Khulupirani Yahova Kuti Mukhale na Moyo!
‘Khulupira Yahova na mtima wako wense ndipo leka kuthemba luso lako la kubvesesa bzinthu.’—MIMWANI 3:5.
1. N’thangwe ranyi tensenefe timbafunika kutsangalazidwa?
TENSENEFE timbafuna kutsangalazidwa. Pinango moyo wathu ngwakudzala na bzineso, thupo pabodzi na msunamo. Mwa ciratizo, pinango tinkubonera thangwe ra matenda, kukalamba ayai thangwe ra kufedwa wacibale wathu. Winango wa ifepano tikucitiridwa bzinthu bzakuipa na wanthu winango. Ndipo kuthumizira bzimwebzi, wanthu azinji m’dzikoli mbaciwembo. Kulewa cadidi, ‘nthawe zakunesazi’ zinkulatiza kuti tinkukhala mu ‘nsiku zakumalizira’ nakuti nsiku iri-yense ikapita timbakhala tinkufenderera dziko lipsa. (2 Timotio 3:1) Pinango takhala tinkudikhirira kuyambira kale-kale kukwanirisidwa kwa mapiciro ya Yahova, ndipo tinkugumana na mabvuto mazinji. Tenepo, kodi tingagumane kuponi mtsangalazo?
2, 3. (a) Kodi dzina lakuti Habakuki limbathandauza ciyani? (b) N’thangwe ranyi tin’funika kupfunza bukhu la Habakuki?
2 Kuti tigumane mtawiro wa mbvunzoyu, bwerani tipende bukhu la Habakuki. Napo kuti Bibliya limbatiuza lini bzense pakulewa bza moyo wa Habakuki, bukhu lace ndakulimbisa kwene-kwene. Dzina lakuti Habakuki limbathandauza “Kukolombexa [munthu] mwamphanvu.” Bzimwebzi bzingathandauze momwe Yahova ambakolombexera anamati wace mwamphanvu. Ayai bzingathandauzembo ciphatano comwe ciripo pakati pa Yahova na anamati wace. Habakuki adalewalewa na Mulungu ndipo adam’bvunza mibvunzo minango. Yahova adafulizira Habakuki kuti anembe macezayo thangwe akhadziwa kuti yangadakhala ya phindu kwa ifepano.—Habakuki 2:2.
3 Bibliya limbatiuza bza Habakuki kucokera pa maceza yomwe yadacitidwa pakati pa iye na Yahova. Koma bukhu lace likucita mbali ya ‘bzinthu bzense bzomwe bzidanembedwa’ m’Fala la Mulungu, ‘kuti bzitipfunzise, kuti mwa kupirira kwathu pabodzi na mtsangalazo wa Bzakunembedwabzo, ifepano tikhale na cidikhiro.’ (Waroma 15:4) Kodi bukhu la Habakuki lingatithandize tani? Lingatithandize kuwona thandauzo la kukhulupira Yahova. Ndipo polofesiya ya Habakuki imbatitsimikizira kuti tingakhale na mtendere wa mu mtima napo tikagumana na mabvuto ayai mayezo.
MBAPEMBANI KWA YAHOVA
4. Kodi n’ciyani comwe cidacitisa Habakuki kusunama?
4 Werengani Habakuki 1:2, 3.a Habakuki adakhala mu nthawe yakunesa kwene-kwene, ndipo wanthu wa m’dzikolo akhali wakuipa na waciwembo, ndipo bzimwebzi bzikhamusunamisa kwene-kwene. Ndipo kuli-kwense komwe iye akhanyang’ana, akhawona Ajirayeri akucitirana ciwembo na bzinthu bzakusaya cirungamo. Tenepo, Habakuki akhabzibvunza kuti: ‘Kodi kuipaku kun’dzamala lini? N’thangwe ranyi Yahova akulekerera nthawe itali kuti amalise bzimwebzi?’ Iye akhabziwona kuti akhalibe na basalo. Tenepo, iye adakumbira Yahova kuti acite ciri-cense pa nkhaniyo. Pinango Habakuki adayamba kukumbuka kuti Yahova akhalibe basa na wanthu wace ayai kuti palibe comwe angadacita. Kodi imwepo mudabzibvambo kale ninga mpolofetayu?
5. Kodi tingapfunze ciyani na bukhu la Habakuki? (Onani cithunzi-thunzi pa tsamba 15.)
5 Kodi mibvunzo yomwe Habakuki adacitayi, inkulatiza kuti iye akhadaleka kukhulupira Yahova pabodzi na mapiciro yace? Ne na pang’onopo! Habakuki akhabvunza Yahova kuti amuthandize kubvesesa na kumalisa mabvuto yomwe akhagumana nayo, bzomwe bzikulatiza kuti iye akhamukhulupira. Bzinkuwoneka kuti Habakuki akhana thupo kwene-kwene ndipo akhasaya kuti angadaphata muti wanyi. Iye akhabvesesa lini thangwe lomwe likhacitisa Yahova kulekerera nthawe itali ne kucita cinthu ciri-cense, nakuti thangwe ranyi Yahovayo akhabvuma kuti iye abonere kwene-kwene. Nkhani yakuti Yahova adafulizira Habakuki kunemba bza thupo lace, imbatipfunzisa nkhani yakufunika kwene-kwene. Tin’funika lini kumbacita mantha kumbauza Yahova thupo lathu ayai bzomwe tinkubvesesa lini. Ndipo mwakudeka mtima, iye ambatiuza kuti timbapembe kwa iye na kumufotokozera momwe timbabvera. (Psalymo 50:15; 62:8) Cinembo ca Mimwani 3:5 cimbatilimbisa kuti: ‘Khulupira Yahova na mtima wako wense ndipo leka kuthemba luso lako la kubvesesa bzinthu.’ Tenepo Habakuki adaphatisa basa mafalaya pa moyo wace.
6. N’thangwe ranyi kupemba n’kwakufunika?
6 Habakuki adakhulupira Yahova, omwe akhali Xamwali na Baba wace, ndipo adacita ciri-cense kuti akhale naye pafupi. Habakuki alibe kukhalira kudandaula bza mabvuto yace acifuna kuyamalisa yekha. M’mbuto mwace, iye adauza Yahova mu mpembo momwe akhabvera na thupo lace lense. Cimweci ni ciratizo cabwino kwene-kwene kwa ifepano. Yahova omwe ni mbveseri wa mpembo, ambatiuza kuti timbamukhulupire mwa kupemba kwa iye ticimbamuuza thupo lathu lense. (Psalymo 65:2) Tikambacita bzimwebzi, tin’dzawona momwe Yahova ambatawirira mipembo yathu. Ndipo iye akambatitsangalaza na kutitsogolera tin’dzabzibva ninga kuti watikolombexa mwa lufoyi. (Psalymo 73:23, 24) Iye an’dzatithandiza kubvesesa momwe akuwonera bvutolo, bziribe basa mabvuto yomwe tinkugumana nayo. Tenepo, kupemba kwa Yahova ni njira yabwino yakulatiza kuti timbam’khulupira.
TETEKERANI YAHOVA
7. Kodi n’ciyani comwe Yahova adacita pomwe Habakuki adamuuza bza thupo lace?
7 Werengani Habakuki 1:5-7.b Pomwe Habakuki adamala kuuza Yahova bza thupo lace, iye akhadziwa lini bzomwe Yahova angadacita kuti amalise bvutolo. Tsono ninga Baba wa lufoyi, Yahova adabvesesa momwe Habakuki akhabvera. Iye akhadziwa kuti Habakuki akhabonera ndipo akhafuna thandizo. Tenepo Yahova alibe kutsimula Habakuki, koma adamuuza bzomwe iye angadacita mwakusaya kucedwa kuna Ajuda wakusaya kukhulupirika. Bzinkuwoneka kuti, Habakuki adakhala munthu wakuyamba omwe Yahova adamuuza kuti ciyeruzo ca Ajuda wakusaya kukhulupirikawo cingadacitika mwakusaya kucedwa.
8. N’thangwe ranyi bzomwe Yahova adatawira ndibzo lini bzomwe Habakuki akhadikhirira?
8 Yahova adauza Habakuki kuti akhadakonzeka kumalisa bvuto lace ndipo angadayeruze Ajirayeri waciwembo na wakuipa. Tsono pomwe Yahova adalewa kuti bzimwebzi bzin’dzacitika ‘mu nsiku zawo,’ iye akhalewa kuti ciyeruzoco cingadabwera pomwe Habakuki ayai Ajirayeri akana moyo. Bzomwe Yahova adatawira ndibzo lini bzomwe Habakuki akhadikhirira. Akalideya, ayai Ababulo akhacita bzinthu ninga bzirombo, thangwe iwo akhali waciwembo kuposa Ajirayeri omwe akhalewa kuti akhadziwa mitemo ya Yahova. Tsono thangwe ranyi Yahova adaphatisa basa mtundu waciwemboyu kuti apase nyathwa wanthu wace? Bzimwebzi bzingadacitisa kuti Ajuda abonere kwene-kwene. (Onani mafala ya m’nyansi.c) Kodi imwepo mungadakhala Habakuki mungadabzibva tani?
9. Kodi ni mibvunzo iponi yomwe Habakuki adabvunza Yahova?
9 Werengani Habakuki 1:12-14, 17.d Napo kuti Habakuki adabvesesa kuti Yahova angadaphatisa basa Ababulo kuti apase nyathwa wanthu wakuipa, iye adakhala ninga kuti alibe kubvesesa. Koma napo bzikhali tenepo, iye adabzicepswa ndipo adatsimikiza kupitiriza kukhulupira Yahova. Ndipo adalewa kuti Yahova adapitiriza kukhala ‘Tsendwa’ lace. (Bzakutonga 32:4; Zaiya 26:4) Habakuki akhana citsimikizo cense cakuti Mulungu ngwalufoyi na wakudeka mtima, ndipopa iye akhacita lini mantha kubvunza Yahova mibvunzo minango ninga iyi: N’thangwe ranyi Yahova akhalekerera kuti bzinthu ku Juda bzipitirize kuipa na kubvuma kuti wanthu wace abonere? Thangwe ranyi iye akhacita lini ciri-cense kuti amalise bvutolo? Ndipo thangwe ranyi Mulungu wamphanvu-zense akhapitiriza ‘kukhala zii’ acilekerera kuti kuipa kucitike kuli-kwense? Kuthumizira bzimwebzo, Yahova ngwakucena ndipo ‘maso [yace] njakucena kwene-kwene ndipo yan’themera lini kuwona bzinthu bzakuipa.’
10. N’thangwe ranyi nthawe zinango ifepano tingabzibve ninga momwe Habakuki adabvera?
10 Nthawe zinango ifepano tingabzibve ninga momwe Habakuki adabvera. Koma, tin’funika kutetekera Yahova, kumukhulupira, kuwerenga na kupfunza Fala lace, lomwe lingalimbise cidikhiro cathu. Ndipo tikambatetekera bzomwe gulu lace limbatipfunzisa timbabva bza mapiciro yace. Napo bziri tenepo, pinango tingabzibvunze kuti, ‘Kodi ni lini pomwe kubonera kun’dzamala?’ Tingapfunze na bzomwe Habakuki adacita patsogolo pace.
DIKHIRANI YAHOVA KUTI AMALISE BVUTO LANU
11. Kodi n’ciyani comwe Habakuki adatsimikiza kucita?
11 Werengani Habakuki 2:1.e Habakuki adakhala na mtendere wa mu mtima pomwe adaceza na Yahova. Bzimwebzi bzidamucitisa kuti adikhire Yahova kuti amalise bvuto lace. Habakuki adalewa mwakubwereza-bwereza bza citsimikizo cace kuti: ‘Ndikudikhirira na mtima wense nsiku ya matsautso yangu.’ (Habakuki 3:16) Ndipo atumiki winango wakukhulupirika wa Mulungu adapitirizambo kudikhirira Yahova kuti amalise bvuto lawo. Tenepo, ciratizo cawo cingatilimbise kwene-kwene na kutithandiza kucitambo bzibodzi-bodzibzo.—Mikeya 7:7; Tiyago 5:7, 8.
12. Kodi tingapfunze ciyani na ciratizo ca Habakuki?
12 Kodi tingapfunze ciyani na ciratizo ca Habakuki? Cakuyamba, tin’funika lini kuleka kupemba kwa Yahova, bziribe basa mabvuto yomwe tinkugumana. Caciwiri, tin’funika kumbatetekera bzomwe Yahova ambatiuza mwakuphatisa basa Bibliya pabodzi na gulu lace. Ndipo cacitatu, tin’funika kudikhirira Yahova kuti amalise mabvuto yathu na kukhulupira kuti iye an’dzamalisa kusunama kwathu pa nthawe yakuthemera. Tenepo, tikatewezera Habakuki, tin’dzakhala na mtendere wa mu mtima ndipo tin’dzakwanisa kupirira mabvutoyo. Ndipo cidikhiro cathu cin’dzatithandiza kupirira na kukhala wakukondwa, bziribe basa mabvuto yomwe tinkugumana nayo. Ndipo tinkupenukira lini kuti Baba wathu wa kudzulu an’dzacita ciri-cense kuti atithandize.—Waroma 12:12.
13. Kodi Yahova adatsangalaza tani Habakuki?
13 Werengani Habakuki 2:3.f Tinkutsimikiza kuti Yahova adakomedwa kwene-kwene pomwe adawona kuti Habakuki adadikhira iye kuti amalise mabvuto yace. Mulungu wamphanvu-zense akhadziwa mabvuto yense yomwe Habakuki akhabonera nayo, tenepo iye adatsangalaza mpolofetayo ndipo mwalufoyi adamutsimikizira kuti angadamutawira mibvunzo yace ire. Bzikuwoneka kuti Habakuki angadatsangalazidwa mwakusaya kucedwa thupo lace lense. Bzimwebzi bzikhakhala ninga kuti Yahova akhauza Habakuki kuti: ‘Pakuti iwepo wapirira ndipo wandikhulupira, ndin’tawira mbvunzo wako, napo bzingawoneka kuti panipita nthawe itali.’ Yahova adakumbusa Habakuki kuti iye akhadaikha kale nsiku yomwe angadakwanirisa piciro lace. Tenepo iye adalimbisa Habakuki kuti apitirize kudikhirira. Ndipo pakumalizira pace, mpolofetayo alibe kusunama pomwe.
N’thangwe ranyi tatsimikiza kucita ciri-cense comwe tingakwanise kwa Yahova? (Onani ndime 14)
14. Kodi n’ciyani comwe tin’funika kucita tikambagumana na mabvuto?
14 Ifepanombo tin’funika kudikhirira Yahova kuti amalise mabvuto yathu. Ndipo tin’funikambo kumbatetekera mwatceru bzomwe iye ambatiuza. Tenepo, tin’dzakhala na cikhulupiro camphanvu na mtendere wa mu mtima napo tikagumana na mabvuto makulu. Jezu adatilimbisa kuti tin’funika lini kumbandokumbukira bzakuti Mulungu alibe kutiuza bza ‘nthawe ayai nyengo.’ (Mabasa 1:7) Koma tin’funika kukhulupira kuti Yahova ambadziwa nthawe yakuthemera yomwe an’dzamalisa mabvuto yathu. Ndipopa tin’funika lini kubwerera m’mbuyo, koma tikhale wakubzicepswa, wakupirira na kukhulupira Mulungu. Tsono pomwe tinkudikhirira nthaweyo, tin’funika kuphatisa basa nthawe yathu mwanzeru na kutumikira Yahova momwe tingakwanisire.—Marko 13:35-37; Wagalata 6:9.
YAHOVA AMBAPASA MOYO WALE OMWE AMBAMUKHULUPIRA
15, 16. (a) Kodi ni mapiciro yaponi yomwe timbayagumana m’bukhu la Habakuki? (b) Kodi mapiciroya yambatipfunzisa ciyani?
15 Yahova adapicira kuti: ‘Nyakulungama an’dzakhala na moyo thangwe ra cikhulupiro cace,’ ndipo ‘dziko lense lin’dzadzala na wanthu wakudziwa umbiri bwa Yahova.’ (Habakuki 2:4, 14) Inde, Yahova wapicira kudzapasa moyo wakusaya kumala wale omwe ambapirira na omwe ambamukhulupira.
16 Piciro lomwe limbagumanika pa Habakuki 2:4 ndakufunika kwene-kwene ndipo mpostolo Paulo adalifotokoza katatu kense m’matsamba yace! (Waroma 1:17; Wagalata 3:11; Wahebereu 10:38) Tenepo, tinkupenukira lini kuti ifepano tin’dzawona kukwanirisidwa kwa mapiciro ya Yahova tikambamukhulupira, bziribe basa mabvuto yomwe tinkugumana. Yahova an’funa kuti timbaikhe cidikhiro cathu pa bzinthu bzakutsogolo.
17. Kodi n’ciyani comwe Yahova an’dzatipasa tikambamukhulupira?
17 Bukhu la Habakuki lina nkhani zabwino zomwe zingatithandize m’nsiku zakumalizira zino. Yahova wapicira kupasa moyo wakusaya kumala nyakulungama ali-wense omwe ambamukhulupira. Tenepo, bwerani tipitirize kulimbisa cikhulupiro cathu kwa Mulungu, bziribe basa kuti tinkugumana na mabvuto ayai thupo. Bzomwe Yahova adauza Habakuki bzimbatitsimikizira kuti iye an’dzatithandiza na kutipulumusa. Ndipo mwakudeka mtima iye ambatiuza kuti timbamukhulupire na kudikhirira nthawe yomwe adaikhazikisa, kuti Umambo bwace budzatonge dziko la pansi. Pa nthaweyo, dziko la pansi lin’dzadzala na wanthu wakukondwa na wa mtendere omwe ambanamata Yahova.—Mateu 5:5; Wahebereu 10:36-39.
KHULUPIRANI YAHOVA KUTI MUKHALE WAKUKONDWA
18. Kodi mafala ya Yahova yadatokonya tani Habakuki?
18 Werengani Habakuki 3:16-19.g Habakuki adatokonyedwa kwene-kwene na bzomwe Yahova adamuuza. Habakuki adakumbukira bzinthu bzabwino bzomwe Yahova akhadacitira wanthu wace kale-kale. Kukumbukira bzimwebzi kudalimbisa cikhulupiro cace, acitsimikiza kuti Yahova angadamalisa mabvuto yace mwakusaya kucedwa! Ndipo adatsangalazidwa, napo akhadziwa kuti angadapitiriza kubonera mu kanthawe kakucepa. Habakuki akhapenukira lini kuti bzimwebzi bzingadacitika. Kuthumizira bzimwebzi, iye akhakhulupira na mtima wense kuti Yahova angadamupulumusa. Ndipo bzomwe iye adalewa pa vesi 18 ni mafala yamphanvu yacitsimikizo yomwe timbayawerenga m’Bibliya. Apfunzi winango wa Bibliya ambalewa kuti mafalaya yambathandauza kuti: “Ndin’dzamoga pamaso pa Mbuya thangwe ra kukondwa; Ndin’dzazungulira thangwe ra kukomedwa na Mulungu.” Limweri ni pfunziro likulu kwa ifepano! Yahova ambatiuza lini kokha bza mapiciro yabwino ya kutsogolo, koma ambatiuzambo kuti tsapanopapa an’kwanirisa mapiciro yace yense.
19. Kodi tingatsangalazidwe tani na Yahova, ninga momwe adacitira na Habakuki?
19 Nkhani ikulu yomwe tapfunza mu bukhu la Habakuki ni kufunika kwa kukhulupira Yahova. (Habakuki 2:4) Ndipo kuti tipitirize kukhulupira Yahova, tin’funika kulimbisa uxamwali bwathu na iye. Tenepo tin’funika (1) Kupitiriza kupemba, ticimuuza Yahova bzense bzomwe bzinkuticitisa thupo. (2) Kutetekera mwa tceru bzomwe Yahova ambatiuza mwakuphatisa basa Bibliya, ticiteweza malango yense yomwe iye ambatipasa kucokera m’gulu lace. (3) Kukhala wakukhulupirika na wakupirira pomwe tinkudikhirira Yahova kuti akwanirise mapiciro yace. Bzimwebzi ndibzo bzomwe Habakuki adacita. Iye akhadasunama kwene-kwene pomwe adayamba maceza yace na Yahova, koma kuphampha kwace, iye adalimbisidwa ndipo adakomedwa kwene-kwene! Tenepo, tikatewezera Habakuki, tin’dzatsangalazidwa na Baba wathu wakudzulu, Yahova, omwe ambakolombexa mwalufoyi. Umweyu ni mtsangalazo ukulu omwe tingakhale nawo m’dziko lakuipali.
a Habakuki 1:2 Imwe Yahova, mpaka lini, ine ndin’dzakulirirani kuti mundithandize, koma imwe ne kundidva? Mpaka lini ndin’dzakukumbirani thandizo kuti mundipulumuse ku ciwembo, koma imwe ne kucita cinthu? 3 Thangwe ranyi munkundiwonesa bzinthu bzakuipa? Ndipo thangwe ranyi mumbalekerera matsoka? Thangwe ranyi pana kuipa na ciwembo pa maso pangu, ndipo thangwe ranyi pana kupolowana na kumenyana?
b Habakuki 1:5 “Nyang’anisani mitundu ya wanthu ndipo khalani tceru! Nyang’anisani mwakudabwa ndipo dabwani. Pakuti mu nsiku zawo pan’dzacitika cinthu cinango comwe imwepo mun’dzacikhulupira lini napo munthu akadzakuuzani. 6 Pakuti ndikubweresa Akalideya, mtundu waciwembo na wakucita bzinthu mwakusaya kukumbuka. Iwo ambapita m’bzigawo bzizinji bza pa dziko la pansi kuti apambe nyumba zomwe n’zawo lini. 7 Mtundu umweyu n’gwakugopswa na wakucitisa mantha. Ndipo umbabzikonzera wokha malamulo ucibzipasa ulemu.
c Pa Habakuki 1:5 pana fala lakuti ‘imwepo,’ bzomwe bzikulatiza kuti ciyeruzo cingadafikira wanthu wense wa ku Juda.
d Habakuki 1:12 Imwe Yahova, kodi imwepo mulipo lini kuyambira kale-kale? Imwe Mulungu wangu, Nyakucena wangu, imwepo mumbafa lini. Imwe Yahova, imwepo mwawasankhula kuti apereke ciyeruzo; Tsendwa langu, imwepo mwawaikha kuti abwerese nyathwa. 13 Maso yanu njakucena kwene-kwene ndipo yan’themera lini kuwona bzinthu bzakuipa; Ndipo mumbalekerera lini uipi. Tsono thangwe ranyi, munkulekerera anyacinyengo, ndipo mukupitiriza kukhala zii pomwe anyakuipa ankukhudyula wanthu omwe mbakulungama kuposa iwo? 14 N’thangwe ranyi munkucitisa munthu kukhala ninga nsomba m’madzi, ninga bzirombo bzakukwawa bzomwe bziribe mtongi? 17 Kodi iye an’dzapitiriza kucosa nsomba m’bwazi lace? Kodi iye an’dzapitiriza kupha mitundu ya wanthu, mwakusaya kuwabvera nsisi?
e Habakuki 2:1 Ndin’dzaima pa mbuto yangu ya ulindiri, ndipo ndi’ndzaima padzulu pa litsito. Ndin’dzakhala tceru kuti ndiwone bzomwe iye an’dzalewalewa mwakuphatisa basa inepano na bzomwe ndin’dzatawira ndikadzatsimulidwa.
f Habakuki 2:3 Pakuti masomphenyaya yankudikhira nthawe yace, ndipo yankuthamangira ku mamaliziro yace; yaninama lini. Napo yacedwe, pitiriza kuyadikhirira pakuti yan’dzacitikadi mwakusaya kucedwa.
g Habakuki 3:16 Ine ndidabva, ndipo m’mimba mwangu mudayamba kukhwukhwuta; miromo yangu idatetemera. Mafupa yangu yadayamba kubvunda; minyendo yangu ikhatetemera. Koma ndikudikhirira na mtima wense nsiku ya matsautso yangu, pakuti iye akubwere kwa wale omwe ankulimbana nafe. 17 Napo mkuyu uleke kuphukira, ndipo mpesa uleke kubala bzisapo; napo muti wa mioliva uleke kubala bzisapo, ndipo minda ireke kucosa cakudya; napo mabira yanyembereke m’thanga ndipo napo m’thanga mukhale mulibe ng’ombe; 18 Tenepo kwa ine ndin’dzakondwa mwa Yahova; Ndipo ndin’dzasekerera mwa Mulungu wa cipulumuso cangu. 19 Yahova Mbuya Mkululetu ni mphanvu yangu; Iye an’dzacitisa minyendo yangu kukhala ninga ya mbalale ndipo an’dzacitisa kuti ndiponde m’mbuto za padzulu.