“Yahova Ndiye Mwenekaciro Nkhondo”

Mu 1990, boma la França lidalewa kuti mthambi yathu ku França ikhafunika kupereka mtsonkho pa bzakupereka bzomwe iyo ikhadatambira kuyambira mu gole la 1993 mpaka 1996. Tidayezera kumalisa nkhaniyo na thandizo la nyumba za mphala za ku França, tsono bziribe kuphata basa. Tidayezera pomwe kukumbira kaciwiri kuti iwo atithandize, tsono mtawiro udakhala ubodzi-bodzi ndipo boma lidatenga kobiri zathu ku banko zakupitirira maeuro 4.5 midyau (zomwe ni madola yakukwana 6.3 midyau). Kuti tikwanise kubwezeredwa kobiriyo, tidawona kuti bzikhali bwino kuyendesa nkhaniyo ku Nyumba ya Mphala Yakuwona bza Ufulu bwa Wanthu ya ku Europa. Tsono pomwe Nyumba ya Mphalayo ikhanati kubva nkhani yathu idatiuza kuti tikhafunikira kugumana na anyakuwona nkhani za malamulo wa boma la França pabodzi na muimikiri wa nyumba ya mphala ya ku Europa kuti awone penu tingadabverana pomwe nkhaniyo ikhanati kuyendesedwa ku Nyumba ya Mphalayo.

Ifepano tikhakumbuka kuti muimikiri wa nyumba ya mphalayo angadatingingimiza kuti timalise nkhaniyo mwa kupereka pang’ono kobiri zomwe boma la França likhadakumbira kuti tipereke. Tsono ifepano tikhadziwa kuti Yahova angadakomedwa lini bzingadakhala kuti tawapasa kobiri iri-yentse. Abale na mpfumakazi akhadacita bzakupereka kuti athandizire Umambo ndipopa kobiriyo ikhali lini ya boma. (Mateu 22:21) Tsono ifepano tidabvuma kuyenda kumweko kuti tilatize kuti tikhalemekeza malamulo ya Nyumba ya Mphala ya ku Europa.

Ifepano tidatsonkhana mu cipinda cibodzi cakudeka kwene-kwene ca Nyumba ya Mphalayo. Mtsonkhanoyo ulibe kuyamba bwino. Muimikiri wa Nyumba ya Mphala ya ku Europayo adayamba na kulewa kuti Mboni za Yahova zikhafunikira kupereka pang’ono mtsonkho omwe zikhadakumbiridwa na boma la França. Mzimu wa Mulungu udacitisa kuti tibvunze kuti: “Kodi imwepo mukudziwa kuti boma la França latitengera kale kobiri zakupitirira maeuro 4.5 midyau ku banko?”

Pomwe muimikiriyo adadziwa bzimwebzo, adadabwa ndipo adakalipa kwene-kwene na bzomwe boma la França likhadacita. Pomwe nyakuwona malamulo wa boma adatsimikizira bzimwebzo, muimikiriyo adacinjiratu momwe akhaiwonera nkhaniyo. Iye adawatsimula ndipo adamalisa nkhaniyo pa nthawe imweyoletu. Ndidazindikira kuti Yahova adacinja bzinthu bzentse na cakulinga cakuti ifepano tiganyali nkhaniyo. Ifepano tidacoka mu nyumba ya mphalayo tiri wakukondwa ndipo tiribe kukhulupira bzomwe bzikhadacitikabzo.

Pa ntsiku ya 30 Junho gole la 2011, Nyumba ya Mphala Yakuwona bza Ufulu bwa Wanthu ya ku Europa idalatiza kuti mtsonkho omwe boma la França likhadakumbira ukhalibe kunembedwa m’malamulo ndipo idauza bomalo kuti libwezere kobiri zomwe likhadatenga, ndipo liperekembo na juro! Cakusankhula cimweci cikukhotcerera kunamata kwakucena ku França mpaka lero. Mbvunzo omwe tidaucita ule udakhala ninga mwala omwe udapha Goliyati thangwe udacinja nkhani yentsene. Thangwe ranyi ifepano tidaganyali? Thangwe ninga momwe Davide adauzira Goliyati, “Yahova ndiye mwenekaciro nkhondo.” — 1 Samuyeli 17:45-47.

Tsono ifepano tiribe kundoganyali nkhani imweyi basi ku nyumba za mphala. Napo kuti maboma na magereja yamphanvu yambatitsutsa, tidaganyali nkhani zakukwana 1225 mu nyumba za mphala za m’madziko 70 na nyumba za mphala zomwe zimbatonga nkhani zomwe ziribe kutongedwa bwino m’madziko yakusiyana-siyana. Kuganyali kumweku kwacitisa kuti tikhale na ufulu bwakunamata, bwakupalizira, bwakulamba kucita mbali ya mafesta ya madziko na kuikhidwa mulopa.

Kodi bzidakwanisika tani kuti ndikathandizire kutongedwa kwa nkhani ya ku Europa uko ndikhatumikira ku Likulu la pa Dziko Lentse la Mboni za Yahova ku Estados Unidos, Nova Iorque?

NDIDALEREDWA NA ABEREKI OMWE AKHALI WA NYONGO

Abereki wangu omwe akhacemeredwa George na Lucille adacita mapfunziro ya Jileyade turma 12. Ndipo pomwe inepano ndidabadwa mu gole la 1956, iwo akhatumikira ku Etiópia. Iwo adandipasa dzina lakuti Philip, pa kukumbukira mpalizi Filipi wa m’magole dzana yakuyambirira. (Mabasa 21:8) Pomwe lidapita gole libodzi, boma lidaletsa kunamata kwa Mboni za Yahova ku Etiópia. Napo kuti ndikhali mng’ono, ndikhakwanisa kuwona adzinza wangu akucita bzinthu bzauzimu mwakabise-bise. Pakuti ndikhali mwana, bzentse bzikhandidekera! Bzakupasa ntsisi mpsakuti mu 1960, boma lidatiuza kuti ticoke m’dzikolo.

Banja lathu lidayenda kukakhala ku Wichita, Kansas, ku Estados Unidos. Tsono abereki wangu adapitiriza kucita basa lakupalizira mwanyongo ninga momwe akhacitira pa nthawe yomwe akhatumikira ninga amisiyonario. Iwo adapfunzisa inepano, mana wangu akulu a Judy na mng’ono wangu Leslie omwe adabadwirambo ku Etiópia kufuna Yahova na kumutumikira na mtima wentse. Inepano ndidabatizidwa na magole 13. Pomwe padapita magole matatu, banja lathu lidayenda kukatumikira komwe kukhafunikira apalizi azinji, ku Arequipa, Peru.

Mu 1974 pomwe ndikhana magole 18, Beteli ya ku Peru idanditumiza pabodzi na abale anai kuti tikatumikire ninga apainiya wakupambulika. Tidatumizidwa ku Cordilheira dos Andes, mphimpha yomwe ikhanati kupaliziridwa kale. Ndipo kumweko tikhapalizirambo wanthu wa cirewedwe ca Quechua na Aymara. Ifepano tikhacita ulendo na karo yomwe tidaipasa dzina lakuti Cingalawa thangwe ikhali ninga kaxa ikulu. Nimbakomedwa kwene-kwene kukumbukira nthawe yomwe tikhaphatisa basa Bibliya kuti tilatize wanthu kuti Yahova an’dzamalisa kusauka, matenda na infa. (Apokalipse 21:3, 4) Wanthu azinji wa kumweko adakhala Mboni za Yahova.

KUTUMIKIRA KU LIKULU LATHU LA PA DZIKO LENTSE

Mu 1977 pomwe m’bale Albert Schroeder, wa m’Bungwe Lakutonga la Mboni za Yahova akhazungira dziko la Peru, adandilimbikisa kuti ndipreenceri petisau kuti ndikatumikire ku Beteli ya ku likulu lathu la pa dziko lentse. Ndipo ndibzo bzomwe inepano ndidacita. Pomwe padapita nthawe pang’ono, pa 17 Junho gole la 1977, ndidayamba kutumikira ku Beteli ya ku Brooklyn. Inepano ndidaphata basa mu depatimenti ya limpeza na yakukonza-konza bzinthu bzakudzongeka magole manai.

Mu Junho 1978, ndidadziwana na Elizabeth Avallone pa mtsonkhano wa m’madziko ku Nova Orleans, Louisiana. Iye adaleredwa na abereki omwe akhatumikirambo Yahova na mtima wentse ninga abereki wangu. Elizabeth akhadamala kale magole manai akutumikira ninga mpainiya wakukhazikika. Ndipo akhafuna kutumikira Yahova mu utumiki bwa nthawe zentse moyo wace wentse. Tidayamba kudziwana bwino-bwino ndipo na kupita kwa nthawe tidadzayamba kufunana. Ifepano tidalowolana pa 20 Outubro mu gole la 1979, ndipo tidayamba kutumikira pa Beteli pabodzi.

Abale na mpfumakazi wa m’gwere lathu lakuyamba la Espanhola Brooklyn akhali wa lufoyi kwene-kwene. Tidatumikirambo m’magwere manango matatu yomwe yakhalimbo yalufoyi kwene-kwene, yadatitambira bwino ndipo yakhatithandiza pa utumiki bwathu bwa pa Beteli. Timbatenda kwene-kwene thandizo lentse lomwe abale amwewa adatipasa kuphatanidzambo thandizo lomwe azixamwali na adzinza wathu adatipasa pakutithandiza kusamalira abereki wathu omwe akhali wakukalamba.

BASA LANGU MU DEPATIMENTI YAKUWONA NKHANI ZA MALAMULO

Ndidadabwa kwene-kwene pomwe mu Janeiro gole la 1982 ndidauzidwa kuti nditumikire mu Depatimenti Yakuwona Nkhani za Malamulo pa Beteli. Pomwe padapita magole matatu, abale adandiuza kuti ndiyende ku universidade kuti ndikacite kurso ya nyakukhotcerera mirandu ayai advogado. Ku universidadeko ndidapfunza kuti wanthu azinji wa ku Estados Unidos na wa m’madziko manango akhali wakutsudzuka kucita bzinthu bzizinji thangwe rakuti Mboni za Yahova zidaganyali nkhani zakusiyana-siyana m’nyumba za mphala. Nkhani zimwezi zikhapfunzidwa kwene-kwene ku xikolako.

Mu 1986 pomwe ndikhana magole 30, ndidaikhidwa kuti ndikhale nyakunyang’anira Depatimenti Yakuwona Nkhani za Malamulo. Umweyu udakhala mwayi ukulu kwene-kwene kwa inepano thangwe napo kuti ndikhali ng’ono bzidawonekeratu kuti abale wa ku Beteli akhandithemba kwene-kwene. Tsono ndikhana thupo kwene-kwene na udindo bomwe ndikhadatambira thangwe pakhana bzinthu bzizinji bzomwe ndikhabzidziwa lini ndipo ndikhadziwambo kuti bzingadakhala lini bzakupusa kucita basa limweri.

Inepano ndidakhala nyakukhotcerera mirandu ayai advogado mu gole la 1988. Tsono ngozi ikhali yakuti ndiribe kuzindikira momwe mapfunziroyo yadandicinjira na momwe yadacinjirambo uxamwali bwangu na Yahova. Mapfunziro ya padzulu yangacitise munthu kufuna kukhala wakubvekera na kukumbuka kuti ni wakufunika kwene-kwene kuposa wanthu winango thangwe rakuti iye ambadziwa bzinthu bzizinji. Elizabeth ndiye omwe adandipulumusa. Iye adandithandiza kuyamba pomwe kucita bzinthu bzomwe ndikhacita kale-kale pomwe ndikhanati kuyenda ku universidade kuti ndikwanise kulimbisa uxamwali bwangu na Yahova. Na kupita kwa nthawe, ndidadzabzibva kuti ndikhali pomwe pa uxamwali bwakulimba na Yahova. Pa bzomwe bzidandicitikira, ningalewe kuti kudziwa bzinthu bzizinji n’cinthu lini cakufunika kwene-kwene pa moyo. Comwe cimbacitisa kuti moyo ukhale na thandauzo ni kukhala pa uxamwali bwakulimba na Yahova, kulatiza kuti timbamufuna na kufunambo abale.

KUKHOTCERERA NA KUKHAZIKISA MWA LAMULO MAFALA YABWINO

Pambuyo pa kumaliza universidade, ndidayamba kuthandizira bzakufunikira mu Depatimenti Yakuwona bza Malamulo ku Beteli na kukhotcerera gulu la Yahova na ufulu bwathu bwa kupalizira mafala yabwino. Basa lomwe ndikhacita likhali lakudekeza tsono pa nthawe ibodzi-bodziyo likhalimbo lakunesa thangwe bzinthu bzikhacinja mwakamfulumize mu gulu la Yahova. Pakuyamba Mboni za Yahova zikhambauza wanthu kuti acite cakupereka akafuna mabukhu. Tsono kuyambira mu 1990, Depatimenti Yakuwona Nkhani za Malamulo idakumbiridwa kuti ilewe bzomwe bzingadacitidwa kuti asiye kucita bzimwebzi. Na kupita kwa nthawe, Mboni za Yahova zidasiya kuuza wanthu kuti acite cakupereka akawapasa mabukhu. Bzimwebzi bzidacitisa kuti basa la pa Beteli na mu upalizi likhale lakusaya kunesa, ndipo mpaka ntsiku zino bzikutikhotcererambo kuti maboma yaleke kumbatikumbira mtsonkho. Wanthu winango akhakumbuka kuti kucinja kumweku kungadacitisa kuti tileke kukhala na kobiri zakukwanira kuti tikonze mabukhu mazinji kuti yathandize wanthu omwe akufuna kudziwa bzinthu bzizinji. Ndipo akhakumbukambo kuti bzimwebzi bzingadacitisambo kuti wanthu aleke kupfunza bzizinji pakulewa bza Yahova. Tsono ndibzo lini bzomwe bzidacitika. Kuyambira mu gole la 1990, mbogo ya wanthu omwe akutumikira Yahova yathumizirika kwene-kwene. Ndipo ntsiku zino, wanthu azinji akukhala na cakudya cauzimu mwakusaya kupagali kobiri. Ndapfunza kuti kucinja kwa bzinthu mu gulu la Yahova kumbafamba bwino na thandizo la Yahova na malango yomwe timbatambira kucokera kwa kapolo wakukhulupirika na wanzeru. — Ekisodo 15:2; Mateu 24:45.

Ifepano timbaganyali lini mirandu mu nyumba za mphala thangwe ra kuti tina anyakukhotcerera mirandu ayai maadvogado yabwino. Kazinji-kazinji bzomwe bzimbacitisa kuti boma litithandize ni makhalidwe yabwino yomwe wanthu wa Yahova ambalatiza. Ndidakwanisa kuwona bzimwebzi mu 1998 pomwe abale atatu wa m’Bungwe Lakutonga pabodzi na azikazawo adayenda ku mtsonkhano wa cigawo wakupambulika ku Cuba. Iwo akhali wakudeka mtima na wa ulemu. Bzimwebzi bzidacitisa kuti akulu-akulu wa boma akwanise kuwona kuti timbapitira lini nkhani za ndale.

Tsono nkhani za malamulo zikasaya kutongedwa bwino, ifepano timbafunika “[kukhotcerera] na kukhazikisa mwa lamulo mafala yabwino ya Mulungu.” (Afilipi 1:7) Maboma ya ku Europa na Coreia do Sul yakhazindikira lini ufulu bwathu bwakulamba kucita basa la ucikunda. Thangwe ra bzimwebzi, abale wakukwana 18 000 wa ku Europa na 19 000 wa ku Coreia do Sul adaikhidwa m’kawoko thangwe ra kulamba kucita basa la ucikunda.

Tsono pa 7 Julho gole la 2011, Nyumba ya Mphala Yakuwona bza Ufulu bwa Wanthu ya ku Europa idakhazikisa lamulo lakusaya kuyebweka pa nkhani ya Bayatyan v. Armenia. Lamulolo likhalewa kuti madziko yentse ya ku Europa yakhafunika kubvumiza kuti wanthu omwe ambacita lini mabasa ya ucikunda thangwe rakuti mtima wawo umbawabvumiza lini aphate mabasa manango. Lamulo libodzi-bodziri lidakhazikisidwambo na Nyumba ya Mphala Ikulu ya ku Coreia do Sul pa 28 Junho gole la 2018. Bzimwebzi bzingadakwanisika lini bzingadakhala kuti abale wathu ambapitira nkhani za ndale.

Madepatimenti yakuwona bza malamulo ya ku likulu la pa dziko lentse kuphatanidzambo mthambi za pa dziko lentse la pantsi yakuphata basa na nyongo kuti yakhotcerere ufulu bwathu bwa kunamata Yahova na bwa kupalizira bza Umambo bwa Mulungu. Ni mwayi ukulu kuthandiza abale na mpfumakazi omwe akutsutsidwa na boma. Napo kuti nthawe zinango tingaganyali lini, ifepano timbakhala tapalizira atongi, maboma na wanthu wa mitundu yakusiyana-siyana. (Mateu 10:18) Atongi, anyakuimikira boma, anyakumwaza nkhani na wanthu wentse ambakwanisa kuwona mavesi yomwe yambaikhidwa m’madokumento na kubvambo mavesi yomwe timbayafotokoza m’nyumba za mphala. Wanthu azinji wa mitima yabwino ambakhala na mwayi wakudziwa kuti Mboni za Yahova ni yani na komwe kumbacokera bzomwe ambakhulupira. Winango wa iwo ambafika pakukhala abale wathu.

NDIKUTENDA YAHOVA!

Kwa magole 40, ndakhala na mwayi wakuphata basa na nkhani za malamulo mu mthambi zakusiyana-siyana za pa dziko lentse la pantsi, kuyendambo ku nyumba za mphala zizinji na kuceza na wanthu wakulemekezeka. Nimbafuna kwene-kwene abale omwe ambaphata basa pabodzi na inepano mu Depatimenti Yakuwonera bza Malamulo ku likulu lathu na wa m’madepatimenti yakuwona bza malamulo wa pa dziko lentse ndipo nimbawatenda thangwe ra nyongo yawo. Yahova wandipasa moyo wabwino ndipo wandipasambo bzisimbo bzizinji.

M’magole 45 yentseneya, Elizabeth wakhala mwanzangu wakukhulupirika na wa lufoyi pa nthawe zabwino na zakuipa. Nimbakomedwa naye kwene-kwene thangwe iye wacita bzimwebzi napo kuti ana matenda yomwe yambamucitisa kuti akhale alibe mphanvu.

Pa moyo wathu, tapfunza kuti mphanvu na kuganyali bzimbabwera lini thangwe la luso lathu. Ninga momwe Davide adalewera: “Yahova ni mphanvu kwa wanthu wace.” (Salimo 28:8) Kulewa cadidi, “Yahova ni mwenekaciro nkhondo.”