NKHANI YAKUPFUNZA 32
Alumbwana na Atsikana, Pitirizani Kukula Mwauzimu Mukabatizidwa
“Tikule m’bzinthu bzentse mwalufoyi.” — AEFEZO 4:15.
NYIMBO 56 Tumikira Mulungu na Mtima Wense
BZOMWE TIN’PFUNZAa
1. Kodi ni bzinthu bziponi bzabwino bzomwe alumbwana na atsikana akucita kale?
GOLE liri-lentse, alumbwana na atsikana azinji ambabatizidwa. Kodi imwepo mudabatizidwa kale? Penu mun’ti inde, dziwani kuti abale na mpfumakazi zanu akukomedwa namwe kwene-kwene ndipo Yahova akukomedwambo. (Mimwani 27:11) Kumbukirani bzinthu bzabwino bzomwe mwacita kale. Imwepo mwapfunza Bibliya ndipo pinango mwamala magole mukucita bzimwebzi. Ndipo kupfunzako kwakutsimikizirani kuti Bibliyalo ni Fala la Mulungu. Cinthu cinango n’cakuti mwafika pa kumudziwa Yahova omwe ni Mwenekaciro wa Bibliyalo. Ndipo lufoyi lanu kwa iye lakucitisani kuti mubzipereke mucibatizidwa. Ndipopa tikuti makolokoto!
2. Kodi n’ciyani comwe tin’pfunza mu nkhani ino?
2 Pomwe mukhanati kubatizidwa, imwepo mudagumana na mabvuto yomwe yangadakutazisani kukhala wakukhulupirika kwa Yahova. Tsono pomwe mukukula, imwepo mun’dzagumana na mabvuto yanango. Sathani an’dzayezera kukutazisani kufuna Yahova na kupitiriza kumutumikira. (Aefezo 4:14) Tsono mun’funika lini kubvuma kuti bzimwebzi bzikucitikireni. Kodi n’ciyani comwe cingakuthandizeni kupitiriza kukhala wakukhulupirika kwa Yahova na kuteweza lumbiro lomwe mudacita pomwe mudabzipereka kwa iye? Comwe cingakuthandizeni ni ‘kupitiriza kukula’ mwauzimu. (Ahebereu 6:1) Ndipopa mu nkhani ino, tiniwona bzomwe alumbwana na atsikana angacite kuti apitirize kukula mwauzimu.
KODI MUNGACITE CIYANI KUTI MUPITIRIZE KUKULA MWAUZIMU?
3. Kodi tentsenefe tin’funika kucita ciyani tikabatizidwa?
3 Tikabatizidwa, tentsenefe tin’funika kupitiriza kuteweza malango yomwe mpostolo Paulo adapereka kwa Akristau wa ku Efezo. Iye adawalimbikisa kuti akule ‘acifika pa msinkhu wa munthu mkulu.’ (Aefezo 4:13) Bzimwebzi bzin’funa kulewa kuti iwo akhafunika kupitiriza kukula mwauzimu. Kuti atithandize kubvesesa nkhani imweyi, Paulo adandendemezera kukula mwauzimu na kukula kwa mwana. Abereki ambakomedwa kwene-kwene akakhala na mwana ndipo ambamufuna kwene-kwene mwana wawoyo. Tsono mwanayo ambadzakula ndipo na kupita kwa nthawe iye ambadzasiya “kucita bzinthu ninga mwana.” (1 Akolinto 13:11) Mpsibodzi-bodzimbo na Akristau. Akabatizidwa, iwo an’funika kupitiriza kukula mwauzimu. Mbatiwoneni nfundo zinango zomwe zingatithandize kucita bzimwebzi.
4. N’ciyani cingakuthandizeni kupitiriza kukula mwauzimu? Fotokozani. (Afilipi 1:9)
4 Pitirizani kufuna kwene-kwene Yahova. Imwepo mumbafuna kale Yahova. Tsono mungapitirize kumufuna kwene-kwene. Mungacite tani bzimwebzi? Mpostolo Paulo adafotokoza bzomwe mungacite pa Afilipi 1:9. (Werengani.) Iye adapemba kuti lufoyi lomwe Akristau wa ku Filipi akhanalo “lipitirize kukula.” Ndipopa ifepano tingakwanisembo kukulisa lufoyi lathu kwa Yahova. Kodi tingacite tani bzimwebzi? Tingacite bzimwebzi mwa ‘kukhala na cidziwiso caico pabodzi na kubvesesa bzinthu.’ Tikamudziwa bwino Yahova, tin’dzamufuna kwene-kwene ndipo tin’dzakomedwambo na momwe ambacitira bzinthu. Ndipo cinango n’cakuti tin’dzafunisisa kumukondwesa na kutcenkha kucita bzinthu bzomwe bzingamukalipise. Ndipo tin’dzacitambo nyongo ya kudziwa bzomwe iye akufuna kuti ifepano ticite, ticicita bzimwebzo.
5-6. Kodi n’ciyani comwe tingacite kuti timbafune kwene-kwene Yahova? Fotokozani.
5 Kuti timbafune kwene-kwene Yahova, tin’funika kumudziwa bwino Jezu, thangwe iye adatewezera bwino-bwino makhalidwe ya Baba wace. (Ahebereu 1:3) Cinthu cabwino comwe tingacite kuti timudziwe bwino Jezu ni kupfunza mabukhu ya m’Bibliya yomwe yambafotokoza bza moyo wace. Penu imwepo mukanati kuyamba kuwerenga Bibliya ntsiku zentse, bzingakhale bwino kuyamba. Mukacita bzimwebzi, mun’dzamudziwa bwino Jezu. Pomwe mukuwerenga nkhani zakulewa bza moyo wa Jezu Kristu, onani makhalidwe yabwino yomwe iye akhanayo. Iye akhali munthu wakufikirika, ndipo akhalatiza lufoyi kuna wana mwa kuwanyamula m’manja mwace. (Marko 10:13-16) Jezu akhali wakudeka mtima ndipo anyakupfunza wace akhagopa lini kumuuza bzinthu. (Mateu 16:22) Jezu akhalatiza makhalidwe yamweya pakutewezera Baba wace wa kudzulu. Yahova ngwakufikirikambo, ndipopa ifepano tingalewelewe naye mu mpembo. Tikambapemba, tingamuuze bzentse bzomwe bzikuticitisa thupo. Ndipo iye an’dzacita lini nafe ciya ayai kutipasa mulandu. Iye ambatifuna na kutithandiza. — 1 Pedru 5:7.
6 Jezu akhabvera ntsisi wanthu. Mpostolo Mateu adanemba kuti: “Pakuwona thimu la wanthulo, iye adawabvera ntsisi, thangwe wanthuwo akhali wakupwetekeka na wakumwazika ninga mabira yakusaya makabusa.” (Mateu 9:36) Kodi Yahova akhabva tani na bzimwebzi? Jezu adati: “Baba wangu wakudzulu an’funa lini kuti m’bodzi mwa wanthu omwe ali ninga tuwanawa ataike.” (Mateu 18:14) Ifepano timbakomedwa kwene-kwene na mafalaya thangwe yambalatiza kuti Jezu ambatifuna. Ndipopa tikamudziwa bwino Jezu, lufoyi lathu kwa Yahova lin’dzakula kwene-kwene.
7. Kodi kucita uxamwali na Akristau wakukhwima mwauzimu kungakuthandizeni tani?
7 Imwepo mungapfunzembo kufuna kwene-kwene Yahova na kupitiriza kukula mwauzimu mukambaceza na abale na mpfumakazi wa m’gwere mwanu omwe mbakukhwima mwauzimu. Mukacita bzimwebzi, mun’dzawona kuti iwo mbakukondwa kwene-kwene pakutumikira Yahova ndipo akukhumbula lini thangwe ra kucita bzimwebzi. Mukambaceza nawo, abvunzeni bzinthu bzomwe bzidawacitikira pakutumikira Yahova. Ndipo mukafuna kucita cinthu cikulu pa moyo wanu, auzeni kuti akupaseni malango. Kumbukirani kuti “anyakupereka malango akawanda bzinthu bzimbafamba bwino.” — Mimwani 11:14.
Kodi mungakhale tani wakukonzeka kufotokoza bzomwe mumbakhulupira ku xikola ikayambika nkhani yakuti bzinthu bzidacita kusanduka? (Onani ndime 8-9)
8. Kodi n’ciyani comwe mungacite penu bzikukunesani kukhulupira bzomwe Bibliya limbalewa?
8 Khulupirani bzomwe Bibliya limbapfunzisa. Ninga momwe talewera kale mu ndime 2, Sathani ambayezera kutitazisa kukula mwauzimu. Cinthu cibodzi comwe ambacita ni kuticitisa kukumbuka kuti bzinthu bzinango bzomwe Bibliya limbapfunzisa mpsakunama. Ndipo cibodzi mwa bzinthu bzomwe bzimbapitana na Bibliya ni nkhani yakuti bzinthu bzidacita kusanduka. Nkhani imweyi imbanyoza Mulungu ndipo ntsiku ziwande ayai zicepe imwepo mun’dzaibva basi ikulewedwa. Pomwe mukhali mwana, pinango mukhaidziwa lini nkhani imweyi, tsono pomwe mwakulapa pinango mukuipfunza ku xikola. Nthawe zinango bzingawoneke ninga kuti bzomwe apfunzisi akulewa mpsacadidi. Tsono kumbukirani kuti iwo pinango alibe kupfunza bwino-bwino umboni bwakuti alipo Mulengi. Onani mafala yomwe yali pa Mimwani 18:17. Vesiri limbalewa kuti: “Munthu akayamba ndiye kufotokoza mbali yace pa mulandu, ambawoneka ninga ana lazau, tsono mwanzace akabwera acifotokozambo mbali yace, bzentse bzimbawonekera padeca.” Ifepano tin’funika kumbapfunza bwino-bwino Fala la Mulungu, Bibliya, sikuti kumbandokhulupira cinthu ciri-centse comwe timbabva ku xikola. Comwe cingatithandize ni kufufudza m’mabukhu yathu. Ndipo mungacezembo na abale na mpfumakazi omwe kale-kale akhakhulupira kuti bzinthu bzidacita kusanduka. Abvunzeni kuti akuuzeni bzomwe bzidawatsimikizira kuti alipo Mulengi omwe ambatifuna. Kuceza na abale amwewa kun’dzakuthandizani kubvesesa umboni bwakuti alipodi Mulengi.
9. Kodi mwapfunza ciyani na bzomwe Melissa adacita?
9 Mpfumakazi yakucemeredwa Melissa idagumana phindu kwene-kwene pomwe idafufudza nkhani yakulewa bza cirengedwe.b Iyo idati: “Ku xikola, nkhani yakuti bzinthu bzidacita kusanduka imbafotokozedwa mu njira yakucitisa munthu kukhulupira kuti bzinthu bzidacitadi kusanduka. Pakuyamba bzikhandinesa kufufudza nkhani imweyi thangwe ndikhakumbuka kuti ndikaifufudza, nin’gumana umboni bwakulatiza kuti bzinthu bzidacitadi kusanduka. Tsono ndidadzawona kuti Yahova ambafuna kuti timukhulupire thangwe ra kukhala na umboni bwa bzomwe timbakhulupirabzo. Ndipopa ndidayamba kuifufudza nkhaniyi. Ndidawerenga bukhu lakuti Existe um Criador Que Se Importa com Você? na mabroxura yakuti A Vida — Teve um Criador? na A Origem da Vida — Cinco Perguntas Que Merecem Resposta. Bzimwebzi ndibzo bzomwe ndikhafunika kucita pa nthawe imweyire. Bzingadakhala kuti ndikhadawerenga kale mabukhu yamweya, ningadafika lini pakukumbuka tenepaule.”
10-11. Kodi n’ciyani cingakuthandizeni kupitiriza kukhala na makhalidwe yakucena? (1 Atesalonika 4:3, 4)
10 Tcenkhani makhalidwe yakuipa. Alumbwana na atsikana ambafika pa msinkhu omwe cikhumbo cakufuna kucita malume ya pa mphasa cimbakhala camphanvu kwene-kwene. Ndipo anzawo angayezere kuwapumpsa kuti acite upombo. Sathani akufuna kuti mucite bzomwe mtima wanu ukufuna. Tsono n’ciyani comwe cingakuthandizeni kupitiriza kukhala na makhalidwe yakucena? (Werengani 1 Atesalonika 4:3, 4.) Cinthu cibodzi comwe cingakuthandizeni ni kupemba kwa Yahova. Pomwe mukupemba, muuzeni Yahova momwe mukubvera ndipo mukumbireni kuti akupaseni mphanvu. (Mateu 6:13) Kumbukirani kuti Yahova akufuna kukuthandizani sikuti kukupasani mulandu. (Salimo 103:13, 14) Cinthu comwe cingakuthandizeni pomwe ni kuwerenga Bibliya. Mpfumakazi Melissa yomwe tailewa pakuyamba ire, ikhacita nyongo kuti ireke kumbakumbuka bzinthu bzakuipa. Iyo idalewa kuti: “Kuwerenga Bibliya ntsiku zentse kumbandithandiza kutcenkha nzeru zakuipa. Thangwe kuwerenga Bibliyako kumbandikumbusa nthawe zentse kuti inepano ndine mtumiki wa Yahova ndipo nin’funika kumutumikira moyo wangu wentse.” — Salimo 119:9.
11 Lekani kuyezera kumalisa mwekha mabvuto yanu. Uzani abereki wanu bvuto lomwe mukugumana nalo. Nthawe zinango bzingakuneseni kuuza abereki wanu nkhani ninga zimwezi. Tsono mpsakufunika basi kucita tenepoyo. Mpfumakazi Melissa idalewa kuti: “Ndidapemba kwa Yahova kuti andithandize kukhala wakukhwimika ndipo ndidauza pai wangu bza bvuto langu. Pomwe ndidamala kuceza nawo, ndidapepukidwa ndipo ndidadziwa kuti Yahova akukomedwa nande.”
12. Kodi n’ciyani comwe cingakuthandizeni kucita bzinthu bzomwe bzimbakondwesa Yahova?
12 Bvumani kutsogoleredwa na nfundo za m’Bibliya. Pomwe mukukula, pang’ono na pang’ono imwepo mun’dzayamba kukhala na ufulu bwa kusankhula mwekha bzakucita. Tsono ufulu bwanubo bun’dzakhala na malire basi. Kodi n’ciyani comwe cingakuthandizeni kutcenkha kucita cinthu comwe cingadzonge uxamwali bwanu na Yahova? (Mimwani 22:3) Mpfumakazi yakucemeredwa Kari idalewa bzomwe bzimbaithandiza kucita bzinthu mwanzeru. Iyo idazindikira kuti munthu wakukhwima mwauzimu an’funika lini kucita kuuzidwa bzakucita, koma yekha ambakwanisa kudziwa bzabwino na bzakuipa. Mpfumakaziyi idalewa kuti: “Ndikhafunika kubvesesa nfundo za m’Bibliya sikuti malamulo basi.” Pomwe mukuwerenga Bibliya, mungabzibvunze kuti: ‘Kodi bzomwe ndawerengabzi bzikundipfunzisa ciyani pa nkhani ya kakumbukidwe ka Yahova? Kodi pamwepa pana nfundo zomwe zingandithandize kucinja bzinthu pa moyo wangu? Penu ziripo, kodi kuziphatisa basa kun’ndithandiza tani?’ (Salimo 19:7; Zaiya 48:17, 18) Mukambawerenga Bibliya na kumbakumbukira bwino-bwino bzomwe mwawerengabzo, bzin’dzakhala bzakusaya kunesa kucita bzinthu bzomwe bzimbakondwesa Yahova. Pomwe mukupitiriza kukula mwauzimu, imwepo mun’dzawona kuti mun’funikira lini kukhala na lamulo lakukuuzani bzakucita pa cinthu ciri-centse, thangwe mun’dzabvesesa bzomwe Yahova akufuna kuti mucite pa nkhani iri-yentse.
Kodi mpfumakaziyi yasankhula axamwali wa moda wanyi? (Onani ndime 13)
13. Kodi axamwali wabwino angakuthandizeni tani? (Mimwani 13:20)
13 Khalani na axamwali omwe ambafuna Yahova. Ninga momwe talewera kumayambiriro kule, axamwali wathu angatithandize kukhala Akristau wakukhwima mwauzimu. (Werengani Mimwani 13:20.) Mpfumakazi yakucemeredwa Sara ikhakhala lini yakukondwa. Tsono axamwali wabwino adaithandiza kukhala yakukondwa. Mpfumakaziyi idati: “Ndidagumana axamwali wabwino pa nthawe yomwe ndikhawafuna. Inepano na mpfumakazi inango tikhambayenda ku mbuto ibodzi sumana iri-yentse kukakonzekera Ntsanza ya Mulindiri. Ndipo xamwali wangu unango adandithandiza kuti nimbayambe kutawira pa mitsonkhano. Thangwe ra kuthandizidwa na axamwali wanguwa, ndidayamba kucita pfunziro la pandekha na kupemba na mtima wentse. Bzimwebzi bzidandithandiza kukhala pa uxamwali bwakulimba na Yahova na kukhala wakukondwa.”
14. Kodi John adacita tani kuti akhale na axamwali wabwino?
14 Kodi mungacite tani kuti mukhale na axamwali omwe angakuthandizeni kukhala na makhalidwe yabwino? John, omwe tsapano ni mkulu wa gwere, adati: “Pomwe ndikhali mulumbwana, kuyenda mu utumiki kudandithandiza kukhala na axamwali azinji. Axamwali amwewa akhana nyongo kwene-kwene pa basa lakupalizira ndipo iwo adandithandiza kuwona basa limweri limbadekeza kwene-kwene. Ndidayamba kufuna kucita utumiki bwa nthawe zentse. Ndipo ndidazindikirambo kuti ndikhaluza mwayi wa kukhala na axamwali wabwino, thangwe rakuti ndikhandokhala pa uxamwali na wanthu wa msinkhu wangu basi. Patsogolo pace, ndidadzakhala pomwe na axamwali wabwino pa Beteli. Makhalidwe yawo yabwino yadandithandiza kusankhula bwino bzinthu bzakupfatsa nabzo. Bzimwebzi bzidandithandiza kukhala pa uxamwali bwakulimba na Yahova.”
15. Kodi Paulo adacenjeza Timotio bza ciyani? (2 Timotio 2:20-22)
15 Kodi n’ciyani comwe mun’funika kucita mukazindikira kuti mukucita uxamwali na munthu omwe angadzonge uxamwali bwanu na Yahova? Mpostolo Paulo akhadziwa kuti mu gwere la Akristau wakuyambirira mungadawoneka wanthu winango omwe akhalibe makhalidwe yabwino. Ndipopa, iye adauza Timotio kuti aleke kubverana nawo wanthu amwewa. (Werengani 2 Timotio 2:20-22.) Uxamwali bwathu na Yahova ni cinthu cakufunika kwene-kwene. Ifepano timbacita nyongo kuti tilimbise uxamwalibu. Ndipopa tin’funika lini kucita uxamwali na wanthu omwe angadzonge uxamwali bwathu na Baba wathu wa kudzulu. — Salimo 26:4.
CITANI BZINTHU BZOMWE BZINGAKUTHANDIZENI KUKULA MWAUZIMU
16. Kodi ni bzinthu bziponi bzomwe mungacite kuti mukhale Mkristau wakukhwima mwauzimu?
16 Citani bzinthu bzomwe bzingakuthandizeni. Citani bzinthu bzomwe bzingakuthandizeni kukhala na cikhulupiro cakulimba na kukhala wakukhwima mwauzimu. (Aefezo 3:16) Mbakhalani na nthawe ya kuwerenga na kupfunza Bibliya pa mwekha. Ndipo mungakhalembo na nthawe kuti mumbapembe kazinji kwa Yahova nakuti mumbapembembo na mtima wentse. Kuti mukwanise kucita bzimwebzi, pinango mungafunike kukhala munthu wakubziphata pa nkhani ya kusankhula bzinthu bzomwe mungapfatse nabzo na kuphatisa basa bwino nthawe yanu. (Aefezo 5:15, 16) Dziwani kuti Yahova an’dzakomedwa kwene-kwene akawona kuti mukucita nyongo kuti mukhale Mkristau wakukhwima mwauzimu.
Kodi mpfumakaziyi idasankhula kucita ciyani pa moyo wace? (Onani ndime 17)
17. Kodi tin’dzagumana phindu liponi tikambathandiza anzathu?
17 Imwepo mungakule mwauzimu mukambathandiza wanthu winango. Ndipopa Jezu adalewa kuti: “Kupasa kumbabweresa cikondweso cikulu kuposa kutambira.” (Mabasa 20:35) Mukambaphatisa basa nthawe na mphanvu zanu kuti muthandize anzanu, imwepo mun’dzakomedwa kwene-kwene. Mungathandize abale na mpfumakazi wacikulire wa m’gwere mwanu na wale omwe mbakuwofoka. Pinango mungathandize acikulire mwa kuyenda kukawagulira bzinthu ayai kuwathandiza kudziwa momwe angaphatisire basa telefoni, tableti ayai komputadori yawo. Ndipo penu ndimwe m’bale, mungacite nyongo kuti mukhale mtumiki wakuthandiza, kuti mukwanise kuthandiza bwino abale na mpfumakazi zanu. (Afilipi 2:4) Mungalatizembo kuti mumbafuna wanthu omwe ni Mboni lini mwa kuwauzambo mafala yabwino ya Umambo. (Mateu 9:36, 37) Penu mungakwanise, citani nyongo kuti mucite utumiki bwa nthawe zentse.
18. Kodi kucita utumiki bwa nthawe zentse kungakuthandizeni tani kukula mwauzimu?
18 Kucita utumiki bwa nthawe zentse kungakuthandizeni kukhala pa uxamwali bwakulimba na Yahova. Penu ndimwe mpainiya, mungayende ku Xikola ya Apalizi wa Umambo, mungayende kukatumikira pa Beteli ayai kukacita mabasa yakumanga ya gulu lathu. Mpfumakazi yakucemeredwa Kaitlyn, yomwe ni mpainiya, idalewa kuti: “Kumala nthawe izinji mu utumiki na abale na mpfumakazi kudandithandiza kukhala pa uxamwali bwakulimba na Yahova pomwe ndidabatizidwa. Makhalidwe yawo yabwino yadandithandiza kuti ndilidziwe bwino Bibliya na kukulisa luso langu la kupfunzisa.”
19. Kodi mun’dzakhala na bzisimbo bziponi mukapitiriza kukula mwauzimu?
19 Pomwe mukupitiriza kukula mwauzimu, Yahova an’dzakupasani bzinthu bzizinji bzabwino. Imwepo mun’dzaphatisa lini basa mphanvu yanu pakucita bzinthu bzomwe bziribe phindu. (1 Juwau 2:17) Ndipo mun’dzacita lini bzinthu bzomwe bzingadzakubweresereni mabvuto. Koma bzinthu bzin’dzakufambirani bwino ndipo mun’dzakhala wakukondwa. (Mimwani 16:3) Makhalidwe yanu yabwino yan’dzalimbikisa Akristau anzanu, wana na akulu kubodzi. (1 Timotio 4:12) Cinthu cakufunika kwene-kwene n’cakuti imwepo mun’dzakhala pa mtendere ndipo mun’dzakomedwa thangwe ra kudziwa kuti mukukondwesa Yahova na kukhala pa uxamwali bwakulimba na iye. — Mimwani 23:15, 16.
NYIMBO 88 Tidziwiseni Njira Zanu
a Atumiki wa Yahova ambakomedwa kwene-kwene akawona alumbwana na atsikana akubatizidwa. Tsono iwo an’funika kupitiriza kukula mwauzimu akabatizidwa. Nkhani ino, in’tithandiza kudziwa bzomwe alumbwana na atsikana omwe abatizidwa tsapanopa angacite kuti apitirize kukula mwauzimu.
b Madzina yanango yacinjidwa.