Pitirizani Kulimbisa Cidikhiro Canu

1. Kodi Yahova adatipasa cidikhiro ciponi?

YAHOVA adatipasa cidikhiro cabwino kwene-kwene cakuti tidzakhale na moyo wakusaya kumala. Wanthu winango akudikhirira kukakhala na moyo wakusaya kumala kudzulu, komwe an’kapasidwa thupi lauzimu lomwe lingafe lini. (1 Akolinto 15:50, 53) Ndipo wanthu azinji akudikhirira kudzakhala na moyo wakusaya kumala pantsi pano. Iwo an’dzakhala na moyo wabwino kwene-kwene na wakusaya mabvuto. (Apokalipse 21:3, 4) Penu cidikhiro cathu n’cakudzakhala na moyo kudzulu ayai pa dziko la pantsi pano, tentsenefe tina cidikhiro cabwino kwene-kwene.

2. N’ciyani cimbaticitisa kukhala na cidikhiro, ndipo thangwe ranyi tikulewa tenepoyo?

² Fala lakuti “cidikhiro” lomwe limbaphatisidwa basa m’Bibliya limbathandauza “kudikhira kuti bzinthu bzabwino bzin’dzacitika.” Ifepano tikudikhirira kuti bzinthu bzabwino bzin’dzacitika thangwe rakuti Yahova ndiye adalewa. (Aroma 15:13) Ifepano tikudziwa bzomwe Yahova adalewa ndipo tikudziwambo kuti ambanama lini. (Mirewengo 23:19) Timbakhulupira kuti Yahova akufuna ndipo ana mphanvu ya kucita bzentse bzomwe adalewa. Ifepano tikudikhirira lini bzimwebzi thangwe rakuti tikundobzifuna kuti bzicitike, koma tina umboni bwakuti bzin’dzacitikadi.

3. Kodi tin’pfunza ciyani mu nkhani ino? (Salimo 27:14)

³ Baba wathu wa kudzulu ambatifuna kwene-kwene ndipo an’funa kuti timbamukhulupire. (Werengani Salimo 27:14.) Cidikhiro cathu kwa Yahova cikakhala cakulimba tin’dzakwanisa kupirira pomwe tikugumana na mabvuto ndipo tin’dzakhala wakukhwimika na wakukondwa, napo tikadzagumana na mabvuto kutsogolo. Mbatiwoneni kuti cidikhiro cathu cingatikhotcerere tani. Cakuyamba, tiniwona kuti cidikhiro cidakhala tani ninga ndangula na kapaseti. Ndipo tikamala, tiniwona bzomwe tingacite kuti tilimbise cidikhiro cathuco.

CIDIKHIRO CATHU CIRI NINGA NDANGULA

4. Kodi cidikhiro cidakhala tani ninga ndangula? (Ahebereu 6:19)

⁴ Mu tsamba lomwe mpostolo Paulo adanembera Ahebereu, iye adandendemezera cidikhiro na ndangula. (Werengani Ahebereu 6:19.) Paulo akhambacita ulendo bwa m’madzi. Ndipopa iye akhadziwa kuti ndangula zikhambaphatisidwa basa pakufuna kuimisa xitima pakati pa madzi. Ntsiku ibodzi, conzi cidawaphata pakati pa madzi. Pa nthawe imweyi, iye adawona amalinyero akuthusa ndangula m’madzi kuti xitimayo ire kukagudza minyala. (Mabasa 27:29, 39-41) Cidikhiro cathu ciri ninga ndangula, thangwe cimbatithandiza kupitiriza kutumikira Yahova tikagumana na mabvuto yomwe yali ninga conzi camphanvu. Ndipo cimbatithandizambo kukhala wakuderekha ticimbakhulupira kuti bzinthu bzin’khala bwino. Kumbukirani kuti Jezu adalewa kale kuti tin’dzazunzidwa. (Juwau 15:20) Ndipopa kukumbukira bzinthu bzabwino bzomwe Yahova an’dzaticitira kutsogolo kun’dzatithandiza kupitiriza kumutumikira.

5. Kodi cidikhiro cidathandiza tani Jezu pomwe akhadasala pang’ono kuphedwa?

⁵ Cidikhiro cidathandiza Jezu kupitiriza kukhala wakukhulupirika, napo akhadziwa kuti angadaboneresedwa na kuphedwa. Pa ntsiku ya Pentekosite ya 33 E.C., mpostolo Pedru adalewa mafala ya m’bukhu la Salimo pakufotokoza bzomwe bzidathandiza Jezu kupitiriza kukhala wakuderekha. Mafalaya yambati: “Inepano ndidakhala na cidikhiro; thangwe imwe mun’dzandisiya lini m’Thenje, ndipo mun’dzabvuma lini kuti thupi la munthu wanu wakukhulupirika libvunde. . . . Mun’dzadzaza mtima wangu na cikondweso pamaso panu.” (Mabasa 2:25-28; Salimo 16:8-11) Napo kuti Jezu akhadziwa kuti angadafa, iye akhadikhirira kuti Mulungu angadamulamusa ndipo angadabwerera kuna Baba wace wa kudzulu.  —  Ahebereu 12:2, 3.

6. Kodi m’bale Leonard adalewa ciyani pa nkhani ya cidikhiro?

⁶ Cidikhiro cikuthandiza abale na mpfumakazi zathu kupirira. Onani bzomwe bzidacitikira m’bale munango wa ku Inglaterra wakucemeredwa Leonard Chinn. Pa nthawe ya Nkhondo Yakuyamba ya pa Dziko Lentse, iye adamangidwa aciikhidwa m’kawoko thangwe ra kulamba kucita basa la ucikunda. Iye adamala minyezi miwiri ali yekha-yekha m’kawokomo ndipo pomwe adamucosa adayenda naye kukamuphatisa basa lakuwawa. M’baleyu adadzalewa kuti: “Bzomwe bzidandicitikirabzi bzidandithandiza kuwona kufunika kwa cidikhiro kuti tikwanise kupirira mabvuto. Bibliya limbalewa bza moyo wa Jezu, apostolo na apolofeta ndipo limbalewambo bzinthu bzabwino bzomwe bzin’dzacitika kutsogolo. Bzentsebzi bzimbatithandiza kudikhirira kuti bzinthu bzin’dzakhala bwino kutsogolo na kutipasambo mphanvu ya kupirira.” Cidikhiro cidakhala ninga ndangula kwa m’bale Leonard, ndipo cingakhalembo ninga ndangula kwa ifepano.

7. Thangwe ranyi cidikhiro cathu cimbalimba tikambagumana na mabvuto? (Aroma 5:3-5; Tiyago 1:12)

⁷ Cidikhiro cathu cimbalimba kwene-kwene tikapirira mabvuto, thangwe timbakwanisa kuwona kuti Yahova akutithandiza ndipo akukomedwa nafe. (Werengani Aroma 5:3-5; Tiyago 1:12.) Ndipopa cidikhiro cathu cimbakhala cakulimba kwene-kwene kuposa pomwe tidapfunza cadidi. Kumbukirani kuti Sathani akufuna kutiwofokesa, tsono na thandizo la Yahova ifepano tingakwanise kupirira mabvuto yali-yentse yomwe tingagumane nayo.

CIDIKHIRO CATHU CIRI NINGA KAPASETI

8. Kodi cidikhiro cidakhala tani ninga kapaseti? (1 Atesalonika 5:8)

⁸ Bibliya limbandendemezera pomwe cidikhiro na kapaseti. (Werengani 1 Atesalonika 5:8.) Mcikunda ambabvala kapaseti kuti akhotcerere msolo wace kuti uleke kupwetekedwa na anyamadulanthaka wace. Mpsibodzi-bodzimbo na ifepano. Pa nkhondo yathu yauzimu tin’funika kukhotcerera nzeru zathu kwa Sathani. Thangwe iye ambatibweresera bzinthu bzizinji kuti adzonge nzeru zathuzo. Tawona kuti kapaseti imbakhotcerera mcikunda. Ndipo cidikhiro cathu ciri ninga kapaseti imweyi, thangwe cimbakhotcerera nzeru zathu kuti tipitirize kukhala wakukhulupirika kwa Yahova.

9. Kodi wanthu omwe alibe cidikhiro ambacita ciyani?

⁹ Cidikhiro cathu cakudzakhala na moyo wakusaya kumala cimbatithandiza kucita bzinthu mwanzeru. Thangwe ranyi? Thangwe tikasaya kukhala na cidikhiro ticiyamba kukhala na nzeru ninga za wanthu wa m’dzikoli, tin’dzayebwa kuti kutsogoloku tin’dzakhala na moyo wakusaya kumala. Onani bzomwe bzidacitikira Akristau wa ku Kolinto. Iwo akhadayebwa cinthu cakufunika comwe Mulungu adalewa, cakuti anyakufa an’dzamuka. (1 Akolinto 15:12) Ndipopa Paulo adawauza kuti wanthu omwe akhalibe cidikhiro cimweci ambandocita bzinthu bzomwe akukomedwa nabzo pa nthaweyo basi. (1 Akolinto 15:32) Ntsiku zinombo wanthu omwe alibe cidikhiro kwa Mulungu ambandocita bzinthu bzomwe akukomedwa nabzo basi. Tsono ifepano timbakhulupira Mulungu. Cidikhiro cathu cimbakhala ninga kapaseti thangwe cimbatikhotcerera kuti tireke kukhala na nzeru zakuipa, zomwe zingaticitise kudzonga uxamwali bwathu na Yahova.  —  1 Akolinto 15:33, 34.

10. Kodi cidikhiro cingatithandize tani kucosa nzeru zakuipa?

¹⁰ Cidikhiro cathu cimbatithandizambo kutcenkha kukumbuka kuti tingakwanise lini kucita bzomwe Yahova ambakomedwa nabzo. Wanthu winango angakumbuke kuti: ‘Inepano nin’dzapulumuka lini thangwe ndine munthu wakuipa. Inepano ningakwanise lini kucita bzomwe Mulungu ambafuna.’ Kumbukirani kuti xamwali wakunama wa Djobi wakucemeredwa Elifazi adauza Djobiyo mafala ninga yamweya. Iye adati: “Kodi munthu wakucokera ku pfumbi angakhalembo wakucena?” Ndipo iye adalewa pomwe kuti: “Ona! Mulungu ambakhulupira lini anjo wace, ndipo napo kudzulu caikoku iye ambakuwona kuti kudapswipa basi.” (Djobi 15:14, 15) Mafala yamweya ngakunama. Ndipo kumbukirani kuti Sathani ambafuna kuti imwepo mumbakumbukembo tenepoyo. Thangwe ambadziwa kuti mukakhala na nzeru zimwezi mungasiye kukhala na cidikhiro. Ndipopa cosani nzeru zimwezi mu mtima mwanu ndipo khulupirani bzomwe Yahova adalewa. Khulupirani kuti Yahova akufuna kuti imwepo mudzakhale na moyo wakusaya kumala ndipo iye an’dzakuthandizani kukhala nawo.  —  1 Timotio 2:3, 4.

LIMBISANI CIDIKHIRO CANU

11. Thangwe ranyi tin’funika kupirira pomwe tikudikhirira nthawe yomwe Mulungu an’dzacita bzomwe adalewa?

¹¹ Mpsakunesa kupitiriza kukhala na cidikhiro cakulimba. Nthawe zinango, tingayambe kuwona ninga kuti Mulungu akucedwa kucita bzomwe adalewa. Tsono tin’funika kukumbukira kuti Yahova ambafa lini, ndipopa nthawe yomwe ifepano tingaiwone ninga ikulu kwene-kwene kwa Yahova ni kanthawe kakucepa. (2 Pedru 3:8, 9) Yahova an’dzacitadi bzentse bzomwe adalewa. Tsono pinango angacite lini bzimwebzo pa nthawe yomwe ifepano tikufuna. Kodi n’ciyani comwe cingatithandize kupirira pomwe tikudikhirira kuti nthaweyo ifike?  —  Tiyago 5:7, 8.

12. Thangwe ranyi cikhulupiro n’cakufunika kuti tikhale na cidikhiro? (Ahebereu 11:1, 6)

¹² Kuti tipitirize kukhala na cidikhiro cakulimba, tin’funika kukhala pa uxamwali bwakulimba na Yahova, thangwe ndiye omwe adalewa kuti an’dzaticitira bzinthu bzabwino kutsogolo. Kumbukirani kuti Bibliya limbalewa kuti cidikhiro tingakhale naco tikakhulupira kuti Yahova alipo ndipo “ambabaira wanthu omwe ambamulinga na mtima wentse.” (Werengani Ahebereu 11:1, 6.) Ifepano tikakhulupira na mtima wentse kuti Yahova alipo, tin’dzakhulupirambo kuti iye an’dzacita bzomwe adalewa. Mbatiwoneni bzomwe tingacite kuti tilimbise uxamwali bwathu na Yahova.

13. Kodi tingacite tani kuti tikhale pa uxamwali na Mulungu?

¹³ Mbapembani kwa Yahova na kuwerenga Fala lace. N’cadidi kuti tingakwanise lini kumuwona Yahova koma tingakhale naye pa uxamwali. Tingacite tani bzimwebzi? Tingacite bzimwebzi mwa kumbalewalewa naye mu mpembo na cikhulupiro cakuti iye an’titetekera. (Jeremiya 29:11, 12) Ndipo Yahova angambalewelewembo nafe. Kuti bzimwebzi bzikwanisike, tin’funika kumbawerenga Fala lace na kumbakumbukira mwakamderekho bzomwe tawerengabzo. Tikambawerenga bzomwe Yahova adacita kuti athandize wanthu wakukhulupirika wakale-kale, cidikhiro cathu cin’dzakhala camphanvu kwene-kwene. Tin’funika kukumbukira kuti bzinthu bzentse bzomwe bziri m’Fala la Mulungu “bzidanembedwa kuti bzitipfunzise, ndipo tina cidikhiro thangwe ra kupirira kwathu na cilimbiso cakucokera m’Bzinembo.”  —  Aroma 15:4.

14. Thangwe ranyi tin’funika kumbakumbukira bzomwe Yahova adacitira atumiki wace?

¹⁴ Kumbukirani kuti Yahova ambacita bzomwe ambalewa. Onani bzomwe bzidacitikira Abalahamu na Sara. Iwo adapfitsa msinkhu omwe bzingadakwanisika lini kubereka mwana. Koma Mulungu adawauza kuti iwo angadakhala na mwana. (Ciyambo 18:10) Kodi n’ciyani comwe Abalahamu adacita? Bibliya limbati: “Iye [adakhala na] cikhulupiro cakuti angadakhala pai wa wanthu wa mitundu izinji.” (Aroma 4:18) Abalahamu akhadziwa lini kuti Mulungu angadacita tani kuti bzimwebzi bzikwanisike. Napo bzikhali tenepo, iye akhakhulupira kuti Mulungu angadamupasa mwana. Ndipo bzimwebzi bzidacitikadi. (Aroma 4:19-21) Nkhani ninga zimwezi zikutipfunzisa kuti nthawe zentse timbakhulupire kuti Yahova ambacita bzomwe ambalewa, napo pa nthawe yomwe wanthufe tingawone ninga kuti bzingakwanisike lini.

15. Thangwe ranyi tin’funika kumbakumbukira bzomwe Yahova adaticitira kale?

¹⁵ Kumbukirani bzomwe Yahova ambakucitirani. Kumbukirani phindu lomwe mwakhala nalo thangwe ra kukwanisika kwa bzomwe Bibliya limbalewa. Jezu adalewa kuti Baba wace angadadzakupasani bzinthu bzakufunikira. (Mateu 6:32, 33) Ndipo iye adalewa pomwe kuti Yahova an’dzakupasani mzimu wace wakucena mukaukumbira. (Luka 11:13) Yahova ambacitadi bzimwebzi. Ndipo mungakumbukirembo bzinthu bzomwe ambakucitirani. Pinango mungakumbukire kuti iye adalewa kuti an’dzakulekererani pikado zanu, an’dzakutsangalazani na kukupasani bzinthu bzakufunikira kuti mupitirize kukhala pa uxamwali bwakulimba na iye. (Mateu 6:14; 24:45; 2 Akolinto 1:3) Mukambakumbukira bzomwe Mulungu adakucitirani kale, mun’dzakhulupirambo kuti bzomwe adalewa bzin’dzacitikadi.

KONDWANI NA CIDIKHIRO CANU

16. Thangwe ranyi tingalewe kuti cidikhiro ni mphaso?

¹⁶ Cidikhiro cakudzakhala na moyo wakusaya kumala ni mphaso yakucokera kwa Mulungu. Ifepano tikudikhirira nthawe yomwe bzimwebzi bzin’dzacitika ndipo tikudziwa kuti bzin’dzacitikadi. Cidikhiro cimweci ciri ninga ndangula thangwe cimbatithandiza kupirira mabvuto, kukhala wakukhulupirika pomwe tikuzunzidwa na kulimbika napo wanthu acifuna kutipha. Ndipo cidikhiroci cirimbo ninga kapaseti thangwe cimbatithandiza kutcenkha nzeru zakuipa kuti ticite bzinthu bzabwino. Cidikhiro cathuci cimbatithandiza kumudziwa bwino Mulungu ndipo cimbatithandizambo kudziwa kuti iye ambatifuna kwene-kwene. Ndipopa tingalewe kuti timbagumana phindu tikalimbisa cidikhiro cathu.

17. Thangwe ranyi tin’funika kukomedwa na cidikhiro cathu?

¹⁷ Mpostolo Paulo adanembera Akristau wa ku Roma kuti: “Kondwani na cidikhiro canu.” (Aroma 12:12) Paulo akhakomedwa kwene-kwene thangwe akhadziwa kuti akapitiriza kukhala wakukhulupirika, iye angadzakhala na moyo wakusaya kumala kudzulu. Ifepano tin’funikambo kukomedwa na cidikhiro cathu thangwe tikudziwa kuti Yahova an’dzacitadi bzomwe adalewa. Nyakunemba Salimo adalewa kuti: “An’kondwa ni ule . . . omwe ambadikhirira Yahova Mulungu wace, . . . Omwe ambapitiriza kukhala wakukhulupirika nthawe zentse.”  —  Salimo 146:5, 6.