Kondwani pa Kupfunza Bukhu la Kodi Bibliya Limbapfunzisa Ciyani Maka-maka?

¹ Bukhu lakuti Kodi Bibliya Limbapfunzisa Ciyani Maka-maka? tsapano liripo mu Cinyungwe. Ndipo tin’liphatisa basa kwene-kwene pa utumiki bwathu maka-maka pakucitisa mapfunziro ya Bibliya. Ndipopa, tin’funika kulizolowera bukhuli. Bzimwebzi bzin’dzakwanisika thangwe tin’dzaliphatisa basa pa Pfunziro la Bibliya la Gwere, kuyambira mu m’dzinga wa 19 Outubro 2015.

² Nyakutsogolera an’dzalewa mibvunzo yomwe iri kwakuyamba kwa msolo uli-wense. Patsogolo pace pfunzirolo lin’dzacitika mwakuphatisira basa mibvunzo yomwe iri pansi pa tsamba liri-lense. Mavesi yomwe yana nfundo zikulu-zikulu yan’dzawerengedwa na kucezerana ndipo kwadru ya msolo wakuti “Bzomwe Bibliya Limbapfunzisa” yomwe imbagumanika kwakumalizira kwa msolo uli-wense in’dzakhala yakuthandiza pa kubwerezera nkhaniyo, pakuti imbakhala na mitawiro ya m’Bibliya ya mibvunzo yomwe iri kwakuyambirira kwa msoloyo. Mun’dzawona kuti bzin’dzanesa lini kutawira thangwe bukhuli limbalewa nkhani mu njira yakubveka bwino, mwakusaya kunesa na mwakukondwesa.

³ Mafala yakuthumizira ya m’bukhuli yambafotokoza cibodzi na cibodzi pa nkhani zakusiyana-siyana. Tingadzaphatise basa nfundo zimwezi penu anyakupfunza wa Bibliya wangadzafune kudziwa bzizinji pa nkhani inango. Mwa kabodzi-kabodzi mbali za mafala yakuthumizira zin’dzacezeredwa pa kucita Pfunziro la Bibliya la Gwere. Penu nthawe ingadzabvumize mbali zensene za mafala yakuthumizira zin’dzawerengedwa na nyakuwerenga ndime pa pfunzirolo ndipo misolo yomwe ina ndime zizinji ayai zikulu-zikulu mungadzacezerane mu mbali zace zing’ono-ng’ono zokha. Mbali za mafala yakuthumizira ziribe mibvunzo, koma nyakutsogolera angadzacite mibvunzo kuna abveseri ya nfundo zikulu-zikulu.

⁴ Pa Pfunziro la Bibliya la Gwere, kucezerana bukhu la Bibliya Limbapfunzisa Ciyani kun’dzacitika mwakamfulumize kuposa pomwe timbapfunza bukhuli na winango maka-maka penu iwo walibe cidziwiso ca m’Bibliya. (Mab. 26:28, 29) Pakucitisa mapfunziro ya Bibliya, tin’dzafunika kucezerana mavesi ya m’Bibliya mu njira yakubveka bwino, kubvekesa mathere na bzinango. Na tenepo, khalani na cakulinga ca kumbagumanika mdzinga uli-wense na kumbatengambo mbali mwakukwanira pa pfunziro la bhukhu lakuti Kodi Bibliya Limbapfunzisa Ciyani Maka-maka?.