NKHANI YAKUPFUNZA 15
NYIMBO 30 Baba Wangu, Mulungu Wangu na Xamwali Wangu
“Kufenderera Mulungu ni Cinthu Cabwino Kwene-kwene” kwa Ifepano!
“Kwa ine kufenderera Mulungu ni cinthu cabwino kwene-kwene.” — SALIMO 73:28.
CAKULINGA CA NKHANIYI
Mu nkhani ino, tiniwona momwe tingafendererere Yahova na phindu lomwe tingakhale nalo tikacita bzimwebzo.
1-2. (a) Kodi ni nyongo iponi yomwe munthu ambafunika kucita kuti akhale pa uxamwali na munthu munango? (b) Kodi tin’cezerana ciyani mu nkhani ino?
KODI imwepo muna xamwali wa ponda ndipondembo? Kodi n’ciyani comwe mudacita kuti mukhale pa uxamwali na iye? Pinango imwepo mudamala nthawe muli pabodzi na iye, kudziwa bzomwe bzidamucitikira pa moyo wace na kudziwambo bzomwe xamwali wanuyo ambafuna na bzomwe ambafuna lini. Imwepo mudazindikira kuti iye ana makhalidwe yabwino kwene-kwene yomwe mungafunembo kukhala nayo. Bzimwebzi bzidakucitisani kuti mumufune kwene-kwene xamwali wanuyo.
2 Kukhala pa uxamwali bwakulimba na munthu pambafunikira nthawe na nyongo. Mpsibodzi-bodzimbo na kukhala pa uxamwali bwakulimba na Yahova Mulungu. Nkhani ino, in’fotokoza momwe tingakhalire wakufendererana kwene-kwene na Mulungu na phindu lomwe tingakhale nalo tikacita bzimwebzo. Cakuyamba, mbatiwoneni kuti n’thangwe ranyi mpsabwino kukhala wakufendererana na Xamwali wathu wabwino, Yahova.
3. Thangwe ranyi tin’funika kumbakumbukira phindu lomwe timbakhala nalo tikafenderera Yahova? Fotokozani.
3 Kulewa cadidi, imwepo mukutawiriza kuti kufenderera Yahova n’kwabwino. Tsono kukumbukira bwino-bwino momwe bzimwebzi bziriri bzabwino kungaticitise kuti tipitirize kumufenderera. (Salimo 63:6-8) Ifepano timbadziwa kuti kucita bzinthu ninga masenzeka yakulimbisa thupi, kugona mwakukwanira na kumwa madzi mwakukwanira bzimbaticitisa kuti tikhale na thanzi labwino. Napo bziri tenepo, azinji ambabzikumbukira lini bzimwebzi ndipo ambakhala alibe basa na thanzi lawo. Tsono tikambakumbukira momwe bzinthu bzimwebzi bzimbaticitisira kuti tikhale na thanzi labwino bzimbaticitisa kuti tipitirize kumbabzicita. Mwa njira ibodzi-bodziyi, ifepano tingadziwe kuti kufenderera Yahova n’cinthu cabwino kwa ifepano, tsono kukumbukira phindu lomwe tingakhale nalo tikacita bzimwebzo kungaticitise kupitiriza kufendererana na Xamwali wathu, Yahova. — Salimo 119:27-30.
4. Mwakubverana na Salimo 73:28, n’ciyani comwe nyakunemba salimoyi akhadziwa?
4 Werengani Salimo 73:28. Munembi wa Salimo 73 akhali Mlevi omwe akhadasankhulidwa kuti atumikire ninga muimbi mu templo ya Yahova. Ndipo bzikuwoneka kuti iye akhatumikira Yahova mwakukhulupirika kwa magole mazinji. Napo bzikhali tenepo, iye akhadziwa kuti bzikhali bzakufunika kwa iye kukumbukira kuti “kufenderera Mulungu” cikhali cinthu cabwino kwa iye. Ndipo akhafunambo kuti wanthu winango adziwe kuti kufenderera Mulungu cikhali cinthumbo cabwino kwa iwo. Kodi ni phindu liponi lomwe limbakhala liripo tikacita bzimwebzo?
“KUFENDERERA MULUNGU” KUMBATICITISA KUTI TIKHALE WAKUKONDWA
5. (a) Thangwe ranyi kufenderera Yahova kumbaticitisa kukhala wakukondwa? (b) Mwakubverana na Mimwani 2:6-16, fotokozani momwe nzeru za Yahova zingakuthandizireni na momwe zingakukhotcerereni pa moyo wanu.
5 Tikambafenderera kwene-kwene Yahova ni pomwe timbakhalambo wakukondwa kwene-kwene. (Salimo 65:4) Pana mathangwe mazinji yomwe yambaticitisa kuti tilewe tenepo. Ifepano tikambawerenga bzomwe iye ambatiuza m’Fala lace, Bibliya, na kumubvera timbakhala wanzeru. Nzeruzo zimbatikhotcerera kuti tileke kucita bzinthu bzakuipa nakuti titcenkhembo kucita pikado zikulu-zikulu. (Werengani Mimwani 2:6-16.) Ndipopa Bibliya limbalewa kuti: “An’kondwa ni munthu omwe agumana nzeru na omwe ambakwanisa kuzindikira.” — Mimwani 3:13.
6. N’ciyani comwe cidacitisa munembi wa Salimoyi kuti asiye kukhala wakukondwa?
6 Kulewa cadidi, nthawe zinango napo atumiki wa Yahova ambakhalambo wakusunama. Munembi wa Salimo 73 adasiya kukhala wakukondwa pomwe adakhala na makumbukidwe yakuphonyeka. Iye adakalipa ndipo adakhala wa njiru thangwe akhakumbuka kuti wanthu wakuipa omwe akhalibe basa na Mulungu pabodzi na malamulo yace bzinthu bzikhawafambira bwino pa moyo wawo. Iye akhakumbuka kuti wanthu wa ciwembo na wakubzikuza akhakwanisa kugumana bzentse bzomwe iwo akhafuna, akhana thanzi labwino ndipo akhabonera lini. (Salimo 73:3-7, 12) Thangwe ra kuwona kusaya cirungamo kumweku, iye adafika pakukumbuka kuti kutumikira Yahova kukhalibe phindu. Iye akhadasunama kwene-kwene ndipo adalewa kuti: “Kulewa cadidi ndacenesa mtima wangu papezi. Ndipo ndasamba m’manja mwangu papezi pakulatiza kuti ndiribe mulandu.” — Salimo 73:13.
7. N’ciyani comwe tingacite kuti tikunde msunamo omwe ungatitazise kukhala wakukondwa? (Onanimbo cithunzi-thunzi.)
7 Napo kuti nyakunemba Salimoyi akhadasunama, iye adacita ciri-centse kuti acinje makumbukidwe yace. Iye ‘adapita pa mbuto yakucena ya Mulungu,’ ndipo Yahova adamuthandiza kucinja makumbukidwe yace. (Salimo 73:17-19) Tikakhala kuti tidasunama, Yahova omwe ni xamwali wathu wabwino ambadziwa bzimwebzo. Pa nthawe imweyi, tingapembe kwa Yahova kuti atithandize kudziwa bzomwe tingacite. Malango yakucokera m’Fala lace na bzomwe abale an’dzacita kuti atilimbikise bzin’dzatipasa mphanvu kuti tipitirize kumutumikira napo kuti tingakhale tidasunama. Napo kuti tingakhale na thupo, Yahova an’dzatithandiza kukhala wakugwa mpfuwa. — Salimo 94:19.a
Mlevi omwe adanemba Salimo 73, adaima pa “mbuto yakucena ya Mulungu” (Onani ndime 7)
“KUFENDERERA MULUNGU” KUMBATIPASA MOYO WABWINO NA CIDIKHIRO
8. Kodi ni njira zinango ziponi zakufunika zomwe zikulatiza kuti kufenderera Yahova n’kwabwino kwa ifepano?
8 Kufenderera Mulungu n’kwabwino kwa ifepano mu njira zinango ziwiri zakufunika. Yakuyamba, timbakhala na moyo wabwino tikakhala pa uxamwali bwakulimba na Mulungu. Yaciwiri, timbakhala na cidikhiro cakudzakhala na moyo wabwino kutsogolo. (Jeremiya 29:11) Bwerani ticezerane njira ziwirizi.
9. Kodi kufenderera Yahova kumbaticitisa tani kuti tikhale wakukondwa?
9 Tikafenderera Yahova timbakhala na moyo wabwino. Wanthu azinji ntsiku zino ambalewa kuti kulibe Mulungu. Iwo ambadziwa lini kuti n’thangwe ranyi wanthu ali pa dziko la pantsi ndipo ambakhulupira kuti kutsogolo kuno wanthuwo an’dzawoneka lini pomwe pantsi pano. Tsono thangwe ra kupfunza Fala la Mulungu, ifepano tina citsimikizo cakuti Mulungu “alipodi ndipo ambabaira wanthu omwe ambamulinga na mtima wentse.” (Ahebereu 11:6) Kuthumizira bzimwebzi, Yahova adatilenga kuti timbamutumikire. Ndipopa tikambamutumikira timbakhala wakukondwa kwene-kwene. — Deuteronomiyo 10:12, 13.
10. Kodi Salimo 37:29 ambalewa ciyani bza tsogolo la wale omwe ambadikhirira Yahova?
10 Wanthu azinji ntsiku zino alibe cidikhiro cacadidi, iwo ambandophata basa, kukhala na wana na kukoya kobiri zomwe zingadzawathandize kutsogolo. Iwo ambadziwa lini bzomwe Mulungu akufuna kudzacita kutsogolo. Mwakusiyana na bzimwebzi, atumiki wa Yahova ambamukhulupira. (Salimo 25:3-5; 1 Timotio 6:17) Timbathemba Mulungu wathu na xamwali wathu ndipo timbadziwa kuti iye an’dzacita bzomwe adatipicira. Tsogolo lathu limbaphatanidza kudzamutumikira mpaka kale-kale m’Paraizo. — Werengani Salimo 37:29.
11. N’ciyani cimbacitika tikafenderera Mulungu, ndipo iye ambabzibva tani na bzimwebzi?
11 Pana njira zinango zizinji zomwe zimbalatiza kuti kufenderera Mulungu n’kwabwino kwa ifepano. Tikafenderera Mulungu, iye ambapicira kulekerera pikado zathu tikakungula. (Zaiya 1:18) Bzimwebzi bzimbaticitisa kuti tileke kubzipasa mulandu thangwe ra pikado zomwe tidacita m’mbuyo. (Salimo 32:1-5) Ndipo bzimbacitisambo kuti Yahova akomedwe. (Mimwani 23:15) Kulewa cadidi, pinango imwepo mukukumbukira bzisimbo bzinango bzomwe bzimbabwera thangwe ra kukhala pa uxamwali bwakulimba na Mulungu. Tsapano bwerani tiwone bzomwe tingacite kuti tifenderere Mulungu.
BZOMWE TINGACITE KUTI TIPITIRIZE “KUFENDERERA MULUNGU”
12. N’ciyani comwe imwepo mudacita kuti mufenderere Mulungu?
12 Pomwe imwepo mukhanati kukhala Mboni ya Yahova mudacita bzinthu bzizinji kuti mukhale xamwali wa Yahova. Imwepo mudapfunza cadidi pakulewa bza Yahova Mulungu pabodzi na bza Jezu Kristu, mudakungula pikado zanu, mudalatiza cikhulupiro cakulimba kwa Mulungu na kucitambo bzinthu mwakubverana na kufuna kwace. Tsono kuti tikhale wakufendererana na Mulungu tin’funika kupitiriza kucita bzinthu bzimwebzi. — Akolose 2:6.
13. Kodi ni bzinthu bzitatu bziponi bzomwe bzingatithandize kupitiriza kufenderera Yahova?
13 N’ciyani comwe cin’dzatithandiza kupitiriza kufenderera Yahova? (1) Tin’funika kupitiriza kuwerenga na kupfunza Bibliya. Pomwe tikuwerenga Bibliya tin’funika kucita bzizinji sikuti kundopfunza bza Mulungu basi, m’mbuto mwace tin’funika kubvesesa bzomwe Mulungu an’funa kwa ifepano ticitsogoleredwa na mitemo yace yomwe imbagumanika m’Fala lace, Bibliya. (Aefezo 5:15-17) (2) Tin’funika kulimbisa cikhulupiro cathu mwa kumbakumbukira bzinthu bzakusiyana-siyana bzomwe iye ambacita bzomwe bzimbalatiza kuti ambatifuna. (3) Tin’funika kupitiriza kuwenga bzinthu bzomwe Yahova ambakomedwa lini nabzo na kutcenkha kukhala pa uxamwali na wanthu omwe ambacita bzinthu bzimwebzi. — Salimo 1:1; 101:3.
14. Mwakubverana na 1 Akolinto 10:31, ni bzinthu bziponi bzomwe tingacite pa moyo wathu wa ntsiku na ntsiku kuti tikondwese Yahova? (Onanimbo bzithunzi-thunzi.)
14 Werengani 1 Akolinto 10:31. Mpsakufunika kumbacita bzinthu bzomwe Yahova ambakomedwa nabzo. Bzimwebzi bzikulatiza kuti tin’funika kucita bzinthu bzizinji sikuti kundopalizira na kuyenda ku mitsonkhano. Bzinthu bzabwino bzomwe bzimbakondwesa Yahova bzimbaphatanidza bzinthu bzomwe timbacita pa moyo wathu wa ntsiku na ntsiku. Tikambakhala wakukhulupirika m’bzinthu bzentse na kupasambo bzinthu bzomwe tinabzo wanthu winango timbakondwesa Yahova. (2 Akolinto 8:21; 9:7) Iye akufuna kuti timbalatize kuti timbatenda mphaso ya moyo yomwe adatipasa. Na tenepo, timbasamala na bzomwe timbadya na kumwa ndipo timbacitambo bzinthu bzinango bzomwe bzimbatithandiza kuti tipitirize kukhala na thanzi labwino. Nyongo iri-yentse yomwe timbacita kuti tikondwese Yahova napo n’tubzinthu tung’ono-tung’ono in’dzacitisa kuti iye atifune kwene-kwene. — Luka 16:10.
Kufambisa bwino karo, kucita masenzeka yakulimbisa thupi, kudya bzakudya bzakupasa thanzi na kukhala wakutambira bwino alendo ni njira zinango za momwe tingakondwesere Yahova (Onani ndime 14)
15. Kodi Yahova ambafuna kuti timbacite tani bzinthu na wanthu winango?
15 Yahova ambadekera mtima wanthu wakulungama na wakusaya kulungama. (Mateu 5:45) Iye akufuna kuti timbadekerembo mtima wanthu winango. Tin’funika lini kulewa ‘kuipa munthu ali-wentse ndipo tilekembo kukhala wandewo, koma tikhale, . . . wakuderekha kwa wanthu wentse.’ (Tito 3:2) Ndipopa, napo kuti wanthu winango ambakhulupira lini Yahova timbakumbuka lini kuti ndife wakufunika kwene-kwene kuposa iwo. (2 Timotio 2:23-25) Ifepano timbafenderera Yahova tikambadekera mtima wanthu wentse.
“FENDERERANI YAHOVA” NAPO POMWE MWACITA PIKADO
16. Kodi munembi wa Salimo 73 adabzibva tani na kupita kwa nthawe?
16 Nthawe zinango, imwepo mungabzibve kuti muli lini wakufendererana na Yahova thangwe ra pikado zomwe mudacita. Ninga momwe tawonera, bzimwebzi bzidacitikirambo munembi wa Salimo 73. Iye adadandaula kuti: “Ine ndikhadasala pang’ono kusocera; ndikhadasala pang’ono kupsereruka.” (Salimo 73:2) Iye adalewa kuti “akhawawidwa,” “akhalibe nzeru” ndipo “akhali ninga cirombo ca m’thengo pamaso” pa Yahova. (Salimo 73:21, 22) Kodi iye adakumbuka kuti Yahova akhamufuna lini pomwe nakuti angadamulekerera lini thangwe ra pikado zace?
17. (a) N’ciyani comwe munembi wa salimoyi akhadziwa napo kuti akhadasunama? (b) N’ciyani comwe tingapfunze na bzomwe iye adacita? (Onanimbo bzithunzi-thunzi.)
17 Napo kuti munembi wa Salimoyi akhabzibva kuti wasiyidwa na Yahova, iye adandokhala na makumbukidwe yamweya kwa nthawe yakucepa. Napo kuti iye akhadasunama akhadziwa kuti akhafunika kufenderera Yahova. Iye adanemba kuti: “Tsono tsapano nthawe zentse ndinamwe [Yahova]; mwandiphata boko langu lamadidi. Mumbanditsogolera na malango yanu. Ndipo mumbandicitisa kuti ndibvumidwe na imwe.” (Salimo 73:23, 24) Ifepano tin’funikambo kukumbira Yahova kuti atipase mphanvu tikawona kuti cikhulupiro cathu cikucepa ayai tikasunama thangwe ra pikado zathu. (Salimo 73:26; 94:18) Napo ticicita pikado zikulu-zikulu tingabwerere kwa Yahova na citsimikizo cakuti iye ali “wakukonzeka kutilekerera” (Salimo 86:5) Tin’funika kufenderera kwene-kwene Yahova maka-maka tikakhala kuti tidasunama. — Salimo 103:13, 14.
Tikawona kuti tin’funika kulimbisa cikhulupiro cathu, tin’funika kufenderera Yahova mwa kumbamala nthawe tikupemba kwa iye na kumbayenda ku mitsonkhano nthawe zentse (Onani ndime 17)
“FENDERERANI MULUNGU” MPAKA KALE-KALE
18. Thangwe ranyi kufenderera Yahova kulibe malire?
18 Kufenderera Yahova kulibe malire ndipo tin’dzasiya lini kupfunza bza iye. Bibliya limbalewa kuti ‘palibe omwe angakwanise kubvesesa’ njira za Yahova na nzeru zace. — Aroma 11:33.
19. Kodi ni citsimikizo ciponi comwe Salimo ambatipasa?
19 Salimo 79:13 ambalewa kuti: “Ifepano wanthu wanu, mabira yomwe mumbausa, tin’dzakutendani mpaka kale-kale. Tin’dzakutumbizani ku mibadwo-mibadwo.” Imwepo mukapitiriza kufenderera Mulungu, mungakhalembo na citsimikizo cakuti mun’dzatambira bzisimbo bzakusaya kumala. Ndipo imwepo mungalewembo mwakutsimikiza kuti: “Mulungu ni tsendwa la mtima wangu ndipo ndinaye mpaka kale-kale.” — Salimo 73:26.
NYIMBO 32 Khalani ku Mbali ya Yahova!
a Wale omwe ambakhala na thupo na wakusunama kwa nthawe itali angafunikire thandizo la adotolo. Kuti mudziwe bzizinji, onani Ntsanza ya Mulindiri, N.° 1 2023 (Chichewa).