Bzomwe Tingacite Kuti Mtsonkhano Wakukonzekera Utumiki Ukhale Wakuthandiza

Mtsonkhano wakukonzekera utumiki bwa kumunda, ngwakundendemerana na mitsonkhano ya gwere. Yentse ni makonzedwe ya Yahova yakuti timbalimbikisane na kulatizana lufoyi na kucita mabasa yabwino. (Ahe 10:24, 25) Mtsonkhano umweyu un’funika kumbamala mphindi 5 ayai 7, bzomwe bzimbaphatanidza kugawa wanthu m’tumagulu, kusankhula gawo lakupalizira na kucitambo mpembo. (Penu mtsonkhano umweyu umbacitika pambuyo pa mitsonkhano ya gwere, un’funika kucitika kwa kanthawe kakucepa.) Nyakutsogolera mtsonkhanoyu an’funika kukonzekera bzinthu bzomwe bzingakhale bzakuthandiza kwa wanthu omwe agumanika pa mtsonkhanoyo. Mwa ciratizo, pa sabudu penu wanthu azinji omwe agumanika pa mtsonkhanoyo alibe kuyenda mu upalizi midzinga ya m’mbuyomu, bzingakhale bwino kundocezerana bzomwe tingakawuze mwenekaciro mui. Kodi ni bzinthu bziponi bzakuthandiza bzomwe mungacezerane?

• Bziratizo bza upalizi bzomwe bziri mu Moyo Wathu Wacikristau na Utumiki—Kabukhu ka Mitsonkhano

• Momwe tingaphatisire basa notisiya ayai bzinthu bzomwe bzacitika mu gawo lathulo kuti tiyambise maceza

• Momwe tingatawirire mibvunzo yomwe wanthu ambaibvunza kawiri-kawiri

• Momwe tingatawirire munthu omwe ambakhulupira lini Mulungu, omwe ambakhulupira kuti bzinthu bzidacita kusandulika, omwe ambalewalewa cirewedwe cinango ayai munthu omwe ali m’cipembedzo cacirendo m’gawo lathulo

• Momwe tingaphatisire basa mbali za pa webisaite yathu ya jw.org ayai JW Library^® na Bibliya

• Momwe tingaphatisire basa cibodzi mwa Bzinthu Bzomwe Timbapfunzisira

• Momwe tingacitire upalizi bwakusiyana-siyana ninga upalizi bwa pa mtedwe, kunemba matsamba, upalizi bwa padeca, kucita ulendo bwakubwereza na mapfunziro ya Bibliya

• Kukumbusana momwe tingakhalire wakusamala, wakuzindikira, wa makhalidwe yabwino, kuwona bzinthu mwa njira yakuthemera na bzinthu bzinango

• Momwe tingaphatisire basa mavidiyo ayai nfundo zomwe ziri m’kabroxura ka kuti Kulisani Luso Lanu la Kuwerenga na Kupfunzisa

• Momwe tingalibikisire na kuthandiza mwanzathu omwe tacoka naye mu utumiki

• Kuwerenga cinembo cakubverana na nkhani yakupalizira na kufotokozambo bziratizo bzakulimbikisa bza mu upalizi