Fikirani Mwakusaya Kucedwa Womwe An’funa Thandizo

Kutomera pomwe Webisaiti yathu idakonzedwa pomwe, mulewengo wa anyakukumbira kupfunza Bibliya pa internet wathumizirika kwene-kwene. Mikumbiro inango ikugumanika thangwe ra kuyambidwa kwa mtundu upsa wa upalizi. Cipinda ca nthambi cimbasamalira mikumbiroyi mwakanfulumize. Mwaciratizo, penu mkumbiro wacitikira pa Webisaiti ya jw.org, akulu wa m’gawo la munthu womwe walatiza kasoyo wambadziwisidwa mkati mwa nsiku ziwiri. Tsono, relatoriyo zinkulatiza kuti pambapita midzinga mizinji wanthu winango womwe wakumbira pfunziro wanati kuzungiridwa. Kodi tingatsimikize tani kuti thandizo linkuperekedwa pomwe munthuyo akadafunisisa?​—Marko 4:14, 15.

Penu munthu ankulatiza kaso koma ambakhala lini m’gawo lanu, dzazani mwakanfulumize formulariyo yakuti Muzungireni Munthuyu (S-43) ndipo iperekeni kwa munembi inati kufika nsiku ya mtsonkhano wanu wakutewera. Mkati mwa nsiku ibobzi ayai ziwiri, munembi an’dzapereka cidziwisoci ku gwere lapafupi na munthuyo ayai an’dzacitumiza ku cipinda ca nthambi mwakuphatisa basa Webisaiti ya jw.org. ya gwere. Akulu wan’funika kumbawona nthawe zense Webisaitiyi. Penu waniwuzidwa kuti wakawonane na munthu winango, iwo wan’funika kuyenda mwakanfulumize. Mpalizi ali-wense womwe angakumbiridwe kucita bzimwebzi acitiretumbo mwakanfulumize. Penu mulibe kugumana munthuyo pamui, pinango mungasiye mulewengo wanu wa mtedwe.