Tewezerani Ciratizo ca Wapolofeta—Habakuki
1. N’thangwe ranyi tingabzindendemezere na mpolofeta Habakuki?
1 Pakuwona kuti tazunguliridwa na dziko lakudzala na kuipa, tingabzibve ninga momwe Habakuki adabvera, omwe adabvunza Yahova kuti: ‘Thangwe ranyi mun’kundiwonesa bzinthu bzakuipa? Ndipo thangwe ranyi mumbalekerera matsoka?’ (Hab. 1:3; 2 Tim. 3:1, 13) Kumbakumbukira mafala ya Habakuki na ciratizo cace ca cikhulupiro, kungatithandize kupirira pomwe tinkudikhirira nsiku ya ciyeruzo ya Yahova.—2 Pe. 3:7.
2. Kodi tingalatize tani kuti tin’kukhala na moyo mwa cikhulupiro nsiku zino?
2 Khalani na Moyo mwa Cikhulupiro: M’mbuto mwa kutepa thangwe ra bzinthu bzakuipa bzomwe bzikhamucitikira, Habakuki adapitiriza kukhala watceru na wakulimba mwauzimu. (Hab. 2:1) Yahova adamutsimikizira mpolofetayu kuti fala Lace lingadakwanisika pa nthawe yace na kuti ‘nyakulungama an’dzakhala na moyo thangwe ra cikhulupiro cace.’ (Hab. 2:2-4) Kodi bzimbathandauza ciyani kwa Akristau kukhala mu nsiku zakumalizira? Cakufunika kwene-kwene si kundodziwa kuti ni lini pomwe mamaliziro yan’dzafika koma n’kukhala wakutsimikiza kuti iyo yan’dzafikadi. Cikhulupiro cimbaticitisa kupitiriza kukhala tceru ndipo cimbatipasa mpata wakucita utumiki.—Waheb. 10:38, 39.
3. Thangwe ranyi tin’funika kupitiriza kukondwa mwa kutumikira Yahova?
3 Kondwani mwa Yahova: Pomwe Gogi wa ku Magogi an’dzamukira wanthu wa Yahova, cikhulupiro cathu cin’dzayezedwa. (Zakiy. 38:2, 10-12) Kunesana kumbabweresa mabvuto, napo pomwe anyakunesanawo angawone ninga akunda. Cakudya cingamale, wanthu angaluze bzinthu bzawo, ndipo bzinthu pa moyo bzingafambe lini bwino. Kodi tin’dzacita ciyani mabvuto yakadzabwera? Habakuki akhadikhirira mabvuto na tenepo iye adatsimikiza kukondwa mwa kutumikira Yahova. (Hab. 3:16-19) ‘Cikondweso comwe Yahova ambapereka’ cin’dzatithandizambo kupirira mabvuto ya kutsogolo.—Neh. 8:10; Waheb. 12:2.
4. Kodi n’cikondweso ciponi comwe tingakhale naco tsapano na kutsogolo?
4 Wale womwe Yahova an’dzawakoya pa nsiku yace yaciyeruzo yomwe inkubwerayi, wan’dzapitiriza kupfunzisidwa njira ya moyo ya Mulungu. (Hab. 2:14) Anyakulamusidwa wan’dzapfunzisidwambo bza Yahova. Napo tsapano, tingaphatisire basa mpata uli-wense kuti tilewelewe bza Yahova na bza mabasa yace yakudabwisa!—Psal. 34:1; 71:17.