka malango yakukwanira kuti acepese bzakudzasokonezabzo. Mwaciratizo, munthu omwe ni mulumbwana acikhala wakubatizidwa, angakhale alipo pomwe mpfumakazi yasankhulidwa kuti icitise mtsonkhanoyo, koma akulu angawone kuti iye akanati kuthemera kuti atsogolere mtsonkhanoyo. Pa bzakucitika ninga bzimwebzi, nyakunyang’anira utumiki angauze wanthu womwe wankucita mbali ya thimulo kuti mpfumakazi yakusankhulidwayo ndiyo in’tsogolera mtsonkhanoyo koma mulumbwanayo ndiye an’dzapereka mpembo penu akulu aniwona kuti iye ngwakuthemera. Ayai pamwepo pangakhale pana munthu mkulu, m’bale omwe ali pansi pa bziretso bzakutsogolera mitsonkhano ayai bza kupereka mipembo mu gwere pa mathangwe yakudziwika na akulu. Akulu angauze mpfumakazi zakusankhulidwazo kuti ndizo zin’dzatsogolera mtsonkhanoyo na kupereka mpembo napo m’baleyo acikhala alipo pa mtsonkhanopo, koma wan’funika lini kuzimbula nkhani yacinsinsi yomwe idacitikira m’baleyo. Akulu wan’dzafunikambo kuuza m’baleyo nsiku zomwe mpfumakazizo zin’dzatsogolera mitsonkhano ya utumiki bwakumunda.

[Kwadru pa tsamba 6]

Pakukonzekera Mtsonkhano wa Utumiki Bwakumunda, Mungacezerane Nfundo Izi:

• Bziratizo bza upalizi bzomwe bziri mu Utumiki Bwathu bwa Umambo.

• Vidiyo yakulewa bza utumiki yomwe ingagumanike mu jw.org.

• Njira inango ya kapaliziridwe, ninga pinango kayambidwe, kukhazikisa ulendo bwakubwereza, ayai kulewa makonzedwe ya bzakupereka bzakubzifunira, akalibvuma bukhulo.

• Mavesi yakulimbisa ayai yakupfunzisa yomwe yangathandize mu utumiki.

• Bzakugumana nabzo bza mu utumiki bwakumunda bza mu deralo ayai bzakufotokozedwa mu mabukhu.

• Nfundo zakufotokozedwa mu Utumiki Bwathu bwa Umambo.

• Nfundo zakufotokozedwa mu mbali za mu Mtsonkhano wa Basa wakucitika tsapanopa.

• Nkhani za kutumikira zakufotokozedwa mu Nsanja ya Olonda.

• Nkhani zakulewa bza utumiki zakucokera mu mabukhu ninga bukhu la Sukulu ya Utumiki na “Bwera Ukhale Wotsatira Wanga”.

• Nfundo zakufotokozedwa mu jw.org zomwe zingaphatisidwe basa mu utumiki.

• Nfundo zakufotokozedwa mu Baibulo la Dziko Latsopano lacingerezi lakusandulizidwa papsa zomwe zingaphatisidwe basa mu utumiki. Wanthu womwe ambalewalewa bzirewedwe bzinango angaphatise basa nfundo zakugumanika m‘tumabukhu twakuti Kodi Tingapfunze Ciyani m‘Fala la Mulungu? (igw) na Kabuku Kothandiza Kuphunzira Mawu a Mulungu (sgd).

• Momwe tingayambisire upalizi na munthu ali-wense omwe tingagumane naye mu utumiki, ninga omwe ambakhulupira kuti kulibe Mulungu, omwe wambakhulupirira kuti bzinthu bzimbacita kusanduka, a Hindi ayai a Bhuda.

• Momwe tingatawirire wale womwe ambatitawira mwakugwata mafala kulatiza kuti wan’funa lini kuceza nafe.

• Momwe tingathandizire mwanzathu omwe tinkupalizira naye kuti apite patsogolo pakulewalewa na munthu.

• Momwe tingacitire tikagumana na munthu omwe ambalewalewa cirewedwe cinango.

• Momwe tingacitire mbali inango mu utumiki yomwe winango wan’dzakhala wankucitambo ninga basa lakufufudza, upalizi mwa kuphatisira basa mtedwe, upalizi bwa padeca, ulendo bwakubwereza ayai mapfunziro ya Bibliya.

• Kukumbusa bza cisungiko, kusaya kucedwa, makhalidwe yabwino ayai bzinango bzakundendemerana nabzo.