NKHANI YAKUPFUNZA 42
“Wakupfatsa ni Wale Omwe Ambapitiriza Kukhala Wakukhulupirika” kwa Yahova
“Wakupfatsa ni wale omwe mbakusaya kuphonya mu njira zawo . . . , omwe ambateweza malamulo ya Yahova.” — SALIMO 119:1.
NYIMBO 124 Kukhala Wakukhulupirika Nthawe Zense
BZOMWE TIN’PFUNZAa
Abale na mpfumakazi zathu wakukhwimika omwe adaikhidwa m’kawoko thangwe ra kukhala wakukhulupirika ku utongi bwa Yahova (Onani ndime 1-2)
1-2. (a) Kodi n’ciyani comwe maboma yanango yambacitira wanthu wa Yahova, ndipo kodi wanthu wa Yahovawo ambacita ciyani? (b) Thangwe ranyi kuzunzidwa kungacitise munthu kukhala wakukondwa? (Onani cithunzi-thunzi ca pa tsamba lakuyamba.)
TIKULEWA pano, basa lathu lidaletsedwa m’madziko yakupitirira 30. Ndipo m’madziko manango, atongi ambaikha m’kawoko abale na mpfumakazi zathu. Kodi iwo ambaphonya ciyani? Yahova ambawona kuti iwo ambaphonya lini cinthu. Bzomwe iwo ambandocita ni kuwerenga Bibliya, kuuza anzawo bzomwe ambakhulupira, kuyenda ku mitsonkhano ya gwere na kulamba kupitira nkhani za ndale. Napo kuti atumiki wakukhulupirika wa Yahovawa akuletsedwa kutumikira Mulungu, iwo akupitiriza kukhala wakukhulupirika kwa iye. Bzimwebzi bzimbawacitisa kukhala wakupfatsa!
2 Pinango imwepo mudawona kale foto za abale amwewa m’mabukhu yathu na pa jw.org. Iwo mbakukondwa thangwe ambadziwa kuti Yahova akukomedwa na kukhulupirika kwawo. (1 Nkhani 29:17a) Jezu adati: “An’kondwa mbale omwe akuzunzidwa thangwe ra kucita cirungamo . . . Kondwani mucisekerera kwene-kwene, thangwe mabaibai yanu ni makulu.” — Mateu 5:10-12.
TEWEZERANI AKRISTAU WAKUYAMBIRIRA
Pedru na Juwau adalatiza bzomwe Akristau wa ntsiku zino an’funika kucita mwa kuyenda kukawonekera ku nyumba ya mphala na kukhotcerera cikhulupiro cawo (Onani ndime 3-4)
3. Kodi apostolo adacita ciyani pomwe akhazunzidwa, ndipo n’thangwe ranyi adacita bzimwebzi? (Mabasa 4:19, 20)
3 Abale na mpfumakazi zathu akugumanambo na mabvuto ninga yomwe apostolo adagumana nayo mu nthawe ya Akristau wakuyambirira, pomwe akhazunzidwa thangwe ra kupalizira bza dzina la Jezu. Atongi wa nyumba ikulu ya mphala ya Adjuda ‘akhawauza kuti aleke kupfunzisa pomwe mu dzina la Jezu.’ (Mabasa 4:18; 5:27, 28, 40) Kodi n’ciyani comwe apostolowo adacita? (Werengani Mabasa 4:19, 20.) Iwo akhadziwa kuti munthu omwe akhana mphanvu kwene-kwene kuposa atongiwo adawapasa basa lakuti ‘apalizire wanthu na kucitira umboni mwakukwanira’ bza Kristu. (Mabasa 10:42) Ndipopa, Pedru na Juwau, omwe akhalalewa mu dzina la apostolo wentse, adalewa mwakukhwimika kuti iwo angadabvera Mulungu sikuti atongiwo. Ndipo adalewa pomwe kuti angadasiya lini kupalizira bza Jezu. Pomwe akhalewa bzimwebzi, bzidakhala ninga kuti akubvunza atongiwo kuti: ‘Kodi imwepo ndimwe mbani kuti mutiletse kucita bzomwe Mulungu akufuna?’
4. Kodi apostolo adacita ciyani pomwe adamala kumenyedwa, ndipo ifepano tingawatewezerembo tani? (Mabasa 5:27-29)
4 Bzomwe apostolo wale adacita ndibzo bzomwe Akristau wentse ambacitambo ntsiku zino. Iwo “[ambabvera] Mulungu ninga mtongi sikuti wanthu.” (Werengani Mabasa 5:27-29.) Pomwe apostolo wale adamala kumenyedwa thangwe ra kukhala wakukhulupirika, iwo adacoka mu nyumba ya mphalayo “wakukondwa kwene-kwene thangwe adakhala na mwayi wakunyozedwa thangwe ra dzina la Jezu.” Ndipo iwo adapitiriza kucita basa la kupalizira! — Mabasa 5:40-42.
5. Kodi ni mibvunzo iponi yomwe tingabzibvunze?
5 Bzomwe apostolo wale adacita pinango bzingaticitise kukhala na mibvunzo minango. Pinango tingabzibvunze kuti: ‘Kodi kubvera Mulungu kuposa wanthu kukubverana tani na nfundo ya m’Bibliya yakuti “tin’funika kubvera wale omwe akutonga pakati pathu”?’ (Aroma 13:1) ‘Kodi ifepanombo tingateweze tani malango ya mpostolo Paulo yakuti “[timbabvere] maboma na atongi,” ticipitiriza kukhala wakukhulupirika kwa Mulungu, omwe ni Mtongi mkululetu?’ — Tito 3:1.
“OMWE AKUTONGA PAKATI PATHU”
6. (a) Kodi mafala yakuti “omwe akutonga pakati pathu” yomwe yali pa Aroma 13:1 yan’funa kulewa bza mbani, ndipo n’ciyani comwe ifepano ti’funika kuwacitira? (b) Kodi ifepano tin’funika kukumbukira ciyani pa nkhani ya atongi wa maboma?
6 Werengani Aroma 13:1. Pa vesiri, mafala yakuti “omwe akutonga pakati pathu” yambalewa bza wanthu omwe ana mpando ayai wanthu omwe ambatonga dzikoli. Akristau an’funika kumbabvera atongi wa maboma, thangwe iwo ambacitisa kuti bzinthu bzifambe bwino mu dzikoli. Ndipo nthawe zinango iwo ambathandiza atumiki wa Yahova. (Apokalipse 12:16) Ndipopa ifepano timbauzidwa kuti tin’funika kumbapagali mitsonkho, kumbawagopa na kumbawalemekeza, thangwe iwo ambafuna bzimwebzi. (Aroma 13:7) Tsono, tin’funikambo kukumbukira kuti akulu-akulu wa boma amwewa ana mphanvu thangwe rakuti Yahova walekerera kuti iwo akhale nazo mphanvuzo. Jezu adabvekesa nfundo imweyi pomwe akhabvunzidwa na mtongi waciroma wakucemeredwa Ponsiyo Pirato. Pa nthawe imweyire, Pilato akhalewa kuti ana mphanvu yakutsudzula Jezu ayai yakutonga kuti iye aphedwe. Tsono Jezu adamuuza kuti: “Imwepo mungadakhala lini na mphanvu iri-yentse pa inepano, bzingadakhala kuti mulibe kupasidwa kucokera kudzulu.” (Juwau 19:11) Mpsibodzi-bodzimbo na ntsiku zino. Mphanvu zomwe akulu-akulu wa boma anazo zina malire, ninga momwe zikhalirimbo mphanvu za Pirato.
7. Thangwe ranyi nthawe zinango timbabvera lini akulu-akulu wa boma, ndipo n’ciyani comwe iwo an’funika kudziwa?
7 Akristaufe timbabvera akulu-akulu wa boma akatiuza kuti ticite cinthu comwe cimbapitana lini na malamulo ya Mulungu. Tsono timbawabvera lini akafuna kuti ticite cinthu comwe Mulungu ambaletsa ayai akutiletsa kucita cinthu comwe Mulungu akufuna. Tiyezezere tenepa: Pinango iwo angafune kuti alumbwana ayende ku nkhondo.b Ayai angatiletse kuphatisa basa Bibliya, mabukhu yathu, kupalizira na kutsonkhana pabodzi. Bzimwebzi bzikacitika, ifepano tin’dzawabvera lini. Tin’funikambo kukumbukira kuti akulu-akulu wa boma an’dzatawira okha kwa Mulungu akakhala akuphatisa basa kuipa mphanvu zawo mwa kutizunza. Iwo an’funika kudziwa kuti Mulungu akuwona bzentse! — Mpalizi 5:8.
8. Kodi pana kusiyana kuponi pakati pa “atongi wa dzikoli” na Mulungu omwe ni “Mkululetu,” ndipo thangwe ranyi nkhani imweyi njakufunika?
8 Akulu-akulu wa boma ayai kuti “atongi” angakhale nazo mphanvu zakutonga, kucita bzinthu bzabwino na kutsogolera wanthu. Tsono bzimwebzi bzin’funa lini kulewa kuti iwo ambacita bzinthu bzentse bwino-bwino ndipo ana mphanvu zentse. Thangwe alipo Omwe ngwakulungama pa bzinthu bzentse ndipo ana mphanvu kuposa wanthu wentse. Bibliya limbalewa kuti munthu umweyu ni Yahova. Ndipo iro limbalewa kanai-kentse kuti iye ni “Mulungu Mkululetu.” — Daniyeli 7:18, 22, 25, 27.
“MKULULETU”
9. Kodi n’ciyani comwe mpolofeta Daniyeli adawona m’masomphenya?
9 Mpolofeta Daniyeli adawona m’masomphenya kuti Yahova ni Mulungu Mkululetu kuposa atongi wentse wa maboma ya wanthu. Pakuyamba, Daniyeli adawona bzirombo bzinai bzomwe ni mautongi manai yamphanvu pa dziko lentse. Mautongi yamweya ni Babiloniya, Mediya na Perisi, Gresiya, Roma na utongi bwa ntsiku zino bwa Anglo-Americana. (Daniyeli 7:1-3, 17) Ndipo Daniyeli adawona Yahova Mulungu adakhala pa mpando wa umambo mu nyumba ya mphala kudzulu. (Daniyeli 7:9, 10) Bzomwe mpolofeta wakukhulupirikayu adawona bzikucenjeza mautongi ya wanthu ntsiku zino.
10. Kodi Yahova adapereka utongi bwa maboma kwa yani, ndipo bzimwebzi bzikulatiza ciyani? (Daniyeli 7:13, 14, 27)
10 Werengani Daniyeli 7:13, 14, 27. Mulungu adatenga utongi bwa maboma ya pa dziko lentse la pantsi acibupereka kwa wanthu winango omwe adathemera kutonga. Kodi wanthu amwewa mbani? Iye adabupereka kwa ‘omwe akhawoneka ninga mwana wa munthu,’ omwe ni Jezu Kristu, na kwa “wakucena wa Mulungu Mkululetu,” omwe ni wa 144 000 omwe an’dzatonga “mpaka kale-kale.” (Daniyeli 7:18) Bzimwebzi bzikulatiza kuti Yahova ni “Mulungu Mkululetu,” thangwe ndiye yekha omwe ana mphanvu yakucita bzimwebzi.
11. Kodi n’ciyani cinango comwe cikulatiza kuti Yahova ana mphanvu yakutonga mitundu yentse ya wanthu?
11 Bzinthu bzomwe Daniyeli adawona m’masomphenya bzikundendemerana na bzinthu bzomwe iye akhadalewa kale. Daniyeli adalewa kuti: “Mulungu wa kudzulu ambacosa amambo m’mipando yawo aciikha winango.” Ndipo adanemba kuti: “Mulungu Mkululetu ni Mtongi wa umambo bwa wanthu ndipo ambabupereka kwa munthu omwe iye akufuna.” (Daniyeli 2:19-21; 4:17) Kodi pana nthawe yomwe Mulungu adacita kale bzimwebzi? Inde!
Yahova adacosa Belisazari pa mpando wa umambo ndipo adatenga umambobo acibupereka kwa Amediya na Aperisi (Onani ndime 12)
12. Kodi Yahova adacosa tani amambo m’mipando yawo m’mbuyomu? (Onani cithunzi-thunzi.)
12 Kuyambira kale-kale, Yahova akulatiza kuti ana mphanvu yakutonga maboma ya wanthu. Mbatiwoneni nkhani zitatu zomwe zikulatiza bzimwebzi. Farawo wa ku Edjipito akhaboneresa wanthu wa Yahova ndipo akhalamba kuwatsudzula. Tsono Mulungu adawatsudzula ku ukapolo ndipo adacitisa kuti Farawoyo afe mu Nyanza Ifuira. (Kufuluka 14:26-28; Salimo 136:15) Mambo Belisazari wa ku Babiloniya adayamba kubzilemekeza yekha sikuti “kulemekeza Mbuya wa kudzulu” ndipo iye “adatumbiza mirungu ya prata na oro” sikuti kutumbiza Yahova. (Daniyeli 5:22, 23) Tsono Mulungu adamunyazisa. Pa “usiku bumweboletu,” Belisazari adaphedwa ndipo umambo bwace budaperekedwa kwa Amediya na Aperisi. (Daniyeli 5:28, 30, 31) Mambo Herode Agripa Wakuyamba wa ku Palestina adapha mpostolo Tiyago ndipo adamanga mpostolo Pedru kuti adzamuphembo. Tsono Yahova adacitisa kuti bzomwe Herodeyo akhafuna bzireke kucitika. “Anjo wa Yahova adacitisa kuti iye aduwale,” ndipo adafa. — Mabasa 12:1-5, 21-23.
13. Kodi Yahova adathandiza tani Ajirayeri kukunda amambo azinji?
13 Yahova adalatiza pomwe mphanvu zace mwa kukunda amambo azinji omwe adabverana kuti acite nkhondo na Ajirayeri. Iye adamenyera nkhondo Ajirayeri ndipo adawathandiza kukunda amambo wakukwana 31 wa ku Kanani na kukundambo mbali ikulu ya Dziko Lakupiciridwa. (Djoswe 11:4-6, 20; 12:1, 7, 24) Ndipo Yahova adathandizambo Ajirayeri kukunda nkhondo pomwe adamenyana na Mambo Beni-hadade wa ku Siriya pabodzi na amambo anzace 32. — 1 Wamambo 20:1, 26-29.
14-15. (a) Kodi Mambo Nabukadinazori na Dariyo adalewa ciyani pa nkhani ya utongi bwa Yahova? (b) Kodi nyakunemba Salimo adalewa ciyani pa nkhani ya Yahova na wanthu wace?
14 Kazinji-kentse, Yahova adalatiza kuti ni Mulungu Mkululetu! Mambo Nabukadinazori wa ku Babiloniya adabzikuza acibzilewa kuti akhana mphanvu na ulemerero. Tsono iye akhafunika kupereka ulemerero bwentse kwa Mulungu. Ndipopa Yahova adamulanga mwa kumukhalisa nyamsala. Pomwe Nabukadinazori adadzalimba, iye “adatumbiza Mulungu Mkululetu” ndipo adazindikira kuti “utongi bwa Yahova n’bwakusaya kumala.” Ndipo iye adalewa kuti: “Palibe munthu omwe angamuletse kucita bzomwe akufuna.” (Daniyeli 4:30, 33-35) Pomwe Daniyeli adayezedwa thangwe ra kukhala wakukhulupirika kwa Yahova, Yahovayo adamupulumusa kuti aleke kudyedwa na mphondolo. Ndipo pomwe Mambo Dariyo adawona bzimwebzi, iye adalewa kuti: “Wanthu ambatetemere thangwe ra kugopa Mulungu wa Daniyeli. Thangwe iye ni Mulungu wamoyo ndipo ambakhala kuyenda na kuyenda. Umambo bwace bun’dzapfudzidwa lini, ndipo utongi bwace n’bwakusaya kumala.” — Daniyeli 6:7-10, 19-22, 26, 27.
15 Nyakunemba Salimo adalewa kuti: “Yahova waviringidza bzomwe wanthu wa mitundu inango akhafuna kucita; ndipo wacitisa kuti nzeru za wanthu winango zireke kuphata basa.” Ndipo iye adalewa pomwe kuti: “Wakukondwa ni mtundu omwe Mulungu wawo ni Yahova; wanthu omwe Iye awasankhula kukhala utaka bwace.” (Salimo 33:10, 12) Mafala ya vesiri yakulatiza kuti ifepano tin’funika kupitiriza kukhala wakukhulupirika kwa Yahova!
NKHONDO YAKUMALIZIRA
Mbverano wa mitundu ya wanthu un’dzakwanisa lini kukunda anyankhondo wa kudzulu (Onani ndime 16-17)
16. Kodi n’ciyani comwe Yahova an’dzaticitira pa “citsautso cikulu,” ndipo thangwe ranyi tikukhulupira bzimwebzi? (Onani cithunzi-thunzi.)
16 Ifepano tawona bzomwe Yahova adacita m’mbuyomu. Tsono n’ciyani comwe iye an’dzacita kutsogoloku? Ifepano tikukhulupira na mtima wentse kuti Yahova an’dzapulumusa atumiki wace wakukhulupirika pa “citsautso cikulu” comwe cikubwera. (Mateu 24:21; Daniyeli 12:1) Iye an’dzacita bzimwebzi pomwe mbverano wa mitundu ya wanthu wakudziwika na dzina lakuti Gogi wa Magogi an’dzafuna kupha atumiki wakukhulupirika wa Yahova. Napo mbverano umweyu ucidzakhala na madziko yentse yakukwana 193, yomwe yambacita mbali ya bungwe la Nações Unidas, un’dzakwanisa lini kukunda Mulungu Mkululetu na acikunda wace wa kudzulu! Thangwe ranyi? Thangwe Yahova adalewa kale kuti: “Nin’dzabzilemekeza, nin’dzabzicenesa ndipo nin’dzacitisa kuti mitundu ya wanthu indidziwe ndipo iwo an’dzadziwa kuti ine ndine Yahova.” — Zakiyeri 38:14-16, 23; Salimo 46:10.
17. Kodi n’ciyani cin’dzacitikira amambo wa pa dziko la pantsi, ndipo n’ciyani cin’dzacitikirambo wanthu wakukhulupirika kwa Yahova?
17 Kupitira kwa Mulungu ndiko kun’dzacitisa kuti nkhondo ya Armagedo idzayambike. Ndipo pa nkhondo imweyi, Mulungu an’dzapfudza “amambo wa pa dziko lentse” la pantsi. (Apokalipse 16:14, 16; 19:19-21) Koma, “wanthu wakulungama okha ndiwo an’dzakhala pa dziko la pantsi. Ndipo omwe akupitiriza kukhala wakukhulupirika an’dzakhala m’mwemo.” — Mimwani 2:21.
TIN’FUNIKA KUPITIRIZA KUKHALA WAKUKHULUPIRIKA
18. Kodi n’ciyani comwe Akristau wacadidi azinji ali wakukonzeka kucita, ndipo n’thangwe ranyi? (Daniyeli 3:28)
18 Kuyambira kale-kale, Akristau wacadidi azinji ambaikha ufulu bwawo pabodzi na moyo wawo pa ngozi thangwe ra kufuna Yahova omwe ni Mtongi Mkululetu. Akristau amwewa ali ninga Ahebereu atatu omwe adapitiriza kukhala wakukhulupirika kwa Mulungu Mkululetu, omwe adawapulumusa mu forno ya moto. — Werengani Daniyeli 3:28.
19. Thangwe ranyi Yahova an’dzapulumusa wanthu wace, ndipo n’ciyani comwe ifepano tin’funika kucita?
19 Pa nkhani ya kufunika kwa kupitiriza kukhala wakukhulupirika kwa Mulungu, nyakunemba Salimo Davide adanemba kuti: “Yahova an’dzatonga wanthu. Nditongeni imwe Yahova, mwakubverana na kulungama kwangu ndipo nditongeni mwakubverana na kukhulupirika kwangu.” (Salimo 7:8) Davide adanemba pomwe kuti: “Kukhulupirika kwangu na kulungama kwangu bzindikhotcerere.” (Salimo 25:21) Cinthu cabwino comwe tingacite ni kupitiriza kukhala wakukhulupirika kwa Yahova, bzinese bzitani! Tikacita bzimwebzi, ifepano tin’dzalewa mafala ninga yomwe nyakunemba Salimo adalewa. Iye adati: “Wakupfatsa ni wale omwe mbakusaya kuphonya . . . , omwe ambateweza Malamulo ya Yahova.” — Salimo 119:1.
NYIMBO 122 Khalani Wakulimba na Wakukhazikika!
a Bibliya limbalimbikisa Akristau kuti ambabvere akulu-akulu wa boma. Tsono, maboma yanango yambaletsa atumiki wa Yahova kumutumikira. Kodi tingabvere tani akulu-akulu wa boma ndipo pa nthawe ibodzi-bodziyo ticipitiriza kukhala wakukhulupirika kwa Yahova?
b Onani nkhani yakuti “Thangwe Ranyi Ajirayeri Akhamenya Nkhondo, Koma Ifepano Timbamenya Lini?” yomwe iri mu revista ino.