Nzeru Yacadidi Ikukuwa

1. Kodi wanthu azinji ambacita ciyani akabva nzeru zakucokera m’Bibliya? (Mimwani 1:20, 21)

M’MADZIKO mazinji, ifepano timbawona abale na mpfumakazi zathu akupalizira m’mbuto zakugumanika wanthu azinji. Iwo ambakomedwa kupasa wanthu mabukhu yathu. Kodi imwepo mudacitambo kale basa limweri? Penu mudacita kale, pinango mwakumbukira mafala yomwe yali pa cinembo ca Mimwani, comwe cikutsogolera nkhani ino. Mafalayo yambalewa kuti: “Nzeru yacadidi . . . imbakuwa . . . m’mbuto zakugumanika wanthu,” kuti wanthuwo atetekere. (Werengani Mimwani 1:20, 21.) Mu Bibliya na m’mabukhu yathu muna “nzeru yacadidi,” yomwe ni nzeru ya Yahova. Nzeru imweyi njakufunika kwene-kwene kuna wanthu kuti iwo adzakwanise kutambira moyo wakusaya kumala. Ndipo ifepano timbakomedwa munthu akabvuma kutambira mabukhu yathu. Tsono ni wanthu lini wentse omwe ambacita bzimwebzi. Wanthu winango ambafuna lini kudziwa bzomwe Bibliya limbalewa. Pomwe wanthu winango ambatiseka. Iwo ambakumbuka kuti nzeru za m’Bibliya zimbaphata lini basa ntsiku zino. Ndipo wanthu winango ambakomedwa lini na bzomwe Bibliya limbapfunzisa. Iwo ambalewa kuti wanthu omwe ambateweza mitemo ya m’Bibliya adanesa ayai ambafuna kubziwonesa ninga wanthu wabwino kwene-kwene. Napo bziri tenepoyo, Yahova akupitiriza kupereka nzeru yacadidi kuna wanthu wentse. Kodi iye akucita tani bzimwebzi?

2. Kodi n’kuponi komwe tingagumane nzeru yacadidi ntsiku zino, tsono n’ciyani comwe wanthu azinji ambacita?

² Cinthu cibodzi comwe Yahova ambacita kuti atipase nzeru ni kuphatisa basa Fala lace, Bibliya. Munthu ali-wentse akafuna angakhale nalo bukhu limweri. Tsono tanimbo pakulewa bza mabukhu yathu manango? Mabukhu yathu yakugumanika mu bzirewedwe bzakupitirira 1000. Ndipo bzimwebzi bzikukwanisika thangwe Yahova akutithandiza. Wanthu omwe ambawerenga mabukhuya na kuphatisa basa bzomwe awerengabzo, bzinthu bzimbawafambira bwino. Tsono wanthu azinji ambafuna lini kuphatisa basa nzeru yacadidi. Akafuna kucita cinthu, iwo ambathemba nzeru zawo ayai ambatewezera anzawo. Ndipo nthawe zinango iwo angatinyoze thangwe rakuti timbateweza bzomwe Bibliya limbalewa. Nkhani ino in’tithandiza kudziwa kuti thangwe ranyi wanthu ambacita bzimwebzi. Tsono pakali pano, mbatiwoneni bzomwe tingacite kuti tikhale na nzeru zakucokera kwa Yahova.

KUDZIWA YAHOVA KUMBATICITISA KUKHALA NA NZERU

3. N’ciyani comwe tin’funika kucita kuti tikhale na nzeru yacadidi?

³ Nzeru ni luso lomwe munthu analo lakuphatisa basa bzomwe akudziwa kuti acite bzinthu bzabwino. Tsono, nzeru yacadidi imbathandauza bzinthu bzizinji kuposa bzimwebzi. Bibliya limbalewa kuti: “Kugopa Yahova ndico ciyambi ca nzeru, ndipo kudziwa Mulungu Wakucena Kwene-kwene ndiko kubvesesa bzinthu.” (Mimwani 9:10) Ndipopa tikafuna kucita cinthu cikulu pa moyo wathu, tin’funika kumbakumbukira bzomwe Yahova, omwe ni “Mulungu Wakucena Kwene-kwene,” akufuna kuti ticite. Tingacite bzimwebzi mwakuyamba kuwona bzomwe Bibliya limbalewa pa nkhaniyo na bzomwe mabukhu yathu yambapfunzisa. Tikambacita bzimwebzi, ifepano tin’dzalatiza kuti tina nzeru yacadidi.  —  Mimwani 2:5-7.

4. Thangwe ranyi tingalewe kuti ni Yahova yekha omwe angatipase nzeru yacadidi?

⁴ Ni Yahova yekha omwe angatipase nzeru yacadidi. (Aroma 16:27) Thangwe ranyi tikulewa tenepoyo? Thangwe lakutoma ndakuti, iye ni Mulengi, ndipo ambadziwa bwino cirengedwe cace. (Salimo 104:24) Laciwiri ndakuti, bzentse bzomwe Yahova ambacita bzimbalatiza kuti iye ana nzeru kwene-kwene. (Aroma 11:33) Lacitatu ndakuti, malango yentse yomwe Yahova ambapereka yambathandiza wanthu wentse omwe ambayaphatisa basa. (Mimwani 2:10-12) Ndipopa, penu tikufuna kukhala na nzeru yacadidi, tin’funika kubvuma kuti Yahova ndiye yekha omwe angatipase malango. Ndipo tin’funikambo kumbathemba nzeru zace tikafuna kucita cinthu.

5. Kodi n’ciyani cikucitikira wanthu thangwe ra kulamba kuphatisa basa nzeru yakucokera kwa Yahova?

⁵ Wanthu azinji m’dzikoli ambadabwa na momwe cirengedweci cidakonzedwera. Tsono, iwo ambakhulupira lini kuti alipo Mulengi ndipo ambalewa kuti bzinthu bzentsebzi bzidacita kusanduka kucokera ku bzinthu bzinango. Ndipo wanthu winango omwe ambalewa kuti ambakhulupira Mulungu ambakumbuka kuti mitemo ya m’Bibliya njakale-kale kwene-kwene ndipo ingaphate lini basa ntsiku zino. Ndipopa iwo ambaphatisa basa nzeru zawo akafuna kucita cinthu. Kodi bzimwebzi bzikucitisa kuti bzinthu bzifambe tani m’dzikoli? Kodi bzikufamba bwino? Kodi wanthu akukwanisadi kukhala na mpfatso caiwo ayai cidikhiro cabwino ca kutsogolo? Ne. Bzomwe tikuwona m’dzikoli bzikutitsimikizira nfundo yakuti: “Palibe nzeru, ne kuzindikira, ne malango yali-yentse yakutsutsana na Yahova.” (Mimwani 21:30) Bzomwe vesiri lalewa bzikutilimbikisa kuti tikumbire Yahova nzeru yacadidi! Tsono, bzakupasa ntsisi mpsakuti wanthu azinji akucita lini bzimwebzi. Thangwe ranyi?

THANGWE RANYI WANTHU AMBALAMBA NZERU YACADIDI?

6. Kodi mbani omwe ambakhala ninga ankhuthu nzeru yacadidi ikakhala ikukuwa mu msewu? (Mimwani 1:22-25)

⁶ Wanthu azinji ambakhala ninga ankhuthu akabva “nzeru ikukuwa mu msewu.” Bibliya limbalewa kuti pana magrupo matatu ya wanthu omwe ambalamba nzeru yacadidi. Pana “wanthu wakusaya kudziwa bzinthu,” “wanthu wakunyoza,” na “wanthu wakupusa.” (Werengani Mimwani 1:22-25.) Mbatiwoneni kuti thangwe ranyi wanthu amwewa ambalamba nzeru za Mulungu na kuwonambo bzomwe tingacite kuti tileke kukhala ninga iwo.

7. Thangwe ranyi wanthu winango ambapitiriza kukhala “wakusaya kudziwa bzinthu”?

⁷ “Wanthu wakusaya kudziwa bzinthu” mbale omwe ambandokhulupira bzinthu bzentse bzomwe ambabva, ndipo ambakhala lini na nthawe kuti akumbuke. (Mimwani 14:15) Nthawe zinango ifepano timbagumana na wanthu amwewa mu utumiki. Iwo ambanamizidwa na atsogoleri wa magereja ayai atsogoleri wa ndale. Winango bzimbawawa akazindikira kuti akunamizidwa. Tsono wanthu omwe ambafotokozedwa pa Mimwani 1:22 ambabvuma basi kupitiriza kunamizidwako. (Jeremiya 5:31) Iwo ambacita bzimwebzi thangwe rakuti ambakomedwa kucita bzomwe akufuna ndipo ambafuna lini kudziwa bzomwe Bibliya limbalewa ayai kuteweza mitemo yace. Wanthu azinji m’dzikoli ali ninga mkazi m’bodzi wa ku Quebec, mu dziko la Canadá, omwe adauza Mboni za Yahova zomwe zidayenda ku mui kwace kuti: “Penu abusa wathu ambatinamiza, kuphonya n’kwawo, ifepano tiribe nabzo basa!” Ifepano tin’funa lini kukhala ninga mkazi umweyu!  —  Mimwani 1:32; 27:12.

8. N’ciyani cingatithandize kudziwa bzinthu bzizinji?

⁸ Ndipopa Bibliya limbatiuza kuti tin’funika lini kukhala wanthu wakusaya kudziwa bzinthu, koma tikhale “akulu pakubvesesa [kwathu] bzinthu.” (1 Akolinto 14:20) Ifepano timbabvesesa bzinthu bzizinji tikambaphatisa basa nfundo za m’Bibliya pa moyo wathu. Pomwe ntsiku zikupita, ifepano tin’dzawona kuti nfundo zimwezi zikutithandiza kutcenkha mabvuto mazinji ndipo tikucita bzinthu mwanzeru. Mpsabwinombo kuwona bzinthu bzabwino bzomwe tacita kale. Penu ifepano tidayamba kale-kale kupfunza Bibliya na kuyenda ku mitsonkhano, tingabzibvunze kuti: ‘N’ciyani cikunditazisa kubzipereka kwa Yahova na kubatizidwa?’ Ndipo penu tidabatizidwa kale, kodi tikupitiriza kuyenda patsogolo na kuthimizira luso lathu lakupalizira na kupfunzisa mafala Mulungu? Kodi bzomwe ifepano timbacita bzimbalatiza kuti timbatsogoleredwa na nfundo za m’Bibliya? Kodi timbalatiza kuti tina makhalidwe yacikristau tikakhala tikucita bzinthu na anzathu? Tikawona kuti pana bzinthu bzomwe tin’funika kucinja, tin’funika kukumbukira malango ya Yahova yomwe ‘yambapasa nzeru wanthu wakusaya kudziwa bzinthu.’  —  Salimo 19:7.

9. Kodi “wanthu wakunyoza” ambalatiza tani kuti akulamba nzeru yacadidi?

⁹ Grupo laciwiri la wanthu omwe ambalamba nzeru za Mulungu ni “wanthu wakunyoza.” Nthawe zinango, ifepano timbagumana nawo wanthu amwewa tikakhala tikupalizira. Iwo ambatiseka. (Salimo 123:4) Bzimwebzi bzimbatidabwisa lini, thangwe Bibliya likhadalewa kale kuti mu ntsiku zakumalizira kungadadzawoneka wanthu azinji wakunyoza. (2 Pedru 3:3, 4) Wanthu winango ntsiku zino adakhala ninga azikuwasa wa Loti. Iwo ambabva lini. (Ciyambo 19:14) Wanthu azinji ambaseka wanthu omwe ambateweza nfundo za m’Bibliya. Comwe cimbacitisa kuti wanthu akhale wakunyoza n’cakuti, iwo ambacita “bzakufuna bzawo bzakulatiza kusaya kugopa Mulungu.” (Djuda 7, 17, 18) Bzimwebzi mpsomwe wanthu omwe ambalamba Yahova ambacita ntsiku zino!

10. Kodi tingacite ciyani kuti titcenkhe kukhala anyakunyoza? (Salimo 1:1)

¹⁰ Kodi n’ciyani cingatithandize kuti tileke kutewezera nzeru za anyakupanduka? Cinthu cibodzi comwe tingacite ni kuleka kucita tsantsa na wanthu omwe ambandokhalira kugung’uzika. (Werengani Salimo 1:1.) Kodi bzimwebzi bzin’funa kulewanyi? Bzimwebzi bzin’funa kulewa kuti tin’funika kutcenkha kuwerenga ayai kutetekera nkhani za wanthu wakupanduka. Ifepano tikasaya kuwona bwino, tingayambe kukhalambo na kamtima kakundokhalira kugung’uzika ticimbawona kuti bzomwe Yahova akucita pa kutsogolera gulu lace bziri lini bwino-bwinoletu. Ayai tingayambe kuwona ninga kuti malango ya gulu la Yahova yomwe timbatambira yakucokera lini kwa Yahovayo. Kuti tileke kukhala na nzeru zimwezi, tin’funika kubzibvunza kuti: ‘Kodi nimbagung’uzika tikakhala tatambira malango mapsa, ayai kafotokozedwe kapsa ka mavesi? Kodi nimbandokhalira kuwona bzinthu bzakuphonyeka bza wanthu omwe akutitsogolera?’ Tikawona kuti tayamba kukhala na kamtima kamweka, tin’funika kucinja mwakamfulumize. Tikacita bzimwebzi, Yahova an’dzakomedwa nafe.  —  Mimwani 3:34, 35.

11. Kodi “wanthu wakupusa” ambaiwona tani mitemo ya Yahova?

¹¹ Grupo lacitatu la wanthu omwe ambalamba nzeru ni “wanthu wakupusa.” Iwo mbakupusa thangwe rakuti ambalamba kuphatisa basa nzeru za Mulungu. Ndipo iwo ambacita bzinthu bzomwe akubziwona kuti mpsabwino. (Mimwani 12:15) Wanthu amwewa ambalamba kutetekera Yahova, omwe ni Mwenekaciro wa nzeru. (Salimo 53:1) Nthawe zinango timbagumana nawo wanthu amwewa mu utumiki, ndipo iwo ambatilewa kuipa thangwe rakuti timbalemekeza nfundo za m’Bibliya. Tsono palibe cinthu cakuthandiza comwe iwo ambalewa. Bibliya limbati: “Munthu wakupusa alibe nzeru yacadidi; ndipo palibe comwe iye angalewe pa msuwo wa mzinda.” (Mimwani 24:7) Munthu wakupusa angapereke lini malango yakuthandiza. Ndipopa Yahova ambatiuza kuti “[tileke] kucita tsantsa na munthu wakupusa”!  —  Mimwani 14:7.

12. Kodi n’ciyani comwe cingatithandize kuleka kutewezera wanthu wakupusa?

¹² Ifepano tidasiyana na wanthu wakupusa omwe ambalamba kubvera mitemo ya Mulungu, thangwe rakuti ifepano timbafuna Yahova ndipo timbafuna kuteweza mitemo yace. Comwe cingatithandize kucita bzimwebzi ndico kubzindendemezera na wanthu omwe ambabvera lini mitemo yace. Tikacita bzimwebzi, tin’dzawona kuti iwo ambagumana na mabvuto mazinji thangwe ra kusaya kubvera Yahova. Tsono ifepano tina moyo wabwino thangwe rakuti timbabvera Mulungu.  —  Salimo 32:8, 10.

13. Kodi Yahova ambatingingimiza kuti titeweze malango yace?

¹³ Yahova ambapereka nzeru kwa wanthu wentse. Koma iye ambangingimiza lini wanthu kuphatisa basa nzeru zacezo. Tsono iye ambaleweratu bzomwe wanthu omwe anilamba kuphatisa basa nzeru zacezo an’dzagumana nabzo. (Mimwani 1:29-32) Wanthu omwe ambalamba kubvera Yahova “an’dzabonera thangwe ra bzicito bzawo.” Ntsiku zino, iwo ambabonera kale ndipo kutsogolo Yahova an’dzawapfudza. Tsono wanthu omwe ambabvera malango ya Yahova na kuyaphatisa basa, bzinthu bzin’dzawafambira bwino kwene-kwene. Ndipopa Yahova adalewa kuti: “Munthu wakundibvera an’dzakhala wakukhotcerereka ndipo an’dzagopa lini tsoka.”  —  Mimwani 1:33.

NZERU YACADIDI IMBATITHANDIZA

14-15. Kodi mafala ya pa Mimwani 4:23 yakutipfunzisa ciyani?

¹⁴ Tikambaphatisa basa nzeru za Mulungu, bzinthu bzimbatifambira bwino. Ifepano tawona kuti Yahova ambapereka nzeru zace kwa wanthu wentse. Ndipo bukhu libodzi la m’Bibliya lomwe lina nzeru za Yahova ni bukhu la Mimwani. Bukhu limweri lina malango yomwe yangatithandize kukhala na moyo wabwino tikayaphatisa basa. Tsapano mbatiwoneni malango manai yomwe yali mu bukhu limweri.

¹⁵ Khotcererani mtima wanu. Bibliya limbati: “Kuposa bzinthu bzentse bzomwe bzimbafuna kukhotcereredwa, khotcerera mtima wako, pakuti mu mtimamo ndimo mumbacokera moyo.” (Mimwani 4:23) Kodi n’ciyani comwe ifepano timbacita kuti tikhotcerere mtima wathu caiwo? Ifepano timbadya cakudya cabwino, timbacita masenzeka yakulimbisa thupi ndipo timbatcenkha kucita bzinthu bzomwe bzingadzonge mtima wathuyo. Tin’funikambo kucita bzibodzi-bodzibzi kuti tikhotcerere mtima wathu wakuyezezera. Ntsiku zentse tin’funika kumbaudyesa Fala la Mulungu. Tin’funika kumbakonzekera mitsonkhano, kumbayenda ku mitsonkhanoyo, kumbatawira pa mitsonkhano na kumbapalizira mafala ya Mulungu. Ndipo tin’funika kutcenkha kucita bzinthu bzomwe bzingadzonge nzeru zathu, bzomwe ni kucita masenzeka yakuipa na kucita tsantsa na wanthu omwe alibe makhalidwe yabwino.

16. Thangwe ranyi malango yomwe yali pa Mimwani 23:4, 5 ngakuthandiza kwa ifepano ntsiku zino?

¹⁶ Mbakomedwani na bzomwe munabzo. Bibliya limbatipasa malango yakuti: “Leka kumbabzinetesa na basa kuti ugumane cuma. . . . Pomwe iwepo ukunyang’anisisa cumaco ico cimbanyembereka, pakuti ico cimbabzikonzera matenga ninga ya mphungu ndipo cimbambuluka ciciyenda kudzulu.” (Mimwani 23:4, 5) Kobiri na bzinthu bzomwe tinabzo bzimbakhalisa lini. Napo bziri tenepo, wanthu omwe adadala kale na wakusauka wentse ambafuna kukhala na kobiri zizinji. Ndipopa nthawe zinango iwo ambacita bzinthu bzomwe bzimbawacitisa kukakhala na mbiri yakuipa, kudzonga uxamwali bwawo na anzawo ndipo winango ambafika pakudzonga moyo wawo caiwo. (Mimwani 28:20; 1 Timotio 6:9, 10) Tsono, nzeru yacadidi imbatithandiza kuti tileke kumbafuna kwene-kwene kobiri. Kucita bzimwebzi kumbatikhotcerera kuti tileke kukhala na dzoka na kobiri ndipo kumbacitisambo kuti tikomedwe na bzomwe tinabzo.  —  Mpalizi 7:12.

17. Kodi tingakhale tani na “lirime la wanthu wanzeru,” lomwe limbafotokozedwa pa Mimwani 12:18?

¹⁷ Mbayambani kukumbuka pomwe mukanati kulewalewa. Tikasaya kuwona bwino, tingalewe bzinthu bzomwe bzingawawe anzathu. Bibliya limbati: “Alipo munthu omwe ambalewalewa mwakusaya kukumbuka ninga kulasa kwa xipada, tsono lirime la wanthu wanzeru limbalimbisa.” (Mimwani 12:18) Ifepano tikambatcenkha kucita magunkha timbabverana na anzathu. (Mimwani 20:19) Kuti anzathu ambakomedwe na bzomwe timbalewa, tin’funika kumbawerenga Bibliya ntsiku zentse na kumbakumbukira bzomwe tawerengabzo. (Luka 6:45) Tikambakumbukira bwino-bwino bzomwe Bibliya limbalewa, mafala yathu yan’dzakhala ninga “mkulo wa nzeru” zomwe zimbatsangalaza anzathu.  —  Mimwani 18:4.

18. Kodi kuphatisa basa nfundo ya pa Mimwani 24:6 kungatithandize tani mu utumiki?

¹⁸ Mbatewezani malango ya gulu la Yahova. Bibliya lina malango yomwe yangatithandize kuti bzinthu bzitifambire bwino. Iro limbati: “Malango yanzeru yangakuthandize kukunda nkhondo, ndipo anyakupereka malango akawanda bzinthu bzimbafamba bwino.” (Mimwani 24:6) Kodi nfundo imweyi tingaiphatise tani basa pomwe tikupalizira? Ifepano tin’funika kucita nyongo ya kuteweza malango yomwe timbapasidwa, sikuti kucita bzomwe ifepano tikuwona kuti mpsabwino. Pa mitsonkhano yathu yacikristau, ifepano timbapasidwa malango yomwe yangatithandize kukhala apfunzisi wabwino. Ku mitsonkhanoko kumbafotokozedwa nkhani zakucokera m’Bibliya ndipo kumbacitidwa pomwe bziratizo bza upalizi bzomwe bzimbatipfunzisa momwe tingaphatire basa la kupalizira. Ndipo cinango n’cakuti, gulu la Yahova limbakonza mabukhu na mavidiyo kuti bzithandize wanthu kubvesesa bwino Bibliya. Kodi imwepo mukuphatisa bwino basa bzinthu bzimwebzi?

19. Kodi imwepo mumbaziwona tani nzeru zomwe Yahova ambatipasa? (Mimwani 3:13-18)

¹⁹ Werengani Mimwani 3:13-18. Timbatenda kwene-kwene Yahova thangwe ra kutipasa malango yace m’Bibliya! Kodi tingadakhala na moyo wa moda wanyi tingadasaya kudziwa nzeru za Yahova? Mu nkhani ino, tawona nzeru zakuthandiza za m’bukhu la Mimwani. Koma Bibliya lentse lina nzeru za Yahova. Bwerani tentse tiphatise basa nzeru za Yahova. Wanthu wa m’dzikoli angazinyozere nzeru zimwezi, koma ifepano tawona kuti “wanthu omwe ambaziphatisisa an’dzacemeredwa wakukondwa.”