Kwadru Ya Mibvunzo

◼ Kodi apalizi an’funika kukhala na cizolowezi ca kucita upalizi ayai pfunziro mwa kuphatisa basa interneti na wanthu omwe ambawadziwa lini wakukhala m’madziko manango?

Apalizi winango ambaphatisira basa interneti kuti akhale na mapfunziro ya Bibliya m’madziko yomwe basa lathu lidaletsedwa ayai komwe kuna apalizi wakucepa. Nthawe zinango ambakhala na bzakutewera bzabwino. Tsono, pambakhala na ngozi penu apalizi angapite m’mbuto zakunemberana mafala za pa interneti ninga e-mail ayai njira zinango pa kumbaceza na wanthu wakusaya kudziwika. (Onani Utumiki Bwathu bwa Umambo bwa Chichewa bwa Julho 2007, tsa. 3.) Pomwe interneti inkuthandiza wanthu wa mitima yabwino kuti afikiridwe na bzipsa bza Umambo, maceza yamweya yangacitise m’bale ayai mpfumakazi kumbabverana na wanthu wakuipa ayai wanthu wakupanduka. (1 Wak. 1:19-25; Wakol. 2:8) Kuthumizira bzimwebzi, ku mbuto zomwe basa lathu la Umambo ndakuletsedwa, bzinthu bzomwe mungambatumize bzingawonedwe na wamphanvu za utongi. Kucezerana kwa mtundu umweyu, kungaikhe pa ngozi abale ayai mpfumakazi wa kumweko. Na tenepo, apalizi an’funika lini kufufudza wanthu pa interneti wa m’madziko yakunja kuti ambawapalizire bzipsa bzabwino.

Kusiya penu tin’cita kuuzidwa na cipinda ca nthambi ca kumweko, tikacita upalizi bwakusaya kulinganizika kwa munthu wakusaya kudziwika wa dziko la kunja omwe wabwera kudzazunga, bzin’funika lini kuti tiyezere kukuza cikhumbo cace cakufuna kudziwa bzizinji atabwerera kumui kwace. Koma tingamulatize momwe iye angagumanire nfundo zakuthumizirika pa jw.org ayai tingamuuze momwe iye angacitire kuti acezerane na cipinda ca nthambi ca komwe ambakhala. Tingamulimbisembo kuti akafike pa Nyumba ya Umambo yapafupi na kumui kwace. Inde, m’madziko yanango kulibe Nyumba za Umambo. Penu iye angafune kuzungiridwa na Mboni za m’dera lace, tingadzaze kaformulariyo kakuti Muzungireni Munthuyu (S-43) ticipasa munembi, omwe angadzakatumize mwa kuphatisira basa tsamba la pa interneti la pa jw.org. Cipinda ca nthambi comwe cimbanyang’anira basa mu dziko la munthu wakufunisisayo n’cakuzolowerana na bzakucitika bza m’dzikolo ndipo cin’dzakhala na njira yabwino yakuperekera thandizo lauzimu.​—Onani Utumiki Bwathu bwa Umambo bwa Junho 2014, tsa. 7, na Utumiki Bwathu bwa Umambo bwa Chichewa bwa Novembro 2011, tsa. 2.

Penu munthu omwe tinkumuzungira pakali-pano wayenda ku dziko linango ayai penu tinkupfunza na munthu wa dziko linango omwe tidandomudziwa pa interneti, tingamuuze malango yomwe yamala kufotokozedwaya. Tsono, tingapitirize kukuza cikhumbo cace mpaka pomwe munthuyo an’gumana na apalizi wakumweko. Kuposa bzense, penu munthu an’kukhala mu dziko lomwe basa lathu lidaletsedwa ayai lidafungidwa, tin’funika kukhala na tceru likulu tikambatumizirana nfundo za m’Bibliya mwa kucita kunemba matsamba, pa mtedwe ayai pa mtcini uli-wense wanzeru.​—Mat. 10:16.