NKHANI YAKUPFUNZA 16
NYIMBO 87 Bwerani Tidzalimbisane
Kukhala pa Uxamwali Bwakulimba na Abale Wathu n’Kwabwino kwa Ifepano!
“Onani! Mpsabwino, ndipo mpsakudekeza abale kukhala pabodzi mwakuphatana!” — SALIMO 133:1.
CAKULINGA CA NKHANIYI
Mu nkhani ino, tiniwona momwe tingalimbisire uxamwali bwathu na abale na mpfumakazi zathu na bzisimbo bzomwe timbakhala nabzo tikacita bzimwebzi.
1-2. Kodi n’cinthu ciponi comwe n’cakufunika kwene-kwene kwa Yahova, ndipo iye ambatilimbikisa kuti ticite ciyani?
MOMWE ifepano timbacitira bzinthu na winango ni cinthu cakufunika kwene-kwene kwa Yahova. Jezu adapfunzisa kuti tin’funika kumbafuna mwanzathu ninga momwe timbabzifunira tekha. (Mateu 22:37-39) Bzimwebzi bzimbaphatanidza kudekera mtima napo wale omwe ambatumikira lini Yahova. Tikacita bzimwebzi timbakhala tikutewezera Mulungu wathu omwe “ambacosera dzuwa lace wanthu wabwino na wakuipa, ndipo ambabvumbisira nvula wanthu wakulungama na wakusaya kulungama.” — Mateu 5:45.
2 Yahova ambafuna wanthu wentse, tsono iye ambafuna kwene-kwene wale omwe ambacita bzinthu bzabwino. (Juwau 14:21) Iye ambafuna kuti ifepano timutewezerembo. Ndipopa iye ambatilimbikisa kuti ‘timbafune na mtima wentse’ abale na mpfumakazi zathu. (1 Pedru 4:8; Aroma 12:10) Lufoyi limweri ndakundendemerana na lufoyi lomwe timbalilatiza kwa wanthu wa m’banja mwathu ayai kwa xamwali wathu.
3. Kodi n’ciyani comwe tin’funika kukumbukira pakulewa bza lufoyi?
3 Ifepano tin’funika kukumbukira kuti lufoyi liri ninga muti omwe umbafunika kusamaliridwa kuti ukule. Mpostolo Paulo adauza Akristau kuti: “Pitirizani kulatiza lufoyi kwa abale.” (Ahebereu 13:1) Yahova akufuna kuti lufoyi lathu kwa abale na mpfumakazi zathu lipitirize kukula. Mu nkhani ino, tiniwona kuti n’thangwe ranyi tin’funika kulimbisa uxamwali bwathu na abale na mpfumakazi zathu na momwe tingapitirizire kucita bzimwebzo.
THANGWE RANYI TIN’FUNIKA KUKHALA PA UXAMWALI NA ABALE NA MPFUMAKAZI?
4. Kodi ciyani comwe tin’funika kucita kuti tipitirize kuwona kuti mbverano wathu na abale na mpfumakazi ngwakufunika? (Salimo 133:1) (Onanimbo bzithunzi-thunzi.)
4 Werengani Salimo 133:1. Ifepano timbatawiriza bzomwe nyakunemba salimoyi adalewa bzakuti “mpsabwino” na ‘bzakudekeza’ kukhala pa uxamwali na wale omwe ambatumikira Yahova. Tsono tin’funika kucita mphole. Kumbukirani bza munthu omwe ntsiku zentse ambapita na pafupi na pomwe pana muti ukulu na wakudeka, na kupita kwa nthawe iye angayambe kusiya kuwona kudeka kwa mutiyo. Mwa njira ibodzi-bodziyi, ifepano timbakhala pabodzi na abale na mpfumakazi zathu sumana iri-yentse. Ndipo bzimwebzi bzingacitise kuti tileke kuwona kufunika kwa mbverano omwe tinawo na iwo. Kodi n’ciyani comwe tingacite kuti bzimwebzi bzileke kucitika? Kuti ifepano tikwanise kuwona kuti mbverano omwe tinayo na abale na mpfumakazi ngwakufunika, tin’funika kukulisa lufoyi lathu kwa iwo mwa kumbapambula nthawe yakukumbukira momwe m’bodzi na m’bodzi aliri wakufunika kwa ifepano pabodzi na gwere.
Lekani kusiya kumbawona kuti mbverano omwe ulipo pakati pa abale na mpfumakazi zathu ngwakufunika (Onani ndime 4)
5. Kodi n’ciyani comwe cimbacitika wanthu akawona lufoyi lomwe liripo pakati pathu?
5 Wanthu winango omwe ambagumanika pa mitsonkhano yathu pa ulendo bwakuyamba iwo ambadabwa kwene-kwene na momwe timbalatizirana lufoyi. Bzimwebzi bzimbacitisa kuti akhulupire kuti ndifedi Akristau wacadidi. Jezu caiyeyo adalewa kuti: “Na bzimwebzi, wentse an’dzadziwa kuti ndimwe anyakupfunza wangu mukambafunana.” (Juwau 13:35) Onani bzomwe bzidacitikira Chaithra, omwe akhapfunza ku universidade ndipo akhapfunzambo Bibliya na Mboni za Yahova. Iye adabvuma mcemo kuti adzagumanike pa mtsonkhano wa cigawo. Pambuyo pa ntsiku ibodzi ya mtsonkhanoyo, iye adauza omwe akhamupfunzisa Bibliya kuti: “Abereki wangu akanati kundikumbatira kale. Tsono pa mtsonkhano wanu inepano ndidakumbatiridwa na wanthu 52 pa ntsiku ibodzi yokha basi! Inepano ndawona lufoyi la Yahova likulatizidwa na abale. Ndipo ndikufunambo kucita mbali ya banja limweri.” Chaithra adapitiriza kuyenda patsogolo mwauzimu ndipo adabatizidwa mu 2024. Bzimwebzi bzikulatiza kuti kazinji-kazinji wanthu omwe ambafunisisa kudziwa bzizinji akambawona mabasa yathu kuphatanidzambo lufoyi lomwe timbalatizana pakati pathu, bzimbacitisa kuti iwo afune kutumikira Yahova. — Mateu 5:16.
6. Tikakhala kuti tidasunama, kodi abale na mpfumakazi angatithandize tani?
6 Kukhala pa uxamwali bwakulimba na abale na mpfumakazi zathu kungacitise kuti tikhale wakukhotcerereka. Paulo adauza Akristau kuti: “Pitirizani kumbalimbikisana ntsiku iri-yentse . . . kuti mphanvu yakupumpsa ya pikado ileke kuumisa mtima ne na m’bodzi wa imwepo.” (Ahebereu 3:13) Nthawe zinango tingakhale wakusunama ndipo tingawone kuti mpsakunesa kupitiriza kucita bzinthu bzabwino. Pa nthawe imweyi, Yahova angacitise m’bale kuzindikira bzimwebzo acitipasa thandizo lomwe tikufunikira. (Salimo 73:2, 17, 23) Kulewa cadidi, tikathandizidwa na kulimbikisidwa mwa njira imweyi timbabzibva bwino kwene-kwene.
7. Kodi lufoyi limbatithandiza tani kuti tikhale wakubverana? (Akolose 3:13, 14)
7 Ifepano timbacita mbali ya wanthu omwe ambacita nyongo yakulatizana lufoyi ndipo bzimwebzi bzimbabweresa bzisimbo bzizinji. (1 Juwau 4:11) Lufoyi limbatithandiza kuti ‘tipitirize kupirirana’ ndipo limbaticitisambo kuti tikhale wakubverana na abale na mpfumakazi zathu. (Werengani Akolose 3:13, 14; Aefezo 4:2-6) Mitsonkhano yathu imbakhala mbuto yakudekeza kwene-kwene kuposa mbuto inango iri-yentse ya pa dziko la pantsi.
MBALATIZANANI ULEMU
8. Kodi Yahova ambatithandiza tani kuti tikhale wakubverana?
8 Yahova ambacitisa kuti tikhale wakubverana na abale na mpfumakazi wa pa dziko lentse. Bzimwebzi bzimbakwanisika napo kuti ndife wakuperewera. (1 Akolinto 12:25) Bibliya limbalewa kuti ifepano tidacita ‘kupfunzisidwa na Mulungu kuti timbafunane.’ (1 Atesalonika 4:9) Ayai kulewa kunango mu Fala lace Bibliya, Yahova ambatiuza bzomwe tin’funikira kucita kuti tikhale pa uxamwali bwakulimba na abale na mpfumakazi zathu. Tsono kuti ‘tipfunzisidwe na Mulungu’ tin’funika kumbapfunza mwakusamala bzomwe Bibliya limbalewa na kuphatisambo basa bzomwe timbapfunzabzo. (Ahebereu 4:12; Tiyago 1:25) Mboni za Yahova zimbacita nyongo yakucita bzimwebzi.
9. Mwakubverana na Aroma 12:9-13, kodi kulemekeza winango kumbaphatanidza ciyani?
9 Kodi n’ciyani comwe Bibliya limbapfunzisa pakulewa bza momwe tingakhalire pa uxamwali na abale na mpfumakazi zathu? Onani bzomwe Paulo adalewa pa Aroma 12:9-13. (Werengani.) Cinthu cibodzi cakufunika comwe Paulo adalewa m’mafala yace, ndico ‘kumbakhala wakuyamba pakumbalatizana ulemu.’ Bzimwebzi bzimbaphatanidza kukhala wakuyamba ‘kufuna na mtima wentse’ ayai kulatiza lufoyi abale na mpfumakazi zathu. Tingacite bzimwebzo mwa kukhala wakulekerera, kutambira bwino alendo na kukhalambo wakupasa. (Aefezo 4:32) Imwepo mun’funika lini kucita kudikhirira kuti m’bale ayambe ndiye kufuna kukhala namwe pa uxamwali. M’mbuto mwace, imwepo mun’funika ‘kukhala wakuyamba’ kucita bzimwebzo. Mukacita bzimwebzi, imwepo mun’dzatawiriza mafala yomwe Jezu adalewa yakuti: “Kupasa kumbabweresa cikondweso cikulu kuposa kutambira.” — Mabasa 20:35.
10. Kodi tingakhale tani wanyongo “mwa [kuthandiza] winango”? (Onanimbo cithunzi-thunzi.)
10 Pomwe Paulo adamala kulewa kuti mbakhalani wakuyamba pakumbalatizana ulemu, patsogolo pace iye adati: “Mbaphatani basa na nyongo lekani kumbacita utofu.” Munthu omwe ambaphata basa na nyongo ambacita basalo na mtima wentse. Iye akapasidwa basa kuti alicite, ambalicita bwino basalo. Pa Mimwani 3:27, 28 pambatilimbikisa kuti: “Leka kusiya kucitira bzabwino wale omwe un’funika kuwacitira bzimwebzo, ukakhala iwepo un’kwanisa kuwathandiza.” Na tenepo, tikawona kuti munthu munango akufunikira thandizo timbacita bzomwe tingakwanise kuti timuthandize. Timbazeza lini kucita bzimwebzo ndipo timbawona lini kuti munthu munango ndiye omwe akufunikira kumuthandiza. — 1 Juwau 3:17, 18.
Mbakhalani wakuyamba kuthandiza abale na mpfumakazi zanu akafunikira thandizo (Onani ndime 10)
11. Kodi ni njira inango iponi yomwe tingalemekezere abale na mpfumakazi zathu?
11 Njira inango ya momwe tingalemekezere abale na mpfumakazi zathu ndiyo kuleka kucedwa kuwalekerera akatiphonyera. Pa Aefezo 4:26 pambalewa kuti: “Lekani kukhala mudakalipa mpaka dzuwa kumira.” Thangwe ranyi kucita bzimwebzi n’kwakufunika? Thangwe vesi 27 limbalewa kuti tikapitiriza kukhala tidakalipa tin’dzakhala ‘tikum’pasa mpata Dyabu.’ Ndipo m’Bibliya, Yahova ambatilimbikisa kazinji-kentse kuti timbalekererane. Pa Akolose 3:13 pambalewa kuti tin’funika “[kupitiriza] . . . kulekererana na mtima wentse.” Kulekerera bzakuphonya bza winango ni njira yabwino yomwe ingalimbisire uxamwali bwathu na iwo. Tikacita bzimwebzi, timbacitisa kuti ‘tipitirize kukhala wakuphatana mwauzimu na kukhala mwa mtendere pakati pathu.’ (Aefezo 4:3) Kulewa cadidi, tikalekerera winango bzimbacitisa kuti gulu la Yahova lipitirize kukhala lakubverana na la mtendere.
12. Kodi Yahova ambatithandiza tani kuti timbalekerere abale na mpfumakazi zathu?
12 Cadidi n’cakuti bzimbakhala bzakunesa kulekerera munthu omwe watiphonyera. Tsono Yahova ambatithandiza mwakuphatisa basa mzimu wace wakucena kuti tikwanise kulekerera anzathu. Pambuyo pa Bibliya kutiuza kuti “timbafunane na mtima wentse” nakuti “timbaphatembo basa na nyongo,” iro limbatilimbikisambo kuti: “Mbabvumani kuti mzimu wakucena wa Mulungu umbakupaseni mphanvu.” Bzimwebzi bzikuthandauza kuti “mzimu wakucena” wa Mulungu ungaticitise kuti tikhale wa nyongo na wakukondwa. (Aroma 12:11.) Bzimwebzi bzin’funa kulewa kuti mzimu wa Mulungu ungatithandize kuti tilatize lufoyi kwa abale na mpfumakazi zathu na kuwalekererambo na mtima wentse. Tenepo, tin’funika kukumbira thandizo la Yahova kuti tikwanise kucita bzimwebzo. — Luka 11:13.
“MULEKE KUMBAPAMBULANA PAKATI PANU”
13. Kodi n’ciyani comwe cingacitise kuti mu gwere mukhale na m’gawano?
13 Mu gulu la Yahova timbagumana “wanthu wa mtundu uli-wentse.” (1 Timotio 2:3, 4) Munthu ali-wentse adakulira n’cikhalidwe cakusiyana na winango ndipo adagumanambo na bzinthu bzakusiyana-siyana pa moyo wace. Bzimwebzi ndibzo bzomwe bzimbaticitisa kuti tisankhule bzinthu mwakusiyana pa nkhani ninga kabvalidwe, kubzidekesa, kusankhula masenzeka na kusankhula thandizo la ulapi lomwe tingatambire. Tsono tikasaya kucita mphole bzimwebzi bzingacitise kuti mu gwere mukhale na m’gawano. (Aroma 14:4; 1 Akolinto 1:10) ‘Yahova ambatipfunzisa kuti munthu walufoyi’ ambawona lini kuti bzomwe ambasankhula mpsabwino kwene-kwene kuposa bza winango. — Afilipi 2:3.
14. Kodi nthawe zentse tin’funika kucita nyongo ya kucita ciyani, ndipo thangwe ranyi?
14 Ifepano tin’funika kucita nyongo yakucitisa kuti gwere likhale lakubverana nthawe zentse mwa kutsangalaza na kulimbikisa winango. (1 Atesalonika 5:11) M’magole yakumalizira yano, wanthu azinji omwe akhadafowoka na kucosedwa abwerera m’gwere. Ndipo ifepano tidawatambira na manja mawiri! (2 Akolinto 2:8) Onani bzomwe mpfumakazi inango yomwe ikhadafowoka kwa magole 10 idalewa. Iyo idati: “Wanthu wentse akhambandimusa ndipo akhambandisekerera.” (Mabasa 3:19) Kodi bzomwe abale wa m’gwereli adacita bzidacitisa kuti mpfumakaziyi ibzibve tani? Iyo idati: “Yahova adandithandiza kuti ndikhale pomwe wakukondwa.” Nthawe zentse tikacita nyongo kuti tilimbikise winango, Jezu an’dzatiphatisa basa kuti titsangalaze “wakuneta na wakulemedwa.” — Mateu 11:28, 29.
15. Kodi ni cinthu cinango ciponi comwe cingacitise kuti tikhale wakubverana na abale na mpfumakazi zathu? (Onanimbo cithunzi-thunzi.)
15 Cinthu cinango comwe cingacitise kuti tikhale wakubverana na abale na mpfumakazi zathu ni bzomwe timbalewa. Pa Djobi 12:11 pambati: “Kodi khutu limbasiyanisa lini mafala ninga momwe lirime limbasiyanisira kukoma kwa cakudya?” Nyakuphika cakudya ambayamba kulawidza cakudyaco kuti abve penu cikukoma pomwe akanati kupasa wanthu, mwa njira ibodzi-bodziyi pomwe tikanati kulewa cinthu tin’funika kuyamba kukumbuka bwino-bwino. (Salimo 141:3) Nthawe zentse tin’funika kutsimikizira kuti bzomwe tin’lewa bzinitsangalaza na ‘kulimbikisa wale omwe akutitetekera.’ — Aefezo 4:29.
Mbayambani kukumbuka bwino-bwino mukanati kulewa cinthu (Onani ndime 15)
16. Kodi ni mbani maka-maka omwe an’funika kucita mphole na bzomwe ambalewa?
16 Misolo ya mabanja na abereki an’funika kumbacita mphole na bzomwe ambalewa. Iwo an’funika kumbalewalewa mu njira yomwe ingalimbikise banja lawo. (Akolose 3:19, 21; Tito 2:4) Akulu omwe ana udindo wakutumikira ninga abusa an’funikambo kumbatsangalaza mabira ya Yahova. (Zaiya 32:1, 2; Agalatiya 6:1) Mwani munango wa m’Bibliya umbatikumbusa kuti: “Mafala yakulewedwa pa nthawe yakuthemera njabwino kwene-kwene!” — Mimwani 15:23.
“MBALATIZANANI LUFOYI LACADIDI NA CIRUNGAMO”
17. Kodi tingafune tani abale na mpfumakazi zathu na mtima wentse?
17 Mpostolo Juwau adatilimbikisa kuti tin’funika kumbafunana sikuti na mafala na pamulomo pokha koma “tin’funika kumbalatizana lufoyi lacadidi m’bzicito bzathu.” (1 Juwau 3:18) Tin’funika kumbafuna abale na mpfumakazi zathu na mtima wentse. Kodi tingacite tani bzimwebzi? Tikambamala nthawe na abale na mpfumakazi zathu, tin’dzakhala pa uxamwali bwakulimba na iwo ndipo lufoyi lathu lin’dzakula. Tenepo mbanyang’anani mipata kuti mumbakhale na abale na mpfumakazi zanu pomwe muli pa mitsonkhano na mu upalizi. Ndipo mbakawazungirani. Tikacita bzimwebzi, bzin’dzawonekeratu padeca kuti ‘tikupfunzisidwa na Mulungu kuti timbafunane.’ (1 Atesalonika 4:9) Kuthumizira bzimwebzi, tin’dzapitiriza kuwona kuti “mpsabwino, ndipo mpsakudekeza abale kukhala pabodzi mwakuphatana!” — Salimo 133:1.
NYIMBO 90 Timbalimbisane