Thandizani Anyakupfunza Wanu wa Bibliya Kutcenkha Axamwali wa Makhalidwe Yakuipa

Kuti anyapfunza wanu wa Bibliya akhale pa uxamwali bwabwino na Yahova, iwo an’funika kusankhula axamwali wabwino. (Sl 15:1, 4) Axamwali wabwino an’dzawathandiza kucita bzinthu bzabwino.—Mim 13:20; lff pfunziro 48.

Pomwe mukuthandiza anyakupfunza wanu wa Bibliya kutcenkha axamwali wakuipa, khalani munthu wakubvesesa, thangwe pinango bzimbakhala bzakuwanesa kusiya axamwali wawowo. Tenepo, mbalatizani kuti mumbawakumbukira napo pa ntsiku zomwe ni zapfunziro lini. Bzimwebzi bzikuphatanidza kuwanembera mensaje, kuwapfuwira ntedwe na kuwazungira. Nyakupfunza wanu akakhala kuti akuyenda patsogolo, mungambamucemerembo kuti akhale namwe pa nthawe ya masenzeka na abale. Anyakupfunza wanuwo an’dzawona kuti akuganyali sikuti kuluza cinthu. (Mar 10:29, 30) Imwepo mun’dzakomedwambo mukawona kuti banja la Yahova likukula.

ONANI VIDIYO YA MSOLO WAKUTI THANDIZANI ANYAKUPFUNZA WANU WA BIBLIYA KUTCENKHA AXAMWALI WA MAKHALIDWE YAKUIPA, MUKAMALA BVUNZANI ABVESERI KUTI:

• Kodi axamwali wakuipa mbaponi?—1 Ako. 15:33

• Kodi Duminga akhakumbuka kuti masenzeka ya Akristau yambakhala tani?

• Kodi Rita wathandiza tani Duminga kukhala na axamwali wabwino?