Cakucitika

Latizani Ntsisi kwa Wanthu Wentse

Ntsiku inango, mpfumakazi ya ku Nova Zelândia idawona vidiyo yakuti ‘Tizisamalirana’ mu jw.org yomwe imbalewa kuti Yahova ambandobva lini ntsisi koma ambalatiza ntsisizo. (Zaiya 63:7-9) Iye adawona kuti bzikhali bwino kuphatisa basa bzomwe adapfunza mu vidiyomo kuti athandize wanthu winango. Patsogolo pace, pomwe iye akhagula bzinthu adawona mkazi munango omwe akhalibe kwakukhala ndipo adafuna kumuthandiza mwa kumugulira cakudya. Mkaziyo adabvuma. Pomwe mpfumakaziyo idamubweresera cakudyaco, iyo idamupalizira mwakuphatisa basa katsamba kakuti Kodi kubonera kun’dzamala?

Mkaziyo adayamba kulira ndipo adayamba kufotokoza kuti adabadwira m’banja la Mboni za Yahova, tsono akhadasiya cadidi kwa magole mazinji. Ndipo iye akhadapemba kwa Yahova kuti amuthandize kubwerera pomwe kwa iye. Mpfumakaziyo idapasa Bibliya mkaziyo ndipo iye adabvuma kupfunza Bibliya.a

Tingatewezere Yahova mwa kulatiza ntsisi wanthu winango, maka-maka abale na mpfumakazi zathu m’gwere. Ndipo tingalatizembo ntsisi mwa kumbanyang’ana mipata kuti timbapalizire wanthu winango.