Thangwe Ranyi Ajirayeri Akhamenya Nkhondo, Koma Ifepano Timbamenya Lini?
PA NTHAWE ya Nkhondo Yaciwiri ya pa Dziko Lentse, mkulu wa acikunda wa partido ya Nazi adauza Mboni za Yahova kuti: “Imwepo mukalamba kuyenda kukamenyana na acikunda wa ku França ayai wa ku Inglaterra, tin’kuphani mwentsenemwe!” Acikunda wa partido ya Nazi akhadaima pafupipo. Koma napo bzikhali tenepo, abale wathu alibe kubvuma kuyenda kukamenya nkhondo. Abalewa akhali wakukhwimika kwene-kwene. Bzomwe iwo adacitabzi bzikulatiza bzomwe Mboni za Yahovafe timbacita: Ifepano timbabvuma lini kuyenda ku nkhondo. Ndipo napo wanthu alewe kuti an’tipha, ifepano timbalamba basi kuthandizira nkhondo.
Tsono, wanthu winango omwe ambabziti mbakristau ambakhulupira lini bzimwebzi. Iwo ambakumbuka kuti Akristau an’funika kukhotcerera dziko lawo. Ndipo pinango iwo angabvunze kuti: ‘Ajirayeri, omwe akhali wanthu wa Mulungu, akhamenya nkhondo, tsono thangwe ranyi Akristau an’funika lini kucita bzimwebzi?’ Kodi imwepo mungatawire tani? Akakubvunzani tenepoyo, imwepo mun’funika kuwafotokozera kusiyana komwe kulipo pakati pa Ajirayeri na wanthu wa Mulungu ntsiku zino. Mbatiwoneni kusiyana kumweku.
1. WANTHU WA MULUNGU ALI PA DZIKO LENTSE LA PANTSI
Kale-kale, Yahova adasankhula Ajirayeri kuti akhale wanthu wace. Iye adacemera Ajirayeriwo kuti “cuma cangu cakupambulika pakati pa wanthu wentse.” (Kufuluka 19:5) Ndipo Mulungu adawapasa dziko kuti iwo akhale. Ndipopa pomwe Mulungu akhauza Ajirayeri kuti akamenye nkhondo na mitundu inango ya wanthu, iwo akhapha lini Ajirayeri anzawo, omwe akhanamata nawo pabodzi Yahova.a
Ntsiku zino, atumiki wa Yahova mbakucokera ku “mitundu yentse, madzinza yentse, mbumba zentse na bzirewedwe bzentse.” (Apokalipse 7:9) Ndipopa wanthu wa Mulungu akayenda ku nkhondo, iwo angakaphe abale wawo wacikristau.
2. YAHOVA AKHAUZA AJIRAYERI KUTI AMBAYENDE KU NKHONDO
Kale-kale, Yahova akhambauza Ajirayeri kuti ambayende ku nkhondo na thangwe lomwe akhayendera ku nkhondoko. Pa nthawe inango, Mulungu adauza Ajirayeri kuti akalange Akanani, omwe akhanamata madimonyo, akhambacita upombo bwakupasa manyazi na kupereka ntsembe wana. Yahova adauza Ajirayeri kuti akaphe wanthu wakuipawo mu dziko lomwe iye akhafuna kupasa Ajirayeriwo. (Mwambo 18:24, 25) Pomwe Ajirayeri adakhazikika mu Dziko Lakupiciridwa, nthawe zinango Mulungu akhawabvumiza kuyenda ku nkhondo kuti abzikhotcerere kwa anyamadulanthaka wawo. (2 Samuweri 5:17-25) Tsono, Yahova akhawabvumiza lini kuyenda ku nkhondo mwakusaya kuuzidwa. Ndipo akacita bzimwebzi, bzinthu bzikhawafambira kuipa. — Mirewengo 14:41-45; 2 Nkhani 35:20-24.
Ntsiku zino, Yahova ambauza lini wanthu kuti amenye nkhondo. Ndipo ntsiku zino, wanthu ambamenyanirana nkhani zawo, sikuti bzomwe Mulungu akufuna. Iwo angayende ku nkhondo kuti atenge dziko la anzawo, akhale na kobiri zizinji ayai kuti angingimize wanthu kucita bzomwe iwo akufuna. Tsono kodi Mulungu ambakomedwa na wanthu omwe ambayenda ku nkhondo kuti akhotcerere gereja yawo ayai kuti akaphe anyamadulanthaka wa Mulunguyo? Mtawiro ngwakuti, ne. Ifepano tikudziwa kuti Yahova an’dzakhotcerera atumiki wace na kupha anyamadulanthaka wawo pa nkhondo ya Armagedo. (Apokalipse 16:14, 16) Pa nthawe imweyi, omwe an’dzamenya nkhondoyo ni acikunda wa Yahova wa kudzulu sikuti atumiki wace wa pa dziko la pantsi. — Apokalipse 19:11-15.
3. AJIRAYERI AKHAPHA LINI WANTHU OMWE AKHAKHULUPIRA YAHOVA
Kodi Mulungu ambathandiza dziko likakhala likumenya nkhondo ninga momwe adacitira na Ajirayeri mu mzinda wa Jeriko?
Kale-kale, acikunda wa Ajirayeri akhabvera ntsisi wanthu omwe akhakhulupira Mulungu ndipo akhapha wanthu omwe Yahova akhalewa kuti akhafunika kuphedwa. Onani nkhani ziwiri zomwe zikulatiza bzimwebzi. Pa nthawe yomwe Yahova adauza Ajirayeri kuti apfudze mzinda wa Jeriko, iwo alibe kupha Rahabi na famidya yace thangwe rakuti iwo adakhulupira Yahova. (Djoswe 2:9-16; 6:16, 17) Ndipo pomwe padapita nthawe pang’ono, wanthu wentse wa mu mzinda wa Gibeyoni adakhulupirambo Yahova, ndipo iye adawapulumusa. — Djoswe 9:3-9, 17-19.
Ntsiku zino, acikunda ambapha wanthu omwe ana cikhulupiro. Ndipo, nthawe zinango, iwo ambaphambo wanthu omwe ni acikunda lini.
4. AJIRAYERI AKHATEWEZA MALAMULO YA NKHONDO YOMWE YAHOVA AKHAWAPASA
Kale-kale, Yahova akhafuna kuti Ajirayeri ambateweze malamulo yace akayenda ku nkhondo. Pa nthawe inango, iye adawauza kuti akafuna kumenya nkhondo na mzinda wa anyamadulanthaka wawo ‘ayambe kuwadziwisa mafala ya mtendere.’ (Bzakutonga 20:10) Ndipo Yahova akhafuna kuti acikunda wa Ajirayeri, msasa wawo na bzinthu bzentse bzomwe akhanabzo bzikhale bzakucena. (Bzakutonga 23:9-14) Pa nthawe imweyire, wanthu wa mitundu inango akhambapswitha akazi wa madziko yomwe akhayakunda, tsono Yahova adaletsa Ajirayeri kumbacita bzimwebzi. Ndipo adawauza kuti akafuna kulowola akazi wa mizinda yomwe akundayo, iwo akhafunika kudikhirira mwezi m’bodzi kucokera pomwe nkhondoyo yacitika. — Bzakutonga 21:10-13.
Ntsiku zino, madziko mazinji yambakhazikisa malamulo ya nkhondo. Malamulo yamweya yambakonzedwa kuti yakhotcerere wanthu omwe ni acikunda lini. Napo bziri tenepo, kawiri-kawiri acikunda ambateweza lini malamuloya.
5. MULUNGU AKHATHANDIZA WANTHU WACE PA NKHONDO
Kodi acikunda omwe ambamenya nkhondo ambasiya wanthu wakukhulupirika kwa Yahova ninga momwe Ajirayeri adacitira na Rahabi na famidya yace pomwe adapfudza mzinda wa Jeriko?
Kale-kale, Yahova akhamenyera nkhondo Ajirayeri. Ndipo nthawe zinango, iye akhawathandiza kukunda anyamadulanthaka wawo mwakudabwisa. Kodi mukukumbukira kuti Yahova adathandiza tani Ajirayeri kukunda mzinda wa Jeriko? Yahova adauza Ajirayeriwo kuti ikakwana nthawe akuwe. Ndipo pomwe Ajirayeriwo “adakuwa na mafala ya nkhondo, mpanda wentse wa mzindayo udagwa,” ndipo bzidakhala bzakupusa kuna Ajirayeri kukunda mzindayo. (Djoswe 6:20) Ndipo kodi mukukumbukirambo kuti iye adathandiza tani Ajirayeri kukunda Aamori? “Yahova adawabvumbisira matalala makulu-makulu yakucokera kudzulu. . . Ndipo wanthu azinji adafa na matalalayo kuposa omwe Ajirayeri adapha na xipada.” — Djoswe 10:6-11.
Ntsiku zino, Yahova ambamenyera lini pomwe nkhondo wanthu. Umambo bwace na Jezu Kristu, omwe ni Mambo wa Umambobu, “[ambacita] lini mbali ya dzikoli.” (Juwau 18:36) Sathani ndiye akutsogolera maboma yentse ya wanthu. Ndipo nkhondo zomwe zikucitikazi zikulatiza mtima wafuluju omwe iye anawo. — Luka 4:5, 6; 1 Juwau 5:19.
AKRISTAU AMBAKHALA MWA MTENDERE NA ANZAWO
Tawona kuti pana kusiyana kukulu pakati pa ifepano na Ajirayeri. Tsono, pana bzinthu bzinango pomwe bzomwe bzimbaticitisa kuleka kuyenda ku nkhondo. Mulungu adaleweratu kuti mu ntsiku zakumalizira, wanthu wace “angadadzapfunza lini pomwe kumenya nkhondo,” ne kuyenda ku nkhondoko. (Zaiya 2:2-4) Ndipo cinthu cinango n’cakuti, Kristu adalewa kuti anyakupfunza wace “[ambacita] lini mbali ya dzikoli”; iwo angadapitira lini nkhani za kunesana za m’dzikoli. — Juwau 15:19.
Kristu adauza ateweri wace kuti aleke pomwe kumbacita bzinthu bzinango. Iye adawauza kuti atcenkhe nzeru zomwe zingawacitise kuti ambakoyere anzawo cakumtima, kukalipa na kucita nkhondo. (Mateu 5:21, 22) Ndipo iye adauzambo ateweri wace kuti ‘ambalinge mtendere’ nakuti ambafune anyamadulanthaka wawo. — Mateu 5:9, 44.
Kodi ifepano tingacite tani bzimwebzi? Mpsakudziwikiratu kuti ifepano tingamenye lini nkhondo. Tsono kodi mu gwere mwathu muna munthu omwe timbamuwona ninga nyamadulanthaka wathu? Penu bziri tenepo, bwerani ticite nyongo yakucosa kamtima ka kuwenga anzathu ndipo bwerani timbabverane nawo. — Tiyago 4:1, 11.
Ifepano timbayenda lini ku nkhondo. Koma timbacita nyongo kuti tikhale mwa mtendere na anzathu nakuti timbafunane. (Juwau 13:34, 35) Bwerani tentse tipitirize kuleka kupitira nkhani za ndale pomwe tikudikhirira na mtima wentse ntsiku yomwe Yahova an’dzamalisa nkhondo pa dziko la pantsi. — Salimo 46:9.
a Nthawe zinango, madzinza ya Jirayeri yakhambamenyana yokha-yokha. Tsono Yahova akhakomedwa lini na nkhondo zimwezi. (1 Wamambo 12:24) Koma, nthawe zinango, iye ndiye akhawauza kuti acite bzimwebzi, bzikakhala kuti madzinza yanangoyo yamuphindukira ayai yacita cinthu cakuipa kwene-kwene. — Wayeruzi 20:3-35; 2 Nkhani 13:3-18; 25:14-22; 28:1-8.