Kupereka Umboni Bwakukwanira, Kuna Bzakutewera Bzabwino​—Nkhaniyi yacokera mu Buku Lapachaka la Mboni za Yahova la 2015

América

Wana Womwe ni Nkhungwa Ankufika pa Mitsonkhano

Tsamba 54, ndime 1

Angela omwe ambakhala ku Suriname, adakazungira mbuto yakukoyera wana womwe ni nkhungwa yomwe ikhali pafupi na nyumba yace. Omwe akhanyang’anira mbutoyo ikhali mpfumakazi yakudjedjera mwauzimu, ndipo mwakusaya kunesa iyo idabvumiza Angela kuti apalizire wanawo. Angela adaceza na wana 85 ndipo adawalatiza mavidiyo ya mu jw.org. Atamala kucita bzimwebzi, iye adayamba kupfunza na azinji mwa wanawo. Apainiya awiri adayamba kumuthandiza, ndipo ali-wense akhana kagulu kace.

Mpfumakazi yakudjedjera mwauzimuyo idalewa kuti ikhapfunzisa nyimbo wanawo mwakuphatisa basa libodzi mwa mabukhu yathu ya nyimbo ndipo usiku ikhambawawerengera nkhani za m’Bibliya. Iyo idalewa kuti imbafunisisa kugumanika pa mitsonkhano, koma ikhafunikira lini kusiya wana 85 wokha-wokha. Patsogolo pace padacitidwa makonzedwe yakuti wense ambayende ku Nyumba ya Umambo. Pakuti nyumba yakusungira wanayo ikhali lini kutali, abale akhathandiza mpfumakaziyo kuyenda na wanawo ku Nyumba ya Umambo. Tsapano mpfumakaziyo na wana wense wakukwana 85 ambafika mwakukhazikika pa mitsonkhano.

Brazil

“Ni Mulungu Omwe Akutumani”

Tsamba 56, ndime 2 mpaka tsamba 57, ndime 1

Ku Brazil, pomwe Jennifer akhagawira katsamba kakuti Kodi Anyakufa Wangakhaledi Pomwe na Moyo? iye adafika pa nyumba ya mkazi munango omwe akhakonzekera kuyenda ku nkhawa ya xamwali wace. Jennifer adamuuza mkaziyo kuti bzandocitikambo kuti iye akhafuna kale kumupasa katsamba komwe kakhalewa bza cidikhiro cakudzawona abale wathu womwe adafa ankukhala pomwe na moyo. Mkaziyo adadabwa na mafala yakuyamba yomwe yakhali pa katsambako ndipo adakatambira. Pomwe Jennifer adabvunza mkaziyo penu angafune tumatsamba tunango kuti akapase banja lakufedwalo, mkaziyo adawona kuti ikhali nzeru yabwino ndipo adatenga tumatsamba tunango twakukwanira tupfemba.

Patsogolo pace Jennifer adacita ulendo bwakubwereza, ndipo mkaziyo adati: “Pomwe tidacezerana nsiku ire, ndidayamba kukumbukira kuti ulendo bwanu bule bulibe kundocitikambo mwa ngozi. Mulungu akhadakutumani na mafala yakutsangalaza yomwe ndikhafunikira.” Iye adagawira tumatsamba twense tomwe akhadatenga. M’bodzi wa wadzinza omwe adaimikira msinda wa nkhawayo adawerenga katsamba kense mwa kukuwa. Wanthu wense womwe akhalipo adakomedwa na bzimwebzi ndipo adatenda mkaziyo thangwe ra mafala yakutsangalazayo. Mkaziyo adabvuma pfunziro la Bibliya.