NKHANI YAKUPFUNZA 28
NYIMBO 88 Tidziwiseni Njira Zanu
Thangwe Ranyi Tin’funika Kumbanyang’ana Malango?
“Wale omwe ambanyang’ana malango ambakhala na nzeru.” — MIMWANI 13:10.
CAKULINGA CA NKHANIYI
Bzomwe tingacite kuti tigumane phindu na malango yomwe timbatambira.
1. Kodi tingacite tani bzakusankhula bza nzeru bzomwe bzingacitise kuti bzinthu bzitifambire bwino? (Mimwani 13:10; 15:22)
TENTSENEFE timbafuna kusankhula bzinthu mwa nzeru kuti bzinthu bzitifambire bwino. Fala la Mulungu limbatiuza kuti tikwanise kucita bzimwebzo timbafunikira kukumbira malango. — Werengani Mimwani 13:10; 15:22.
2. Kodi Yahova akupicira kuti an’dzaticitira ciyani?
2 Kulewa cadidi, munthu m’bodzi omwe angatipase malango yabwino ni Baba wathu Yahova. Ndipopa tin’funika kupemba kwa iye ticimukumbira kuti atipase nzeru. Iye akupicira kuti an’dzatithandiza mwa kulewa kuti: “Nin’dzakupasa malango ndicikunyang’anisisa.” (Salimo 32:8) Mafalaya yakulatiza kuti Yahova ambacita bzizinji sikuti kundotipasa malango. Iye ambacita nafe thupo ndipo ambatithandiza kuphatisa basa malango yace.
3. Kodi tin’cezerana ciyani mu nkhani ino?
3 Mu nkhani ino, tin’phatisa basa Fala la Mulungu kuti litithandize kutawira mibvunzo minai iyi: (1) Kodi ni khalidwe liponi lomwe nin’funika kukhala nalo kuti ndigumane phindu na malango yabwino? (2) Mbani omwe angandipase malango yabwino? (3) Kodi ningalatize tani kuti ndikufunikiradi malango? (4) Thangwe ranyi nin’funika kutcenkha kukumbira wanthu winango kuti andisankhulire bzakucita?
KODI NI KHALIDWE LIPONI LOMWE NIN’FUNIKA KUKHALA NALO?
4. Kuti tigumane phindu na malango yabwino, ni khalidwe liponi lomwe tin’funika kukhala nalo?
4 Tin’funika kukhala wakubzicepesa kuti tigumane phindu na malango yabwino. Tin’funika kubvuma kuti tikufunikira thandizo la wanthu winango kuti tisankhule bwino bzakucita bzikakhala kuti tagumana na bzinthu bzomwe tikhanati kugumana nabzo kale. Kuthumizira bzimwebzi, tin’funika kuzindikira kuti timbadziwa lini bzinthu bzentse. Tikasaya kukhala wakubzicepesa bzin’dzakhala bzakunesa kuti Yahova atithandize ndipo malango yentse yomwe tin’dzatambira pomwe tikuwerenga Fala la Mulungu yan’dzakhala ninga madzi yomwe yakondoyerera pa mwala. (Mika 6:8; 1 Pedru 5:5) Na tenepo, tikakhala wakubzicepesa mwakamfulumize tin’dzaphatisa basa malango yomwe timbayabva m’Bibliya ticigumana phindu.
5. Kodi ni bzinthu bziponi bzomwe bzingadacitisa kuti Davide akhale wakubzikuza?
5 Mbatiwoneni bzomwe tingapfunze na bzomwe Mambo Davide adacita. Bzinthu bzomwe iye adacita pa moyo wace bzingadamucitisa kuti akhale wakubzikuza. Pomwe iye akhanati kukhala mambo akhadziwika ninga muimbi waluso. Ndipo adafika pakucemeredwambo na mambo Sauli kuti akaimbe. (1 Samuyeli 16:18, 19) Pomwe Yahova adasankhula Davide kuti akhale mambo, iye adamucitisa kukhala na mzimu wakucena omwe udamucitisa kukhala wamphanvu. (1 Samuyeli 16:11-13) Iye akhabvekera pakati pa wanthu wace thangwe ra kukunda anyamadulanthaka kuphatanidzambo cinzonzomtali cakucemeredwa Goliyati. (1 Samuyeli 17:37, 50; 18:7) Bzingadakhala kuti Davide ngwakubzikuza angadakumbuka kuti pakuti iye adakwanisa kucita bzinthu bzentsenebzi angadafunikira lini kubva malango ya wanthu winango. Tsono Davide akhali wakubzicepesa.
6. Kodi timbadziwa tani kuti Davide adabvuma malango? (Onanimbo cithunzi-thunzi.)
6 Pambuyo pa kukhala mambo, Davide adasankhula axamwali omwe angadamupasa malango yabwino. (1 Nkhani 27:32-34) Bzimwebzi mpsakudabwisa lini thangwe napo pomwe akhanati kukhala mambo, iye akhatetekera kale malango yabwino yomwe wanthu winango akhamupasa. Iye alibe kundobvuma malango yakucokera kwa amuna okha koma adabvumambo malango yomwe adapasidwa na mkazi munango wakucemeredwa Abigayeli. Abigayeli akhadalowodwa na Nabali omwe akhali mwamuna wakubzikuza, akhatenda lini ndipo akhalemekeza lini winango. Mwakubzicepesa, Davide adabvuma kuphatisa basa malango yomwe adapasidwa na Abigayeli ndipo bzimwebzi bzidacitisa kuti iye atcenkhe kucita bzinthu bzakuipa. — 1 Samuyeli 25:2, 3, 21-25, 32-34.
Mambo Davide mwakubzicepesa adabvuma kuphatisa basa malango ya Abigayeli (Onani ndime 6)
7. Kodi n’ciyani comwe tingapfunze na Davide? (Mpalizi 4:13) (Onanimbo bzithunzi-thunzi.)
7 Ifepano tingapfunze bzinthu bzizinji na Davide. Pinango tingadziwe kucita bwino cinthu cinango ayai pinango tingakhale na udindo. Napo bziri tenepo, ifepano tin’funika lini kukumbuka kuti timbadziwa bzinthu bzentse nakuti tikufunikira lini kupasidwa malango. Ninga Davide, tin’funika kukhala wakukonzeka kutetekera malango yabwino bziribe basa munthu omwe angayaperekeyo. (Werengani Mpalizi 4:13.) Tikacita tenepo, ifepano tin’dzatcenkha kucita bzinthu bzakuipa bzomwe bzingatibweresere mabvuto na bzomwe bzingabwereserembo mabvuto wanthu winango.
Tin’funika kukhala wakukonzeka kubvera malango yabwino yomwe tapasidwa bziribe basa munthu omwe angatipaseyo (Onani ndime 7)c
MBANI OMWE ANGANDIPASE MALANGO YABWINO?
8. Thangwe ranyi Jonatani akhali wakuthemera kupereka malango kwa Davide?
8 Mbatiwoneni pomwe cinthu cinango comwe tingapfunze na Davide. Iye adatetekera malango ya wanthu omwe akhali pa uxamwali bwabwino na Yahova ndipo iwo akhabvesesambo bwino mabvuto yomwe iye akhagumana nayo. Pomwe Davide akhafuna kudziwa penu Mambo Sauli angadakhala pomwe pa mtendere na iye, Davideyo adabvera malango yakucokera kwa mwana wa Sauli omwe akhali Jonatani. Thangwe ranyi Jonatani adakwanisa kupasa malango yabwino Davide? Thangwe Jonatani akhali pa uxamwali bwabwino na Yahova ndipo akhamudziwa bwino Sauli. (1 Samuyeli 20:9-13) Kodi bzimwebzi bzingatipfunzise ciyani?
9. Tikafuna malango, tin’funika kukumbira yani? Fotokozani. (Mimwani 13:20)
9 Ifepano tikafunikira malango tingacite bwino kukumbira malangoyo munthu omwe ali pa uxamwali bwabwino na Yahova na omwe akuidziwa bwino nkhaniyo.a (Werengani Mimwani 13:20.) Tiyezezere kuti m’bale munango wacitswaka akunyang’ana munthu wabwino kuti adzamange naye banja. Kodi mbani omwe angamupase malango yabwino? Xamwali wace omwe akanati kulowola angamupase malango yakuthandiza akaphatisa basa Bibliya. Tsono m’bale wacitswaka umweyu angatambire malango yabwino kwene-kwene na yakuthandiza akabvunza banja lomwe ndakukhwima mwauzimu na lomwe liri lakukondwa m’banja kwa magole mazinji.
10. Kodi n’ciyani comwe tin’cezerana tsapano?
10 Tacezerana bza khalidwe lomwe tin’funika kukhala nalo na omwe angatipase malango yabwino. Tsapano bwerani ticezerane momwe tingalatizire penu tikufunikiradi malango na penu tingafunikire kukumbira wanthu winango kuti atisankhulire bzakucita.
KODI NINGALATIZE TANI KUTI NDIKUFUNIKIRADI MALANGO?
11-12. (a) Kodi n’ciyani comwe munthu angacite nthawe zinango? (b) Kodi n’ciyani comwe Mambo Robowamu adacita pomwe akhafuna kucita cakusankhula cakufunika?
11 Nthawe zinango munthu angalatize ninga kuti akufuna malango pomwe cadidi cace n’cakuti iye akondofuna kuti wanthu winango abverane na bzomwe iye akhadasankhula kale. Munthu umweyu, kulewa cadidi akufuna lini malango. Iye akufunikira kupfunza na bzomwe bzidacitikira Mambo Robowamu.
12 Robowamu adakhala mambo wa Ajirayeri pambuyo pa pai wace Salomau kufa. Pomwe Robowamu adakhala mambo, wanthu akhana bzinthu bzabwino, tsono wanthuwo akhabzibva kuti Salomau adacitisa kuti basa lawo likhale lakuwawa kwene-kwene. Iwo adayenda kukakumbira Robowamu kuti acepese basalo licileka kukhala lakuwawa. Robowamu adakumbira wanthuwo kuti amupase nthawe kuti aikumbukire nkhaniyo aciwona bzomwe angadacita. Iye adayamba bwino mwa kukumbira malango amuna wacikulire omwe adathandiza Salomau. (1 Amambo 12:2-7) Tsono iye adalamba malango yomwe adapasidwa na amuna amwewa. Kodi n’ciyani comwe pinango cidamucitisa kuti acite bzimwebzi? Pinango Robowamu akhadasankhula kale bzakucita, ndipo akhadikhirira kuti amuna wale abverane na bzomwe iye akhadasankhulabzo. Ndipopa pomwe iye adakumbira malango axamwali wace omwe akhali maswaka, iwo adabverana na bzomwe iye akhakumbuka, na tenepo iye adakomedwa na bzomwe axamwali wacewo adamuuza. (1 Amambo 12:8-14) Robowamu adatawira wanthu wale mwakubverana na bzomwe azixamwali wace wale akhadamuuza. Bzimwebzi bzidacitisa kuti wanthuwo agawanike ndipo kuyambira pamwepo Robowamu adagumana na mabvuto makulu. — 1 Amambo 12:16-19.
13.Kodi tingalatize tani kuti tikufunikiradi malango?
13 Kodi n’ciyani comwe tingapfunze na Robowamu? Ifepano tikakumbira malango tin’funika kulatiza kuti tikufunikiradi malangoyo. Kodi tingalatize tani kuti tikucita bzimwebzo? Pinango tingabzibvunze kuti: ‘Kodi nimbakumbira malango ndipo patsogolo pace nimbalamba kuyaphatisa basa thangwe rakuti ndibzo lini bzomwe ndikhafuna kubva?’ Mbatiwoneni ciratizo.
14. Tikatambira malango, n’ciyani comwe tin’funika kukumbukira? Fotokozani. (Onanimbo cithunzi-thunzi.)
14 Tiyezezere kuti m’bale munango watambira mwayi wakuphata basa lomwe an’tambira kobiri zizinji kwene-kwene. Tsono pomwe iye akanati kubvuma basalo wakumbira malango kwa mkulu munango. Iye akufotokozera mkuluyo kuti basalo lin’dzacitisa kuti akhale kutali na banja lace kwa nthawe itali. Mkuluyo akukumbusa m’baleyo bza mitemo ya m’Bibliya yomwe imbalatiza kuti cakuyamba iye an’funika kusamalira banja lacelo mwauzimu. (Aefezo 6:4; 1 Timotio 5:8) M’baleyo akubverana lini na bzomwe mkuluyo akumuuza ndipo akupitiriza kubvunza winango m’gwere mpaka kugumana munthu omwe animuuza kuti iye angabvume basalo. Kodi m’baleyu akunyang’anadi malango ayai pinango wasankhula kale koma akondofuna munthu kuti abverane na bzomwe asankhulabzo? Tin’funika kukumbukira kuti mtima wathu ungatipumpse. (Jeremiya 17:9) Nthawe zinango malango yomwe timbafunikira yambakhala yale yomwe tikufuna lini kuyabva.
Kodi tikufunikiradi malango yabwino ayai pinango tikondonyang’ana munthu kuti abverane na bzomwe tasankhula kale? (Onani ndime 14)
KODI NIN’FUNIKA KUUZA WANTHU WINANGO KUTI ANDISANKHULIRE BZAKUCITA?
15. Kodi tin’funika kutcenkha kucita ciyani, ndipo thangwe ranyi?
15 Ali-wentse wa ifepano ana udindo bwakusankhula yekha bzakucita. (Agalatiya 6:4, 5) Ninga momwe tawonera, Mkristau wanzeru ambanyang’ana malango m’Fala la Mulungu na kwa Akristau wakukhwima mwauzimu pomwe akanati kusankhula kucita cinthu. Na tenepo tin’funika kutcenkha kukumbira kuti winango atisankhulire bzakucita. Winango angacite bzimwebzo mwakubvunza munthu omwe ambamuthemba kuti: “Kodi n’ciyani comwe imwepo mungadacita bzingadakhala kuti mukugumana na bvuto ninga languli?” Winango pinango angandosankhule kucita bzomwe munthu munango adasankhula mwakusaya kukumbuka bwino.
16. Kodi ni cakusankhula ciponi comwe abale wa gwere la ku Kolinto akhafunika kucita pakulewa bza nyama yomwe ikhaperekedwa kwa bzifanikiso? (1 Akolinto 8:7; 10:25, 26)
16 Kumbukirani bza cakusankhula comwe Akristau wa m’gwere la ku Kolinto akhafunika kucita pakulewa bza nyama yomwe ikhaperekedwa kwa bzifanikiso. Paulo adawanembera Akristauwo kuti: “Timbadziwa kuti bzifanikiso n’cinthu lini pa dziko ndipo palibe Mulungu munango, koma m’bodzi yekha.” (1 Akolinto 8:4) Thangwe ra bzomwe Paulo adalewa, abale winango wa gwere adasankhula kuti angadadya nyama zomwe agula ku bazali napo bzingadakhala kuti izo zaperekedwa kwa bzifanikiso. Tsono winango adasankhula kuleka kudya nyama imweyi thangwe cikumbu-mtima cawo cikhawabvumiza lini. (Werengani 1 Akolinto 8:7; 10:25, 26.) Cimweci cikhali cakusankhula ca munthu ali-wentse payekha. Paulo akhalimbikisa lini abale wa ku Kolinto kuti ambacitire bzakusankhula winango ayai kuwauza kuti atewezere bzomwe winango akhacita. Ali-wentse wa iwo ‘angadadzabzitawirira yekha kwa Mulungu.’ — Aroma 14:10-12
17. Kodi n’ciyani comwe cingacitike tikambandotewezera bzomwe winango asankhula kucita? Fotokozani. (Onanimbo bzithunzi-thunzi.)
17 Kodi bzimwebzi bzingaticikirembo tani ntsiku zino? Kumbukirani bza nkhani ya tubzigawo twa mulopa. Mkristau ali-wentse an’funika kubzisankhulira yekha penu an’bvuma ayai kulamba tubzigawo tumwetu.b Pinango tingawone kuti mpsakunesa kubvesesa nkhani imweyi. Tsono kucita cakusankhula pa nkhani imweyi n’ca munthu ali-wentse payekha. (Aroma 14:4) Tikatewezera bzomwe wanthu winango asankhula, ifepano cipo ticidzakhala wanzeru. Ifepano tingakhale wanzeru pokha-pokha tikaphatisa basa nfundo za m’Bibliya. (Ahebereu 5:14) Tsono ni pa nthawe iponi pomwe tingakumbire malango m’bale wakukhwima mwauzimu? Ni pambuyo pa kufufudza tekha ticiwona kuti tikadafunikira thandizo kuti tibvesese momwe mitemo ya m’Bibliya ikubveranira na nkhaniyo.
Tin’funika kukumbira malango pambuyo pakuti tafufudza kale tekha (Onani ndime 17)
PITIRIZANI KUNYANG’ANA MALANGO
18. Kodi n’ciyani comwe Yahova adaticitira?
18 Yahova adalatiza kuti ambatikhulupira mwakuti adatipasa mwayi wakuti timbasankhule tekha bzakucita. Iye adatipasa Fala lace Bibliya. Ndipo ambatipasambo axamwali wanzeru omwe angatithandize kukumbukira mitemo ya m’Bibliya. Yahova adakwanirisa udindo bwace ninga Pai. (Mimwani 3:21-23) N’ciyani comwe tingacite kuti tilatize kuti timbamutenda?
19. Kodi n’ciyani comwe tingacite kuti tipitirize kukondwesa Yahova?
19 Abereki ambakomedwa kwene-kwene akawona wana wawo akukula acikhala atumiki wanzeru wa Yahova omwe ambathandiza winango. Mu njira ibodzi-bodziyi, Yahova ambakomedwa kwene-kwene akatiwona tikukula mwauzimu, tikunyang’ana malango na kucita bzakusankhula bzomwe bzimbamutumbizisa.
NYIMBO 127 Mtundu wa Munthu Omwe Ndin’funika Kukhala
a Nthawe zinango Akristau angakumbire malango wale omwe ambanamata lini Yahova pa nkhani ya kobiri, thandizo la ulapi na bzinango.
b Kuti mubvesese bwino nkhani imweyi, onani pfunziro 39 nfundo 5 na mbali yakuti “Onani Pomwe Ibzi” mu bukhu lakuti Khalani na Moyo Wakukondwa Mpaka Kale-kale!
c BZOMWE BZIKUCITIKA PA CITHUNZI-THUNZI Tsamba: Mkulu wa gwere akupereka malango kwa mkulu mwanzace yakulewa bza momwe alewalewera pa mtsonkhano omwe amala kuucita.