NKHANI YAKUPFUNZA 36
NYIMBO 89 Bvera Kuti Usimbidwe
“Mbacitani Bzomwe Fala la Mulungu Limbalewa”
“Mbacitani bzomwe Fala la Mulungu limbalewa, sikuti kumbandobva basi.” — TIYAGO 1:22.
CAKULINGA CA NKHANIYI
Nkhaniyi in’tithandiza kuwona bzomwe tingacite kuti tileke kumbandowerenga Fala la Mulungu ntsiku zentse basi koma timbakumbukire bzomwe tawerengabzo na kubziphatisa basa pa moyo wathu.
1-2. N’ciyani cimbacitisa kuti atumiki wa Yahova akhale wakukondwa? (Tiyago 1:22-25)
YAHOVA na Mwana wace wapamtima, Jezu, akufuna kuti ifepano tikhale wakukondwa. Nyakunemba Salimo 119:2 adati: “Wakukondwa mbale omwe ambabvera malamulo yace, ndipo ambamulinga na mtima wentse.” Ndipo pakulewambo bza nkhani ibodzi-bodziyi, Jezu adati: “Wakusimbidwa ngule omwe ambabva mafala ya Mulungu aciyakoya!” — Luka 11:28.
2 Atumiki wa Yahova mbanthu wakukondwa. Thangwe ranyi? Pana mathangwe mazinji yomwe yambaticitisa kukhala wakukondwa. Thangwe libodzi ndakuti ifepano timbawerenga Fala la Mulungu nthawe zentse na kucita nyongo yakuphatisa basa bzomwe tawerengabzo. — Werengani Tiyago 1:22-25.
3. Kodi ni phindu liponi lomwe timbakhala nalo tikambacita bzomwe timbapfunza m’Fala la Mulungu?
3 Ifepano timbagumana phindu mu njira zizinji ‘tikambacita bzomwe Fala la Mulungu limbalewa.’ Mwa ciratizo, ifepano timbadziwa kuti imweyi ni njira ibodzi yomwe imbacitisa kuti Yahova akomedwe nafe. Ndipo bzimwebzi bzimbacitisa kuti ifepano tikhale wakukondwa. (Mpalizi 12:13) Tikambateweza bzomwe timbawerenga m’Fala la Mulungu, timbakhala na banja lakukondwa ndipo timbakhala pa uxamwali bwakulimba na abale na mpfumakazi zathu. Pinango bzimwebzi bzidakucitikiranimbo kale pa moyo wanu. Kuthumizira bzimwebzi, timbatcenkha kugumana na mabvuto yomwe wale omwe ambateweza lini malamulo ya Yahova ambagumana nayo. Ifepano timbabverana na mafala yomwe Mambo Davide adalewa. Pomwe akhaimba nyimbo yace pambuyo pa kulewa bza malamulo na katongedwe ka Yahova, iye adamaliza na kulewa kuti: “Munthu omwe ambabziteweza ambagumana mabaibai mazinji.” — Salimo 19:7-11.
4. Thangwe ranyi bzingakhale bzakunesa kuwerenga na kuphatisa basa bzomwe tawerengabzo?
4 Pakuti timbakhala na bzakucita bzizinji pa moyo wathu, nthawe zinango bzingakhale bzakunesa kuwerenga Fala la Mulungu na kuphatisa basa bzomwe tawerengabzo. Tsono napo bziri tenepo, tin’funika kumbapambula nthawe kuti timbawerenge na kupfunza Bibliya kuti tidziwe bzomwe Yahova akufuna kuti ticite. Tenepo mu nkhani ino, tiniwona bzinthu bzomwe bzingatithandize kuti timbawerenge Bibliya ntsiku zentse. Ndipo tiniwonambo bzomwe bzingatithandize kumbakumbukira bzomwe tawerenga na kuwona njira za momwe tingaphatisire basa bzomwe tapfunzabzo pa moyo wathu.
MBAPAMBULANI NTHAWE YAKUTI MUMBAWERENGE BIBLIYA
5. Kodi timbakhala wakutanganidwa na bzinthu bziponi?
5 Atumiki azinji wa Yahova ambakhala na bzakucita bzizinji pa moyo wawo. Timbamala nthawe izinji tikucita mabasa yomwe Bibliya limbalewa kuti njakufunika. Mwa ciratizo, azinji wa ifepano timbaphata basa kuti tikwanise kubzisamalira na kusamalirambo mabanja yathu. (1 Timotio 5:8) Pana Akristau azinji omwe ambasamalira adzinza wawo omwe akuduwala ayai mbakukalamba. Ndipo tentsenefe timbafunikira nthawe kuti tisamalire thanzi lathu. Kuthumizira pa mabasa yamweya, pana mabasambo yanango yomwe timbacita m’gwere. Basa likulu kwene-kwene lomwe timbacita ndiro kupalizira mwa nyongo. Na mabasa yentsene yomwe munayoya, kodi mungacite tani kuti mugumane nthawe yakumbawerenga Bibliya nthawe zentse, kukumbukira bzomwe mwawerenga na kubziphatisa basa?
6. Kodi mungacite ciyani kuti mumbakhale na nthawe yakuwerenga Bibliya? (Onani cithunzi-thunzi.)
6 Kuwerenga Bibliya ni cibodzi mwa “bzinthu bzomwe mpsakufunika kwene-kwene” kwa Akristau. Ndipopa tin’funika kuwonesesa kuti timbakhala na nthawe yakumbaliwerenga. (Afilipi 1:10) Pakulewa bza munthu wakukondwa, Salimo wakuyamba ambalewa kuti: Iye “ambakondwa na malamulo ya Yahova, ndipo ambawerenga malamulo yace acimbayakumbukira masikati na usiku.” (Salimo 1:1, 2) Bzimwebzi bzikulatiza kuti tin’funika kumbapambula nthawe kuti timbawerenge Bibliya. Kodi nthawe yabwino kuti tiwerenge Bibliya njiponi? Munthu ali-wentse angakhale na mtawiro wace pa mbvunzo umweyu. Tsono imwepo mun’funika kusankhula nthawe yomwe mungambacite bzimwebzo mwakusaya kumoga-moga. M’bale munango, wakucemeredwa Victor, adalewa kuti: “Inepano nimbafuna kuwerenga Bibliya macibese. Napo kuti nimbafuna lini kubesera, koma nimbawona kuti nthawe imweyi njabwino thangwe pambakhala palibe bzinthu bzakundisokoneza. Nzeru zangu zimbakhala zidakhazikika ndipo nimbakwanisa kubvesesa bzomwe ndikupfunzabzo.” Pinango mungacitembo ninga bzomwe m’baleyu ambacita. Bzibvunzeni kuti: ‘Kodi njiponi nthawe yabwino kwa inepano kuti nimbawerenge Bibliya?’
Kodi njiponi nthawe yabwino ya kuwerenga Bibliya? Kodi njiponi nthawe yabwino kwa imwepo kuti mumbawerenge mwakusaya kumoga-moga? (Onani ndime 6)
MBAKUMBUKIRANI BZOMWE MWAWERENGA
7-8. N’ciyani comwe cingatitazise kugumana phindu na bzomwe timbawerenga? Fotokozani.
7 Ifepano tingambawerenge bzinthu bzizinji ntsiku iri-yentse koma ne kukumbukira bzomwe tawerengabzo. Kodi imwepo mudawerenga kale nkhani inango ndipo patsogolo pace mucileka kukumbukira bzentse bzomwe mwawerengabzo? Bzimwebzi bzidaticitikira kale tentsenefe ndipo bzingaticitikirembo pomwe tikuwerenga Bibliya. Pinango tingakonze ndondomeko ya makapitulo ya m’Bibliya yomwe tingambawerenge ntsiku zentse. Mpsabwino kucita bzimwebzi. Tin’funika kukonza ndondomeko na kucita nyongo yakuteweza ndondomekoyo. (1 Akolinto 9:26) Tsono penu tikufuna kugumana phindu na bzomwe timbawerenga m’Bibliya, tin’funika kucita bzizinji sikuti kumbandowerenga Bibliyalo basi.
8 Kumbukirani bza ciratizoci: Nvula njakufunika kwene-kwene kwa wanthufe. Tsono nvulayo ikabvumba kwene-kwene koma mu kanthawe kakucepa mnyontho umbapita lini pantsi. Nvulayo ikabvumba mwa njira imweyi, mbeu zimbakula lini bwino. Nvula in’funika kumbabvumba pang’ono-ng’ono kuti mnyontho upite pantsi. Mwakundendemerana na bzimwebzi, tin’funika lini kumbawerenga Bibliya mwakuthamanga-thamanga, thangwe tikacita bzimwebzi tin’dzakwanisa lini kubva, kukumbukira na kuphatisa basa bzomwe tawerengabzo. — Tiyago 1:24.
Ninga momwe bzimbafunikira nthawe kuti nvula yomwe ikubvumba ipite pantsi, timbafunikirambo nthawe kuti tikumbukire na kuphatisa basa bzomwe tikupfunza m’Fala la Mulungu (Onani ndime 8)
9. Kodi n’ciyani comwe tingacite penu tazolowera kumbawerenga Bibliya mwakuthamanga-thamanga?
9 Kodi imwepo mumbawerenga Bibliya mwakuthamanga-thamanga? Penu ndibzo, n’ciyani comwe mun’funika kucita? Mun’funika kuwerenga mwakusaya kuthamanga. Citani nyongo kuti mumbabvesese bzomwe mukuwerenga ayai kukumbukira bzomwe mwamala kuwerenga. Kucita bzimwebzi n’kwakunesa lini. Imwepo mungambamale nthawe izinji mukupfunza kuti mukwanise kumbakumbukira bzomwe mwawerengabzo. Ayai mungambawerenge mavesi mang’ono-ng’ono mucimbakhala na nthawe izinji kuti mumbakumbukire bzomwe mwawerengabzo. Victor, omwe wafotokozedwa kale ule, adalewa kuti: “Nimbacita ciri-centse kuti ndileke kuwerenga makapitulo mazinji ya m’Bibliya. Nthawe zinango nimbandowerenga kapitulo ibodzi basi. Ndipo pakuti nimbawerenga ku macibese nimbakwanisa kukumbukira bzomwe ndawerengabzo ntsiku yentse.” Imwepo mungambasankhule kuti ni mavesi mangasi yomwe mun’funa kuwerenga. Cakufunika n’cakuti mumbawerenge mwakusaya kuthamanga kuti mukhale na nthawe yakumbakumbukira bzomwe mukuwerengabzo. — Salimo 119:97; onani kwadru yakuti “Mibvunzo Yomwe Mun’funika Kumbabzicita Pakuwerenga Bibliya.”
10. Fotokozani momwe mungaphatisire basa bzomwe mukuwerenga. (1 Atesalonika 5:17, 18)
10 Pomwe mukuwerenga mavesi ya m’Bibliya, mbawonani momwe mungambayaphatisire basa. Pomwe mukuwerenga mbali inango ya m’Fala la Mulungu, bzibvunzeni kuti: ‘Kodi ningaphatise tani basa nkhani imweyi ntsiku zino ayai kutsogoloku?’ Mwa ciratizo, kumbukirani kuti imwepo mwawerenga cinembo ca 1 Atesalonika 5:17, 18. (Werengani.) Mukamala kuwerenga mavesi mawiriya, imwepo mungaime pang’ono mucikumbukira kuti n’kangasi komwe imwepo mumbapemba na momwe mumbapembera. Kuthumizira bzimwebzi, imwepo mungambakumbukire bzinthu bzomwe Yahova adakucitirani. Ntsiku iri-yentse, mungambasankhule bzinthu bzitatu pa bzinthu bzomwe Yahova adakucitirani mucimutenda pa bzinthubzo. Napo mucimala nthawe ing’ono-ng’ono mukukumbukira bzomwe mwapfunza m’Bibliya, bzimwebzi bzin’dzakuthandizani kubvesesa Fala la Mulungu na kucita bzomwe iro limbalewa. Mukambaphatisa basa bzomwe mumbawerenga m’Bibliya ntsiku zentse, na kupita kwa nthawe mun’dzakhala mtumiki wabwino wa Yahova! Tsono n’ciyani comwe mun’funika kucita penu pana bzinthu bzizinji bzomwe mun’funika kucinja?
KHAZIKISANI BZAKULINGA BZOMWE MUN’KWANISA KUBZITEWEZA
11. Thangwe ranyi nthawe zinango mungawone kuti bzomwe mun’funika kucinja bzawanda? Fotokozani.
11 Pomwe mukuwerenga Bibliya, nthawe zinango imwepo mungasuname mukadziwa kuti pana bzinthu bzizinji bzomwe mun’funika kucinja. Mwa ciratizo, tindendemezere kuti: Lero pomwe mukhawerenga Bibliya mwagumana malango yomwe yakulatiza kuti Akristau an’funika lini kumbasankhulana. (Tiyago 2:1-8) Imwepo mwazindikira kuti mun’funika kucinja momwe mumbacitira bzinthu na wanthu winango ndipo mwasankhula kucita bzimwebzo. Mwacita bwino kwene-kwene! Mangwana yace imwepo mwawerenga malango yomwe yakulewa kuti mun’funika kucita mphole na bzomwe mumbalewa. (Tiyago 3:1-12) Imwepo mwazindikira kuti nthawe zinango mumbalewa lini mafala yabwino. Patsogolo pace, imwepo mwatsimikiza kuti mun’dzalewa mafala yabwino na yakulimbisa. Mkuxa wace pomwe mwawerenga Bibliya mwagumana malango yomwe yakulewa kuti mun’funika lini kukhala xamwali wa dziko. (Tiyago 4:4-12) Imwepo mwazindikira kuti mun’funika kucita mphole na bzomwe mumbawerenga, kuwona na kubva. Mtondo wace imwepo mungawone ninga kuti mpsakunesa kuphatisa basa malango yentseneya.
12. Thangwe ranyi mun’funika lini kugoboka m’mabondo mukawona kuti pana bzinthu bzinango bzomwe mun’funika kucinja pomwe mukhawerenga Bibliya? (Onani mafala ya m’nyantsi.)
12 Imwepo mukawona kuti pana bzinthu bzomwe mun’funika kucinja lekani kusunama. Bzimwebzi bzikulatiza kuti moyo wanu wa uzimu uli bwino. Munthu wakubzicepesa na wakulungama ambawerenga Bibliya na cakulinga cakuti awone mbali zomwe an’funika kucinja pa moyo wace.a Kumbukiranimbo kuti kubvala “unthu bupsa” kumbacitika lini kabodzi na kabodzi. (Akolose 3:10) Kodi n’ciyani cin’dzatithandiza kuti timbapitirize kucita bzomwe Fala la Mulungu limbalewa?
13. Kodi n’ciyani comwe mun’funika kucita kuti mukwanise kuphatisa basa bzomwe mukupfunza? (Onani cithunzi-thunzi.)
13 M’mbuto mwa kuyezera kucita bzentse bzomwe mwawerenga kabodzi na kabodzi, yezerani kukhazikisa ndondomeko. (Mimwani 11:2) Imwepo mungayezere kucita ibzi: Nembani lista ya bzinthu bzomwe mun’funika kucinja, ndipo m’mbuto mwa kufuna kucinja bzinthu bzentse kabodzi na kabodzi sankhulani cibodzi ayai bziwiri. Ndipo bzinangobzo mun’dzabziwona kutsogolo. Tsono kodi muniyamba kucinja bzinthu bziponi?
M’mbuto mwa kuyezera kucita bzentse bzomwe mwawerenga m’Bibliya kabodzi na kabodzi, mungakonze ndondomeko ya bzinthu bzomwe mungakwanise kucinja. Pinango mungayambe kucinja cinthu cibodzi ayai bziwiri (Onani ndime 13-14)
14. Kodi mungasankhule kuyamba kucita bzinthu bziponi?
14 Imwepo mungasankhule kuyamba kucita cinthu comwe mukuwona kuti n’cakupusa kwa imwepo. Ayai pinango imwepo mungasankhule kuyamba kucita nyongo yakuti mucinje mbali inango pa moyo wanu yomwe njakufunika kwene-kwene. Imwepo mukawona bzomwe mun’funika kuyamba kucinja fufudzani m’mabukhu yathu, pinango mu Índice das Publicações da Torre de Vigia ayai mu Bukhu Lakufufudzira Nkhani la Mboni za Yahova. Pemphererani bzomwe mwasankhulabzo mucikumbira Yahova kuti akupaseni “mphanvu na cikhumbo kuti mucite bzomwe iye akufuna.” (Afilipi 2:13) Mukamala phatisani basa bzomwe mwapfunzabzo. Mukakwanisa kucinja cinthu cakuyamba comwe mukhadasankhulaco bzimwebzi bzin’dzakucitisani kuti mukwanisembo kucinja cinthu caciwiri comwe mwasankhula. Imwepo mukawona kuti mwakwanisa kucinja bzinthu bzinango pa moyo wanu ayai kukhala na makhalidwe yacikristau yomwe mukhalibe, mun’dzafunisisa kupitiriza kufuna kucinja ndipo bzin’dzakhala bzakupusa kucinja bzinthu bzinango bzomwe mun’funikira kucinja.
BVUMANI KUTI FALA LA MULUNGU ‘LIPHATE BASA MWA IMWEPO’
15. Kodi n’kusiyana kuponi komwe kulipo pakati pa wanthu wa Yahova na wanthu azinji omwe ambawerenga Bibliya? (1 Atesalonika 2:13)
15 Wanthu winango ambalewa kuti adawerenga kale Bibliya kazinji-kentse. Tsono kodi iwo ambakhulupiradi Bibliyalo? Kodi iwo adaphatisa basa bzomwe adawerenga m’Bibliya ayai kuteweza bzomwe Bibliyalo limbalewa pa moyo wawo? Kazinji-kazinji mtawiro ngwakuti ne. Tsono bzimwebzi mpsakusiyana na wanthu wa Yahova! Ninga Akristau wakuyambirira, ifepano timbabvuma ‘Bibliya kuti ni mafala yakucokera kwa Mulungu.’ Kuthumizira bzimwebzi, timbacita nyongo yakuteweza bzomwe Bibliyalo limbalewa pa moyo wathu. — Werengani 1 Atesalonika 2:13.
16. Kodi n’ciyani comwe cingatithandize kuti timbacite bzomwe Bibliya limbalewa?
16 Mpsakupusa lini nthawe zentse kuwerenga na kuphatisa basa bzomwe timbawerenga m’Bibliya. Bzingatinese kugumana nthawe yakuti tiwerenge. Ayai tingawerenge mwakamfulumize mwakuti tingakumbukire lini bzomwe tawerengabzo. Ayai tingawone kuti bzinthu bzomwe tin’funika kucinja bzawanda kwene-kwene. Bziribe basa mphitca yomwe mungagumane nayo pomwe mukuwerenga Bibliya. Imwepo mungakwanise kuikunda mwakuthandizidwa na Yahova. Tenepo mbatibvumeni thandizo lace kuti tileke kukhala anyakubva omwe ambayebwa bzomwe abva. Koma tikhale wale omwe ambacita bzomwe Bibliya limbalewa. Kulewa cadidi, ifepano tikambawerenga Bibliya na kuphatisa basa bzomwe tawerengabzo pa moyo wathu tin’dzakhala wakukondwa kwene-kwene. — Tiyago 1:25.
NYIMBO 94 Kutenda Fala la Mulungu
a Onani mu jw.org vidiyo yakuti Bzomwe Maswaka Yanango Yambalewa — Kuwerenga Bibliya.